Read Biblia Mixe de Quetzaltepec Jeremias 17 Bible Online

Jeremias 17 - Biblia Mixe de Quetzaltepec bible

Jeremias 17

¹Mijts Judá, yë m'ëxëëktu'un m'ëxëëk kajpxën këxpajy jap y'ity mëët yë juunpujxn, mëët yë juuntsaa ma ja mjot mwinma'anyën mëti'ipë juunën tä tsaajën ets ma ja mwintsë'këntyakn nyiwajën.

²Yë m'u'unk m'ëna'k jyaak ja'amyäjtstëp ja wintsë'këntyakn ets kepy apujxtuky mëti'ipë ijty kënu'kxy myajnajxypyën mëti'ipë jam myaj'ijtypyën ma kepypya'tkën ets jam kopkkëjxm,

³ets jam muum aayjyotm ujtsjotm. Mëët ja nëë poky mëti'ipë të xytyunyën, mijts mniminanëp yë mä'tspë ets tyajnëjkxta'aja'any ja mwit mmeeny ets mëti'ipë pëjkë'ëky myaj'ijtypyën, wa'ats tyajnëjkxta'aja'any, ja mpëjktä'äky mëti'ipë jam muum myaj'ijtypyën tunkëjxm kopkëjxm ets ma tëkokyë ja m'itjot mnaaxjotmën.

⁴Kwanë ko xy'ëxmatsëty ja itjot naaxjot mëti'ipë njatukkumaayën ets mmëtun m'ëyowëty ma ja mmëtsipën wiink naax wiink kajpn ma ka'ap xy'ixy'ätyën, jä'ä ko mëkës të xyajjoot'anpëky, jëtu'unës ja ntsip n'äkë xyajtooypyiky jëënën mëti'ipë nyo'ktëkoopyën winë.

⁵Jëtu'un yë Wintsën y'ënä'äny: Poky yë ja'ay y'ity mëti'ipë yë jyot wyinma'any yajjëëwä'kpyën maas ëjtsën, mëti'ipë yë naaxwiinyëtë ja'ay tyuk'ijxpejtypyën ets yë'ë tyukjotkujk'ajtyp.

⁶Jëtu'un jyata'any jëtu'unpë ja'ay tä yë kepyën mëti'ipë yoonpën të'ëts itjoty, ka'apë ni pën tkëwent'atyën, mëti'ipë tsaajoty yoonë'kpën ma ta'amts naaxën ets ma ka'ap nitii jyuuky'ätyën.

⁷E kënu'kxy nyaxa'any yë ja'ay mëti'ipës xytyuk'ijxpäjtpën, mëti'ipë ëwxijtp mä'kxtujkpën ma ëjtsën.

⁸Jëtu'un nyaxa'any tä tu'uk yë kepyën nëpë'aaypyë tyänën mëti'ipë tyikts nëëjoty kuyo'onëpën; oy jënu'un y'anëty ka'ap tsyë'ëtsa'any, jä'ä ko yë y'ääy xye'enty xëmë tsuxk y'ity. Ko xyëkopk'aty, nitii tkamëmay tkamëtajy ets xëmë tyëëmpety.

⁹Nitii jëtu'un kyawin'ëëny ets nitii jëtu'un kyayajtsojkën'aty tä yë jot winma'anyën. ¿Pën y'ëkja'akyukëp wi'ix ko jyëtu'unëty?

¹⁰Ëjts, mëti'ipë Wintsën'ajtpën, mëti'ipë nyija'awëtyääpyën yë jot winma'any, mëti'ipë wa'ats y'ixy'äjtypyën wi'ix ja'ay tu'ukjaty myäy tyäjyën, mëti'ipë myooytyääpyën nitu'ukjaty yë ja'ay kyuma'ayën ijxtëm të tyuny të kyäjpxyën.

¹¹Mëti'ipë ja'ay nätyukyajkumeentyakëpën ja wit meeny ka'apë të tnituntën, jëtu'un yë nyäxy tä tu'uk yë pakëtseyën mëti'ipë wiink jëyujk yë tyaa nyimaajëpën. Ma ënäty yajxon të myëjaawtëkën, jää nëjkx tyëkooytyä'äy ja kyumeenyajtën, tääts nëjkx je'eyë jyaak jëtity ja'akyupojën.

¹²Yë ntsajptëjk'ajtëmë jëtu'un yë nyäxy tä tu'uk yë yajkutujktaknën oypyë tsujpë, mëti'ipë këjxm xëmë yajpatpën.

¹³Wintsën, mijts yë Israel ja'ayëty m'a'ijx mjëjp'ijxëp. Mëti'ipë m'ëxmajtsëpën, tsëtyu'unmëët wyë'ëma'any. Mëti'ipë mmëjëkämkäkëpën, jëtu'un nëjkx jyäty tä ja'ayxyëëw naaxwayjoty yajkëxja'ayën, poj'am pyojtëkoy, mëët ko ënäty mijts të myaj'ëxmatsy ma jëtu'un m'ityën tä nëëkopkën.

¹⁴Wintsën, yajtsooypyäjtkës etsës ntso'okëty; yaj'ëwaatsëpëtsëëmkës etsës njotkujkëty, jä'ä ko mijts tu'uk nyajmëjnajxyp.

