Read Biblia Mixe de Quetzaltepec Jeremias 36 Bible Online

Jeremias 36 - Biblia Mixe de Quetzaltepec bible

Jeremias 36

¹Ma ënäty taxk jëmëjt y'apetyën ma Joaquim tyëkën yajkutujkpë, yë Josías yë myaank mëti'ipë jam Judá ënä'ämpën, jää ojts yë Wintsën tmëkäjpxy yë Jeremías ets t'ënëmaay:

²Ix tu'uk yë noky apity ma xykyëxjaaytya'ajëtyën tëkokyë mëti'ipë të ntuk'ëwaanën mëëtpë yë Israel ja'ayëty, Judá ja'ayëty ets wiinkëtypë naax kajpn, wa'ats xykyëxjaaytya'ajëty maju'unëm nikajpxtsoonyënës ets tyampaat.

³Wä'änxyëp yë Judá ja'ayëty tyaj'oyëtëty yë jyot wyinma'anyëty; ko nijawëtëty tëkokyë yë ëyo'on jotmay mëti'ipës ntuknikäxantëpën ets jyëkyäpëp npokymyä'kxtëtyës.

⁴Ënät yë Jeremías tuknipëjky yë Baruc, yë Nerías yë myaank ets tnajtskajpxëy jëtu'un tä ënäty ja Wintsën të y'ënë'ëmxëtyën. Yë Baruc wa'ats tkëxjaaytyääy.

⁵Ënät yë Jeremías tuknipëjky yë Baruc ets t'ënëmaay: Ëk'ix, ëjts ka'apës njëkyepy nnëjkxëty ma tsajptëjkën, jä'ä ko tsipjotyës nyajpaaty.

⁶Paaty mijts ntuknipëky ko jatëkok tpaatëty ja nyixëëw ma ja'ay y'ayuu'atën, tääts mnëjkxëty ma tsajptëjkën ets jap xykyajpxëty tëkokyë mëti'ipës të nnaskajpxën ets të xykyëxja'ayën jëtu'un tmëtoowtëty yë ja'ayëty ja Wintsën ja y'aaw y'ayuk, yë Judá ja'ayëty mëti'ipë të tsyoontën ma kyajpnëtyën ets të myintën ma tsajptëjkën,

⁷wä'änxyëp tmëpëjktsowtëty yë Wintsën ets tyaj'oyëtëty yë jyot wyinma'any ets tyu'unënëty kyajpxënëty, jä'ä ko yë Wintsën tëë tukjoot'anpëky ya'atë naax kajpn.

⁸Yë Baruc jëtu'un tuuntaay tä ënäty ja Jeremías käjpxynyajxpë të tyuknipëkyën, ojts jam nyijkxy ma ja tsajptëjkën ets tkajpxtaay ja noky axaatsy ma ënäty të tkëxja'ayën ja Wintsën ja y'aaw y'ayuk.

⁹Ma taxtujk po'o y'apetyën, ma ja mëmëkoxk jëmëjtpën ma yajkutukyën yë Joaquim, yë Josías yë myaank mëti'ipë jam Judá ënä'ämpën, ojts tu'uk ënä'ämën tpëjkta'aktë ets ja Jerusalén ja'ayëty, Judá ja'ayëtyën y'ayuu'atëty mëti'ipë jam Jerusalén të myintën.

¹⁰Ënät ja Baruc jam tsajptëjk'ëkë'ëm wya'ak'a'awëy, ma ja tëjkëtyaknën mëti'ipë tyijtëpën Jempyë Tëjk Aaw ma ja Guemarías ja tyëjkën, yë Safán yë myaank mëti'ipë jääpyën, ojts tkajpxta'ay tu'kë'ëyë ja Wintsën ja y'aaw y'ayuk mëti'ipë jap miinpën këxja'ay ma ja noky axaatsyën.

¹¹Yë Micaías, yë Guemarías yë myaank, yë Safán y'ok'u'unk, wa'ats tmëtoowtaay ja Wintsën ja y'aaw y'ayuk mëti'ipë ja Baruc kyäjpxypën mëti'ipë jap miinpën këxja'ay ma ja noky axaatsyën,

¹²ënät ojts nyijkxy ma ja kutujkëntëjkën ma yajpaatën ja jääpyëtëjkëty. Tap ënäty tu'kmukyë yajpaatë ja wintsëntëjkëty: yë Elisamá mëti'ipë jääpyën, Delaías, yë Semaías yë myaank; yë Elnatán, yë Acbor yë myaank; yë Guemarías, yë Safán yë myaank; yë Sedequías, yë Hananías yë myaank ets wiinkëtypë.

¹³Ënät tyukmëmëtyakëtë yë Micaías ja aaw ayuk mëti'ipë ënäty të tmëtoyën tkäjpxy ja Baruc ma ja naax kajpnën.

¹⁴Ënät ja wintsëntëjkëty tkäjxtë ja Jehudí, yë Netanías yë myaank, yë Selemías yë y'ok'u'unk ets yë'ë y'u'unk y'ok yë Cusi ets t'ënëmaaytyë ja Baruc wä'än tmëjämy ja noky axaatsy mëti'ipë ënäty ja naax kajpn të tukwinkajpxën. Ënät ja Baruc ojts tmënëjkxy ja noky axaatsy ma ënäty jam yajpaatën.

¹⁵Ets y'ënëmaayëtë: U'unyë xii ënyääypyäjn ets ëktukwinkukajpxëtyëkës ja noky axaatsy. Ja Baruc ojts ja noky tjanty kyäjpxy.

¹⁶Ko jëtu'un tmëtoowtë, xim yam ja tsë'ëkë tyuktëjkëyëtë ets nyäy'ënanëtë: Kopkpëky yë yajkutujkpë yajtukmëtowa'any tu'kë'ëyë ya'atë aaw ayuk.

