Read Biblia Mixe de Quetzaltepec Ezequiel 16 Bible Online

Ezequiel 16 - Biblia Mixe de Quetzaltepec bible

Ezequiel 16

¹Ënät ja Wintsën ojts xymyëkäjpxyës etsës xy'ënëmaay:

²Mijts ye'etyëjk, tuk'ix yë Jerusalén ja'ayëty wi'ix ëxëëkjaty winë tuntën.

³Jëtu'un xy'ënëëmëty: Jëtu'un yë Wintsën y'ënä'äny: Mijts Jerusalén ja'ayëty, Canaán ja'ay miitsëty; yë mteety Amor ja'ay ijty ets mtaak Hit ja'ay.

⁴Ko miiny naaxwiiny ka'ap ojts pën yë mputsk mjëjptsujkxëty, ka'ap ojts pën yë kaan nëë mtuktsi'iyë, ka'ap ojts pën mjaaxyë ets ka'ap ojts myajwëëny.

⁵Ka'ap pën mpa'ëyoowë ets ka'ap ojts pën mëmay mëtajyë. Ko miiny naaxwiiny, jëtu'unyë muum myajkujëpijpëy aayjoty ujtsjoty jä'ä ko ëxëëkëm ënäty myaj'ijxnë.

⁶Ëjts winkonës nnajxy ma mijtsën, ko n'ijxy tëë mne'pny xytyukyäjtsëtyä'äy ënätës ojts n'ëna'any ko jyëkyejpy mjuuky'atëty.

⁷Ets nyajye'ky tä aay ujts yonyën kamjoty, ojts myeeky mpety, koonëm m'awinpijty tu'uk to'oxytyëjk, ojts ja mtsi'tsk yeeky ets myujxtaay ja mwaay. Je'eyëp ko mniwa'ats m'ëxwa'ats.

⁸Koos jatëkok nnajxy ets n'ijxy ko tëëtëm myä'knë, jyëkyäjpnëp mye'etyëjk mëëttsënaaynyëty. Ënät ojts yë nwitës ntukniye'epy ets ja mjot mnini'kx nyu'tyës ets n'ënëmaay ko mijts nmëët tsëënëjäämpy; ojts tu'uk käjpxytyu'unën nyaj'o'oyëmë ets mijts npëjky. Ëjts Wintsën, ëjts ënaanp.

⁹Ets nyajtsiiy, nyawatsy ma ënäty të mne'pnyëtyä'äyën ets ntuku'tsy yë tsooy mëti'ipë pa'akxu'kpën;

¹⁰ojts ntukxoxy yë wit kanaak ujkën ets ojts ntukteky jyänë yë po'okë'ëk oypyë, tsowpë; ojts nmooy yë mwëën mëti'ipë linë witën ets nmooy yë mwit mëti'ipë jo'okyën ets tsowën;

¹¹tääts ojts mpëjktakëmë yë mkë'ëjän, mtatsktëy ets mnantsëm;

¹²ojts jam mpëjktä'äkyës ma mjëjpën yë kë'ëjiits ets ojts nmo'oy yë mtatsktëy ets mkujän oypyë yaj'ixyën.

¹³Nituky ojts mwë'ëmy mëët yë pu'ts pujxn ets poop pujxn; linë wit ojts xywyit'aty, oyëtypë wit myajtuun, kanaak ujkën. Oyjyäty ijty mkay m'uuky, yë'ë uuxpa'ak ets olivë on mjë'kxyp. Janty oy myaj'ijxy, m'awinpijty jëtu'un tä tu'uk to'oxytyëjkën mëti'ipë yajkutujkpën.

¹⁴Akäjpxy ojts m'ity oymyaanaax myaakajpnëty mëët ko ënäty m'oyëty mtsujëty, aak'oy ijty ja'ay mtijyë jä'ä ko ëjts ojts mijts n'oytyuny. Ëjts Wintsën, ëjts ënaanp.

