Read Biblia Mixe de Quetzaltepec Jeremias 50 Bible Online

Jeremias 50 - Biblia Mixe de Quetzaltepec bible

Jeremias 50

¹Ma yajnikäjpxyën wi'ix jyata'anyën ja Babilonyë kajpn, ma caldeo ja'ay tsyëënëtën, mëti'ipë yë Wintsën ojts tuk'ëwaanën yë Jeremías ets tkajpxnaxëty.

²Nimëtya'aktë ya'atë aaw ayuk, tukmëtoowta'atë ja naax kajpn. Mëj'ijxëntyuuy xynyikajpxtëty; këtii nitii xykyuyu'utstëty. Jëtu'un m'ëna'antëty. Tëë ja Babilonyë kajpn yajtukja'ty ets të yajmëmëtä'äky. Nëxi'iky tukxi'iky të wyi'imy ja Bel mëti'ipë y'ëwtajtëpën.

³Jam anëkëjxmtsow tu'uk ja naax kajpn tsyoona'any mëti'ipë nëjkx tyaj'awinpityën ja kajpn aanë'ëk tëëtsë'ëk. Nitu'uk yë ja'ay nëjkx jam kya'ëktsënaaynyë, yë'ëpaat aayjëyujk ujtsjëyujk ka'ap nëjkx jam y'ëkyajpatnë, ni'ikyë ja ja'ay kyäkta'aja'antë.

⁴Jëtu'un yë Wintsën y'ënä'äny: Ko yë xëëw jëmëjt tpaatëty, nëjkxëp yë Israel ja'ayëty ets Judá ja'ayëty xynyimintës jëëpy yaxp, yë Tios mëti'ipë Wyintsën'ajtëpën.

⁵Yajtëwantëp maatsow wyi'imyën ja në'ë tu'u mëti'ipë nëjkxpën Sión, jam nyëjkxa'antë ets y'ëna'ana'antë: Tsojk ninëjkxëmë yë Wintsën ets mëët ntu'unmëty tu'uk yë käjpxytyu'unën mëti'ipë itëpën xëmë, mëti'ipë ka'ap yajja'atyëkoyëtyën.

⁶Yë nnaaxës nkajpnës jëtu'un ënäty yajpaatë tä maykyupixynyën mëti'ipë të tyu'utëkoytyën, mëti'ipë ka'ap këwent'ajtpë oy të kyëwent'atëtën ets të ye'eywya'kxta'atë jam ujtsjotm. Ko jyatsoontë ma jam yajpaatën, wiinktsow nyëjkxtë ets ka'ap jya'të ma y'ijtaknëtyën.

⁷Ko ja myëtsip ijty pyaatëtë, poj'am yajkutëkoyëtë ets y'ëna'antë: Ka'ap ëëts npoky'ajtëmë, kë'ëm yë Wintsën të tmëtëtëkoytyë, mëti'ipë yajkaay yaj'ukëtëpën, mëti'ipë ojts ja y'aptëjk tuk'ijxpätën xëmë.

⁸Kä'äktë, tsoontë jam Babilonyë ma caldeo ja'ay kyajpnëtyën; tsoontë jam, jëtu'un tä tu'uk ja'ay maykyupixyny twojptsoonyën.

⁹Ëjts nyajkutukäämpy ets kajpn mëkëtypë tyu'ukmuktëty jam anëkëjxmtsow ets jä'ä xëëw yë Babilonyë kajpn tukja'tëty. Waatswitsy nëjkx jam tsyoontë ets ja naax kajpn tjä'äpëktëty. Tsip'ixy yë'ëjëty, ko tu'uk tyi'pxë'ëky kopkpëky ko jam tyajja'ty ma tukni''ixyën.

¹⁰Wa'ats nëjkx yë Caldeo ja'ayëty winë yajpëjkëtya'atë, koonëm yajmä'tsta'atëty ets kyu'uxëtëty. Ëjts Wintsën, ëjts ënaanp.

¹¹Miitsëty Caldeo ja'ayëty mëti'ipë mä'tstën yë nnaax nkajpnës, ätstë xoonta'aktë. Nëpëkax yujkpëkaxtë jëtu'un tä tu'uk tsajpkaani'kxën mëti'ipë ujtsjoty tënääpyën ets m'ajëjtëty tä tu'uk kwaayën.

