Read Biblia Mixe de Quetzaltepec Jeremias 12 Bible Online

Jeremias 12 - Biblia Mixe de Quetzaltepec bible

Jeremias 12

¹Wintsën, ko n'ëktëjkëmëty mëtyakpë, mijts aak mëtëy winë xynyimëtyä'äky, je'eyëp ko oy jyajëtu'unëty ëjts nmëët'ajtypyës tu'uk mäjtsk yajtë'ëwën. ¿Wi'ix jëtää ko jotkujk jyuuky'ajtëpë ja'ay mëti'ipë ëxëëk ja'ay'ajtëpën, wi'ix jëtää ko ka'ap tii tmaytyë tajtë yë ja'ayëty mëti'ipë myëku'uk nyikäjpxytyu'unëpën?

²Jëtu'un mijts të xyajjuuky'äty tä jeexyë ujts xypyenyën, jëtu'un mëk y'itë tä ujtsën mëti'ipë tiktskäkpën ets ënät winë tuntë tä jeexyë tyëëmpätën. Ko mkajpxpaatyë nëkoopë je'eyë tyajmëtoyë, jä'ä ko wiinkë'ëy akë'ëy je'eyë mnikäjpxyë.

³E mijts Wintsën wa'atsës xy'ixy'äty; mnija'ap wi'ixës nmay ntajyën ma mijtsën. Mënëjkxta'a tääpë ja'ayëty jëtu'un tä yë ja'ay tmënëjkxyën yë kupixyny ma y'o'ktaknën; tuknikä'tsta'a jëna'a tyuka'ajëtë o'kën.

⁴¿Jëna'a jyëjpkëxa'any ja xëëw jëmëjt ma ja naaxwiinyëtë ka'ap anë'ëk tëëtsë'ëk y'ëk'ijnëty ets ma ja aay ujts ka'ap y'ëktëtsnëty? O'kta'ajanëp yë aayjëyujk ujts jëyujknë ets joon jëyujk mëti'ipë kääkëtijtëpën, mëët ko ja naaxwiinyëtë ja'ay ëxëëk y'ëtë'ëtstë y'ëna'antë ets y'ëna'antë ko mijts ka'ap xy'ixy yë tyuuntëko'oy kyajpxtëko'oyënëty.

⁵Pën mijts m'ënu'kxëp ko mpëyë'kijpxy mëët yë ja'ay, ¿wi'ix mpëyë'kijpxa'any mëët ja kwaay? Joytyuuy jotkujk mpëyi'iky, e jam ma Jordán yukjotmën ¿wi'ix mpëyë'ëka'any?

⁶Yë'ëpaat yë mmëkä'äx, yë mmëku'uktëjk tëë mnawa'ktu'utyë, je'eyë mtukyä'äxy mtukjokyë ets mpetyë mkëtä'äkyë. Këtii yë'ë xytyuk'ijxpätëty oy mjamëxon mjamë'itëtëty mëët oy aaw oy ayuk.

⁷Tëës ja nnaax nkajpn n'ëxmajtsnë, tëëjës n'ëxwanë mëti'ipës ijty njä'ä'ajtypyën. Tëës nkë'ëyajknë ma myëtsipën ja naax kajpn mëti'ipës ijty ntsojkpy nja'apën.

⁸Ya'atë kajpn mëti'ipës ijty njä'ä'ajtypyën, jëtu'un të y'awinpity ma ëjtsën tä tu'uk yë kaajën yukjotypë tsyëënën, je'eyë nyiitsy, paatyës n'ëxëëk'ixy.

⁹Jëtu'unës yë nnaax nkajpn tä tu'uk yë joonën mëti'ipë janty'oy yë jyëmkën, mëti'ipë tukmëtsip'ajtëpën ja myëku'uk ko y'oyëty ja jyëmk. Miinta'atë nitëkokyë aayjëyujk ujts jëyujkëty mëti'ipë ëwa'anëtyën ets mtu'ukmuktëty ets mjë'kxtëty mpëktëty.

¹⁰Yë may wintsëntëjk mëti'ipë mëtsip'ajtëpën tëë tyajkutëkoytyë yë ntsatymkyamës, tëë tä'änjëtijta'atë ja nkamës. Aanë'ëk tëëtsë'ëk të tyaj'awinpitë ja naaxwiinyëtë mëti'ipës ijty mëk ntsojkpyën.

¹¹Aanë'ëk tëëtsë'ëk ets mon tuk të tyajwë'ëmtë, n'ijxypyës wi'ix jyi'iy yä'äxyën. Aanë'ëk tëëtsë'ëk tu'kë'ëyë ja naax kajpn yajpaaty ets ni pën tkamëmay tkamëtajy.

¹²Ma ja tun kopkën mëti'ipë yajpatëpën jam të'ëts'itjotmën tëë jam myintë ja ja'ayëty mëti'ipë ëxëëk të y'ëtë'ëtstë y'ëna'antën, jä'ä ko ëjts Wintsën, nmëëtës yë ntëypyujxn mëti'ipë yë naax kajpn yajkutëkoyäämpyën wä'än timmyaajëty ets ka'ap ja jotkujk'ajtën y'ita'any.

¹³Ojts tjani'iptë yë tsajpmok, äpny ojts tpëjkmuktë, nëkoopë ja tuunk nyatëkë'ajty. Ka'ap ojts ja pëjktä'äky wyintëy mëët koos ntukjoot'anpëjky.

¹⁴Jëtu'un yë Wintsën të tnikäjpxy jyata'any yë naax kajpn mëti'ipë ëxëëk ëtëtsp ënaanpën, mëti'ipë myëwinkon'ajtëpën yë Israel kajpn, mëti'ipë të tyajma'ta'atën ja naax kam mëti'ipë yë Wintsën myooyën yë Israel kajpn: Ëjts njëpëkäämpyës tääpë naax kajpn naaxwiinypë ets nyajpëtsëma'anyës yë Judá ma yë'ëjëtyën.

¹⁵E ko ënäty të nyajpëtsëmyës ma nyaax kyajpnëtyën tä ja'ay ujts tnujkë'ëkyën naaxkëjxy, ënätës jatëkok mpa'ëyowa'antë etsës nyajwinpita'antë ma nyaax kyajpnëtyën.

¹⁶Mëtëy ja ijty ko yë'ë ojts tukni''ixëtë ja nnaax nkajpnës wi'ix tii tnikajpxtëtyën mëët xyëëwkyëjxm yë Baal, e tyam jyëkyejpy tsyënaaytyaknpëktëty nkajpnjotyës, pën kyupëjktëp ja mëpëjkën ijxtëmës nkajpn myëpëkyën ets pën ënantëp ko tii tnikajpxtëty: Mëët yë'ëkyëjxm yë Wintsën yë jyuukyajtën.

¹⁷E ja naax kajpn mëti'ipës ka'ap xymyëmëtoyën, jëtu'unës nnujkë'ëka'any naaxkëjxy tä ja'ay ujts tnujkë'ëkyën etsës nyajkutëkoyä'äny. Ëjts Wintsën, ëjts ënaanp.