Read Biblia Mixe de Quetzaltepec Jeremias 52 Bible Online

Jeremias 52 - Biblia Mixe de Quetzaltepec bible

Jeremias 52

¹Jä'ä ënäty yë Sedequías yë jyëmëjt I'px tu'uk, ko tyëjkëy yajkutujkpë jam Jerusalén, jä'ä yajkutujky majktu'uk jëmëjt. Hamutal ijty yë tyaak xyëëwajtyp, yë'ë Jeremías yë nyëëx, jam Libná kyukajpnëty.

²Je'eyëp ko aak ëxëëk ojts winë tuny Tios wintum, jëtu'un tä Joaquim winë tuunyën.

³Paatykyëjxm ojts yë Wintsën tukjoot'anpëky yë Jerusalén kajpn ets Judá kajpn ets timy'ixkejxy. Ja Sedequías tkäjpxykyumëtoownajxy yë Babilonyë yajkutujkpë.

⁴Ma myajk anyën yë mëmajkpo'opë, ma taxtujk jëmëjt y'apetyën ma Sedequías tyëkën yajkutujkpë, jää yë Nabucodonosor yajkutujkpë ojts tnija'ty yë Jerusalén kajpn ets tyajnatujky mëët ja tsyiptuunpëtëjk, ojts twinwëëtë ja potsy mëti'ipë yë Jerusalén kajpn nyapots'ajtypyën.

⁵Natuky yë Jerusalén kajpn jeky y'ijty, ma myajktu'uk jëmëjtpejtyën, ma yajkutukyën yë Sedequías.

⁶Ma taxtujk y'änyën, ja mëmajktaxk po'opë, jää ojts ja ja'ay mëk tja'awënëtë ja yuu nëëtëëtsë jap kajpnjoty, ka'ap maa tiinë tii ja'ay jyë'kxtëpën.

⁷Ënät ja Jerusalén ja'ayëty tyajjujtë ja mëjpotsy mëti'ipë ja kajpn nyapots'ajtypyën. Oy ënäty jam ja caldeo ja'ayëty tjayaj'itë ja naax kajpn natuky, jap nyajxtaaytyë ja tsiptuunpëtëjkëty, Israel ja'ayëty ets kyäktë. Jam pyëtsëëmtë ma ja tëjkëtyaknën ma mäjtsk ja potsy nyäpyäätyë, koots kyäktë, jam nyajxtë ma ja kamjotmën mëti'ipë yajkutujkpë jyä'ä'ajtypyën, yë'ë ojts tpanëjkxtë ja tu'u mëti'ipë jam Jordán nëjkxpën.

⁸E yë tsiptuunpëtëjkëty, yë Caldeo ja'ayëty, ojts tpatsoontë ja Sedequías yajkutujkpë ets tnajtspatëtyë jam joyjotm winkon ma Jericó kajpnën. Ja Sedequías ja tsyiptuunpëtëjk ojts y'ëxmajtstaayënë ets jëtu'unyë kyääkwa'kxtaaytyë.

⁹Ja Caldeo ja'ayëty ojts tmatstë ja Sedequías yajkutujkpë ets ojts tmënëjkxtë ma ja Babilonyë yajkutujkpën, jam ënäty yajpaaty Riplá, ma Hamat nyaaxjotmën. Jam yë Nabucodonosor ni'ënä'ämëy yë Sedequías,

¹⁰mëët yë y'u'unk y'ëna'k ets wyintsëntëjk, jampë Judá kyukajpn'atën, ets yajyo'kpuxtëty yë'ë wyintuuy.

¹¹E yë Sedequías ojts yajni'ënä'ämë ets wyiintsaa yajjuutëty ets yajtsumëty mëët yë pujxntä'äky, jëtu'un jam Babilonyë yajmënëjkxëty. Tsumy ënäty jap y'ity ko ojts y'o'knë.

