Read Biblia Mixe de Quetzaltepec Jeremias 48 Bible Online

Jeremias 48 - Biblia Mixe de Quetzaltepec bible

Jeremias 48

¹Yë Wintsën, mëti'ipë maaytyääyëpën winë, mëti'ipë ja Israel ja'ay Tyios'ajtëpën, tëë tnikäjpxy wi'ix jyata'antën yë Moab ja'ayëty: Janty mon janty tuk yajpaaty yë Nebo kajpn ko të kyutëkooynyë. Yë Quiriataim kajpn o'ktëy të jyäty të kyëpety, yë nyaax kyajpn mëti'ipë ënäty ta'tspëkyën ets këwent'atyën, tëë jyijtë'kta'ay ja pyotsy.

²Tëë kyixy nyäxy ma mëj'äämpy të y'ityën yë Moab. Jam Hesbón tam tnipëjktaakëtë wi'ix yë Moab kajpn y'atëkoyëtyën. Mits Madmén näjyëtu'un mkutëkoyä'äny ets ja tsip ka'ap m'ëxmatsa'anyë.

³Jam Horonaim yë'ë jam yajtukyax yajtukjojkëp: Wi'ix kyutëkoyä'änyën ja naax kajpn ets wi'ix xit ko'ow jyata'anyën.

⁴Xit ko'ow ja Moab të jyäty; ja jyi'iyën yaxënëty jampaat Soar yajmëtoownë.

⁵Jëëpy yaxp nyëjkxtë mëti'ipë pa'tëjkëtëpën jam Luhit; janty jëëy janty yaxtëp ja ja'ayëty mëti'ipë këtaktëpën jam Horonaim.

⁶Kä'äktë. Wä'än tke'eky pën jyëkyejpyën kyä'äkëty. Jëtu'un mnäpyëjkta'akëtëty tä yë zarsa aatsën jampë wintë'ëtstum yajpaatyën.

⁷Miitsëty Moab ja'ayëty, yë'ë të xytyuk'ijxpätë ko të mjotmëk'atë ets ko mkumeeny'atë, e pyätyp ja xëëw jëna'a myajmëmëta'aka'antën. Yë Quemós mëti'ipë m'ëwtajtëpën, yajmënëjkxaanp wiink naax wiink kajpn, mëët ja teetytyëjkëty ets ja ja'ayëty mëti'ipë mëj'äämpy ijtëpën.

⁸Itaanp ja o'kën tëko'oyën ma kajpnën, ni pën kyatso'oka'any; ja tun kopk xit ko'ow jyajta'aja'any. Ëjts Wintsën, ëjts ënaanp.

⁹Jam këxja'atë tsaakëjxm ets xytyuknijawëtëty yë Moab ko kyutëkoyä'äny, ko xit ko'ow yë nyaax kyajpn jyata'any ets ka'ap jam pën tsyëënëja'any.

¹⁰Poky yë ja'ay wyi'imy mëti'ipë ka'ap winë aaw winëjot tunyën mëti'ipë ja Wintsën të tyuk'ëne'emyën. Poky yë ja'ay wyi'imy mëti'ipë ka'ap jyam'atyën ko ja o'kën y'itëty.

¹¹Yë Moab ja'ayëty jotkujk xëmë të jyuuky'atë, nijëna'a muum të kyanëjkxtë tsum matsy wiink naax wiink kajpn. Jëtu'un tä tu'uk yë tsatym nyëë tëëpë nyimaanaxyën tu'tsjotypë y'ityën ets ka'ap ëpëky yajtäämnaxy wiink tu'tsjoty, xëmë xu'kx jyawë ets pa'ak xëmë y'ity.

¹²E yë Wintsën jëtu'un y'ënä'äny: Ko ja'taanp ja nyixëëw nyipo'o jëna'a nëjkx wiink ja'ay myinyën ets nëjkx täämnaxy tääpë tsatym nyëë ma wiinkëtypë tu'tsën, ja tu'ts tukwa'atsëtypë nëjkxëp yajtukpu'ujëtya'atë.

¹³Jää nëjkx ja Moab nyäjya'awëpyäätyë ko kajtëm ja wyintsën Quemós të pyutëkëty ijxtëm jyapaatë'atyën, jëtu'un ijxtëm yë Israel ja'ayëty ojts nyäjyawëtën ko ja tios Betel ka'ap pyutëjkëyëtë, mëti'ipë ënäty xëmë të tuk'ijxpätën.

¹⁴Këtiipë y'ëna'antëty yë Moab ja'ayëty: Ëëtsëty jotmëk, tsip'ixy, ka'apës nyajmëta'aktë yë nmëtsiptëjk.

