Read Biblia Mixe de Quetzaltepec Jeremias 46 Bible Online

Jeremias 46 - Biblia Mixe de Quetzaltepec bible

Jeremias 46

¹Ojts yë Wintsën tmëkäjpxy yë Jeremías ets tukmëmëtyäky wi'ix jyata'antën wiink kajpn.

²Jëtu'un ojts yë Egiptë kajpn yajnikäjpxy ets yajkutujkpë Necao mëët yë tsyiptuunpëtëjk, ma ënäty mëmajktaxk jëmëjt ëka'any yajkutukyën yë Joaquim, yë Josías yë myaank mëti'ipë jam Judá ënä'ämpën; ojts tsyiptuny jam Carquemis mëët yë Nabucodonosor, yë Babilonyë yajkutujkpë, jam winkon ma ja Éufrates mëjnëëjën. Yë Carquemis ka'ap ojts myëtä'äky.

³Jëjp'ixy yaj'itë mëti'ipë mnätyuk'akëëytyujkëtëpën. Tsiptuntë ënät.

⁴Niwëëntë ja mkuwaayëty kwaay ënyääpyë. Tukwä'tspätë ja mkuwaayëty. Pëjkta'aktë yë mpujxnkujupëty ets näwyaatswitsëtë. Jëjp mä'ätë mku'umënëty. Nätyukxoxëtë ja mpujxn nijänëty.

⁵E ¿tiijës n'ijxyp? Tsë'ëkë tsë'ëkë jyaak winpitë. Jëtu'unyë kyääkwa'kxta'atë mëti'ipë tsip'ixyëtyën ko ka'ap y'ëkmëtaknëtë; pëyi'ikyë jyänty kyä'äktë, ni pën kyanäjyë'ixyë. Aak kutsë'ëkë oy myaa'ajnë. Ëjts Wintsën, ëjts ënaanp.

⁶Ka'ap tjëkyepy kyä'äktëty mëti'ipë pe'tymyëtyën, ja'ay mëti'ipë jotmëkëtyën ka'ap tjëkyepy maa nyëjkxtëty. Jam anëkëjxmtsow ma Éufrates mëjnëëjën, jam të y'anäpëtë ets të kyëtawtë.

⁷¿Pën tääpë yeekyën jëtu'un tä Nilë nëë kyomyën, jëtu'un tä nëëkom nyämyëjënäkyën?

⁸Egiptë jëtu'un yä'kp tä Nilë nëë kyomyën, tä nëëkom nyämyëjënäkyën. Jëtu'un ja Egiptë ja'ayëty y'ëna'antë: Nyajnikoompätantëpës yë naaxwiinyëtë, nyajkutëkoyantëpës yë naax kajpn ets nyija'ay mëti'ipë ja naax kajpn tyuk'ijt tyuktsëna'ayëtëpën.

⁹Wä'än tnëjkxtë mëti'ipë kwaay tyuk'u'unyääytyëpën. Wä'än tsoontë yë pujxnwintëkäämpë. Wä'än tu'utëkëtë mëti'ipë tsip'ixyëtyën: yë Etiopiiyë tsiptuunpëtëjkëty ets Lidyë tsiptuunpëtëjkëty, mëti'ipë yajxon tyukjajtëpën wi'ix ti'px tyajtuntëtyën.

¹⁰Ya'atë xëëw jëtu'un xyëëwajtyp, Wintsën mëti'ipë maaytyääyëpën winë, ya'atë xëëw tuunwinpita'any ijxtëm yë myëtsip të tyunyën. May yë ja'ay kupuxy y'ooka'any koonëm kyu'uxëtëty, koonëm myu'ukëtëty. Yë Wintsën mëti'ipë maaytyääyëpën winë, yaj'ookäämpy yë ja'ay.

¹¹Mijts Egiptë kajpn, nëjkx tsooy ixta'a jam Galaad. E oy jënu'un mjatsooypyätëty, ka'ap mtso'oka'any, jä'ä ko mijts ni tii tsooy mkayajtso'oka'anyë.

¹²Yë naax kajpn tëë tnijawëtë ko mijts o'ktëy të mjaty të mkëpety, naaxwiinyëtë apëtsëmy të yajmëtoy ko të xymyëyä'äxy ja ëyo'on jotmay.

¹³Ënät ja Wintsën ojts tmëkäjpxy ja Jeremías käjpxynyajxpë ma ënäty ja Nabucodonosor, Babilonyë yajkutujkpë tninëjkxyën ja Egiptë kajpn ets tnitëkëja'any:

¹⁴Tuk'ëwaanëtë yë Egiptë ja'ayëty, Migdol ja'ayëty, Menfis ja'ayëty ets Tafnes ja'ayëty: Jëjp'ixy myajpaatëty, a'ijxp jëjp'ijxp m'itëty. Jä'ä ko ëyo'on jotmay mtukminëtëty, jëtu'un myiny tä tu'uk ja'ay tmëminyën yë tyiypyujxn ets tkupuxa'any ja'ay mwintuuy mpë'aay.

¹⁵¿Wi'ix ko të kye'eky yë mtsajpkaa mëti'ipë m'ëwtajtypyën? ¿Tii ko ka'ap twintänë ëyo'on jotmay? Jä'ä ko ka'ap të nyajmëtä'äkyës; jëtu'unës të ntuny tä ja'ay potsy tjijtë'ëkyën.