¹⁵Je'eyëp ko mijts yi'iyë ojts xytyuk'ijxpety ja m'oy'at mtsuj'at ets ko aak'oy ja ja'ay mnikäjpxy mnimëtyä'äkyë; ka'apës të xy'ëkwintsë'kënë, tëë m'awinpijnë tä tu'uk yë to'oxytyëjkën mëti'ipë xim yam yë ye'etyëjk myëët'ajtypyën.

¹⁶Mëët yë mwit mtujkxy ojts xy'oytyuny yë nyitsajptëjk yë wiink tios jam muum tunkëjxm kopkkëjxm ets jam ja mjot mnini'kx xytyo'ky.

¹⁷Ojts xymyënëjkxta'ay ja pu'ts pujxn poop pujxn mëti'ipë nmooyën ets ojts xy'oytyuny ja ja'ay mëti'ipë mëët mko'knën;

¹⁸ojts xytyukxoxy ja wit kanaak ujkën ets xytyukwintsë'këy ja on ets ja poom mëti'ipës të nyajtuknipëjktaakën.

¹⁹Ja tsajpkääky mëti'ipë nmooyën, mëti'ipës mëët n'oytyuunyën ja oypyë tsajpmokway ets ja on ets ja uuxpa'ak mëti'ipë ënäty mëët të n'ixy të nmëyätyën, yë'ë të xytyukwintsë'kë tä tu'uk yë wintsë'kënën mëti'ipë oy xu'kp jojkpën. Ëjts Wintsën, ëjts ënaanp.

²⁰Ojts näjyëtu'un ja n'u'unk'ajt n'ëna'k'ajtëm xytyukwintsë'kënë tääpë awinax ets tsu'tstë twëjtstë. Ka'ap yowë xytyim mëjpëjktä'äky ko kujeny të m'awinpijnë,

²¹ets ëpëky të xykyë'ëyajknë ja n'u'unk n'ëna'kës ets jëënjoty të nyitoytyë ma awinax të yajtukwintsë'këtën, ¿këtiijë?

²²Mijts, ma tyam je'eyë mjot mnini'kx xytyo'knë xyajknën ka'ap xy'ëkja'amyäjtsnë wi'ix ojts mëxu'unk'atyën, ko niwa'ats ëxwa'ats miiny naaxwiiny ets jëtu'un ja ne'pny xytyukyäjtsëtyääynyë.

²³Paatyës tyam n'ëna'any: Janty mon janty tuk mijts myajpaaty. Ëpëky ja wiinkëtypë ja ëxëëk tu'unën ëxëëk kajpxën mëti'ipë të xytyuuntëkoyën,

²⁴xii yaa ojts muum xykyojy yë wiink tios yë nyitsajp tëjk ma xy'ëwtatëtyën ets ma ja mjot mnini'kx xyakëtyën.

²⁵Maajaty yë tu'u jyëjpkëxyën jam ojts xykyojy kanaak yë tsajptëjk ets ja m'oy'ajt mtsuj'ajtën xyaj'awinpijty ëxëëk tuunk, ko ja mjot mnini'kx xyäky ets xymyo'oy oypyënëty, mëti'ipë tu'uye'epyën, xytyooky jëtu'un ja mjot mnini'kx.

²⁶Ojts ja mjot mnini'kx xymyo'oy ja mëjëën mëtëjk, tääpë Egiptë ja'ayëty mëti'ipë mëjatyëty yë ye'etyëjkajtën etsës xyajjoot'anpëjky mëët ko ja mjot mnini'kx xymyooy oypyënëty.

²⁷Ënät ojts nyajnitukë ets xykyumëtowëty ja mpoky, ojts njëpëjkta'ayës yë mjë'kxy mpëky ets ja Filistejë ja'ayëty ntukkë'ëtëjkëy mëti'ipë m'ëxëëk ijxëpën ets ka'ap ënäty t'oy'ixy ijxtëm m'ëtë'ëtsy m'ëna'anyën oytyuktsëtyuunë.

²⁸E kä'äpyëm mku'uxyë paaty ojts yë mjot mnini'kx xyäky ma Asiria ja'ayëtyën ets kä'äpyëm mjotkëtäky.