¹²Je'eyëp ko yë mnaax mkajpn ma mmëxu'unk'ajtyën, tsëtyu'unmëët wyë'ëma'any. Yë'ë nëjkx tu'uk jyaak kajpn'aty, mëti'ipë aanë'ëk tëëtsë'ëk wë'ëmaanpën.

¹³Jä'ä ko ntukjoot'anpëkäämpyës yë'ë ets nitu'uk yë nyija'ay nkayajwë'ëma'anyës. Ko ënäty jam pën nyäxy, je'eyë tsyë'ëkëty mëët ko ënäty t'ixy wi'ix ja tëytyu'unën të t'ëxajën tääpë kajpn.

¹⁴Miitsëty jënu'un mti'pxtën, nëjkx yë Babilonyë kajpn yajnatuktë. Jam najtsti'pxëtë ma yë'ëjën, jä'ä ko tëëjës xymyëpoky tyuntë, ëjts Wintsën.

¹⁵Xii yaa tukyaax tukjokëtë ko mtsiptuna'antë. Ka'ap ja Babilonyë y'ëkmëtaknë. Tëë jyijta'ay ja pyotsy ma ënäty kyëwent'atën, tëë jyijtë'kta'ay ja potsy mëti'ipë ja kajpn nyapots'ajtypyën. Jëtu'unës ntuunwinpita'any mëët koos të xymyëtëkoytyë: Tuunwinpitë ijxtëm të mtunëtën.

¹⁶Ni pën jam Babilonyë xykyayajwë'ëmtëty mëti'ipë ni'ipëpën kojëpën ets tyajpëtë'ëkëty ja pëjktä'äky. Ko ënäty ja ja'ayëty t'ixtë wi'ix ja ëyo'on myëkëtyën, nëjkxëp wyimpijta'atë kyajpntum. May nëjkx kyä'äktë ets nëjkx tja'amyätstë yë nyaax kyajpnëty.

¹⁷Yë Israel kajpn jëtu'un tä tu'uk yë kupixyny tyëkoy'ityën mëti'ipë kaa papooyëpën. Yë'ë jëyëjp të myätsyë tä kaajën yë yajkutujkpë, Asiria ja'ay; ok yë Nabucodonosor, yë Babilonyë yajkutujkpë, mëti'ipë jëtu'un tä kaajën të tsyu'utsyën.

¹⁸Paaty ëjts maas nWintsën'atyën, mëti'ipë maaytyääyëpën winë, mëti'ipë yë Israel ja'ay Tyios'ajtëpën, ëjts ënaanp: Ntëytyunäämpyës yë Babilonyë yajkutujkpë, mëët ja nyaax kyajpn, jëtu'un tääjës ntuunyën ja Asiria yajkutujkpë.

¹⁹Ëjts nyajwinpitäämpy jatëkok yë Israel ja'ayëty ma nyaax kyajpnëtyën, jëtu'unës nyajwinpita'any tä tu'uk yë kupixyny yajtukniwoyën yë jyi'kxy jam Carmel, Basán, ëkë ma Efraín kyopk jotmën, jam Galaad.

²⁰Ëjts, Wintsën, jëtu'unës n'ëna'any: Jä'ä xëëw jä'ä jëmëjt yë Israel ja'ayëty ets ja Judá ja'ayëty ëwaatsëtum wyë'ëma'antë ma nyëë pyokyëtyën, jä'ä ko npokymyä'kxäämpyës mëti'ipës juuky të nyajwë'ëmtën.

²¹Nitëkëtë yë Merataim yë nyaaxjot ets Pecod ja'ayëty, papo'otë ma nyëjkxtën, koonëm xyajkutëkoytyëty. Jëtu'un xytyuntëty tääjës ni'ënä'ämën. Ëjts Wintsën, ëjts ënaanp.

²²Ma naax kajpnën yë'ë yajmëtoop jëën tsip mëti'ipë yë naax kajpn yajkutëkoopyën.

²³Yë Babilonyë ja'ayëty, jëtu'un yë naax kajpn y'ixyë pujxnkuwojpnën mëti'ipë tëë kyiitsyën ets piw nuuk të jyajta'ay. Tsë'këp yë naax kajpn ko yë Babilonyë ëxëëk të jyäty të kyëpety.

