Read Biblia Mixe de Quetzaltepec Jeremias 39 Bible Online

Jeremias 39 - Biblia Mixe de Quetzaltepec bible

Jeremias 39

¹Majk po'o ënäty y'apety ja mëtaxtujk jëmëjtpë ma yajkutukyën yë Sedequías jam Judá, jää ojts yë Nabucodonosor, yë Babilonyë yajkutujkpë, tnija'ty yë Jerusalén kajpn ets tyajnatujky.

²Ma tyaxtujk anyën ja taxk po'opë, ma mëmajktu'uk jëmëjtpë tyu'uye'eyën, ma ënäty yajkutukyën yë Sedequías, jää ojts tyëkë ja mëtsip jam ma Jerusalén kajpnën,

³mëët tëkokyë ja Babilonyë tsiptuunpëtëjk mëti'ipë mëj'äämpy ijtëpën ets jam nyäpyëjktakëtë ma ja kajpn yajnitëkën itkujkytsyow. Tam ja mëti'ipë xyëëwajtypyën Nergal-sarézer, samgar-nebó, Sarsequim, wintsën y'ity ma ja kutujktaknën ets ja wiinkpë mëti'ipë xyëëwajtypyën Nergal-sarézer, nän wintsën y'ity.

⁴Ko yë Sedequías yajkutujkpë ets tsyiptuunpëtëjk t'ijxtë tii tuunëp jajtëp, ënätyë pyëtsëëmtë kajpnjoty, koots ojts kyä'äktë, jamtsow nyajxtë ma ja pëjykyamjotmën mëti'ipë yajkutujkpë jyä'ä'ajtypyën, ma ja tëjk'aawën mëti'ipë potsy akujk yajpatpën ets tpëjktë ja tu'u mëti'ipë nëjkxpën ma Jordán joyjyotën.

⁵E ja caldeo tsiptuunpëtëjkëty ojts y'ixëtë ets pyatso'onëtë. Jam yë Sedequías yajnajtspatëy ma ja joyjyotën mëti'ipë Jericó nyitënääpyën. Ënät yajmajtsy ets ojts yajmënëjkxy ma ja Nabucodonosor yajkutujkpë yajpaatyën jam Riblá, ma Hamat y'itjotmën. Jam yë Nabucodonosor ojts tni'ënä'ämë ets Sedequías yë y'u'unk y'ëna'k yajyo'kpujxta'atëty ets tëkokyë yë jyä'äy mëti'ipë ënäty jyiiky'äjtyp myëku'uk'ajtypyën e yë'ë wintuuy ojts y'o'kta'atë.

⁷Yë Sedequías ojts yajni'ënä'ämë ets wyiintsaa yajjuutëty ets atsumy kë'ëtsumy nyëjkxëty mëët yë pujxn aats jam Babilonyë.

⁸Yë Caldeo ja'ayëty ojts tjëënmo'otë ja kutujkëntëjk ets ja ja'ay ja jyëën tyëjkëty mëti'ipë jamën kajpnjotm, ojts tjijtë'kta'atë ja potsy mëti'ipë ja Jerusalén kajpn nyapots'ajtypyën.

⁹Ok yë Nebuzaradán, tsiptuunpë wintsën, mëti'ipë nyiwintsën'ajtypyën ja këwent'ajtpëtëjk mëti'ipë ja yajkutujkpë kyëwent'ajtëpën, ojts tmënëjkxta'ay tsumy matsy ja ja'ayëty jam Babilonyë, jëtu'un mëti'ipë ënäty kajpnjoty të wyë'ëmtën ets mëti'ipë të tpuwa'akëtën ja Caldeo ja'ayëty; tu'kë'ëyë ja naax kajpn tyajnëjkxtaay tsumy matsy.

¹⁰Yi'iyë ojts tyajwë'ëmy ma Judá y'itjotmën yë ëyoopëja'aytyëjk ets mëti'ipë ka'ap tiituunk tmëët'atën. Jä'ä xëëw yajmooytyë ja tsatsymkyam ets ja naax kam ma yu'utëty tyuntëtyën.

¹¹Yë Nabucodonosor Babilonyë yajkutujkpë, ojts tukmëwë'ëmy yë Nebuzaradán ya'atë ënä'ämën wi'ix tmëët'atëtyën ja Jeremías ets t'ënëmaay:

¹²Mijts ntuknipëjkpy ets xykyëwent'atëty yë Jeremías, këtii nëkoo ëxaty xytyunëty xy'ënëëmëty, ni'ikyë xymyo'ojëty tii mtimy'amëtoowëpën.

¹³Ënät yë Nebuzaradán mëët yë Nebusazbán ets Nergal-sarézer ets tëkokyë mëti'ipë ënäty nyiwintsën'ajtëpën yë tsiptuunpëtëjk,

¹⁴tni'ënä'ämëtyë ets nëjkx tyajpëtsëmtë yë Jeremías ma jap tsumy matsy y'ityën ets yë'ë Guedalías tuknipëjktë ets t'ixëty tkëwent'atëty. Ya'atë Guedalías yë'ë Ahicam yë myaank, yë Safán y'ok'u'unk, jam ojts ja Jeremías tyajnëjkxtë ma Guedalías ja tyëjkën. Jëtu'un'äämpy yë Jeremías ojts wyi'imy jam tsënääpyë ma ja naax kajpnën.

¹⁵Tamnëm ënäty ja Jeremías tsumy matsy yajpaaty ma ja këwent'ajtpë y'itën, ko ojts ja Wintsën myëkäjpxyë ets y'ënëmaayë:

¹⁶Nëjkx ënëëmë yë Ébet-mélec, yë Etiopíë ja'ay: Yë Wintsën mëti'ipë maaytyääyëpën winë, mëti'ipë yë Israel ja'ayëty Tios'ajtëpën, jëtu'un y'ënä'äny: Yë'ëjës ntunäämpy mëti'ipës ojts nikäjpxyën wi'ix ya'atë naax kajpn ëxëëk jyata'anyën. Ko ënäty o'ktëy jyäty nëjkxëp xy'ixy.

¹⁷E ëjts mijts nkuwa'anäämpy këtiipë wi'ix mjatëty ma tääpë ja'ayëtyën mëti'ipë mtsë'këpën. Ëjts Wintsën, ëjts ënaanp.

¹⁸Ëjts mijts nyajtso'okäämpy këtiipë pën myaj'ookëtëty, mjaakwë'ëmëp mijts juuky, jä'ä ko tëëjës xytyuk'ijxpety. Ëjts Wintsën, ëjts ënaanp.