Read Biblia Mixe de Quetzaltepec Levitico 8 Bible Online

Levitico 8 - Biblia Mixe de Quetzaltepec bible

Levitico 8

¹Ënät yë Tios ojts tmëkäjpxy yë Moisés ets t'ënëmaay:

²Woownëjkx yë Aarón mëët y'u'unk y'ëna'k, mënëjkxëp näjyëtu'un ja wyit tyujkxy, näjyëtu'un ja on mëti'ipë mëët winë yajkënu'kxyën, näjyëtu'un ja tsajpkaa ayääkë mëti'ipë ja ja'ay nätyukunajxëpën ko tii poky tuny, näjyëtu'un mäjtsk ja kupixyny yä'äy ets tu'ukjaty ja tsajpkääky mëti'ipë ka'ap tsyooymyëëtëtyën,

³tëkokyë yë ja'ayëty xywyoowmujkta'ajëty, jam ma yajnitëkën ja wit tëjk ma näpyaatë y'ityën.

⁴Moisés ojts jëtu'un tuny, tä ënäty yë Wintsën të tyuk'ëne'emyën. Ojts ja ja'ay jam tyajtu'ukmujkta'ay ma yajnitëkën ja wit tëjk ma näpyaatë y'ityën.

⁵Ënät ja Moisés t'ënëmaay ja mayjyä'äy: Ya'atë jëtu'un yë Wintsën të tnikäjpxy ets yajpatunëty.

⁶Ënät yë Moisés ojts tyajwinkony yë Aarón ets y'u'unk y'ëna'k ets ojts tyajtsi'iy mëët yë nëë.

⁷Ënät ja Aarón ojts ja wyit yajtukxoxy tänë xuypyë ets yajpëjktäky ja wyëën, tääts yajtukxojxy ja nyijän, ënät nëkëjxy yajpëjktäky ja kejky yä'äp ets tya'tspëjky mëët ja nyiwëën.

⁸Ojts näjyëtu'un nëkëjxy yajtukniwitsy ja katsyjyän, ma ja kyätsyjyänën jam ojts yajpëjktä'äky ja tsaa'u'unk mëti'ipë mëët winë yajnijawën.

⁹Tääts ojts tpëjktä'äky ja kyupit ma kyëpajkën ets wyimpoktuuy ojts tpëjktä'äky ja tsya'a mëti'ipë aak pu'ts pujxn mëët y'oytyunyëtyën, mëti'ipë kënu'kxëpën ko tyeety'äty, jëtu'un ojts tuny tä ënäty ja Tios të tyuk'ëne'emyën.

¹⁰Tä ojts ja Moisés tpëjkë'ëky ja on, mëti'ipë yajtukkënu'kxpën winë ets ojts txijkxjëtity ma ja tsajptëjkën jap tëkotsyow ets ma tëkokyë jënu'un ënäty jap winë yajpaatyën. Jëtu'un'äämpy ojts tkënu'kxta'ay winë.

¹¹Yë'ë ojts mëët ja kënu'kxy on tukënu'kxy ja tsajptëjk wëxtujk'ok. Ojts jam txijkxjëtity ma ja wintsë'këntyaknën ets ma ja apëjk atu'unën ets näjyëtu'un ma ja pujxn kë'ëpujtakn mëët ja nyitënaaypyäjn, jëtu'un'äämpy ojts tkënu'kxy.

¹²Tä ja Moisés tukuja'axnë ja kënu'kxy on ja Aarón ets ojts tukmëkënu'kxë ja teety'ajtk.

¹³Ojts näjyëtu'un tmëjwoy ja Aarón ja y'u'unk y'ëna'k ets ojts wyinkontë. Tä tukxojxtaay ja tänë xuypyë ja wit ets ojts ja wyëën tpëjktakë ets ja kyupit, jëtu'un tä ënäty ja Tios të tni'ënä'ämën.

¹⁴Tä ojts ja Moisés tni'ënä'ämë ets ja tsajpkaa tyajmintëty mëti'ipë wintsë'kën'atëpën mëëtkyëjxm ja nëë poky. Tä ja Aarón ets ja y'u'unk y'ëna'k jam ja kyë'ë tkëxkoontë ma ja tsajpkaa ja kyëpajkën.

