Read Biblia Mixe de Quetzaltepec Jeremias 34 Bible Online

Jeremias 34 - Biblia Mixe de Quetzaltepec bible

Jeremias 34

¹Ko ojts yë Jerusalén kajpn ets kajpn mëti'ipë mëët nyätyu'kmëtsëpa'an'atyën nyitëkëty yë Nabucodonosor jampë Babilonyë yajkutukyën, mëët tu'kë'ëyë yë tsyiptuunpëtëjk mëti'ipë wiink naax wiink kajpn tso'ontëpën mëti'ipë yë Nabucodonosor nyitënääpyën, jää ojts yë Wintsën tmëkäjpxy yë Jeremías ets t'ënëmaay:

²Ëjts, mëti'ipë Wintsën'ajtpën, mëti'ipë yë Israel ja'ayëty Tyios'ajtëpën, mijts ntuknipëjkpy ets nëjkx xy'ënëëmë yë Sedequías yajkutujkpë, mëti'ipë jam Judá ënä'ämpën: Jëtu'un yë Wintsën y'ënä'äny: Ëjts nyajkutukäämpy ets Babilonyë yajkutujkpë myinëty ma mnaax mkajpnën ets tjëënmo'ojëty yë mkajpn.

³Mijts ka'ap nëjkx tjëkyepy mkä'äkëty; nëjkxëp myajmatsy ets nëjkx jam myajkë'ëyäky, nëjkxëp myajmënëjkxy tsumy matsy jam Babilonyë.

⁴E mëtoow'it ënät mijts Sedequías, mëti'ipë jam Judá yajkutujkpën, mëtoow'it mëti'ipës nkajpxäämpyën maas nxëëwatyën Wintsën: Mijts ka'ap kupuxy m'ooka'any.

⁵Jotkujk nëjkx m'ooky, myajtukwintoyaanp yë tsooy mëti'ipë pa'akxu'kpën jëtu'un tä yajtukwintooytyën yë m'ap m'ok mëti'ipë ojts y'ënä'ämtën yajkutuktën ma ënäty mijts ka'ap m'ëne'emnyëmën; nëjkxëp ja'ay y'ëna'antë: Aay wintsën, nëjkxëp myajnimony myajnituky. Ëjts Wintsën, ëjts ënaanp.

⁶Yë Jeremías käjpxynyajxpë ojts ja aaw ayuk tkajpxnajxta'ay ma ja yajkutujkpën Sedequías jam Jerusalén.

⁷E ja tsiptuunpëtëjkëty mëti'ipë yë Babilonyë yajkutujkpë jyä'äy'äjtypyën tëë ënäty tyajnatuktë ja Jerusalén ets ja Judá kajpn mëti'ipë yajtijpën Laquis ets Azecá ja këwent'atypë y'itën.

⁸Ojts ja Wintsën tmëkäjpxy ja Jeremías, tëë ënäty ja Sedequías yajkutujkpë tuny tu'uk ja käjpxytyu'unën mëët ja mayjyä'äy mëti'ipë kukajpnajtëpën jam Jerusalén, yë'ë ënäty të tkäjpxy'atë ets tyaj'ëwaatsëpëtsëma'antë ja ëyoopë mëtuunpë.

⁹Ja käjpxytyu'unën mëti'ipë yaj'apatëtyën, jëtu'un ja y'ënä'äny ko mëti'ipë ja'ay myëët'ajtypyën ja mëtuunpë ma jyëën tyëjkën ets ka'ap tmëjuy ets pën hebreo ja'ay, wä'än tnajtsmatsë këtiipë pën ja myëkunaax myëkukajpn twa'anëty mëtuunpë.

¹⁰Tu'kë'ëyë ja ja'ayëty ojts tkupëktë ja jëtu'unpë ja winma'any ets y'itëty jëtu'unpë ja käjpxytyu'unën, ojts tyaj'ëwaatsëpëtsëëmta'atë ja ëyoopë mëtuunpë ets ka'ap ojts tuk'atsip'atë ets myëtunëtëty.

¹¹E ok jatëkok tmëkja'awëtyë ko ënäty të tnajtsmatsëtë ja myëku'ukëty mëti'ipë mëtuuntëpën ets t'atsip'ajtë ets jatëkok myëtunëtëty.

