Read Biblia Mixe de Quetzaltepec Jeremias 27 Bible Online

Jeremias 27 - Biblia Mixe de Quetzaltepec bible

Jeremias 27

¹Ma ënäty mëmajktaxk jëmëjt yajkutukyën jam Judá yë Sedequías, yë Josías yë myaank; ënät ojts yë Wintsën tmëkäjpxy yë Jeremías,

²ets t'ënëmaay: Oytyun yë po'otejpxy ets tsajpkaakukë'ë ets mnätyukyo'ktëyëtëty.

³Ok xykyäjpxynyikäxëty yë yajkutujkpëtëjk mëti'ipë jam ënä'ämtëpën Edom, Moab, Amón, Tirë ets Sidón. Yë'ë ntukmëkäxëp ja käjpxy yë ja'ayëty mëti'ipë ja Sedequías yajkutujkpë nyimiintëpën.

⁴Ets xytyuk'ënä'ämëty wä'än yë wyintsëntëjk t'ënëëmëtë, ko ëjts, mëti'ipë Wintsën'ajtpën, mëti'ipë maaytyääyëpën winë; mëti'ipë yë Israel ja'ay Tyios'ajtëpën, jëtu'unës n'ëna'any:

⁵Mëët yë mëj'ajtën kutujkën ojts nyajkojyës yë naaxwiinyëtë; yë ja'ayëty ets jëyujkëty mëti'ipë jam yajpatëpën, njëkyejpyës pën nmo'ojëty mëti'ipës ënäty nmo'ojäämpyën.

⁶E yë ntuunpës Nabucodonosor, mëti'ipë jam Babilonyë ënä'ämpën, tëëjës ntukë'ëtëjkëtyä'äy tu'kë'ëyë naax kajpn ets aayjëyujk ujtsjëyujk ëwa'anëtypë.

⁷Tu'kë'ëyë yë naax kajpn aakjam yajpata'aja'antë ma yë'ëjën ets ma y'u'unk y'ëna'kën ets ma y'ok'u'unk y'ok'ëna'kën; koonëm wiinkëtypë naax kajpn wäänë mëkpë pyëtsëmëty mëti'ipë nëjkx tyukja'tyën ets pyëjkëtëty ja kyutujkën.

⁸E pën jää yë naax kajpn mëti'ipë ka'ap nyätyuk'ëne'emyën yë Nabucodonosor, ëjts ntëytyunäämpyës tääpë naax kajpn mëët yë tsip, yuu xëëw ets pa'am ëyo'on, koonëm ja naax kajpn aakjam yajpata'atëty ma Nabucodonosor y'ëne'emyën. Ëjts Wintsën, ëjts ënaanp.

⁹Paaty n'ënëëmëtë këtii nëkoo xymyëpëjkëtëty yë y'aaw y'ayuk tääpë käjpxynyajxpëtëjkëty, najtsja'apëtëjkëty ets ja'ayëty mëti'ipë yajkuma'aynyiwijtëpën; yë'ëpaat mëti'ipë kajpxpojktëpën, mëti'ipë yajmëtoopën tii t'akajpxtën mëti'ipë tunan jatanëpën; mëti'ipë ënantëpën ets ka'ap mnäkyë'ëyakëtëty ma ja Babilonyë yajkutujkpën.

¹⁰Ijxtëm mja'ënë'ëmxëtën nëkoo je'eyë mwin'ëënëtë, je'eyëm nëjkx tsumy matsy myajmënëjkxtë wiink naax wiink kajpn ets xit ko'ow ntuunta'aja'antës ets jam m'ooktëty muum.

¹¹E ja naax kajpn mëti'ipë nnäkyë'ëyajkëpën ma ja Babilonyë yajkutujkpën, jamës nëjkx nyajwë'ëmy ma nyaax kyajpnën ets ja nyaax kyam tajtëty tjääptëty. Ëjts Wintsën, ëjts ënaanp.

¹²Ëjts Jeremías, ojtsës nkajpxnajxta'ay ya'atë aaw ayuk ma Sedequías yajkutujkpën, mëti'ipë jam Judá ënä'ämpën ets ojtsës n'ënëëmë: Näkyë'ëyakëtë ma Babilonyë yajkutujkpën ets ma nyaax kyajpnën ets mjuuky'atëty.

