Read Biblia Mixe de Quetzaltepec Jeremias 4 Bible Online

Jeremias 4 - Biblia Mixe de Quetzaltepec bible

Jeremias 4

¹Jëtu'un yë Wintsën y'ënä'äny: Mijts Israel, pën mjootwinpitaanp jatëkok, ëjts jëtu'un xynyiwinpitëp, ënät jëtu'un tyunëtëty jyatëtëty pën myajjëkämkekpy yë wiinkëtypë m'awinax mëti'ipë m'ëwtatypyen ets pën ka'ap xy'ëkpuwa'ktutnës,

²jäänëm tëy, jyëkyäpëp xykyajpxpaatëty yë nxëëwës ko ënäty tii xynyikäjpxy mëët yë tëyajtën, mëët ja oypyë ja paye'eyën ets oypyë tu'unën kajpxën. Nëjkxëp ja ja'ay tukxoonta'aktë ja nxëëwës ma ja naax kajpnën.

³Jëtu'un yë Wintsën t'ënëmaay yë Judá ja'ayëty ets Jerusalén ja'ayëty: Jam mtajtëty mjääptëty ma ja'ay ka'ap yë naax tyajtunyëmën; këtii jam m'ëk nipnëtëty apnyjyotm.

⁴Miitsëty Judá ja'ayëty ets Jerusalén ja'ayëty, ja'amyätstë ko ëjts Wintsënajtp. Pëjkta'aktë jap mjootjoty mwinma'anyjoty ja käjpxytyu'unën mëti'ipë të ntu'unëmën; këtiipë tsyooypyëkëty jëënën ja ntsip n'äkës ko ënäty tëkatsy tii xytyuntë ets ka'ap tjëkyäpëty wi'ix pyi'itsëtyën.

⁵Nikajpx nimëtya'aktë jam Jerusalén ets jam Judá, tukxu'uxtë yë pujxnxuxn ma tu'kë'ëyë naax kajpnën, jëtu'un mëk mya'axtëty mjoktëty: Ja'amtë. Tsojk ntu'ukmujkëmë. Ja'amta'ayëm ma ja naax kajpnën mëti'ipë ta'tspëky yajpatpën ets këwent'aty, ijtpën.

⁶Yujktëytyë yë mwit wintëyëty ets jam ma Sión kajpn xyajnajts'ixëtëty; ixta'atë maa mkäktso'oktëtyën, këtii mpo'kxtë. Jä'ä ko nyajminäämpyës jam anëkëjxmtsow yë ëyo'on jotmay etsës winë nyajkutëkooytya'aja'any.

⁷Jëtu'un ja mmëtsip të mnitsoonyë tä kaa pyëtsimyën ma myä'äy pyo'kxyën, tää ja wyinkony mëti'ipë yajkutëkoyäämpyën ja naax kajpn; tëë ja nyaax kyajpn t'ëxmatsy ets tyajkutëkoyä'äny ja mnaax mkajpn ets xit ko'ow tuunta'aja'any.

⁸Paaty miitsëty, tuktëkëtë ja mwit mëti'ipë kuumpën u'kxpën ets jë'ëtë ya'axtë tä jeexyë mpëkëtën, jä'ä ko yë Wintsën yë y'äkë ka'ap tu'ukyë të xytyim'ëxmajtsëmë.

⁹Jëtu'un yë Wintsën y'ënä'äny: Ko ënäty jëtu'unpë xëëw jëmëjt tukja'ty, yë yajkutujkpëtëjk ets kopktëjkëty nëjkxëp tsyë'këtya'aktë, yë teetytyëjkëty ets käjpxynyajxpëtëjkëty nëjkxëp tsyëtyuuypyëjkta'atë.

¹⁰Ënätës të n'ëna'any: Aay Wintsën, ix ja'ay nëkoo xywyin'ëëny mëti'ipë jam tsënaaytyëpën Jerusalén. Je'eyë nëkoo të xytyukwinwanë ko jotkujk'ajtën tpaata'antë, yë'ëjëty jëtu'un jam jyatë kyëpätë tä jeexyë të yajyo'ktsujkta'atën.

¹¹Ko ënäty jëtu'un ja xëëw jëmëjt tukja'ty, tääts nëjkx ja Jerusalén ja'ayëty yaj'ënëëmëtë: Mëkjëënpoj miimp mëti'ipë jam tso'onpën të'ëts'itjotm ets nitëyë nyijkxy maas yë nnaax nkajpnën. Ka'ap yë'ëjëty tëtykpyoj mëti'ipë yajtukwinpojpën yë tsajpmok;

¹²ja mëkpoj mëti'ipës nyajminäämpyën, mëkës nyaj'ita'any, ka'ap tjëkyepy ets tsajpmok yajtukwinpojëty, yë'ëjës ntukwinmëtowantëp jënu'un ëyoowtaknjoty y'ita'antën.

¹³Ëk'ixtë wi'ix myinyën yë mëtsip tä tu'uk yootsën, yë pyujxnwintëkäämpë jëtu'un yaj'ixy wyinkontë pojxujtykyën, yë kwaay jëtu'unyë yaj'ijxnë kyääkë'knëtë witsnën. Janty mon janty tuk ëëtsajtëm nyajpatëmë, tëë ntëko'oyëmë.

¹⁴Miitsëty Jerusalén ja'ayëty, yaj'oyëtë mjot mwinma'anyëty ets mnäyajtso'okëtëty. ¿Tii jekyëtën yi'iyë xymyëmaya'an xymyëtaja'antë ëxëëkpë jot winma'any?