¹²Ma myajk anyën ja mëmëkoxk po'opë, ma tyu'uye'eyën ja mëmajkmokx majktaxkpë, ma tyëkën yajkutujkpë yë Nabucodonosor jam Babilonyë, yë Nebuzaradán mëti'ipë yë yajkutujkpë pyutëjkëpën, ma winë tuknipëjktaakën ets mëti'ipë näjyëtu'un nyiwintsën'ajtypyën ja këwen'ajtpëtëjkëty ma ja kutujktaknën, ojts jyä'ty jam Jerusalén

¹³ets tno'ktëkooy ja tsajptëjk ets ja kutujkëntëjk ets ja jëën tëjk jampë kajpnjotm yajpaatyën, yë'ë ni'ik ja wintsëntëjkëty ja jyëën tyëjkëty mëti'ipë ënäty mëj'äämpy të y'itën;

¹⁴e ja tsiptuunpëtëjkëty mëti'ipë ënäty mëët të myintën, ojts tjijtë'ëktë ja potsy mëti'ipë Jerusalén kajpn nyapots'ajtypyën.

¹⁵Ets ja Nebuzaradán tyajnëjkxtaay ja ja'ay tsumy matsy jam Babilonyë, mëti'ipë ënäty jam kajpnjotm yajpatëpën ets mëti'ipë ënäty të tmëjwa'kpätën ja Babilonyë yajkutujkpë ets mëti'ipë ënäty oyjyäty winë yaj'o'oyëtëpën.

¹⁶Yi'iyë ojts tyajwë'ëmy ja ja'ay mëti'ipë ëyoowtëpën ets tyaj'itëty ja tsatym ets wiinkëtypë ja aay ujts jam kamjotm.

¹⁷Yë Caldeo ja'ayëty piw nuuk tuuntaaytyë ja tsuxkpujxn mëti'ipë jap tsajptëkoty yajpatpën: ja xeny, ja nyi'ëjx ets ja nëë apëjkën mëjpë; ojts tmënëjkxta'atë ja tsuxkpujxn jam Babilonyë.

¹⁸Ojts näjyëtu'un tmënëjkxtë mëti'ipë ja kuyjaam yajtukjä'pën, ma ja kuyjaam nyipetyën, ja jëënpajk jä'pn, ja ka'pn mëti'ipë jëën yajtuka'apyu'kxpën, ja mëj a'ukën, ja mëj jä'pn ets tëkokyë ja apëjk atu'unën, mëti'ipë ënäty jap tsajptëkoty tuunpën ko ja wintsë'kën yajyäky.

¹⁹Näyjyëtu'un ja tsiptuunpë wintsën, ojts tmënëjkxta'ay ja apëjk atu'unën mëti'ipë pu'ts pujxn ets poop pujxn mëët y'oytyunyëtyën, tä ja mëj texyën, ma ja jëënpajk yaj'apëkën, ja mëj a'ukën; ja tu'ts ma ja kuyjaam nyipetyën, ja jëëntooytyakn, ja mëj jä'pn ets ja a'ukën mëti'ipë tuunpën ko yajyäky ja tsatym nyëë mëti'ipë tëë nyimaanaxyën.

²⁰Ja tsajptëjk xeny, ja nëë kë'ëpujtakn mëti'ipë ja y'ëjx jëtu'un këxë'kpën tä tsajpkaajën, aak tsuxkpujxnëmpë mëët y'oytyunyëtyën, mëti'ipë ojts ja Salomón tni'ënä'ämën ets jap tyunëty tsajptëkoty, nëkooyë jye'emty'ajnë, ka'ap tjëkyepy yaj'a'ixëty.

²¹Ja xeny jä'ä kyëjxmjatyëty, mëkoxk xajpk ja kujkm ets pyëkixëty tëkëëk xajpk ja kujkm.

²²Yë xenykyopk aakyë'ë tsuxkpujxn mëët y'oytyunyëty, jä'ä y'ayenyëty ma tsuxkpujxn tmëëtëtyën, naxy tu'kxajpk ja kujkm, na'ëwtityë yë'ë myëët'ajtyp tsuxkpujxn, pikjatyëty yaj'ixy. Mäjtskëty ja tsajptëjk xeny, aak tu'knax yaj'ixy.

²³Ma ja xenykyopkën, mëko'px tmëëtëty ja tsuxkpujxn, jëtu'un myëjatyëty tä kutymyën, majkta'px majkmokx tu'uk mëti'ipë yaj'ijxpën.

