Read Biblia Mixe de Quetzaltepec Jeremias 21 Bible Online

Jeremias 21 - Biblia Mixe de Quetzaltepec bible

Jeremias 21

¹Ënät yë Sedequías yajkutujkpë tkejxy yë Pashur, yë Malquías yë myaank, mëët yë teety Sofonías, yë Maaseías yë myaank ets nëjkx t'ixtë yë Jeremías ets t'ënëëmëtëty:

²Tun yë mëyajtën, yajtëw wäänë yë Wintsën mëët ëëtsëty, yë Nabucodonosor mëti'ipë jam Babilonyë yajkutujkpën, yë'ëjës ëxëëk xytyuuntëp ets tëëjës yë nnaax nkajpn tyajnatuky. Wä'änxyëp yë Wintsën yë myëj'ajtën tyaj'ixëtëty ets jeexyë yë Nabucodonosor tyajwinpity ets jatëkok tnajtskäxëty ma nyaax kyajpnën. Ënät ja Wintsën ojts tmëkäjpxy yë Jeremías,

³ets Jeremías t'ëtsooy ja Sedequías ja jyä'äy mëti'ipë ënäty të tkexyën: Ënëëmëtë yë Sedequías

⁴ko jëtu'un yë Wintsën y'ënä'äny, mëti'ipë yë Israel ja'ayëty Tyios'ajtëpën: Ëjts nyajwinpijta'ajäämpyës yë tsiptuunpëtëjk mëti'ipë miitsëty mja'ay'ajtëpën, mëti'ipë jam kajpnpë'am tsiptuuntëpën mëët yë Babilonyë yajkutujkpë jyä'äy etsës nyajmiinta'aja'any yaa kajpn itkujky, yaa tyu'ukmujkta'atëty.

⁵Ëjts kë'ëm tsiptunaanp ets miitsëty nipëtë'ëka'antë mëët yë mëk'ajtën, tsip äkë ets joot'an.

⁶Nyaj'o'kta'ajäämpyës yë ja'ay mëti'ipë yaa kajpnjoty tsënaaytyëpën: ja'ay ets jëyujk, ni'ëmukë nëjkx pa'am ëyo'on yaj'ookëtë.

⁷Yë Sedequías, mëti'ipë jam Judá yajkutujkpën mëët yë tyuunpëtëjk ets jyä'äy, ok nkë'ëyaka'antës ma Nabucodonosor yajkutujkpën; mëti'ipë ënäty juuky të wyë'ëmtën, yuu ets pa'am ëyo'on nëjkx yaj'ookëtë ets tam mëti'ipë kupuxy ookaanpën, nijënu'un nëjkx kyayajpa'ëyowtë. Ëjts Wintsën, ëjts ënaanp.

⁸Tuk'ëwaanë näjyëtu'un yë naax kajpn ko ëjts mëti'ipë Wintsën'ajtpën, näjyëtu'unës n'ënëëmëtë; ko wä'än twin'ixtë mëti'ipë tsyojkën'ajtëpën, pën yë'ë juukyajtën ëkë pën yë'ë o'kën.

⁹Ja ja'ayëty mëti'ipë wë'ëmtëpën kajpnjoty, jëën tsip, yuu ets pa'am ëyo'on nëjkx yaj'ookëtë. E mëti'ipë tso'ontëpën yaa kajpnjoty ets nyäkyë'ëyakëtë ma ja Caldeo ja'ayëtyën mëti'ipë të mnipëtë'ëkëtën, ka'ap y'ooka'antë, oy ënäty y'ëkyajmënëjkxtë tsumy matsy.

¹⁰Jä'ä ko tëëjës ntuknipëjktaakë koos nyajmina'any yë ëyo'on jotmay ma ya'atë naax kajpnën, jëtu'un tä jeexyë oyajtën nyajminyënës. Ya'atë naax kajpn yë'ëjës ntukë'ëtëjkëp yë Babilonyë yajkutujkpë ets tyajtooytyëkoyëty. Ëjts Wintsën, ëjts ënaanp.

¹¹Jëtu'un xy'ënëëmëty yë Judá yajkutujkpë, yë David yajkutujkpë y'u'unk y'ok: Mëtoow'it yë Wintsën yë y'aaw y'ayuk: Mëtëy xëmë winë xynyipaye'eyëty; yaj'ëwaatsëpëtsëm ja ëyoopëja'ay ma ja ëxëëkja'aytyëjk yaj'ëyowëtën, mëti'ipë yajmëtuunëpën natëk nawa'akë ets ka'ap tsow myëjuyë, këtiipës mijts ntukjoot'anpëkëty ets këtiipë ja n'aaw njotës tsyipkä'äxëty mëët mijts ets tsyooypyëkëty jëënën ets mijts m'ëk o'knëty, jää pën jää y'ëkyajkupi'itsëp.

¹³Mijts kajpn mëti'ipë yajpatpën joyjoty mëti'ipë jam ënä'ämp yajkutujkpën, mëti'ipë yajpatpën jëtu'un tä jeexyë tsaatunkëjxy y'ityën jam joyjyotm, ëjts mëti'ipë Wintsën'ajtpën, mëtsipës të nnänyikäjpxyë ma mijtsën. Miitsëty jä'ä m'ëna'antë: ¿Pën jëtää xy'ëkmä'ämyëp, pën jëtää xy'ëknipëtë'kmëp ets xy'ëknitëjkëmëty yaa ma yu'utsy kë'ëy ets këwent'aty nyajpatëmën?

¹⁴Ëjts miits ntëytyunantëp ijxtëm mpaatëtën mëët mëti'ipë të xytyuntën; nyajtooypyëkäämpyës yë yukjot ets jampaat yë jëën y'ëwtita'any ma pya'a nyuxën. Ëjts Wintsën, ëjts ënaanp.