¹⁵Ënät ja Moisés ojts ja tsajpkaa tyaj'ooky ets ojts ja nyine'pny tpëjkëyë, ja ne'pny jam ojts txijkxëtity ma ja wintsë'këntyakn ja nyiwajën ets wa'ats wyë'ëmëty. Jä'ä ja ne'pny mëti'ipë ojts nyatëkën, jam ojts txijkxëtity ma ja wintsë'këntyakn ja nyitekyën ets kënu'kxy wyë'ëmëty ets jam ja pokymyä'kxën yajpaatëty.

¹⁶Ok ojts ja Moisés tnëtsujkta'ay ja on, mëti'ipë ja jyot nyijuux'ajtypyën ets mëti'ipë jamën ma ja myäätsën ets ma ja myëjtiintyën mäjtskpëky ets ojts tnino'oky jam ma ja wintsë'këntyaknën.

¹⁷Tëkokyë ja nyini'kx ja tsajpkaa tä yë nyipo'ojën nyitsu'utsyën, tyi'inyën, jam ojts ja Moisés tnino'kta'ay kajpnpë'am, jëtu'un tä ënäty ja Tios të tni'ënä'ämën.

¹⁸Moisés ojts näjyëtu'un tni'ënä'ämë ets twijtsmintëty ja kupixyny yä'äy yä'kpetypë mëti'ipë yajnino'kpën, tä ja Aarón ets ja y'u'unk y'ëna'k jam ja kyë'ë tkëxkoontë ma ja kupixynykyëpajkën.

¹⁹Tä ja Moisés ojts tyo'kkumy ets ja ne'pny jam txijkxjëtijty ma ja wintsë'këntyakn ja pya'ajën ets nëkëjxytsyow.

²⁰Ojts ja tsu'utsy tsujktä'äky ets ojts tnino'oky, ja kyëpajk ets ja y'on.

²¹E ja jyot ets ja pyuuy yajxon ojts wa'ats tpujë mëët yë nëë ets jam tnino'ktaay ma ja wintsë'këntyaknën. Jëtu'un ja Tios tukwintsë'këy ja jok oypyë xyuuky jyokyën, tä ënäty ja Tios të tni'ënä'ämën.

²²Tä ja Moisés ojts tni'ënä'ämë ets wiinkpë ja kupixyny yä'äy tyajmintëty, mëti'ipë yajyakëpën ets ja näkyënu'kxë tpaatëty ja Aarón ets ja y'u'unk y'ëna'k ets jam ja kyë'ë tkëxkoontë ma ja kupixyny yä'äy ja kyëpajkën.

²³Ënät ja Moisés ojts ja kupixyny yä'äy tyaj'ooky ets ojts ja nye'pyny tpëjkë, yë'ë ja Aarón ojts tuktatskuutsy ma ja y'a'oytyatskën, ma ja kyë'ëkaajën ja a'oypyë ets ma ja tyekykyaajën ja a'oypyë näjyëtu'un.

²⁴Ënät ojts tmëjwoy ja Aarón ja y'u'unk y'ëna'k ets tuktatsku'tsy ja ne'pyny ma ja a'oy'äämpyën, ma ja kyë'ëkaajëtyën ja a'oy'äämpyë ets ma ja tyekykyaajëtyën näjyëtu'un a'oy'äämpyë. E ja ne'pny mëti'ipë ojts nyatëkën, jam ojts txijkxjëtity ma ja wintsë'këntyakn ja pya'ajën.

²⁵Ënät ja Moisés ojts tpëjkta'ay ja on mëti'ipë jamën ma ja pyi'ixyën, ma ja myoxën, ma ja myäätsën, ma ja myëjtiintyën ets mëti'ipë jamën ma ja myoxpa'ajën.

