Read Biblia Mixe de Quetzaltepec Jeremias 49 Bible Online

Jeremias 49 - Biblia Mixe de Quetzaltepec bible

Jeremias 49

¹Ma Wintsën tnikäjpxyën wi'ix jyata'antën yë Amón ja'ayëty: ¿Maa ënät ja Israel ja'ayëty ja y'u'unk y'ëna'këty? ¿Maa ënät ja mëti'ipë myëwë'ëmantëpën ja kuma'ayën? ¿Wi'ix ko ënät ja tios Milcom yë'ë Gad ja'ay nyiwintsën'atyë? ¿Wi'ix ko yë Amón ja'ayëty yë'ë jam tsyëënëtë ma Gad y'itjotmën?

²Oy ko jyëtu'unëty, ëjts, mëti'ipë Wintsën'ajtpën, jëtu'unës n'ëna'any: Jam ma Rabá kajpnën, ma Amón ja'ay tsyëënëtën, nëjkxëp tmëtowtë ko ënäty ja myëtsip t'akajpxtë ja tsip; xit ko'ow jyata'antë ets nyaax kyajpnëty nëjkxëp tyooytyä'äy. Ënät nëjkx jatëkok yë Israel ja'ayëty tpaatë ja nyaax kyajpnëty. Ëjts Wintsën, ëjts ënaanp.

³Jë'ë ya'ax mijts Hesbón kajpn, ko tëë ja Aí kajpn kyutëkoy. Nasyaaxëtë miitsëty to'oxytyëjkëty mëti'ipë jam Rabá kukajpnajtëpën. Tuktëkëtë ja mwit mtujkxyëty mëti'ipë kuump u'kxpën ets mnäkyätykyupëtëty. Jëtu'un mpëyë'knax mpëyë'ktëkëtëty tä jeexyë mpojëtën, yajtsëtyutë mjot mnini'kxëty. Jä'ä ko ja Milcom mëti'ipë m'ëwtajtëpën, wiink naax wiink kajpn të yajmënëjkxy tsumy matsy mëët ja teetytyëjkëty ets ja ja'ayëty mëj'äämpyë y'itën.

⁴¿Wi'ix ko mnätyukmëjjawëty ko mkumëjaawëty? Yë mjot mmëjaaw këxaanp naxaanp yë'ë, ko je'eyë nkäjpxykyumëtoownaxy, yi'iyë mtukjotkujk'ajtyp ko may yë wit meeny të xynyipëjkpety ets m'ëna'any: ¿Pënës xy'ëknipëtë'ëkëp?

⁵E oy ko jyëtu'unëty, ëjts xii yaajës nkäxa'any mëtsip mëti'ipë m'atsë'ëk m'ajawëtëpën. Ëjts Wintsën mëti'ipë maaytyääyëpën winë, ëjts ënaanp. Nitu'ukjaty nëkooyë nëjkx muum mjaaknajtskääkëtë, ka'ap pën jatëkok mwoowmuka'anëtë.

⁶Je'eyëp ko nëjkxëpës ok jatëkok nyaj'oyë ja Amón ja'ayëty ja jyuuky'ajtënëty. Ëjts Wintsën, ëjts ënaanp.

⁷Ma ja Wintsën tnikäjpxyën wi'ix ja Edom jyata'anyën: ¿Tii këtii jam Temán pën kyuwijyëtyë? ¿Ti këtii tnijawëtë yë ijxpëkyjyä'äytyëjkëty tii tyuntëpënë? ¿Tëë tyëkooytyä'äy mëti'ipë jyajtëp nyija'awëtyëpënë?

⁸Miitsëty Dedán ja'ayëty, nëjkx mnäyu'utsëtë. Jä'ä ko nyajkutëkoyäämpyës yë Esaú kajpn; tëë tpaaty ja xëëw po'o jëna'ajës ntëytyuna'anyën.

⁹Ko ja'ay tpëjkmuky tsatsymtsya'am yajkä'äpy wäänë në'ë'aay tu'u'aay; ko mä'tspë koots myiny kamjoty yi'iyë myënëkxyp mëti'ipë yajmëyäjtypyën.

¹⁰E ëjts tëëjës yë Esaú winë npëjkëtyä'äy, tëëjës npatë nyäyu'tstakn ets ka'ap tjëkyepy tii xy'ëktukwinkuyu'tsnëtyës. Wa'ats të kyutëkooytya'atë y'u'unk y'ëna'këty, jyiiky myëku'ukëty ets myëjëën myëtëjkëty, ni pën të kyawë'ëmy mëti'ipë jeexyë ënaanpën:

¹¹Wä'än ja mku'ooky u'unktëjk twë'ëmy mëët ëjts, ëjts nkëwent'atëp. Ja to'oxytyëjkëty ku'ookyëtypë ëjts nkëwent'atëp.

¹²Yë Wintsën jëtu'un y'ënä'äny: Ja ja'ayëty mëti'ipë ka'ap të jyapaatëtën jeexyë o'ktëy jyatë kyëpätë, ëxëëk të jyat të kyëpätë; jëtu'un mijts kopkpëky ko näjyëtu'un xykyëpety mëti'ipë mpatëpën.