¹⁵Jam tsyo'ontä'äky ma Dan y'itjotmën ets tyimja'ty jampaat ma Efraín y'itjotmën yajmëtoy'äty ja ëyo'on jotmay:

¹⁶Tukmëtowtë yë naax kajpn ets Jerusalén kajpn ko jëkäm të nyitsoonyë yë myëtsip ets yaxp jojkp myintë mëti'ipë yajkutëkoyantëpën yë Judá ja'ayëty.

¹⁷Jëtu'un yë Judá nyatuka'any tä ja'ay kam tkëwent'atyën, mëët ko tëëjës xykyäjpxy kyumëtoownaxy. Ëjts Wintsën, ëjts ënaanp.

¹⁸Mëët ko yi'iyë të xytyuny mëti'ipë ëxëëkën, paaty o'ktëy të mjaty; mëët ko të mtuuntëkoy, paaty të mjoottëkëty ja ëyo'on ets tëë ja mwinma'anytyëkoy.

¹⁹Janty yäjts janty pojpës mëët yë pëjkën ijxën. Ëxëëkëmës njawë yë njot. Ka'apës nijënu'un nnäjyawëty npo'kxy, ninu'unës amonyë nka'ity. Tëës nmëtoy ko ja'ay pujxnxuxn tukxu'uxy, tsip y'awantëp, jëtu'un ya'axtë jyoktë tä ja'ay tsyiptuna'anyën.

²⁰Aakyë'ë yajmëtoop ëyo'on jotmay tyunyë jyätyë; xit ko'ow ja naax kajpn yajpaaty. Ajotkumonë të mya'ta'ay ja ijtakn ma ja ntsiptuunpëtëjkës y'itën, ja ijtakn mëti'ipë witnikojyën.

²¹¿Jënaak xëëw jënaak jëmëjt jëtu'un y'ita'any tääpë wit wintëy ets jënu'un pyoxa'any ma yajmëtowa'anyën ja pujxnxuxn mëti'ipë nyikäjpxypën ja tsip?

²²Jëtu'un ja Wintsën y'ënä'äny: Ëxëëk kunëpap yë nnaax nkajpnës yajpaaty, ka'apës xy'ixy'äty. Yë'ëjëty jëtu'un tä u'unk ëna'kën mëti'ipë ka'ap jyä'äkyukën ets tä u'unk ëna'kën mëti'ipë ka'ap tii tmëmay tmëtajyën. Jëtu'un yaj'ixy nijënu'un yowë tsip tkatimjyawëtë ko tii tuuntëkoytyë; e ko tjatuna'antë ja oypyë ka'ap tmëwinma'anypyaatë.

²³Ojts n'ixyës ja naaxwiinyëtë ko kajtëm nitii ijxën oypyë tmëëtëty; ojts n'ijxyës ja tsajp, je'eyë kootspuknë kyëxë'ëky.

²⁴Ojts n'ixyës yë kopk ko yu'kxtë, aakjëtu'un ja tun kopk aak tsëtyuuytyëp.

²⁵Ojts n'ixyës ko ka'ap maa ja'ay, ko tëë ënäty ja joon jëyujk tsajpjotmëpë kyäkta'atë.

²⁶Ojts n'ixyës ja pëjykyamjot, aanë'ëk tëëtsë'ëk të y'awinpijta'atë, tu'kë'ëyë ja naax kajpn xit ko'ow ënäty të jyajta'atë. Ja Tios ja tsyip y'äkë ënäty jëtu'un winë të tyajjajta'ay.

²⁷Jëtu'un ja Wintsën y'ënä'äny: Ëxëëk ja naaxwiinyëtë jyata'any, je'eyëp ko ka'apës ntimyajkutëkooytya'aja'any.

²⁸Mon tuk ja naaxwiinyëtë y'awinpita'any ets ja tsajp jëtu'un yaj'ixa'any tä jeexyë o'kën tëko'oyën të y'ityën. Ëjts tëëjës njanikäjpxy, ni pën të kyajootwinpity; tëëjës ntuknipëjktaakë tiijës ntunäämpyën ets ka'ap tjëkyepy n'ixtëkëwa'akëtyës.

²⁹Jëtu'unyë ja'ay kyäkpëtsëëmta'atë ko tmëtowtë ja mëtsip myiny kwaaykyijxy ets aakmëët ja tyi'pxnëty; jam ujtsjotm kyukäkëtya'atë ets mëti'ipë jam tsaatunkëjxm. Tëë ja naax kajpn tukpëyë'ktuta'atë; ka'ap jam pën y'ëktsënaaynyë.

³⁰E mijts naax kajpn, xit ko'owpë myajpaatyën, ¿tii nyawa'anëty oy uky tsyapts mjanäxyoxyë? ¿Tii nyawa'anëty oy jam ma mwiin mjëjpën xyjyapëjktä'äky pu'ts pujxn? ¿Tii nyawa'anëty oy mwiin yëk xyjyakoy? Nëkoopë janty'oy mnäkyoyë, ja mëti'ipë määpy mtäjpyën mtsojkëp mja'awëyëp, ka'ap m'ëk tsojkënë, mijts o'kën yi'iyë mjëjp'ijxnëp.

³¹Jëtu'unës nmëtoy ja ja'ay jyi'iy yä'äxy tä tu'uk to'oxytyëjk jyi'iy yä'äxyën mëti'ipë u'unk maay yaja'täämpyën naaxwiiny; yë'ë Sión ja'ayëty jëëytyëp yaxtëp, jyaxajë'ktëp ja kyë'ëjëty ets jya'ëna'antë: Pa'ëyoowtëkës ka'apës mëpaat xyaj'ooktë yaja'ay'o'kpë.