²⁴Mijts Babilonyë, kë'ëm të xynyipëjktaakë yë m'o'ktakn yu'utsypë, ka'ap të xyjyawë ko jam o'këntum të mka'ay. Jam wë'ëm, jam ku'ëtuky yajpaat mëët ko të xykyamëtoowkukë yë Wintsën.

²⁵Jëtu'un yë Wintsën të tyajni'ëwa'atsy yë tsyip y'äkë, tä jeexyë yë pyujxn ets tyi'pxn të tyajni'ëwa'atsyën ma y'ityën pëjkë'ëky mëti'ipë myëtsiptuunpyën, jä'ä ko yë Wintsën myëët'ajtyp tu'uk yë tuunk mëti'ipë yaj'apaatëjäämpyën ma Caldeo ja'ayëtyën.

²⁶Nipëtë'ëktë oy maa xytyimpaatëty. Yajjujtaayëtë yë tyëjkëty ma pëjkë'ëky tyaj'itën yë tsyajpmokëty. Niwoowpätë ja'ayëty ets xyaj'ooktëty. Nitu'uk mëpaat ja'ay juuky xykyayajwë'ëmtë.

²⁷Yaj'o'ktaayëtë yë tsyiptuunpëtëjkëty, jam käjxta'atë ma o'ktaknën. Janty mon janty tuk yë'ëjëty yajpaatë, tëë nyija'tëtë ja xëëw po'o ma yajtëytyuntëtyën.

²⁸Ja'ay mëti'ipë jam Babilonyë të kyä'äktën tëë yaa myintë Sión ets të tnimëtya'aktë wi'ix yë Wintsën Tëyajtën ëxëëk të tunyën yë Babilonyë kajpn, mëët ko ëxëëk tuuny yë tsajptëjk yaapë yajpaatyën.

²⁹Mëkajpxta'atë nitëkokyë yë ti'pxpëtëjkëty ets tnitëkëtëty yë Babilonyë kajpn. Yajnatujkta'atë yë kajpn këtiipë pën kyä'äkëty. Tukumëtowtë ijxtëm pyaatëtën. Tuunwinpitë ijxtëm ojts mtunëtën. Jä'ä ko yë'ë je'eyë të kyujuun'ooky maas ëjtsën, mëët ëjts mëti'ipë Wintsënën, mëti'ipë yë Israel ja'ayëty Tyios'ajtëpën.

³⁰Paatykyëjxm yë yujkyä'kpëtëjkëty y'o'kta'aja'antë jä'ä xëëw. Ëjts Wintsën, ëjts ënaanp.

³¹Yë Wintsën mëti'ipë maaytyääyëpën winë, jëtu'un y'ënä'äny: Naax kajpn mëti'ipë amëj akëjxm kajpn'ajtpën, tëë nmëtsiptsoony; tëë tpaaty ja xëëw jëmëjt ma xykyumëtowëtyën yë mpoky.

³²Naax kajpn mëti'ipë kujuunën, je'eyë mkunäpëja'any tääts mkëtawa'any, ni pën mkayajpëtë'ëka'anyë. No'kta'ajäämpyës yë mkajpn, tääpë jëën yë'ë yajkutëkooyäämpy tëkokyë mëti'ipë yajpatpën na'ëwtity ma mijtsën.

³³Yë Wintsën mëti'ipë maaytyääyëpën winë, jëtu'un y'ënä'äny: Yë Israel kajpn ets Judá kajpn mëk y'ëyowtë ko yajtëytyuntë. Tsumy matsy ja myëtsip yaj'itëtë ets ka'ap nyajtsmatsëtë.

³⁴E mëti'ipë yaj'ëwaatsëpëtsëëmpën, mëk yë'ë, jä'ä xyëëwajtyp Wintsën mëti'ipë maaytyääyëpën winë. Yë'ë paye'eyën tyunäämpy; yajminäämpy ja jotkujk'ajtën ma naax kajpnën ets tëytyuna'any ja Babilonyë kajpn.

³⁵Jëtu'un yë Wintsën y'ënä'äny: Wä'än t'ooktë yë Babilonyë ja'ayëty, yë kyopktëjkëty ets wyijyä'äytyëjkëty.