²⁶Ojts tpëjkë'ëky tu'kkatsy u'unk ja tsajpkääky, mëti'ipë ka'ap tsyooymyëëtëtyën, mëti'ipë jam ijtpën Tios wintum ets tu'uk ja tsajpkääky tkoonë'ky mëti'ipë ka'ap tsyooymyëëtyën. Tääts tu'uk ja tsajpkääky mëti'ipë mëët xyëpinyëtyën yë on ets tu'uk yë tsajpkääky tsyë'ëts pejypyë ets mutskjatyëty ets t'apëjkmujky mëët ja on ets ja kupixyny yä'äy ja myoxpa'a a'oytsyowpë.

²⁷Ets tukë'ëpëjkëy ja Aarón mëët ja y'u'unk y'ëna'k ets jä'ä tkë'ëyaktëty jam Tios wintum.

²⁸Ënät ja Moisés ojts jatëkok t'ëxajë tëkokyë ya'atë ets ojts tnino'oky jam ma ja wintsë'këntyaknën, winkon ma ënäty jam ja jëyujk yajnino'okanyën ets yë'ë yajmo'oy yë Tios, tä tu'uk yë ayajk ako'onën mëti'ipë oy xu'kp jojkpën ma ja näkyënu'kxë y'ityën mëti'ipë yajtukwino'kp yajtukwinxaanpën.

²⁹Tä ja Moisés tpëjkë'ky ja tsajppax katy ets ojts ja Tios tmo'oy tä ënäty tyuny'ätyën. Ja tsajppax ja kyäty mëti'ipë të yajkënu'kxyën, yë'ë ojts tjä'ä'aty ja Moisés, jëtu'un ijxtëm ënäty ja Tios të tnikäjpxyën.

³⁰Ënät ja Moisés ojts tpëjkë'ëky ja on wäänë, mëti'ipë mëët winë yajkënu'kxyën ets näjyëtu'un ja ne'pny mëti'ipë ënäty jamën ma ja wintsë'këntyaknën, tä ojts tuknixijkxy ja Aarón ets ja y'u'unk y'ëna'k, näjyëtu'un ma ja wyitëtyën, mëti'ipë myëteety'ajtëpën, jëtu'un ojts ja Aarón yajkënu'kxtë mëët ja y'u'unk y'ëna'k ets ja wyit tyujkxyëty.

³¹Ets ja Moisés t'ënëmaay ja Aarón ets ja y'u'unk y'ëna'k: yajkë'ëwtë yë tsu'utsy jam ma yajnitëkën yë wit tëjk ma näpyaatë y'ityën. Jam xytyukkaytyëty mëët ja tsajpkääky mëti'ipë jap yajpatpën ma katsy u'unkën, mëti'ipë yë Tios të yajmo'oyën jëtu'un ijxtëm yë'ë tni'ënä'ämën: Yë Aarón ets y'u'unk y'ëna'k yë'ë nëjkx tsu'utstë yë tsu'utsy.

³²E ja tsu'utsy mëti'ipë natëjkëpën ets ja tsajpkääky mtimnyino'kta'atëp.

³³Nitu'kxëëwën jam mkatsoontëty ma ja wit tëjkën ma ja näpyaatë y'ityën mëët ja Tios, wëxtujk xëëw jam m'itëty, jä'ä ko jëtu'un pyo'oxy ets ja kënu'kxën xypyaatëty.

³⁴Yë Tios jëtu'un të tni'ënä'ämë yajtunëty, tä tyam të xy'ixtën yajtunyën, ko pën ja nëë poky tunëty.

³⁵E paaty miitsëty, wëxtujk xëëw wëxtujk koots jam mwë'ëmtëty ma yajnitëkën ja wit tëjk ma näpyaatë y'ityën ets xytyuntëty jëtu'un tä ja Wintsën ja y'ënä'ämën tyiy'ajtënën, e pën ka'ap jëtu'un xytyuntë m'ooktëp miitsëty, jä'ä ko jëtu'un yë Wintsën të xytyuk'ëne'emyës.

³⁶Yë Aarón ets y'u'unk y'ëna'k jëtu'un ojts tuntë, tä ënäty ja Tios të tyäkyën ja ënä'ämën mëët ja Moisés.