¹³¿Tii mpëkëp mpaatëp ko mijts m'ookëty ets mnaax mkajpn tyëkoyëty tsipjoty ets yuu ooktëty ets pa'am ëyo'on yaj'ookëtëty yë mja'ay? Jä'ä ko yë Wintsën tëë tnikäjpxy ko ja naax kajpn mëti'ipë ka'ap nyäkyë'ëyäkyën ma ja Babilonyë yajkutujkpën jëtu'un jyata'any tä të tnikäjpxyën.

¹⁴Këtii xymyëpëkëty yë y'aaw y'ayukëty tääpë käjpxynyajxpëtëjkëty ko y'ëna'antëty ko ka'ap mnäkyë'ëyakëtëty ma Babilonyë yajkutujkpën, nëkoopë je'eyë y'anta'aktë.

¹⁵Yë Wintsën jëtu'un y'ënä'äny ko ka'ap yë'ëjëty të kyäxëtë; nëkoopë y'anta'aktë ko tii tkajpxtë ëjts nxëëwkyëjxmës. Miitsëty tsumy matsy je'eyëm myajmënëjkxa'antë wiink naax wiink kajpn mëët ja käjpxynyajxpëtëjkëty mëti'ipë nëkoo ëxaty të m'ënë'ëmxëtën ets jam nëjkx m'ooktë.

¹⁶Ojtsës näjyëtu'un njamëkäjpxy yë teetytyëjkëty ets tëkokyë ja ja'ayëty etsës t'ënëmaay: Jëtu'un yë Wintsën y'ënä'äny: Këtii xymyëpëktëty yë käjpxynyajxpëtëjkëty mëti'ipë ënantëpën ko tsojk jatëkok yajmëwinpita'any jam Babilonyë mëti'ipë jap tsajptëkoty tuuntëpën. Ko jëtu'un m'ënë'ëmxëtëty nëkoopë ënäty mwin'ëënëtë.

¹⁷Këtii xymyëpëktëty. Nikë Näkyë'ëyakëtë jam ma Babilonyë yajkutujkpën ets mjuuky'atëty. ¿Tii mpëktëp mpaatëp ko ya'atë naax kajpn jyatëty xit ko'ow?

¹⁸Pën janty tëy ko miitsëty mkäjpxynyajxpë'atë, ëjts yajtëëwtëk; ëjts Wintsën mëti'ipë maaytyääyëpën winë, wä'änës ka'ap nyajkutukëty ets jam Babilonyë yajmënëjkxta'ajëty ja apëjk atu'unën mëti'ipë jap ijtpën tsajptëkoty, mëti'ipë jamën ma kutujkëntëjkën ets mëti'ipë jamën maajaty yë Jerusalén kajpnën.

¹⁹Ko yë Nabucodonosor yajkutujkpë tmëtso'ony yë Jeconías jam Jerusalén, yë Joaquim yë myaank, mëti'ipë jam ënä'ämpën Judá ets ojts tsumy matsy tyajnëjkxy jam Babilonyë mëët ja kyopktëjkëty mëti'ipë ënäty jam Judá yajpatëpën ets Jerusalén, ka'ap ojts tyajnëjkxy ja mäjtskpë ja tsajptëjk xeny ets ja nëë apëjkën mëjpë mëti'ipë mëët yë tsuxkpujxn y'oytyunyëtyën ets ja nyipujxnwintëkäämpë ma ja nëë apëjkën tyajye'eytyën ets ja apëjk atu'unën mëti'ipë jap jaak'ijtpën tsajptëkoty. Yë Wintsën mëti'ipë maaytyääyëpën winë jëtu'un y'ënä'äny, yë'ë nyikäjpxyp tääpë apëjk atu'unën mëti'ipë të wyi'imyën jap tsajptëkoty ets ma Judá yajkutujkpë kyutujktaknën ets jampë Jerusalén.

²²Yajmënëjkxta'ajantëp jam Babilonyë ets jeky jam y'ita'any, koonëmës ëjts ntuknipëjktaakëty jëna'a jatëkok wyimpitëty ma të yajmutsoonyën. Ëjts Wintsën, ëjts ënaanp.