³⁶Wä'än t'ooktë yë nyajtsja'apëtëjkëty: wä'än tsuujëtë tpojëtë.

³⁷Wä'än t'ooktë yë tsyiptuunpëtëjkëty: yajtsëyuytyë mëët ja tsë'ëkë. Wä'än t'ooktë yë këwaayëty ets wä'än tyajma'ta'atë yë pyujxnwintëkäämpëty. Wä'än t'ooktë yë tsyiptuunpëtëjkëty mëti'ipë mëjuy tsiptuuntëpën: wä'än t'awinpijta'atë to'oxytyëjkën, wä'än yë wyit myeenyëty yajmä'tsta'atë.

³⁸Wä'än tsipaatë ja nyëëjotëty, wä'än tëtsta'ay yë myëj nëëjëty. Jä'ä ko yë Babilonyë yi'iyë y'ëwtatyp yë awinax ëxëëkpë, paaty të tyajtëkoy yë jyot wyinma'any.

³⁹Paaty ja Babilonyë jä'ä y'awinpita'any jëyujk tsënaaytyakn; miitsëty, waxëty yë'ë jam ya'axan jokantëp, wojnyëty patutkëty yë'ë jam yajpaatantëp. Nijëna'a nëjkx jam pën kya'ëktsënaaynyë.

⁴⁰Jëtu'un y'awinpita'any tä yë Sodomë kajpnën ets Gomorra kajpnën, mëët ja naax kajpn mëti'ipë mëët nyämëtsëpa'an'atyën. Ni pën nëjkx jam kya'ëktsënaaynyë ets ni pën nëjkx jam kya'ëknajxnë. Ëjts Wintsën, ëjts ënaanp.

⁴¹Jam jëkäm, tam yë naax kajpn ets yajkutujkpëtëjk nyäy'a'ix nyäjyëjp'ixëtë, mëti'ipë nyiminantëpën yë Babilonyë kajpn ets ëxëëk tuna'antë.

⁴²Tëë tpëjktakta'atë yë tyi'pxnëty ets kyu'umënëty; ëxëëk jyä'äy'atë, ka'ap nitii tpa'ëyowtë, jëtu'un yajmëtoy tä nëë y'iitsy kyomyën ko tyëkëtë yaxpë jojkpë, kwaaykyijxy myintë. Tëë tuknipëjktaakëtë ko yë Babilonyë kajpn tnitëkëja'antë.

⁴³Ko yë Babilonyë yajkutujkpë të tnijawë, jëtu'unyë të myoonkëtä'äky të tyujkëtä'äky mëët yë tsë'ëkë, jëtu'un myony tyuky tä to'oxytyëjkën mëti'ipë u'unk maay yajmëxu'unk'atäämpyën.

⁴⁴Ajotkumonës nmina'any, jëtu'un tä tu'uk kaa ye'epyëtsimyën ujtsjoty jam ma Jordán nëëjën ets kyupëyë'ëkë mëëyjoty ma xyeemyëtyën ets nyajka'aka'anyës yë Babilonyë ja'ayëty, yë'ëjës jam mpëjkta'akäämpy ja'ay yajkutujkpë mëti'ipës të nwin'ixyën. Jä'ä ko, ¿pënës xy'ëkmëpaatëp? ¿Pën ëktsiptuna'anëp mëët ëjts? ¿Pën kupixyny këwent'ajtpë xy'ëkwinkuwa'akëpës?

⁴⁵Mëtoow'itë ja winma'any mëti'ipës ëjts Wintsën të ntuknipëjktaakën, tëëjës nnimay nitajë wi'ixës ntëytyuna'anyën yë Babilonyë kajpn, ja winma'any mëti'ipës të nmä'kxyën wi'ixës yë Caldeo ja'ayëty nyajata'antën: Yë'ëpaat yë kupixyny u'unk tmënëjkxa'antë, yë'ëpaat yë tun wiin kopk wiin tyajma'ta'aja'antë.

⁴⁶Ko ënäty ja Babilonyë o'ktëy jyäty kyëpety, nëkooyë mëk y'ëna'ananë; nëjkxëp ja naaxwiinyëtë yu'kxypëky ets yajxon nëjkx ja'ay yaxnëtë jyojknëtë, jampaat yajmëtoownë ma wiink naax wiink kajpnën jëkämpë yajpaatën.