Read Biblia Mixe de Quetzaltepec Jeremias 25 Bible Online

Jeremias 25 - Biblia Mixe de Quetzaltepec bible

Jeremias 25

¹Ma taxk jëmëjt y'apetyën ma tyëkën yajkutujkpë yë Joaquim, yë Josías yë myaank, jam Judá, jää yë Wintsën ojts tmëkäjpxy yë Jeremías ets tukmëmëtyäky wi'ix ja Judá kajpn jyata'anyën. Mëtu'uk jëmëjt ënäty ëka'any yajkutuky yë Nabucodonosor jam Babilonyë.

²Yë Jeremías käjpxynyajxpë ojts tukmëmëtyakta'ay ya'atë aaw ayuk ja Judá ja'ayëty ets Jerusalén ja'ayëty; jëtu'un t'ënëmaay:

³Ma ënäty majktëkëëk jëmëjt y'apetyën ma ja Josías tyëkën yajkutujkpë, yë Amón yë myaank, jam Judá ets tyampaat ma kyä'pxyën i'px tëkëëk jëmëjt, tëëjës yë Wintsën yë y'ayuk xytyuknijawë ets tëë miitsëty ntuk'ëwaanëtë kanaak'ok, e miitsëty ka'ap nijënu'un të xymyëpëktë.

⁴E oy yë Wintsën kanaak ok të mjatuknikäxëtë yë käjpxnyajxpëtëjk, miitsëty nijënu'un mëj të xykyajawëtë, ka'ap të mja'akyukëtë ets ka'ap të mmëtowtë.

⁵Yë'ëjëty tëë kanaak ok mja'ënë'ëmxëtë: Ixmatstë yë m'ëxëëkjot m'ëxëëk winma'any ets m'ëxëëktu'un m'ëxëëk kajpxënëty; jëtu'un jotkujk mjuuky'atëty ma ja it naaxwiinyëtën mëti'ipë ja Wintsën mmooyëtën ets myooyën ja m'ap m'okëty.

⁶Këtii xypyanëjkxtëkëtëty wiink tios; këtii xytyukmuk xytyukxu'umtëty ets ka'ap xy'ëwtatëty. Këtii nëkoo xyajjoot'anpëktëty yë Wintsën ko miitsëty wiink tios xy'ëwtajtëpë, mëti'ipë kë'ëm myajkojtëpën; këtiipë ëxëëk mtunëtëty.

⁷Ets tyam, jëtu'un yë Wintsën y'ënä'äny: Miitsëty ka'apës të xytyuntë këwentë; je'eyës nëkoo të xyajjoot'anpëktë ko xy'ëwtatë wiink tios mëti'ipë kë'ëm myajkojtëpën, tääpë je'eyë nëkoo ëxëëk mnätyukyajjata'anëtë.

⁸Paaty ja Wintsën y'ënä'äny, mëti'ipë maaytyääyëpën winë: Mëët ko miitsëty ka'ap të xymyëjpëjkta'aktë ma të njamëkajpxtën,

⁹yë'ëjës nmëkajpxäämpy yë naax kajpn mëti'ipë anëkëjxmtsow yajpatëpën, yë ntuunpës Nabucodonosor mëti'ipë Babilonyë yajkutujkpën tääts yaa myintëty ets tnitëkëtëty ya'atë kajpn ets jënu'un mëët nyämyëwinkon'atyën. Xit ko'ow ntuunta'aja'anyës, wa'atsës nyajkutëkooytya'aja'any. Xit ko'owës xëmë nyaj'ita'any ets je'eyë ja'ay tsyë'ëkëtëty ko t'ixtëty.

¹⁰Ëjts ka'apës n'ëwa'atsa'any nijëna'a ets jam jatëkok yë ja'ay xyi'ik y'ëwë'ëkëty ëkë y'ëwëty ya'axëty akujk jotkujk, ka'ap nëjkx pëjkpë ukpë y'ëknänyikaayënë, ka'ap nëjkx ja'ay y'ëkyajmëtoownë tsaa tukjëtsy ets yë'ëpaat nëjkx ka'ap yë kutë'kxn y'ëktë'kx y'ëkjajnë.

¹¹Nëjkxëp ya'atë naax kajpn kyutëkooytyä'äy ets xit ko'ow nëjkx jyajta'ay. Tëkë'px majk jëmëjt jëtu'un ya'atë naax kajpn y'ita'any, yë'ë ënä'ämanëp yë Babilonyë yajkutujkpë.