¹²Ënät ja Wintsën ojts tmëkäjpxy ja Jeremías ets t'ënëmaay:

¹³Ëjts, maas nWintsën'atyën, mëti'ipë yë Israel ja'ayëty Tyios'ajtëpën, ojtsës tu'uk ntuny yë käjpxytyu'unën mëët yë m'ap m'okëty koos jap nyajpëtsëëmtë Egiptë, ma ënäty myëtuntën y'ëyowtën. Ojtsës ntuk'ënä'ämtë

¹⁴ets kom wëxtujk jëmëjt tyaj'ëwaatsëpëtsëmtëty tu'uk ja hebreo ja'ay mëti'ipë të myëtunëtën tëtujk jëmëjt ma jyëën tyëjkëtyën ko tii të tyajmëyäty. Je'eyëp ko yë y'ap y'okëty ka'ap jëtu'un tuuntë ets ka'apës xymyëmëtoowtë.

¹⁵E miitsëty ojts xyaj'oyëtë mjot mwinma'anyëty ets ojts xytyuntë mëti'ipës n'oyjya'apën ko xynyasmajtsëtyë ëwaatsëtum yë mjëëky mëku'ukëty ma ënäty myëtuntën. Ko miitsëty ojts xytyuntë tu'uk ja käjpxytyu'unën maas yë ntsajptëjkën mëti'ipës ojts nyajtuknikojën.

¹⁶E ok të mwinmaaytyëkatstë ets të xytyukxi'iktë ja nxëëwës, tëë xy'atsip'atë jatëkok ja ja'ayëty mëti'ipë ënäty të xynyajtsmatsëtën ets jatëkok xy'atsip'atë ets mëtunëtëty.

¹⁷Paatyës mëti'ipë Wintsën'ajtpën, jëtu'unës n'ëna'any: Miitsëty ka'apës të xymyëmëtowtë, ka'ap të xy'ëxmatstë ets të xyaj'ëwaatsëpëtsëmtë ja mjëëky mmëku'ukëty mëti'ipë të xyajmëtuntën; e ëjts yë'ëjës nnajtsmatsëjäämpy yë tsip käjpxy, yuu xëëw ets pa'am ëyo'on, mëti'ipë ëxëëk myajjat myajkëpätëtëpën ets naax kajpn tsyë'ëkëtëty. Ëjts Wintsën, ëjts ënaanp.

¹⁸Yë kopktëjkëty mëti'ipë ënäty mëj'äämpy ijtëpën ma Judá ja'ayëtyën ets ma Jerusalén ja'ayëtyën, mëti'ipë jam tuuntëpën ma kutujkëntëjkën, yë teetytyëjkëty ets nitëkokyë ja'ayëty ojts tuntë tu'uk ja käjpxytyu'unën mëët ëjts: ojts tsujkwa'kxtë ja tsyajpkaa ayääkë ets nyajxtë itkujky ma ënäty mäjtskpëky të tyajwa'kxtën. E ok ojts jatëkok ja wyinma'any tyajtëkatstë ets ka'ap ojts jëtu'un t'ëktuunëtë tä ënäty të y'ëna'antën.

²⁰Paatyës të ntuknipëjktaakë ets jam kya'atëty ma myëtsipëtyën kutsë'ëkëpë ets nyini'kxëty nëjkx tsyu'tsxëtë lut majkwejkxy ets kaa jëyujk,

²¹Tëës näjyëtu'un ntuknipëjktaakë ets Sedequías, Judá yajkutujkpë mëët yë tyuunpëtëjk kya'atëty ma ja myëtsiptëjkëtyën, ma ja Babilonyë ja'ayëtyën mëti'ipë tsiptuuntëpën, mëti'ipë tu'ktsojkyë ja tsipt të tyajxäämtën.

²²Ntuk'ënä'ämäämpyës ets jatëkok tnitëkëtëty ya'atë naax kajpn ets tjëënmo'otëty. Ets ëjts kë'ëm ntuknipëjktaakëjäämpy ets Judá kajpn y'awinpitëty aanë'ëk tëëtsë'ëk ma nitu'uk ja'ay jam kyatsëënëtyën. Ëjts Wintsën, ëjts ënaanp.