Read Biblia Mixe de Quetzaltepec Jeremias 26 Bible Online

Jeremias 26 - Biblia Mixe de Quetzaltepec bible

Jeremias 26

¹Jam Judá ma yajkutujktso'onyën yë Joaquim, yë Josías yë myaank, jää ojts yë Wintsën tmëkäjpxy yë Jeremías,

²ets t'ënëmaay: Jam mwa'ak'oyëty tsajptëjk'ëkë'ëm, jam xynyikajpxta'ajëty tu'kë'ëyë ja aaw ayuk mëti'ipë të ntukmëmëtyä'äkyën, wä'än ja ja'ay tmëtowtë mëti'ipë tso'ontëpën Judá, mëti'ipë miintëpën ma tsajptëjkën. Nitii xykyaninaxëty wa'ats xynyikajpxta'ajëty.

³Kooxyëp tnaja'akyukëtëty mëti'ipë mnikäjpxypën ets t'ëxmatstëty ja y'ëxëëkjot y'ëxëëk winma'any, wä'änës ka'ap ntëytyuntyëty ma ëxëëk të y'ëtë'ëtstë y'ëna'antën, jëtu'un tääjës ënäty të njamay të njatajyën.

⁴Jëtu'un xy'ënëëmëtëty ko ëjts, mëti'ipë Wintsën'ajtpën, ëjts ënaanp: Pën këtii xymyëj'ix xymyëjpëjkta'aktës ets ka'ap tuntë tääjës të nja'ënëëmëtën,

⁵ets pën ka'ap tja'akyukëtë ja aaw ayuk mëti'ipës të njakajpxnaxyën mëët ja nkäjpxynyajxpëtëjkës, mëti'ipës kanaak ok të njakexyën ets je'eyë të kyäjpxykyumëtoownaxtë,

⁶ënätës ya'atë tsajptëjk jëtu'un ntuna'any tä jam Siló jyäjty kyëpejtyën ets nëjkx ijxpäjtën wyi'imy ko të yajpoky ma wiinkëtypë naax kajpnën mëti'ipë naaxwiinyëtë yajpatëpën.

⁷Yë teetytyëjkëty, käjpxynyajxpëtëjkëty ets tëkokyë ja ja'ayëty myëtoowtaaytyë ja aaw ayuk mëti'ipë ja Jeremías ojts tkäjpxyën jam tsajptëjk'ëkë'ëm.

⁸Ko kyajpxtaay ijxtëm ja Wintsën ënäty të tyuknipëkyën, ënät myajtsëtë ja teetytyëjkëty, ja käjpxynyajxpëtëjkëty ets mayjyä'äy ets y'ënëmaayëtë: M'ookëp ënät.

⁹¿Ma jëtu'unpë winma'any xypyiky ko m'ëna'any ko ya'atë tsajptëjk mëti'ipë Wintsën tyëjk'ajtypyën jëtu'un jyata'any tä jyäjtyën jam Siló ets ko m'ëna'any ko ya'atë naax kajpn kyutëkoyä'äny ets tukwa'ats wyë'ëma'any ets ko ka'ap yaa pën tsyëënëja'any? Tä ja mayjyä'äy myujkpejty ets ojts tyajnatuktë ja Jeremías.

¹⁰Ja kopktëjkëty mëti'ipë jam Judá mëj'äämpy ijtëpën, ko tnija'awëtyë wi'ix jam jyäty kyëpetyën, ënätyë jam tsyo'ontë ma ja kutujkëntëjkën, ma ja yajkutujkpë y'ëne'emyën ets ojts nyëjkxtë ma tsajptëjkën. Jam nyaaxwä'tstë ma ja Jempyë Tëjk Aawën.

¹¹Ënät ja teetytyëjkëty, ja käjpxynyajxpëtëjkëty ets ja mayjyä'äyëty ojts t'ënëëmëtë ja kopktëjkëty mëj'äämpyë y'itën ma ja kajpnën: Tyaapë ja'ay, patëp y'ookëty, jä'ä ko tëkatsy të tnikäjpxy yë naax kajpn. Miitsëty tëë wa'ats xymyëtowtë mëët yë mkopk mtatskëty.

¹²E ja Jeremías ojts tmëkäjpxy ja kopktëjkëty ets ja mayjyä'äy ets t'ënëmaay: Yë Wintsën të xykyexyës etsës yë y'aaw y'ayuk nikajpxëty, yë'ëjës të xytyuknipëky ets jëtu'un yë naax kajpn ets tsajptëjk nimëtya'akëtyës ijxtëm të xymyëtowtën.