¹³Ëjts, mëti'ipë Wintsën'ajtpën, nxëëwës ntukajpxpejtyp: Yë Bosrá kajpn aanë'ëk tëëtsë'ëk ets xit ko'ow wyë'ëma'any, yë'ë nëjkx y'ijxpäjtën'aty ko ënäty o'ktëy jyäty kyëpety ets ko ënäty të yajpoky, e ja wiinkëtypë ja naax kajpn xit ko'ow nëjkx jyajta'atë.

¹⁴Tëës yë aaw ayuk xynyija'ty mëti'ipë yë Wintsën kyejxypyën; tëë tkexy tu'uk ja yaj'ayukye'epyë: Nämyukëtë ets nëjkx xytyukjatë yë Edom kajpn. Nänyipëjktaakëtë ets mtsiptuntëty.

¹⁵Wäänë mutsk mijts nyaj'awinpita'any ma naax kajpnën, ëxëëk nëjkx ja'ay m'ixyë.

¹⁶Tëë mnätyukwin'ëënyë ko mnämyëjjaw të mnäjyääntyjyawëty, je'eyë ijty m'ëtsë'ëk m'ajawë. Tyam jam muum mtsëënë tsaa yuukjoty tsaakäätsjoty. Jam muum m'ity tunkëjxm kopkëjxm. Oy jënu'un m'ijtakn mtsënaaytyakn këjxm xynyipëjktaakëty jëtu'un tä witsn pyä'än muum t'oytyunyën këjxm ma ka'ap npatmëtyën, nëjkxëp jam nyajjënäky. Ëjts Wintsën, ëjts ënaanp.

¹⁷Ko ënäty ja Edom kajpn kyutëkoy, mëj këjää nëjkx ja ëyo'on tyunyë jyätyë, may ja naax kajpn tsyë'ëkëja'any. Mëti'ipë jam nëjkxtëpën, je'eyë tsyë'ëkëja'antë ko ënäty t'ixtë wi'ix ja Edom kajpn yajtëytyunyën,

¹⁸jä'ä ko jëtu'un nëjkx jyäty tä jyajtën ja Sodomë kajpn ets Gomorra kajpn ets ja naax kajpn mëti'ipë mëët nyämëtsëpa'an'atyën. Ni pën nëjkx jatëkok jam kyatsëënë, ëkë je'eyë tyu'uma'ajëty. Ëjts Wintsën, ëjts ënaanp.

¹⁹Ajotkumonës nmina'any, jëtu'un tä muum yë kaa y'ëkëtypyëtsimyën ujtsjoty jam Jordán ets nyijkxy mëëyjoty; njëkäxäämpyës yë Edom ja'ayëty etsës yë'ë jam nyaj'ënä'äma'any yë ja'ay mëti'ipës ënäty të nwin'ixyën. Jä'ä ko ka'ap maa jëtu'unpë Tios tä ëjtsën, ka'ap tjëkyepy pën xytsyipwinkajpxëtyës, ka'ap tjëkyepy pën xywyinkuwa'akëtyës.

²⁰Mëtoow'itë ja winma'any, wi'ixës ëjts Wintsën të ntuknipëjktaakën ntuna'any ja Edom ja'ayëty, mëtoow'itë ja winma'any mëti'ipës ntuknipëjktakëpën maajës o'ktëy ntuna'anyën ja Temán ja'ayëty: Yë'ëpaat yë kupixyny mutskpë tmënëjkxa'antë ets ja nyimëëykyam nëjkxëp y'atëkooytyä'äy.

²¹Nëkooyë nëjkx yajmëtoy nyä'ämnë ko ënäty ja Edom kyutëkoy, yë'ëpaat nëjkx naaxwiinyëtë yu'kxy; may ja ja'ay näypyutëkë tja''amëtowëty, nëjkxëp jyaya'ax jyajoktë jampaat Tsaptsmejy ëkë'ëm.

²²Jëtu'un nëjkx ja mëtsip tukja'ty ja Bosrá kajpn tä tu'uk witsnën mëti'ipë kyäkn xyajtëëpyën, jä'ä xëëw ja ja'ayëty mëti'ipë ënäty tsip'ixyëtyën jëtu'un nëjkx ja pëjkën ato'onën tyajnaxtë tä to'oxytyëjk u'unk maay tyajmina'anyën naaxwiiny.

²³Ma yajnikäjpxyën wi'ix yë Damaskë kajpn jyata'anyën. Tsëtyu'un mëët të wyë'ëmtë ja Hamat kajpn ets ja Arpad kajpn ko të yajtuknijawëtë ja ëyo'on jotmay mëti'ipë nimiinëtëpën; je'eyë tyam tsyë'ëkëtë ets ka'ap jyotkujk'atë.

