Read Biblia Mixe de Quetzaltepec Jeremias 38 Bible Online

Jeremias 38 - Biblia Mixe de Quetzaltepec bible

Jeremias 38

¹Yë Sefatías, yë Matán yë myaank, yë Guedalías, yë Pashur yë myaank, yë Jucal, yë Selemías yë myaank ets Pashur, yë Malquías yë myaank; jëtu'un mëti'ipë myëtoowtën wi'ix ënäty ja Jeremías të tnikäjpxy të tnimëtyä'äkyën ja naax kajpn mëët ya'atë ja aaw ayuk:

²Jëtu'un yë Wintsën y'ënä'äny: Mëti'ipë wë'ëmtëpën kajpnjoty, yë'ë nëjkx yaj'ookëtë jëën tsip, yuu xëëw ets pa'am ëyo'on. E mëti'ipë näkyë'ëyajkëtëpën ma Caldeo ja'ayëtyën, tämyëm jyaakwë'ëmtëty juuky.

³Jëtu'un yë Wintsën y'ënä'äny: Yë kajpn yë'ë nnitëkëjanëyëp yë Babilonyë yajkutujkpë. Yë'ë nyitëkëjäämpy yë kajpn ets ka'ap nëjkx tjëkyepy wi'ix pën y'ëtukëtëty.

⁴Ënät ja wintsëntëjkëty t'ënëmaaytyë ja yajkutujkpë: Tyaapë ja'ay wä'än timy'ooky, ni'ikyë tsë'ëkëwinkajpxë yë tsiptuunpëtëjk mëti'ipë yaa naaxjoty kajpnjoty niwäänë të jyaakwë'ëmtën ets ja'ayëty. Ya'atë ja'ay ka'ap oypyë tmëmay tmëtajy ma kajpnën, ni'ikyë tsoky ets ja'ay o'ktëy jyatëty.

⁵Tää ja Sedequías yajkutujkpë y'ënëmaayëtë: Mijts ixtë tii mtuuntëp mëët yë'ë. Ëjts ka'apës xymyäy wi'ixës n'akajpxtuktëty.

⁶Ënät tmajtstë ja Jeremías ets jap tkujëpijpëtyë nëëjutjoty mëti'ipë yë Malquías jyä'ä'ajtypyën, yë yajkutujkpë myaank. Mëët yë tejpxy tkutëëynyajxtë. Jap nëëjutjoty ka'ap ënäty jap tii nëë, yi'iyë nëë mo'onts, paaty yë Jeremías myo'onts jë'ënë.

⁷E jam ijty tu'uk yë Etiopíë ja'ay, jä'ä xyëëwajtyp Ébet-mélec, yë'ë mëët tyuny yë yajkutujkpë, ojts tnijawë ko yë Jeremías të tkujëpipëtë nëëjutjoty. Ja yajkutujkpë jam ënäty yajpaaty ma ja käjpxy mëtyä'äky y'ityën ma ja tëjkën mëti'ipë tyijtëpën Benjamín Tyëjk Aaw,

⁸ënätyë yë Ébet-mélec tsyo'ony ma jam ja kutujkëntëjkën ets ojts tninëjkxy ja yajkutujkpë tä t'ënëmaay:

⁹Wintsën, mëti'ipë tääpë ja'ay të tuntën, mëjpoky yë'ë. Tääpë Jeremías yuu'ookëp ënät jap nëëjutjoty, jä'ä ko ka'ap maanë yë jë'kxy yaa kajpnjoty.

¹⁰Ënätyë yë yajkutujkpë tkejxy yë Ébet-mélec mëët i'px majk yë ja'ay ets nëjkx tjuutë yë Jeremías jap nëëjutjoty ma ënäty të yaj'kujëpipën naamka'anëm y'ooky.

¹¹Tääts ja Ébet-mélec tsyo'ontë mëët ja i'px majkpë ja ja'ay, ojts tukwit tpapëky mëti'ipë jamën ma yajkutujkpë maywyit tyaj'ityën ets tuknipijty ja tejpxy mëti'ipë jap jutjoty kyutëëynyajxën,

¹²ets t'ënëmaay ja Jeremías: Nätyukxëkätpä'änët ya'atë tukwit, këtiipë yë tejpxy myajtsëtyutëtëty. Jëtu'un ja Jeremías tjantytyuuny.

¹³Ënät ja Jeremías two'onpëtsëëmtë mëët ja tejpxy. Yë Jeremías jam ojts je'eyë këwent'aty jyaak ijty ma këwent'ajtpë y'itën.

¹⁴Ënät ja Sedequías yajkutujkpë ojts tmëkäjpxy ja Jeremías käjpxynyajxpë ma ja mëtëkëëkpë ja tëjk'aawën ma ja kajpn yajnitëkën. Ets t'ënëmaay: Tu'ukës yë yajtë'ëwën ntuna'any ma mijtsën ets jä'äs ntsoky xy'ëtsoowinpitëty mëtëy.

¹⁵Tä ja Jeremías y'ëtsooy: Koos n'ëtsoowinpitëty ja yajtë'ëwën, mijts xynyi'ënä'ämëpës jää yaa etsës ja'ay xyaj'ooktëty; e koos wi'ix mijts nja'ënëëmëty, ka'apës ja n'aaw n'ayuk xymyëpëkanë.