¹³Yaj'oyëtë yë mjot mwinma'anyëty ets mtu'unënëty mkajpxënëty, mëmëtowtë yë Wintsën mëti'ipë miits mTiosajtëpën, këtiipë ja ëyo'on jotmay mtuknikäxëtëty mëti'ipës të nikäjpxyën.

¹⁴E ëjts, tyamës yë'ë, miits mkë'ëjotyëty të nka'ayës; ixtë wi'ixës xytyuna'antë.

¹⁵Je'eyëp tëy ko yajxon xytyimwinmaytyëty: pën xyaj'o'ktëpës, miitsëty ets nitëkokyë ja'ayëty mëti'ipë kunaax kukajpnëtyën pokymyëët nëjkx wyë'ëmta'atë mëët ko ënäty të xyaj'ooktë tu'uk ja'ay mëti'ipë ka'ap tii poky tmëëtëtyën; jä'ä ko ëjts Wintsënës të xykyexy ets miitsëty ntukmëtowtëty ya'atë aaw ayuk mëti'ipë të xymyëtowtën.

¹⁶Ënät ja kopktëjkëty ets ja mayjyä'äyëty t'ënëmaaytyë ja teetytyëjkëty ets ja käjpxynyajxpëtëjkëty: Ka'ap tyaapë ja'ay tii poky tjantymyëëtëty wi'ix ko nyaj'o'kmëty; yë'ë të tnikäjpxy yë Wintsën yë y'aaw y'ayuk mëti'ipë nTios'ajtëmën.

¹⁷Ënät tu'uk mäjtsk ja mëjja'aytyëjkëty wya'akë'ktë ets t'ënëmaaytyë ja mayjyä'äy mëti'ipë ënäty jam të nyiye'eypyätën:

¹⁸Ma yajkutujkyën yë Ezequías, mëti'ipë jam Judá ënä'ämën, jää ojts yë Miqueas mëti'ipë Moreset tso'onpën, tnikäjpxy tnimëtyä'äky yë Wintsën yë y'aaw y'ayuk ets ojts tmëkäjpxy yë Judá ja'ayëty, ma t'ënëmaayën: Yë Wintsën mëti'ipë maaytyääyëpën winë jëtu'un y'ënä'äny: Jëtu'un yë Sión kajpn y'awinpita'any tä yë tsajpkaa yu'uyën, yë Jerusalén kajpn xit ko'ow jyata'any ets jam ma nitunën kajpnjotmëpë y'ityën, wa'ats y'aatëkoyä'äny.

¹⁹¿E ojts yë Ezequías yajkutujkpë ets naax kajpn tyaj'ooktë ja Miqueas? Ka'ap, ni'ikyënëm ojts yë yajkutujkpë tsë'ëkë ja Wintsën ets ni'ikyënëm ojts y'ënä'äny ko wä'än yë Tios tpokymye'kxy ja naax kajpn. Ënät ja Wintsën ka'ap tkejxy ja ëyo'on jotmay mëti'ipë ënäty të tjatuknipëjktaakën tkäxa'any. ¿Ets ënät ëëtsajtëm ja nëë poky mëjpë këjääpë nnätyukpatëmëtyë ko tu'uk ja ja'ay nyaj'o'kmëty ka'apë tii poky tmëëtëtyë?

²⁰Näyjyëtu'un ja Urías käjpxynyajxpë, yë Semaías yë myaank mëti'ipë jam Quiriat-jearim kukajpn'ajtpën, ojts ja Wintsën ja y'aaw y'ayuk tnikäjpxy ets mëk ojts tnikäjpxy nimëtyä'äky ya'atë naax kajpn, jëtu'un tä yë Jeremías të kyäjpxy të myëtyä'äkyën.

²¹Yë Joaquim yajkutujkpë mëët yë wyintsëntëjk ets kyutuunktëjk ojts tmëtoow'itë ja aaw ayuk ets ja yajkutujkpë ojts jya'ëna'any tyaj'ooka'any. E ko yë Urías tnija'awëy, ojts ënätyë kye'eky ets ojts jap nyijkxy Egiptë.

²²E yë Joaquim yajkutujkpë ojts jap Egiptë tkexy yë Elnatán, yë Acbor yë myaank, mëët yë wiinkpë ja'ayëty,

²³ets tyajtso'ontë jap Egiptë ja Urías ets tuknimiintë ja Joaquim yajkutujkpë, tä ni'ënä'ämëy ets tyaj'ooktëty ets ja nyini'kx tkujëpijpëtëty ma ja o'kpëjutën ma ja may o'kpë nyipetyën.

²⁴Yë Ahicam, yë Safán yë myaank, yë'ë ojts tnikajpxtu'uty ja Jeremías ets ka'ap yajkë'ëyäjky ma ja mayjyä'äyën këtiipë tyaj'ooktëty.