¹⁵Tää tyimwinkony mëti'ipë ja Moab ja'ay yajkutëkoyanëtëpën ets ja nyaax kyajpnëty; yë'ëpaat y'o'kta'aja'antë yä'äy ëna'k mëti'ipë je'eyë juuky'ajtso'ontëpnën. Yë'ë jëtu'un ënaanp yë Wintsën Yajkutujkpë mëti'ipë maaytyääyëpën winë.

¹⁶Winkoomp ja Moab kajpn ja y'ëyo'on jyotmay, poj'am ja ëyo'on tyukja'ta'anyë.

¹⁷Nitëkokyë miitsëty naax kajpn jënu'un yë Moab kajpn xymyëwinkon'atën, jënu'un xynyijawëtën wi'ix yë Moab kajpn mëj'äämpy të y'ityën, nijë'ë niya'axtë, jëtu'un m'ëna'antëty: Ix ja kyutujkën mya'taaynyë, mëk ets mëj'äämpy të y'ity.

¹⁸Mijts Dibón kajpn, jënak ma myajkutukyën ets mnaaxwäätsëty naaxkëjxy, jä'ä ko mëti'ipë Moab kajpn yajkutëkoyanëpën tää mmëwinkonyë, tëë tyajkutëkooytyä'äy ja mnaax mkajpn mëti'ipë ënäty ta'tspëky yajpatëpën.

¹⁹Mijts Aroer kajpn, jam tu'u'am wa'ak'oyë ets xy'ixëty; yajtëw yë ja'ay mëti'ipë juuky të wyë'ëmtën tii të tyuny të jyätyë.

²⁰Yë Moab kajpn mëj këjää të tsyë'ëkë. Jyëkyejpy xynyijë'ë xynyiya'axtëty. Nëjkx jam nikajpxtë ma Arnón mëjnëëjën ko yë Moab kajpn të kyutëkoy.

²¹Ko tëë ja ëyo'on tyunyë jyätyë jam nijoykyëjxm ma ja kajpnën mëti'ipë yajtijtëpën: Holón, Jahas ets Mefáat,

²²Dibón, Nebo, Bet-diblataim,

²³Quiriataim, Bet-gamul, Bet-meon,

²⁴Queriot, Posrá ets maajaty ja kajpnën mëti'ipë Moab nyitënääpyën wiinkonëtypë yajpaatyën ma yë'ëjën.

²⁵Jëtu'un yë Wintsën y'ënä'äny: Tëë ja Moab myëjaawkukëxë ets tëë ja kyutujkën y'atëkoy.

²⁶Yajmukpëkëtë yë Moab, jä'ä ko tëë yë Wintsën tkäjpxykyumëtoownaxy. Ënät yë Moab tuk'yätsëja'any yë y'iitsy ets ja'ay tyukxi'ika'anyë.

²⁷Mijts Moab je'eyë ijty xynyëxi'iky tyukxi'iky yë Israel ja'ayëty ets ëxëëkëty ijty xymyëkäjpxy, jëtu'un ijty xy'ixy toonpë mä'tspën, ¿këtiijë?

²⁸Moab ja'ayëty tim pëtsëëmta'atë jap kajpnjoty; nëjkx jam mtsëënëtë tsaakopkëjxm ets jëtu'un jam muum mnäkyukonëtëty tä joon jëyujk pyä'än t'oytyunyën tsaakäätswiiny.

²⁹Nnija'awëm wi'ix yë Moab kajpn amëj akëjxm nyäyajnaxyën: ko y'iy kyäjpxy, këtii pën myëjëty; në'ix pa'at'ix nyäxy tyëkë ets ni pën tkamëj'ixy.

³⁰Näyjyëtu'un yë Wintsën wa'ats tnijawë wi'ix ëxëëk myäy tyäjyën ets wi'ix je'eyë kyu'awakëtyën ets nitii tkatuny,

³¹paatykyëjxmës nnijë'ëja'any nniya'axa'any yë Moab ja'ayëty ets Quir-heres ja'ayëty, jä'ä ko ëxëëk jyata'antë.

³²Ni'ik nniya'axa'any mijts, tsatsymkyam mëti'ipë jam yajpatëpën Sibmá, këtiinëm yë Jazer kajpn. Jëtu'un ijty mijts myaj'ixy tä jeexyë mkepy xyajyonyën ets jampaat nyasxajë Jazer. Yë mxe'enty nyinajxyp ijty yë mejy ets jyä'ty Jazer. E tyam, yë m'tsatymkyam tëë kyutëkooytyä'äy.

³³Tyam ka'ap pën y'ëk'ëëw y'ëkyaxnë akujk jotkujk jam Moab. Tëë y'akëjxënë ja tsatym nyëë ma ijty kom yajpëjkë'ëkyën. Tyam ka'ap pën ja tsatym t'ëkwintä'änë ets ka'ap pën y'ëk'ëëw y'ëkyaxnë akujk jotkujk.