¹²Ko ënäty kyä'pxy tëkë'px majk jëmëjt, jääjës yë Babilonyë yajkutujkpë yë nyaax kyajpn mpatëkëjanë yë tyëko'oyën, yë Caldeo ja'ayëty wa'atsës mpaye'eyä'äny yë nyëë pyoky ets nëjkxëpës xëmëkyëjxm nyajkutëkoy. Ëjts Wintsën, ëjts ënaanp.

¹³Nyajkëta'akäämpyës yë ëyo'on jotmay ma ya'atë naax kajpnën, tëkokyë ja ëyo'on jotmay mëti'ipë miinpën kuja'ay; tu'kë'ëyë mëti'ipë yë Jeremías të tnikäjpxyën mëët yë nxëëwkyëjxmës wi'ix jyata'anyën ja naax kajpn.

¹⁴Mëjëtypë kajpn ets mëj'äämpyë yajkutujkpë nëjkxëp tyukja'tyë ets ka'ap nëjkx yajmëtä'äkyë. Jëtu'unës ntukëpäta'any mëët ijxtëm të y'ëtë'ëtstë y'ëna'antë.

¹⁵Jëtu'unës të xy'ënëëmë yë Wintsën mëti'ipë yë Israel ja'ayëty Tyios'ajtëpën: Ix tyaapë a'ukën, ujts yajpaaty mëët yë ntsip n'äkës. Këëyë'ëk ets nëjkx xytyuk'uuky tëkokyë yë naax kajpn ma të nkexyën.

¹⁶Ko ënäty t'uuktë, jëtu'un y'ëtë'ëtsa'antë tä ja'akyupojën mëët ko ënäty ja jëën tsip tyunyë mëti'ipës ntuknikäxantëpën.

¹⁷Ënät ojts n'ëxajës ja a'ukën mëti'ipës ja Wintsën xymyooyën etsës ntuk'uky ja naax kajpn maajës ënäty ja Wintsën të xykyexyën.

¹⁸Ojtsës ntuk'uuky yë Jerusalén kajpn ets Judá kajpn mëët yë yajkutujkpëtëjk, y'ënä'ämpëtëjkëty ets tyimkutëkooytya'atëty, xit ko'ow jyajta'atëty, mëti'ipë je'eyë nëjkx yajtsë'ëkëtën ko ënäty yaj'ixy, yë'ë ijxpäjtën'atëp ko ënäty të yajpoky xëmëkyëjxm.

¹⁹Tëës näjyëtu'un ntuk'uuky yë faraón, mëti'ipë jap Egiptë ënä'ämpën, mëët yë wyintsëntëjk ets tyuunpëtëjk ets tu'kë'ëyë jyä'äy,

²⁰ets oypyënëty mëti'ipë jap Egiptë yajpatëpën, tu'kë'ëyë yajkutujkpëtëjk mëti'ipë jam Us ënä'ämtëpën ets tëkokyë yë filistejë ja'ayëty: yë Ascalón kajpn, Gaza kajpn, Ecrón kajpn ets mëti'ipë jam Asdod të wyë'ëmtën;

²¹yë y'itjot yë Edom, Moab ets Amón,

²²tu'kë'ëyë yë yajkutujkpëtëjk mëti'ipë jam ënä'ämtëpën Tirë ets Sidón, yajkutujkpëtëjk mëti'ipë jam yajpatëpën ma ja Mejyën Naax'akujkpyë,

²³yë Dedán ja'ayëty, Temá ja'ayëty, Buz ja'ayëty ets ja kajpn ma ja ja'ay nyäy'awaayjyäpëtën,

²⁴tu'kë'ëyë yë Arabië yajkutujkpëtëjkpë, tëkokyë yajkutujkpëtëjk mëti'ipë jam të'ëts'itjotm yajpatëpën,

²⁵yë yajkutujkpëtëjk mëti'ipë jamëtyën Zimri, Elám ets jam Media,

²⁶yë yajkutujkpëtëjk mëti'ipë jam anëkëjxmtsow yajpatëpën, mëti'ipë nämyëwinkon'ajtëtëpën, mëti'ipë nämyëjëkäm'ajtëtëpën; tu'kë'ëyë ja wiink naax wiink kajpn ma y'ityën ënä'ämën kutujkën. Ets tukjëjpkëxëty yë Babilonyë yajkutujkpë.

²⁷Ënät ojts yë Wintsën näjyëtu'un xy'ënëëmës: Ënëëmëtë ko ëjts Wintsën mëti'ipë maaytyääyëpën winë, mëti'ipë yë Israel ja'ay Tyios'ajtëpën, tyam ntuk'ënä'ämtë ets xy'ukta'atëty koonëm mukpëkëtëty ets mtëkëtëty ë'tspë, mkëtaw mkëpiptëty, ka'ap m'ëk maayënëtëty wi'ix mpëtë'ëktëty, mëët ko ënäty je'eyë ja tsip y'ijnë mëti'ipë ntuknikäxantëpën.

