Read Biblia Mixe de Quetzaltepec Jeremias 18 Bible Online

Jeremias 18 - Biblia Mixe de Quetzaltepec bible

Jeremias 18

¹Ënät ja Wintsën ojts xymyëkäjpxyës etsës xy'ënëmaay:

²Nijëjpta'ak yë tu'ts pojtspë ets jam ntuk'ëwaanëty ja aaw ayuk

³Ëjts Jeremías, ojtsës nnijëjptä'äky ja tu'ts pojtspë. Tuunp ënäty jam, tëë je'eyë ja myo'onts tkëxpëky ma kyepyën mëti'ipë ëwtijtpën.

⁴Ënätës n'ijxy ko kanaak ok ja myo'onts tjantykyëxpëky ko oy kyapëtsëmy ja tyu'ts, tääts tjëpëky ja mo'onts ets ja wiinkpë tkëxpëky koonëm pyëtsimy oy tä tsokyën.

⁵Ënät ja Wintsën xy'ënëmaayës:

⁶¿E ëjts këtiis jëtää jëtu'un xymyäyëty ntuntëty miitsëty ijxtëm tääpë tu'ts pojtstpënë? Miitsëty jëtu'un nmëët'atë tä tu'uk yë tu'ts pojtspë myo'onts tkë'ëpëk'atyën. Ëjts Wintsën, ëjts ënaanp.

⁷Koos ntuknipëjktaakëty nwijxë'ëkëpës yë ujts, njitëpës yë potsy ets nyajkutëkoyëpës yë kajpn.

⁸Ko tu'uk yë kajpn t'ëxmatsëty ja ëxëëktu'un ëxëëk kajpxën, ëjts ka'apës ntuknikäxëty ja ëyo'on jotmay mëti'ipës të njatuknipëjktaakën.

⁹Yë'ëjës nmayäämpy ntajäämpy wi'ix tääpë kajpn n'akojëtyës ets nyajyääky nyajpätëtyës.

¹⁰Ko tääpë naax kajpn ka'ap kyäjpxyjyä'äkyukëty, je'eyë tnakumëtoownaxy ijxtëmës n'ënëëmën, ëjts njëpëkäämpyës ja oyajtën mëti'ipës yë'ëjëty të njatuknipëjktaakëtën.

¹¹Paaty ntuknipëky ets xy'ënëëmëty yë Judá ja'ayëty ets Jerusalén ja'ayëty ko mëti'ipë Wintsën'ajtpën, jëtu'unës n'ënëëmëtë: Tyam miitsëty nimay nitajëtë wi'ix nyaj'ëyo'onpaata'antën, yë'ëjës nmääpy ntäjpy wi'ix ntëytyuntëty. Nik yaj'oyëtë mjot mwinma'anyëty, ëxmatstë ëxëëk tu'u ets oy winë tuntë.

¹²Yë'ëjëty jëtu'un m'ëtsowa'anëtë: Këtii nëkoo mxëëw mpo'o xyajtëkoy, ëëtsëty oyës jëtu'un njuuky'atë, yë'ëjës ntsojkën'ajtëp ëxëëk juukyajtën, oyës näjyawëtë koos jëtu'un winë ntuntë tääjës kë'ëm nmaytyën ntajtën.

¹³Paaty yë Wintsën y'ënä'äny: Yajtëwtë wiinkëtypë naax kajpn pën tëë jëtu'unpë aaw ayuk mëkpë tmëtowtë. Yë Israel ja'ayëty mëj këjää të tyuuntëkoytyë.

¹⁴¿Wä'än jëtää yë tip nëjkx jëna'a ka'ap y'ëka'anë ma Líbano y'itjotmën, jam tsaakopk jotmë? ¿Wä'än jëtää yë nëë nëjkx jëna'a tyëtsnë mëti'ipë jam tso'onpën?

¹⁵Yë nnaax nkajpnës tëëjës xyjyä'äytyëkooynyë, wiink tios tyukwintsë'kënëp yë poom jok. Tëë t'ëxmajtsnë ja ap tu'u ets jä'ä pyanëjkxnëp mëti'ipë ka'ap t'ixy'ätyën,

¹⁶ets anë'ëk tëëtsë'ëk ja nyaax kyajpn të tyaj'awinpity, je'eyë yajnimony yajnituky. Ko ja'ay jam nyaxtë, je'eyë kyëpajk tjëpiptë jä'ä ko ka'ap tja'akyukëtë tii ko o'ktëy ja naax kajpn jyajnë.

¹⁷Jëtu'un tä yë jëënpoj tyajpojwä'kxyën winë mëti'ipë tso'onpën xëëwpëtsëmtsyow, jëtu'unës yë Israel ja'ay nwojpwa'kxa'antë ets tkukä'äktëty yë myëtsip. Ko yajtëytyunëty, ka'apës mpa'ëyowa'any ets ka'apës mputëkëja'any.

¹⁸Ënät ja ja'ayëty ojts aakyë'ë nyäy'ëna'anëtë: Tsojk winma'any n'ixta'ayëmë wi'ix yë Jeremías nyaj'o'kmëty. Ma ëëtsajtëmën, ka'ap yë teetyëjk tyëkoy'äty mëti'ipë xytyukni''ijxëmëp winë, yë ixpëkyjyä'äytyëjk näjyëtu'un ka'ap tyëkoy'äty mëti'ipë xykyajpxtë'ëwmëpën ets ka'ap yë käjpxynyajxpëtëjkëty tyëkoy'äty mëti'ipë xytyuknija'awëmëp ja Wintsën ja y'aaw y'ayuk. Tsojk pyoky n'ixta'ayëmë ets wä'än t'ooky. Ka'ap nmëpëjkmëty yë y'aaw y'ayuk mëti'ipë të tjakäjpxyën.

¹⁹Wintsën, mëtoow'it wi'ixës n'ëna'anyën. Mëtoow'it wi'ixës yë nmëtsiptëjk y'ëna'antën.

²⁰¿Ti yë'ë jëtää yë ëxëëkpë mëët yajmëwinpity mëti'ipë oyënë? Yë'ëjëty tëë tajtë jut maas xyajnaaxtëkëja'antën.

²¹E mijts myajkutukëp ets ja y'u'unk y'ëna'k yuu'ooktëty ëkë kupuxy y'ooktëty. Wä'än yë pa'am ëyo'on yë'ë yaj'ookëtë ets ja y'ëna'ktëjkëty wä'än jam tsipjotm t'ooktë.

²²Mijts ajotkumonë mtuknikäxëp may mä'tspë; yajmëtowëp ko nyëya'ax yujkya'axtëty mëët ja mëktsë'ëkë. Jä'ä ko tëë tajtë o'kpë jut maas xyajnaaxtëkëja'antën, tëë tpëjkta'aktë o'ktakn yu'utsypë maas jeexyë nkuka'anaxyën.

²³E mijts Wintsën, wa'ats xynyija'awëtyä'äy wi'ix myäytyën tyajtën ets xyaj'ooka'antës. Këtii xymyä'kxëty yë tyëko'oyënëty ets këtii yë nyëë pyokyëty xyjyä'äytyëkoyëty. Wä'än tka'atë mijts mwintuuy ets mëët ja mtsip m'äkë tëytyun.