²⁴Ja mëti'ipë nyiwintsën'ajtypyën ja këwen'ajtpëtëjk, ma ja kutujktaknën, ojts tmatsy ja Seraías, ja teety wyintsën; ojts tmatsy näjyëtu'un ja Sofonías, mëti'ipë ja Seraías paye'eyëpën ets nitëkëëk ja ja'ayëty, mëti'ipë ja tsajptëjk ijty këwent'ajtëpën.

²⁵Ja ja'ayëty mëti'ipë jam Jerusalén yajpatëpën, yë'ë ojts yajmatsy ja tsiptuunpë wintsën, mëti'ipë nyikopk'ajtypyën ja tsiptuunpëtëjk; ojts näjyëtu'un yajmatstë ja niwëxtujkpë ja ja'ayëty, mëti'ipë ja yajkutujkpë kyëwent'ajtëpën, mëti'ipë ënäty jam kajpnjotm yajpatëpën; ja tsiptuunpë wintsën mëti'ipë ja tsiptuunpëtëjk ijty jyääymyujkpyën ets nitëkë'px majk ja kopktëjkëty, mëj'äämpyë y'itën jam kajpnjotm.

²⁶Ojts yë Nebuzaradán tyajnëjkxta'ay ya'atë ja'ay jam ma Babilonyë yajkutujkpën, jam Riplá ma Hamat yë nyaaxjotmën, jam yë Babilonyë yajkutujkpë ojts tni'ënä'ämë ets tyaj'ooktëty. Jëtu'un'äämpy ojts yë Judá kajpn tsumy matsy nyëjkxnë wiink kë'ëy wiink kajpn.

²⁸Yë Nabucodonosor may ojts yë ja'ay tyajnëjkxy tsumy matsy: Ma ënäty mëwëxtujk jëmëjt ëka'any yajkutukyën, tëkëëk mil ja i'px tëkëëk ojts Judá ja'ay tyajnëjkxy tsumy matsy;

²⁹Ma ënäty mëmajkmokx tëkëëk jëmëjt y'apetyën ma yajkutukyën, jä'ä ojts tyajnëjkxy ja'ay tsumy matsy: tuktujk mëko'px ja i'px majkmäjtsk, Jerusalén ja'ayëty;

³⁰ma ënäty i'px tëkëëk jëmëjt y'apetyën ma yajkutukyën yë Nabucodonosor, yë Nebuzaradán jä'ä ojts tyajnëjkxy tsumy matsy yë Judá ja'ay: wëxtujk mëko'px ja wëxtyikxy mëkoxk. Jä'ä nyiwinë'ajtë mëti'ipë ojts yajmënëjkxtën tsumy matsy: taxk mil ja tëtujk mëko'px.

³¹Ma y'i'px mëkoxk anyën ja mëmajkmäjtsk po'opë, ma i'px majkmokx mäjtsk jëmëjt y'apetyën, ma ënäty ja Joaquín të yajmënëjkxyën tsumy matsy, mëti'ipë jam Judá kukajpn'ajtpën. Ko tyëjkëy yajkutujkpë jam Babilonyë yë Evil-merodac, y'oyjya'awëy yë Joaquín, paaty tyajpëtsëëmy jap pujxn tëkoty.

³²Oy ojts Joaquín tmëku'ukjawë, paaty tkumaay ni'ik, këtiinëm ja wiinkëtypë ja yajkutujkpëtëjk mëti'ipë jam Babilonyë tsumy matsy yajpatëpën.

³³Ko ja Joaquín jap pyëtsiimy pujxn tëkoty, ojts tjäänë ja wyit mëti'ipë jap pujxn tëkoty myë'ijtypyën ets ja oypyë ja wyit tuktëjkëy. Jëtu'un mëët tu'ukyë kyääy y'uky ja Babilonyë yajkutujkpë ets jam tsyënaay, mapaat jyaak juuky'äjtyën.

³⁴Yë Joaquín, mapaat jyaak juuky'äjtyën, ojts myo'oyë yë Babilonyë yajkutujkpë yë näypyutëkë winjëpom; yë'ë ojts yajkay yaj'uukyë ets kyëwent'atyën mapaat y'oknën.