Read Biblia Mixe de Quetzaltepec Lamentaciones 4 Bible Online

Lamentaciones 4 - Biblia Mixe de Quetzaltepec bible

Lamentaciones 4

¹Tëë ja pu'ts pujxn yëkëtyä'äy. Ka'ap y'ëk'atë'kxnë. Xii yaa muum në'ëjoty tu'ujoty yajpatnë xit ko'oy, ja tsaa oyëtypë jëtu'unyë muum jyaak ka'tsnë

²Yë Sión ja'ayëty, mëti'ipë ijty yajtsojktëpën, mëti'ipë ijty tsoopatëpën këtiinëm yë pu'ts pujxn, tyam jëtu'un yajjawëtë naaxtu'tsën.

³Yë wax jyaak yajtsi'tstëp yë y'u'unk ets tyajjotkujk'atë, e yë nkajpnës ni'ikyë tyëkooynyë jëtu'un nyäpyëjktakënë tä pawojnyën mëti'ipë tsënääpyën jam të'ëts'itjotm.

⁴Nëkooyë y'u'unk y'ëna'k yuu o'kënëtë, tëë pya'kxwiin nyamëj'o'tspäjnëtë. Jya''amëtoow yë pi'k ëna'këty tii kyäytyëpën, je'eyëp ni pën kyayajkayë.

⁵Mëti'ipë ku'uxyë të kyäy të y'uuktën, tyam yë'ë yuu'o'ktëp në'ëjoty tu'ujoty. Mëti'ipë të yaak të pyatën akujk jotkujk mëët yë wit meeny, pu'uxmjotypyën yajpatnëtë.

⁶Yë nnaax nkajpnës yë y'ëxëëktu'un y'ëxëëk kajpxënëty nëkooyë të kyëjääjënë këtiinëm jyëtu'un'ajtë yë Sodomë kajpn, mëti'ipë ojts poj'am kyutëkoyën ets mëti'ipë ka'ap pën nyitëkëtyën.

⁷Poop ijty yë jyä'äyëty yaj'ixtë këtiinëm jëtu'un pyoopëty yë tip ets këtiinëm jyëtu'unëty yë tsi'tsknëë; tsapts ijty yaj'ixtë ja jyot nyini'kxëty këtiinëm jëtu'un yë nëë jëyujk y'atääm; janty'oy kyëxë'ëktë, tä oy tsyaajën.

⁸Tyam je'eyë y'akootsënyë; ka'ap y'ëkyaj'ixkajpnë. Tëë nyini'kx myëjtëtspäjtaaynyë pyajkwiinyëty, jëtu'un yaj'ijxnëtë ja'axy tsyë'ëtsën.

⁹Nikë oy mëti'ipë pojën o'kën tsipjoty këtiinëmëm mëti'ipë yuu'o'ktëpën, jä'ä ko mëti'ipë të yuu'ooktën jeky të y'ëyowtë, ko të tyëkoy'äty ja ka'ayën ukën.

¹⁰Oy ënäty ja to'oxytyëjkëty oy ja jyot wyinma'any tjamëët'atë, ojts ja y'u'unk tyajkëëwnëtë; ojts ja y'u'unk tsu'tsnëtë ko kyutëkooy ja naax kajpn.

¹¹Yajnajx ja Wintsën ja tsyip y'äkë, ojts tyajmëtä'äky ja jyoot'an; yajnitooy ja Sión kajpn ets yë'ëpaat tyajkutëkooytyääy ja pyoty ëjx.

¹²Yë yajkutujkpëtëjk mëti'ipë ënä'ämtëpën naaxwiinyëtë apëtsëmy, nitu'uk ojts tkamëpëktë ko yë mëtsip jëna'a tnitëkëty yë Jerusalén kajpn.

¹³Ets yë'ë jëtu'un të tkujatëtë ko ja teetytyëjkëty ets ja käjpxynyajxpëtëjkëty të tyëkoytyë, ko jap tsajptëkoty të yaja'ay o'knëtë, ko të tyaj'o'knëtë ja ja'ay ka'apë tii poky tmëëtëtyën.

¹⁴Jëtu'un nyäpyëjkta'akëtë ko nyaxtë tyëkëtë ka'ap yowë tii t'ixtë; ëxëëk ja jyot wyinma'any yajpaatë, ni pën kyawinkuwa'akëja'anëtë.

¹⁵Jëwa'aktë, jëwa'aktë, jëtu'un yaj'ënëëmëtë ja'ayëty; këtii xywinkuwa'akëtë tääpë ja'ayëty, ëxëëk yë'ëjëty. Yë'ë mëti'ipë tëë tyuuntëkoytyën, mëti'ipë käktëpën, jëtu'un y'ëna'antë mëti'ipë wiink tios y'ëwtajtëpën, ka'ap tjëkyepy yaa tsyëënëtëty.

¹⁶Tëë yë Wintsën y'ëxmatsëtë, paaty jëtu'unyë të y'aye'eyëtya'atë ets ka'ap të y'ëkni''ijxwinpijtënëtë. Ko ka'ap pën ja teetytyëjkëty të t'ëkwintsë'kënëtë ets ko ka'ap pën ja mëjja'aytyëjkëty të t'ëkja'amyäjtsënëtë.

¹⁷Ëëtsajtëm oy jënu'un wiin nyaj'ënu'kxëmëty ets oy jënu'un nja'ëwxijtmëty ja näypyutëkë, ka'ap tii mpaata'anëmë. Yë'ë ntsaty'ëwxijtëmë tu'uk yë kajpn mëti'ipë ka'ap tjëkyepyën xyajtsokmëty.

¹⁸Aak y'ijx'ijtëp maajaty najxëmën; ka'ap tjëkyepy wi'ix muum nëjkxmëtyën. Tyim paatyp ja xëëw ma n'o'ktä'ämyëtyën, tëë jëtu'un, o'ktä'ämyëp ënät.

¹⁹Ni'ik pye'tym'ajnëtë yë nmëtsipëtyës këtiinëm jyëtu'unëty yë witsn mëti'ipë tsajpkëjxy kääkjëtijtëpën; koos njanëjkxtë kopkkëjxm tamës xypyaja'të, koos nëjkxtë të'ëts'itjotm tamës xypyaja'të.

²⁰Tëë yajtsumy yajmatsy mëti'ipë ja Wintsën wyin'ijxën, mëti'ipë ijty ëëts xyjyotkujkmooytyëpën, ja yajkutujkpë mëti'ipë ijty ëëts n'antijtëpën: Yë'ë wyintuuy jotkujk njuuky'ata'antës ma naax kajpnën.

²¹Xi'ik, xoonta'ak mijts Edom kajpn; mëti'ipë jam Us yajkutujkpën. Mtukëta'akanëp näjyëtu'un ja ëyo'on jotmay ets jëtu'un nëjkx mjaty tä ja'ay myu'ukyën ets tä ja'ay niwa'ats ëxwa'ats wyi'imyën.

²²Mijts Sión kajpn, tëë nyäxy ja mtëytyu'unën; ka'ap yë Wintsën m'ëk ixkäxanënë mnaaxjoty mkajpnjoty. Je'eyëp ko tyiytyunäämpy yë mtëko'oyën mijts Edom kajpn ets yajnikëxë'ëkäämpy ma të mtëkoyën.