²⁴Yë Damaskë kajpn ka'ap tii mëk'ajtën t'ëkmëët'ajnë, yi'iyë myääpy tyäjpy wi'ix kyä'äka'anyën. Yë tsë'ëkë, monyëtukyë ets ja pëjkën ijxën yë'ë të myëmëtä'äkyë, jëtu'un jyäty tä tu'uk yë to'oxytyëjkën mëti'ipë u'unk maay pyatäämpy y'ixäämpyën.

²⁵Ja kajpn mëj'äämpyë ets jotkujkpë të y'ityën, tëë ja nyija'ay kyäkpëtsëëmta'atë.

²⁶Jä'ä xëëw, kujy jëpipy ja y'ëna'ktëjk jyata'antë në'ëjoty tu'ujoty, nitëkokyë ja tsyiptuunpëtëjk y'o'kta'aja'antë. Ëjts Wintsën mëti'ipë maaytyääyëpën winë, ëjts ënaanp.

²⁷Njëënmo'ojäämpyës yë Damaskë kajpn ets Ben-hadad kajpn yë kyumoontëjk.

²⁸Ma ja Wintsën tnikäjpxyën wi'ix jyata'antën ja Quedar ja'ayëty ets Hasor ja'ayëty, mëti'ipë ja Nabucodonosor, Babilonyë yajkutujkpë ojts ka'ap yajmëta'akëtën. Nëjkx nitëkëtë yë Quedar kajpn, yajkutëkoytyë tääpë kajpn, xëëwpëtsëmtsyowpë yajpaatyën.

²⁹Mijts jä'ä'ajta'atë ja wyit tyujkxyëty ets ja tsyajppaxëty, kyupixynyëty, ja wit mëti'ipë tyëjk tyuknikojtëpën ets ja y'apëjk y'atu'unënëty. Pëjkëtë ja jyëyujk jëku'uxëty ets xy'ënëëmëtëty ets wiinkuyaaxëtë. Kutsë'ëkë yajpaaty oymyaajëty.

³⁰Pëtsëmtë pëyi'ikyë Hasor ja'ayëty. Nëjkx mnäyu'utsëtë. Ëjts Wintsën, ëjts ënaanp. Yë Nabucodonosor, Babilonyë yajkutujkpë, tëë tuknipëjktaakë ko myajkutëkoya'anëtë.

³¹Ëjts mëti'ipë Wintsën'ajtpën, jëtu'unës të n'ëne'emy: Nëjkxtë, nëjkx yajkutëkoytyë yë naax kajpn mëti'ipë jotkujk yajpatpën ets mëti'ipë ka'ap tii tmay tajyën, ja naax kajpn mëti'ipë ëwa'ats'ijtpën, ka'apë y'awiityën mëët yë pujxn, atu'kpajkpë yajpaatyën.

³²Mä'tsta'atë yë jyëyujk jëku'uxëty ets tsyajpkaajëty. N'awojpwa'kxäämpyës xiitsow yaatsow tääpë ja'ayëty mëti'ipë tyatsk waay jyäjptëpën; xiitsow yaatsowës ntuknitsoona'antë ja ëyo'on jotmay. Ëjts Wintsën, ëjts ënaanp.

³³Aanë'ëk tëëtsë'ëk nëjkx wyë'ëmnë yë Hasor kajpn, wax nëjkx jam xëmë yä'äxy jyoky. Ka'ap jam nëjkx ni pën y'ëktsënaaynyë, oy jeexyë je'eyë pën tyu'uma'ay.

³⁴Ko yë Sedequías jam Judá y'ënä'ämtso'ony, ënät ojts yë Wintsën tmëkäjpxy yë Jeremías ets tukmëmëtyäky wi'ix jyata'any kyëpäta'anyën yë Elám.

³⁵Ëjts Wintsën mëti'ipë maaytyääyëpën winë, ëjts ënaanp: Ntuktëjëjäämpyës yë Elám yë tyi'pxn mëti'ipë myëtsiptuunpyën.

³⁶Mëkpoj ëtsu'ux poj nyajminäämpyës xiitsow yaatsow ma tyaapë kajpnën ets jëtu'unyë pyojwa'kxta'atëty ja ja'ayëty ma ja naax kajpnën, oymyaakajpnëty nëjkxëp jam nyajtskäkëtya'atë mëti'ipë käktëpën.

³⁷N'ëtsë'ëkëjäämpyës yë Elám ma myëtsiptëjkën kutsë'ëkëpë, ntuknikäxäämpyës yë ëyo'on jotmay, ntukjoot'anpëkäämpyës, ntukpaatäämpyës yë jëën tsip koonëm kyutëkoytyëty. Ëjts Wintsën, ëjts ënaanp.

³⁸Jam Elám jamës nëjkx yë nkutujktakn npëjktä'äky, ja yajkutujkpëtëjk ets ja ënä'ämpëtëjkëty wa'atsës nëjkx nyaj'o'kta'ay. Ëjts Wintsën, ëjts ënaanp.

³⁹Je'eyëp ko nëjkxëpës ok jatëkok nyaj'oyë yë Elám ja'ayëty yë jyuuky'ajtënëty. Ëjts Wintsën, ëjts ënaanp.