¹⁵Jëtu'unës ja'ay xy'ënëëmë: ¿Wi'ix ja Wintsën të m'ënë'ëmxëty? Wä'än jëtu'un tunyë tjatyë.

¹⁶E ëjts, ka'apës nëkoo mijts nyajjotkëxy ets ëyo'on jotmay tpaatëty ets nkatsojkpyës ëxëëk jyatëty kyëpätëty. Mijts wa'ats xynyijawë wi'ixës të n'ëna'anyën jä'ä ko mijts mwintuuy nkajpxpëtsëëmyës.

¹⁷Këtii atsë'ëkë ajawë tii xytyunëty ma ëjtsën, jä'ä ko mijts ntsoktakn'ajtyp koos ëxëëk njaty nkëpety.

¹⁸Yë'ë wë'ëmtëp nëxi'iky tukxi'iky mëti'ipës xy'ixjëtijt xypyajëtijtëpën, ka'ap y'ëjtsëty; wä'än tsë'ëkëtë tjawëtë, e ëjts ka'apës mëpaat jëtu'un njaty. Mijts myajkutukëp ets o'ktëy jyatëty kyëpätëty, tuktëjëtya'a tukwäjxëtya'a.

¹⁹Jëtu'unës yë Wintsën xy'ënëmaay: Nëjkx ets jam mwa'ak'oyëty ma kajpn yajnitëkën, ma tyëkëtën pyëtsëmtën yë yajkutujkpëtëjk mëti'ipë jam Judá ënä'ämtëpën, jëtu'un xy'aye'eytya'ajëty yë tëjk'aaw maajaty yajpaatyën, ma kajpn yajnitëkën jam Jerusalén.

²⁰Jëtu'un yë ja'ay xy'ënëëmëty: Miitsëty Judá ja'ayëty yajkutujkpëtëjk, ënä'ämpëtëjk ets miitsëty Jerusalén ja'ayëty mëti'ipë yaa najxtëp tëjkëtëpën, mëtoow'itë ja Wintsën ja y'aaw y'ayuk.

²¹Jëtu'un yë Wintsën y'ënä'äny: Ko po'kxënxëëw, këtii jää tii xypyatsëmtëty ets këtii nëkoo tsëmy kë'ëy xyajnaxtëty ma tëjkëtyaknën ma Jerusalén kajpn yajnitëkën, mijts myaj'antijtëp ets jotkujk mjuuky'atëty.

²²Këtii nëkoo tsëmy kë'ëy xymyëtsoontëty ma mjëën mtëjkëtyën ko po'kxënxëëw ets ka'ap tiituunk jää xytyuntëty. Ma tääpë xëëwën ëjts jää xymyëj jawëtëp jëtu'un tääjës ojts n'ënëëmëtën yë m'ap m'okëty.

²³E yë'ëjëty ka'ap ojts tmëjpëjkta'aktë n'aaw n'ayukës ets ka'apës xymyëmëtoowtë, je'eyë ojts kyujuunta'aktë, ka'ap jëtu'un tunantë ets nän ka'ap tkupëjktë ets yajtuk'ënëëmëtëty ja nyëë pyokyëty.

²⁴Ëjts Wintsën, jëtu'unës n'ëna'any: Ja'aykyukëtë, mëmëtoowtëkës, këtii tsëmy kë'ëy xymyënaxtëty po'kxënxëëw ma Jerusalén kajpn yajnitëkën; tääpë xëëw kënu'kxy mëpaat nyäxy ets nitiituunk jää kyayajtunëty.

²⁵Ko jëtu'un xytyuntëty, itaanp xëmë yë ja'ay mëti'ipë nëjkx yajkutujkpë'atyën ets y'ënä'ämëty ma David kyutujktaknën, nëjkxëp jam tyëkë pyëtsëmtë mëj'äämpy naaxjoty kajpnjoty kepy wintëkäämpëkëjxy ets kwaaykyijxy, mëët ja kopktëjkëty, wintsëntëjkëty mëti'ipë jam Jerusalén ets jam Judá kukajpnajtëpën ets jam Jurusalén xëmë nëjkx ja'ay jam yajpaaty.

²⁶Minantëp yë ja'ayëty mëti'ipë tso'ontëpën ma Judá y'itjotmën, ma Jerusalén kajpnën, mëti'ipë yajpatëpën ma Benjamín y'itjotmën ets ma ja kopkjotmën mëti'ipë Négueb nyitënääpyën; myëminantëp yë tsyajppaxëty kyupixynyëty ma tsajptëjkën ets tukwintsë'ëkëja'antë ja Wintsën nino'oky nixämy, myëminantëp yë pyoomëty ets y'ääypyajk y'ujts pajkëty ets Wintsën tukmëyoxa'antë ma tyajnaxtën ja kukajpxën.

²⁷E pën miitsëty ka'ap mja'akyukëtë ets ka'ap xypyatuntë ja n'ënä'ämënës ets po'kxënxëëw ka'ap xypyo'kxtë. Pën mënajxtëp ja tsëmy kë'ëy, ja juy tooky jam ma ja tëjkëtyaknën, ma ja naax kajpn yajnitëkën, ëjts njëënmo'ojäämpyës tääpë naax kajpn, nyajnitooyäämpyës yë Jerusalén yë tyëjk aaw ets ko ënäty jëtu'un ntunyës, ni pën nëjkx kyamayë tyajpi'itsëty ja jëën.