Read Biblia Mixe de Quetzaltepec Ezequiel 10 Bible Online

Ezequiel 10 - Biblia Mixe de Quetzaltepec bible

Ezequiel 10

¹Ënätës të n'ixy jam niwits nijuux nëkëjxm mëti'ipë yajpatpën ma ja kyëpajkëtyën ja tsajpjotmëtë kukäjpxy, tu'uk yë kutujkëntakn aak tsuxk uky tsyaa mëët y'oytyunyëty.

²Ets ja Wintsën t'ënëmaay ja ja'ay linë wit mëëtpë: Tëkë jap ma kepy wintëkäämpë ye'eypyäjnën, mëti'ipë tyuktënaaytyëpën yë tsajpjotmëtë kukäjpxy ets xynyu'kpëtsëmëty yë jëënpajk mëti'ipë itkujky yajpatpën ma tsajpjotmëtë kukexyën ets xywëjtëwëty jam kajpnjotm.

³Yë tsajpjotmëtë kukäjpxy jam ënäty yajpaatë ëpa'tkë'ëmtsow ma tsajptëjkën ets tu'uk ja yoots të tyaj'ujtsta'ay ja tsajptëjk tëja'aw.

⁴Ënät ja Wintsën ja myëj'ajt y'oyajtën të pyëti'iky ma yajpaatën ja tsajpjotmëtë kukäjpxy ets të nyijkxy ma ja tsajptëjk yajnitëkën; ënät ja tsajptëjk të tyuktuky mëët ja yoots ets të jyajtä'äky jap tsajptëjk ëkë'p ja Wintsën ja myëj'ajt y'oyajtën.

⁵Ko ja tsajpjotmëtë kukexy ja kyäkn tyaj'ëna'antë yajmëtoop jappaat tsajptëjk ëkë'p, mëti'ipë tëja'ptsowën. Jëtu'un yajmëtoy tä jeexyë ja Tios kyäjpxyën mëti'ipë maaytyääyëpën winë.

⁶Ënät ja Tios t'ënëmaay ja ja'ay mëti'ipë linë wit wyit'ajtypyën ets tpëjkë'ëkëty yë jëën ma ja kepy wintëkäämpë ja ye'eypyäjnën, mëti'ipë itkujky yajpatpë ma ja tsajpjotmëtë kukexyën. Ënät ja ja'ay ojts nyijkxy ets wya'ak'o'oyëy jam winkon ma ja tëkäämpën.

⁷Ma ja kyäknpa'tkëtyën ja tsajpjotmëtë kukëxy jëtu'un jap yaj'ixy kyë'ë txajpëtsëmtë tä ja'ay kyë'ëjën. Tu'uk ja kyë'ë jam të tnajtstijë ma ja jëënën itkujkpyë tyoyën ets të tpëjkë'ëky tu'knuuky ja jëën tääts të tmo'oy ja ja'ay mëti'ipë linë wit wyit'ajtypyën, ënät ja ja'ay të t'ëxajë ets të nyijkxy.

⁹Ma ja tsajpjotmëtë kukexyëtyën taxkës të n'ixy yë tëkäämpë, wiinkonjaty yajpaatë ma yë'ëjëtyën, këëktu'uk twintänëtë. Ja tëkäämpë jëtu'un tyi'kxy tä pu'ts tsaajën.

¹⁰Ja taxkpë ja tëkäämpë tu'knax yaj'ixtë ets jëtu'un kyëxë'ëktë ajäänmuky yowë.

¹¹Ko ja tsajpjotmëtë kukäjpxy ye'eytsyoontë ets nyëjkxtë ma tu'uk ja tu'ujën mëti'ipë taxk atu'um yajpatpën, tu'ukyë nyëjkxta'atë ets ka'ap tniwinpitë ja tyu'ujëty, jä'ä pyanëjkxtëp ja mëti'ipë jëyëjp'ajtpën.

¹²Aak të'kxp yaj'ixy ja nyini'kxëty, ja jyëxkëty, kyë'ëjëty ets ma kyäknëtyën, näjyëtu'un ja taxkpë ja tëkäämpë.

¹³Etsës të nmëtoy ko ja tëkäämpë yajtijtëp näjyëtu'un: Wintëkäämpë.

¹⁴Tu'ukjatypë ja tsajpjotmëtë kukäjpxy taxkpëky tmëëtëty ja wyiin jyëjp: Tu'uk ja wyiin jyëjp jëtu'un kyëxë'ëky tsajpkaajën; tu'uk jëtu'un kyëxë'ëky ye'etyëjkën; tu'uk tä kaajën ets tu'uk tä witsnën.

¹⁵Näy yë'ë ya'atë tsajpjotmëtë kukäjpxy ojts n'ixyës ma ja Quebar mëjnëëjën. Ja tsajpjotmëtë kukäjpxy ojts pyëtë'ëktë,

¹⁶ko ye'eytsyoontë, näjyëtu'un tsyoontë ja tëkäämpë; ko ja kyäkn tyujkxajtë ets pya'atwa'atstë ja tëkäämpë ka'ap myajtstu'utëtë;

¹⁷ko wya'akwë'ëmtë, näjyëtu'un ja tëkäämpë wya'akwë'ëmtë; ko pya'atwa'atstë, näjyëtu'un ja tëkäämpë pya'atwa'atstë, jä'ä ko ja tëkäämpë yë'ë mëët tu'ukyë ja tsajpjotmëtë kukäjpxy jyuuky'atë.

¹⁸Ënät ja Wintsën ja myëj'ajt y'oyajtën të pyëti'iky ma ja tsajptëjkën ets të nyäpyëjktä'äkyë ma ja tsajpjotmëtë kukexyëtyën.

¹⁹Ënät ja tsajpjotmëtë kukäjpxy të kyääkë'ëktë. Tëës n'ixy wi'ix të tmëkääkë'ëktën ja tëkäämpë pyë'aay ets wi'ix jam të nyaaxkëta'aktën ma ja tëjk'aawën mëti'ipë xëëwpëtsëmy wë'ëmpën. Jam kyëpajk këjxm jam ja Tios ja myëj'ajt y'oyajtën yaj'ixy.

²⁰Näy jä'ä ja tsajpjotmëtë kukäjpxy, mëti'ipës ënäty të n'ëk ijxpën y'ënä'ämëtë ja Israel Wintsën, jam Quebar mëjnëë ëkë'ëm. Ënätës yajxon të n'ijxwa'atsy ko jä'ätëm ja tsajpjotmëtë kukäjpxy.

²¹Nitu'ukjaty taxkjaty ja wyiin jyëjpëty ets taxkjaty ja kyäknëty ets ma ja kyäknpa'tkëtyën jap yaj'ixy ja'aykyë'ë xyajpëtsëmy.

²²Ja wyiin jyëjpëty näjyëtu'un yaj'ixtë tä tsajpjotmëtë kukexyën mëti'ipës ënäty të n'ëk ijxpën jam Quebar mëjnëë ëkë'ëm. Aak wintuuytsyow ye'eytyë.