¹⁶E ja Sedequías yajkutujkpë ame'tsyë ojts tatskmëkajpxë ja Jeremías ets t'ënëmaay: Yë Wintsënës yë xyëëw ntukkajpxypejtypyës ko ka'ap mijts ni'ënä'ämëja'any, ka'ap pën myaj'ookëtëty ets ka'ap nkë'ëyaka'any ma ja ja'ayëtyën mëti'ipë ënantëpën ko m'ookëty.

¹⁷Ënät ja Jeremías t'ënëmaay ja Sedequías: Jëtu'un yë Wintsën y'ënä'äny mëti'ipë maaytyääyëpën winë, mëti'ipë yë Israel ja'ayëty Tyios'ajtëpën: Pën mijts tu'ktonyë mnäkyë'ëyäkyë ma Babilonyë tsiptuunpëtëjkëtyën, mnäyajtsokëp ënäty mëët ja m'u'unk m'ëna'k, m'u'unk mto'oxytyëjk ets ja naax kajpn ka'ap nyitoyëty.

¹⁸E pën mijts ka'ap mnäkyë'ëyäkyë ma Caldeo ja'ayëtyën, yë'ëjëty jyëënmo'ojantëp ya'atë kajpn ets nëjkx wyintooykyëtä'äky, e mijts ka'ap nëjkx tii mëk'ajtën xy'ëkmëët'ajnë wi'ix mkä'äkëtyën.

¹⁹Ënät ja Sedequías y'ëtsooy: Yë'ëjës ntsë'këtëp yë Judío ja'ayëty mëti'ipë të tpuwa'akëtën yë Caldeo ja'ayëty. Ko ëjts nnäkyë'ëyakëtëty ma yë'ëjëtyën, ëxëëkës nëjkx xytyuntë.

²⁰Tä ja Jeremías y'ëtsooy: Mijts yajkutujkpë, ka'ap jyamëty mnäkyë'ëyaka'anyë ma yë'ëjëtyën. Mijts yajkutujkpë, yë'ë tun mëti'ipë yë Wintsën të mtukni''ixëtyën mëti'ipë të ntukmëmëtyä'äkyën. Këtiipë wi'ix mjatëty ets mjuukyajtën tsyo'okëty.

²¹Yë Wintsën tëëjës xytyuk'ëwaanë wi'ix mjata'any mkëpäta'anyën ko m'ënaanpëty ka'ap mnäkyë'ëyaka'anyë ma Babilonyë ja'ayëtyën:

²²tu'kë'ëyë ja to'oxytyëjktëjkëty mëti'ipë ënäty të wyë'ëmtën ma myajkutujktaknën, wa'ats nëjkx jap yajju'ta'atë ets nëjkx yë'ë yajmo'otë ja Babilonyë ja'ayëty yë tsyiptuunpë wintsëntëjkëty, jëtu'un ja to'oxytyëjk nëjkx y'ëna'antë: Yë ja'ayëty mëti'ipë ënäty mëët oy të nyäjyawëtyën yë yajkutujkpë ojts wyin'ëënyë ets jëtu'un ojts myëmëtä'äkyë; ojts y'ëxmajtsënë ko myo'ontstëjkëy ets ojts jam nyikäkënë.

²³Ets Jeremías tjaakënëmaay yë yajkutujkpë: Tëkokyë yë to'oxytyëjktëjkëty ets yajkutujkpë yë y'u'unk y'ëna'k, yë'ë nëjkx yajkë'ëmo'otë yë Caldeo ja'ayëty; mijts yajkutujkpë ka'ap nëjkx mmayë mkä'äkëty, nëjkxëp myajkë'ëyäky ma ja Babilonyë yajkutujkpën ets nëjkxëp yë Jerusalén kajpn tno'oktë.

²⁴Ënät ja Sedequías yajkutujkpë t'ëtsooy ja Jeremías: Pën mtsojkpy mja'ap yë mjuukyajtën, këtii ni pën ya'atë aaw ayuk xytyukmëmëtya'akëty.

²⁵Ko yë wintsëntëjk nijawëtëty ko tëë nkajpxëm nmëtyakëm tsojk mniminëtëty ets myajtëwëtëty wi'ix të nmëtyakëmë ets wi'ixës të xy'ënëëmën, e mijts tëë myajtukwinwanë ko myajnimä'kxa'any, nëjkxëp myaj'ënëëmë ets tëkokyë winë xynyimëtyakta'ajëty.

²⁶E mijts jëtu'un xy'ëtsowëty ko yë'ëjës të xypyëjktsoy ets ka'ap jatëkok jam myajkäxëty ma Jonatán yë tyëjkën këtiipë jam m'ookëty.

²⁷Ojts ënätyë jyänty myintë yë wintsëntëjkëty ma ënäty jam ja Jeremías yajpaatyën ets tyajtëëwtë winë. E yë'ë jëtu'un t'ëtsooy tä ënäty ja yajkutujkpë të y'ënë'ëmxëtyën. Ënät yaj'ëxmajtsy ets ka'ap ojts pën y'ëkyajjotkëjxënë ko myëtyaktë, ni pën ënäty të tkamëtoy tii nyimëtyaktën.

²⁸Yë Jeremías jam ojts tsumy matsy jyaak ijty ma këwent'ajtpë y'itën, koonëm ja Jerusalén yajnitëjkëy.