¹⁶Yë mtsiptuunpëtëjk je'eyë y'anäpëtë ets kyëtawtë, nixim niyam nyäy'ëna'anëtë: Tsojk nkäkëmë, nikë tim ja'amënë ma nkajpn'ajtëmën, tsojk tsip ntimkyukäkëmë.

¹⁷Tääts xytyimtijnëtëty ja Egiptë yajkutujkpë: Tääpë faraón nëkoo jyaak ne'emy; ka'ap tii të tuny ma jeexyë të jyotmëk'atyën.

¹⁸Ëjts mëti'ipë yajkutujkpën, yë Wintsën mëti'ipë maaytyääyëpën winë, nkë'ëmjuukyajtënës ntukajpxpejtyp: Jëtu'un tä yë Tabor kopk ni'ik këjxm yaj'ixyën kopkjoty, tä yë Carmel kopk mejy'ëkë'ëmpë yaj'ixyën jëkämpaat, jëtu'un ja mmëtsip yaj'ixa'any mëti'ipë mniminanëpën.

¹⁹Jam mnäjyëjp'ixëtëty ko ënäty mkajpnjoty myajmëtso'onëtë, miitsëty Egiptë ja'ayëty, jä'äxë ko yë Menfis kajpn aanë'ëk tëëtsë'ëk nëjkx wyinkëtä'äky, xit ko'ow wyë'ëma'any ets ni pën jam kyatsëënëja'any.

²⁰Yë Egiptë kajpn yë'ë mëët n'ijxkijpxmëty tu'uk yë tsajpkaato'oxy, jëtu'un jyata'any tä jeexyë tu'uk aktsa'ak të nyitsoonyën jam anëkëjxmtsow ets të y'ëxmëtsu'utsëty.

²¹Ja tsyiptuunpëtëjkëty mëti'ipë mëjuy tuuntëpën, ni'kxëty ets mëjjëty jyayaj'ixtë, yë'ëjëty je'eyë kyä'äka'antë ets ka'ap tmëmëta'aka'antë ja ëyo'on jotmay, jä'ä ko yë'ë miimp wiinkoonp ja ëyo'on ma ëxëëk jyata'antën ets yajtëytyuna'antë.

²²Jëtu'un nëjkx yë Egiptë ja'ayëty kyä'äktë tä tsa'any y'amu'uyën ko kye'eky ko ënäty ja myëtsip tyukja'tyë, jëtu'un yë myëtsip pyuxa'any kya'atsa'anyë tä ja'ay aay kepy tpuxy tka'atsyën,

²³Pyujxë'kta'ajantëp yë aay kepy yuukjotypë. Ëjts Wintsën, ëjts ënaanp. Ja mëtsip jëtu'un nyimay'ata'antë tä maymyu'ujën, ni pën nëjkx kyamayë tmëtsyowëty.

²⁴Tsëtyu'un mëët yë Egiptë kajpn wyë'ëma'any, yë'ë mëmëta'akanëp yë naax kajpn anëkëjxmtsowpë yajpaatyën.

²⁵Yë Wintsën mëti'ipë maaytyääyëpën winë, mëti'ipë yë Israel ja'ayëty Tyios'ajtëpën, jëtu'un y'ënä'äny: Ëjts ntëytyunäämpyës yë Amón, mëti'ipë yë Tebas ja'ayëty y'ëwtajtëpën, ntëytyunäämpyës yë Egiptë ja'ayëty mëët ni'ëmukë yë tyiosëty ets yajkutujkpëtëjk ets y'ënä'ämpëtëjk ets ni'ëmukë mëti'ipë tyuk'ijxpäjtëpën.

²⁶Ëjts nyajkutukäämpy ets myëtsip myëmëta'akëtëty, ja kutsë'ëkëpë jampë tsyoontën Babilonyë, mëti'ipë yajkutujkpë Nabucodonosor kyejxypyën. Kom oknëm nëjkx yë Egiptë jatëkok wyintuky mëët yë ja'ay. Ëjts Wintsën, ëjts ënaanp.

²⁷Këtii mtsë'ëkëtëty, miitsëty yë Jacob y'u'unk y'ok mëti'ipës xymyëtuuntëpën, këtii mtsë'ëkëtëty miitsëty Israel ja'ayëty. Ëjts miitsëty nyajtso'onkantëp ni'ëmukë mëët yë m'u'unk m'ëna'këty oy ënäty jam muum wiink naax wiink kajpn myajpaatë tsumy matsy. Nëjkxëp jatëkok jëna'a jotkujk mjuuky'atë, ni pën mka'ëtsë'ëkëtëty.

²⁸Ëjts Wintsën, jëtu'unës n'ëna'any: Këtii mtsë'ëkëtëty, miitsëty yë Jacob y'u'unk y'ok mëti'ipës xymyëtuuntëpën, jä'ä ko ëjts yajpatpës mëët miitsëty. Nyajkutëkoyäämpyës ja naax kajpn maajaty ënäty të nwojpwa'kxtën. E miitsëty ka'ap nëjkx nyajkutëkoytyë; yi'iyë nëjkx ntukumëtowtë yë mtuuntëko'oy mkajpxtëko'oyënëty tä ënäty mpaatëtën. Ka'ap jëtu'unyë nyaninaxa'any ja mtuuntëko'oyënëty.