²⁸E ko tka'ëxajëja'antëty yë a'ukën, jëtu'un xy'ënëëmëtëty: Yë Wintsën mëti'ipë maaytyääyëpën winë, jëtu'un y'ënä'äny: Kwanë ko xy'uuktë oy wi'ix mja'ëna'antë.

²⁹Jä'ä ko jamës nyajtso'onta'aka'any yë ëyo'on jotmay ma ja kajpnën mëti'ipës ojts ëjts njayajtuknikënu'kxën. ¿E miits m'ënantëp ko ka'ap myajtëytyuntëtyë? Miitsëty ka'ap myajnimä'kxa'antë, jä'ä ko nyajtso'onta'akäämpyës yë tsip ma tëkokyë yë naax kajpn yajpaatën. Ëjts Wintsën mëti'ipë maaytyääyëpën winë, ëjts ënaanp.

³⁰Mijts Jeremías, wa'ats xynyimëtyakta'ajëty ma yë'ëjëtyën tëkokyë mëti'ipë mmëtoopyën. Jëtu'un xy'ënëëmëty: Jëtu'un yë Wintsën jam këjxm yë y'aaw y'ayuk tyajmëtoyë ënääwën, jam ma y'ijtaknën kënu'kxypyë ets tmëkäjpxy ja y'u'unk y'ëna'k mëk, jëtu'un tä yë ja'ay mëk kyajpxtën mëti'ipë tsatym wyintä'äntëpën ets tukmëtoy ni'ëmukë ja naaxwiinyëtë ja'ay.

³¹Koos nkajpxëty, jëtu'un yajmëtowa'any tä ënääwën mëti'ipë naaxwiinyëtë apëtsëmy yajmëtoopën, jä'ä ko yë Wintsën pyaye'eyäämpy ja nëë poky mëti'ipë të tuntën ja naax kajpn, wa'ats tmëkajpxta'aja'any ja naaxwiinyëtë ja'ay ets tyajkutuka'any wä'än t'o'kta'atë ja ëxëëkja'aytyëjk. Yë Wintsën jëtu'un ënaanp.

³²Yë Wintsën mëti'ipë maaytyääyëpën winë, jëtu'un y'ënä'äny: Yë ëyo'on jotmay mëti'ipë miimp këtakpën, jëjpkë'ëy tyu'utëkëja'any kajpn kajpn; jëtu'un tä tuupoj jam tsyoonyën ma naaxwiinyëtë jyëjpkëxyën.

³³Jëtu'unyë nëjkx nyaaxmë'o'këtya'atë ja ja'ayëty mëti'ipë ënäty ja Wintsën yaj'o'kpyën jä'ä xëëw. Ni pën nëjkx kyaniya'axëtë ets ni pën nëjkx kya'ëna'any ets nyaaxtëkëtëty; jëtu'un tä të'ënyën, jëtu'un nëjkx nyaaxmëpuutsë.

³⁴Ya'axtë kupixyny këwent'ajtpë, ya'axtë joktë mëët ja pëjkën ijxën. Jä'ä ko tëë tpaaty ja nyixëëw ma ja o'kën tëko'oyën y'ita'anyën ets miitsëty jëtu'un mmëtsip myaj'ooka'anëtë tä ja'ay tyaj'ookyën yë kupixyny.

³⁵Yë kupixyny këwent'ajtpëty ka'ap nëjkx tjëkyepy wi'ix kyä'äktëtyën; mëti'ipë wyojpjëtijtëpën yë kupixyny nijënu'un nëjkx tkajëkyepy wi'ix kyäktso'oktëtyën.

³⁶Yaxtëp jojktëp yë kupixyny këwent'ajtpë, jëëytyëp yaxtëp yë kupixyny winwoopë, jä'ä ko tëë ja Wintsën tyajkutëkooytyä'äy ja aay ujts.

³⁷Mëët yë'ëkyëjxm ko yë Wintsën të jyoot'anpëky, paaty të tyajkutëkooytyääy ja kam tu'u oyëtypë.

³⁸Jëtu'un të tnipëtsëmy ja naax kajpn tä tu'uk kaa pyëtsimyën y'ijtaknjoty ets ëxëëk tuuny ja naax kajpn, jä'ä ko ja Wintsën ja tsyip y'äkë jëënën tsyooypyijky, paaty tyajnaaxkëtäky ja jëën tsip.