¹⁷Ënät t'ënëmaaytyë ja Baruc: Tukmëmëtyaktëkës wi'ixën të mwinma'anypyatnë ets të xyjyä'äy ya'atë aaw ayuk.

¹⁸Ënät ja Baruc y'ëtsooy: Yë Jeremías të xynyajtskajpxës ets të nkëxjaaytyä'äyës nokykyijxy ma ya'atë noky axaatsyën.

¹⁹Ënät t'ënëmaaytyë ja Baruc: Mijts ets mëët yë Jeremías nëjkx ixtë ma mnäyu'utsëtë ets ni pën mëpaat tkanijawë ma myajpaatën.

²⁰Ja wintsëntëjkëty jap ja noky axaatsy t'ëxmajtstë ma ja Elisamá ja tyëjkën, mëti'ipë jääpyën ets ojts tninëjkxtë ja yajkutujkpë ma ja kutujktaknën ets tukmëmëtyaktë mëti'ipë ënäty të tmëtowtën.

²¹Tä ja yajkutujkpë tuknikejxy ja Jehudí ets ja noky axaatsy tmëminëty mëti'ipë ënäty të tyajwë'ëmtën ma ja Elisamá ja tyëjkën, mëti'ipë jääpyën. Ko tmëmiiny, tääts ojts tukwinkukajpxë ja yajkutujkpë ets ja wintsëntëjkëty mëti'ipë jam napikëyëpën.

²²Jä'ä xëëw nëkoo ënäty y'ëktëtyky'ajnë, paaty ja yajkutujkpë ënäty të twinkonë ja jyëën jap tyëkoty ets jap xyämy.

²³Ko ja Jehudí tkajpxta'ay ja noky tëkëëk taxk waats, tääts ja yajkutujkpë tuktsukë ja noky ets tjëënkupëky. Aakjëtu'un tuuntaay koonëm tno'ktaay.

²⁴Yë yajkutujkpë ets ja wintsëntëjkëty mëti'ipë myëtoowtën wi'ix ja noky axaatsy jyä'äyëtyën, nijënu'un kyatsë'këtyë ets nitii tkamëkja'awëtyë.

²⁵Yë Elnatán, yë Delaías ets Guemarías ojts mëktä'äky tja'ënëëmëtë ja yajkutujkpë ets këtii tno'okëty ja noky axaatsy, e yë'ë ka'ap nyi''ijxë'këtë,

²⁶ni'ikyë ojts tni'ënä'ämë ets ja Jeremías ets ja jyääpyë Baruc yajmatstëty. Ets tuknipëjky ja Jerahmeel, yë'ë yajkutujkpëtëjk jyä'äy ets ja Seraías, yë Azriel yë myaank ets ja Selemías, yë Adbeel yë myaank. Je'eyëp ko yë Jeremías ets Baruc ojts yë Wintsën yu'utsëtë, ka'ap yajpatë.

²⁷Tëë ënäty yë yajkutujkpë tnino'oky ja noky axaatsypë ma myinyën ja aaw ayuk mëti'ipë ja Jeremías të tnajtskajpxën mëti'ipë ja Baruc jyääyën, ko jatëkok yë Wintsën ojts tmëkäjpxy yë Jeremías ets t'ënëmaay:

²⁸Ix wiinkpë noky ets jatëkok xyjya'ajëty ja aaw ayuk mëti'ipë ijty jap miinpën këxja'ay ma ja mëjëyëjpën, mëti'ipë nyino'kën ja Joaquim jampë Judá yajkutukyën.

²⁹Ets xy'ënëëmëty: Jëtu'un yë Wintsën y'ënä'äny: Mijts ojts xynyino'oky ja noky axaatsy ets ojts yë Jeremías xytyuk'ojy ko tjaay mëti'ipë ja Babilonyë yajkutujkpë tyunäämpyën, ko myina'any ma ja naax kajpnën ets tyajkutëkoyä'äny ets nitu'uk ja ja'ay juuky tkayajwë'ëma'any ets jëyujkpaat tyajkëjxtaja'any.

³⁰E ka'ap wyi'ixëty, ëjts, mëti'ipë Wintsën'ajtpën, tyam mijts n'ënëëmë, Joaquim, mëti'ipë ënä'ämp yajkutujkpën ma Judá kajpnën, mijts ka'ap nëjkx yë m'u'unk m'ëna'k ets m'u'unk m'ok xymyëët'aty mëti'ipë jam ja'tëpën ma David yë kyutujktaknën. Ko ënäty m'ooky, yë mjot mnini'kx jëtu'unyë nëjkx wyin'aankëtä'äky xëëny ets jëtu'unyë nëjkx tyipjuuny koots,

³¹e mijts mëët yë mwintsëntëjk ntukumëtowantëp wi'ix të m'ëtë'ëtstën. Nyajminäämpyës yë ëyo'on jotmay ma miitsëtyën tëkokyë mëti'ipës të nikäjpxyën ma Jerusalén ja'ayëtyën ets ma Judá ja'ayëtyën, mëët ko ka'ap të mkäjpxyjyä'äkyukëtë.

³²Ënät ja Jeremías t'ijxy tu'uk yë noky ets tmooy ja Baruc, mëti'ipë yajjääpyën ets ja Baruc jatëkok tjaaytyääy wi'ix ja Jeremías y'ënä'änyën, yë'ë ja aaw ayuk mëti'ipë ënäty jap të t'ëkjääpyën ma ja mëjëyëjpën mëti'ipë Joaquim yajkutujkpë nyino'kën. Ojts yë Jeremías tjaakyajkëxja'ayë wiinkpë aaw ayuk jëtu'unpë kyäjpxyën.