³⁴Jëëytyëp yaxtëp yë Hesbón ja'ayëty mëët yë pëjkën ijxën, tëë tnijawëtë yë Elalé ja'ayëty ets Jahas ja'ayëty; tëë tnijawëtë yë Soar ja'ayëty, yë Horonaim ja'ayëty ets Eglat-selisiya ja'ayëty, jä'ä ko yë'ëpaat yë nëëkopk të tyëtsnë mëti'ipë jamën Nimrim.

³⁵Jëtu'un yë Wintsën y'ënä'äny: Ëjts nyajkutëkoyäämpyës yë Moab ja'ayëty mëti'ipë tunkëjxm kopkëjxm tsënaaytyëpën, ma ja wiink tios ja tsyajptëjk yajpaatyën, mëti'ipë tyukwinjojktëpën ja poom jok.

³⁶Nmëmoompy nmëtujkpyës yë Moab ja'ayëty ets Quir-heres ja'ayëty, paatyës ntukwinxu'uxy yë tsajpkäpny xuxn, jä'ä ko tëë tyëkooytyä'äy ja wit meeny mëti'ipë të tjanipëjkpätën.

³⁷Tëë ja'ay nyäkyukä'pta'ajëtë, tëë y'awaay tjäjpta'atë; tëë kyë'ë tsujkta'atë ets tëë tuktëjkëtya'atë yë wit mëti'ipë kuump u'kxpën.

³⁸Ma ja tëjk kopkën ets në'ëjoty tu'ujoty jam Moab, aak jëëy aak yaxtëp yë ja'ayëty, jä'ä ko yë Moab piw nuuk të ntuunta'ayës jëtu'un tä ja'ay tu'ts tukpu'ujën mëti'ipë ka'ap y'ëktuunën. Ëjts Wintsën, ëjts ënaanp.

³⁹Nijë'ë niya'axtë yë Moab kajpn, atsë'ëk ajawëpë yajpaatyën. Nitsëtyu'un kutsëtyu'un ja jyëxk të tojpwinpity. Këtii y'ijxnëty të y'awinpity ets këtii tsyojknëty ma myënaax myëtsëpa'anën.

⁴⁰Jëtu'un yë Wintsën y'ënä'äny: Jëtu'un yë Moab yë myëtsip të nyiminyë käknmëët yowë, tä tu'uk witsnën.

⁴¹Oy jënu'un myëjkajpnëty ets oy jënu'un kyëwent'atyëty, ko ja myëtsip nyiminëtëty, o'ktëy tyuna'anyë. Jä'ä xëëw ja Moab ja tsyiptuunpëtëjk nëjkxëp yë tsë'ëkë tyajnaxy tä tu'uk yë to'oxytyëjk tsyë'ëkën ko u'unk maay tyajmina'any naaxwiiny.

⁴²Yë Moab kajpn ka'ap nëjkx y'ëk'yajtijnë Moab, jä'ä ko të xymyëtëkoyës ets të xynyipëtë'ëkyës maajës nxëëwatyën Wintsën.

⁴³Paaty ëjts maas nWintsën'atyën n'ëna'any, ëjts mëti'ipë Wintsën'ajtpën: Yë Moab kajpn jëtu'un nëjkx myëtsip pyajëtityë tä ja'ay ujtsjëyujk tmatsa'anyën, ëkë tä tu'uk yë ujtsjëyujk muum kyënaxa'anyën o'këntujp mëti'ipë yu'utsyën.

⁴⁴Mëti'ipë ënäty kyukekpyën ja ja'aymyajtspë, jutjoty nëjkx kyuka'anaxy; e mëti'ipë ënäty jutjoty pëtsëëmpën, jam nëjkx nyaskääkë ma yajxokyën, jä'ä koos ënäty jëtu'un kë'ëm ntëytyuunpyës ja Moab. Ëjts Wintsën, ëjts ënaanp.

⁴⁵Tëë mayjyä'äy myëjaawkëjxnë, jam t'ixta'atë tsoktakn Hesbón y'itjotm, ma Sihón yajkutukyën, je'eyëp ko jëën jam yä'ämp, jampaat jyä'ty ma Moab kyopk jotmën, yë Moab kajpn mëti'ipë je'eyë ëtëtsp ënaanpën.

⁴⁶Janty mon janty tuk myajpaaty mijts Moab kajpn. Mijts Quemós kajpn tëë mkutëkoy. Ja m'u'unk m'ëna'k ye'etyëjkpë to'oxytyëjkpë tsumy matsy të yajmënëjkxtë wiink naax wiink kajpn.

⁴⁷Je'eyëp ko nëjkxëpës ok jatëkok nyaj'oyë yë mjuukyajtën, mijts Moab; ëjts Wintsën, ëjts ënaanp. Ya'atë ëyo'on jotmay, yë'ë ojts yajtuk'ëwaanëtë yë Moab ja'ayëty.