²⁹Babilonyë ja'ay ojts xymyooykyojnëpë ja mjot mnini'kx, ja'ay mëti'ipë ajuuy ato'ktëpën ets oy jyajëtu'unëty kä'äpyëm mkuxë.

³⁰Ëjts Wintsën, jëtu'unës n'ëna'any: Ko mijts mëk pëjkëptëm ënäty yë mjuuky jot paaty ja mjot mnini'kx xyäky ets kanaak ja ja'ay xymyo'oy ets ninu'un mkatsëtyuny.

³¹Maajaty yë tu'u jyëjpkëxyën ets maajaty y'ëwaatsëtyën, jam ojts xy'oytyuny yë m'awinax yë nyiwintsë'këntyakn ets jam ja mjot mnini'kx xyäjky. Mijts ka'ap ijty mjëtu'unëty tä yë to'oxytyëjkën mëti'ipë jyot nyini'kx yäjkpyën, jä'ä ko mijts ka'ap ijty mjä'ä xynyimeenypyiky.

³²Yë to'oxytyëjk mëti'ipë ka'ap twintsë'ëkën yë nyiye'etyëjk, y'ëxajëp yë ye'etyëjk wä'än tpënëty.

³³Yë kujenytyo'oxy nyipëjkpy yë jyot nyini'kx; e mijts ni'ikyë xynyayäky yë mjot mnini'kx ma ye'etyëjkëtyën ets ni'ikyë xymyëjuy ko muum wiink naaxwiinyëtë tsyoontë ets mëët mpokytyuny.

³⁴Mijts tëkatsy mkujenytyo'oxy'äty ka'ap jyëtu'unëty tä yë kujenytyëjkëtyën; jä'ä ko ka'ap mijts pën m'ixta'ayë ets mpokytyunëty ets ka'ap pën meeny mo'oyë, mijts ni'ikyë xymyëjuy ja ye'etyëjk mëti'ipë mëëtko'knaayëpën. Yë'ë yajtuk'ijxp ko mijts mtëkatsyëty.

³⁵Paaty mijts kujenytyo'oxy, mëtoow'it wi'ix yam n'ënëëmëja'anyën:

³⁶Ëjts Wintsën, jëtu'un mijts yam n'ënëëmë: Mijts ka'ap nitiitsëtyu'un xyjyawë ko mnänyijeny mnäy'ixjenyë ets të xymyëëtko'knë wä'än tpënëty, xyäky jëtu'un ja mjot mnini'kx, xymyo'oy ja wyintsë'kën ja awinax mëti'ipë m'ëwtajtypyën; tëë xytyäämë xyjyä'tsë ja m'u'unk m'ëna'k ja jyot nye'pny ko të xyäky ma jam xytyukwintsë'ëkën ja m'awinax.

³⁷Paaty yam nwinwoowmujkta'aja'anyës ja ye'etyëjktëjk mëti'ipëjaty të xymyëëtko'knën, mëti'ipëjaty të xytsyokyën ets të xy'ëxëëk'ixyën ets ntuknimina'any; jam ma yë'ëjëtyën nijäna'any n'ixjäna'any ets m'ixëtëty niwa'ats ëxwa'ats.

³⁸Ets yë'ë ntukpatëkëjäämpy ko ënäty të xyajwintsë'këntyëkoy ja pëjkën ukën ets ko ënäty të myajja'ay ooky, atsip a'äkë nëjkx nyaj'ooky.

³⁹Yë'ë ntukë'ëtëkëjäämpy ets yë'ë nëjkx tyajkutëkooytya'atë maajaty ënäty të xy'oytyunyën yë m'awinax ma xytyuunk'atyën yë ëxëëkpë ma oypyënëty xymyo'oyën ja mjot mnini'kx. Nëjkxëp myajpëjkëtyä'äy ja mwit mtujkxy ets ja mkë'ëjän mkë'ëjiits, niwa'ats ëxwa'ats nëjkx myaj'ëxmatsy.

⁴⁰Nëjkxëp ja naax kajpn mtukjoot'anpëkyë, kuka'atsy kupuxy nëjkx myaj'ookyë.

⁴¹Nëjkxëp yajjëën'ixkonë ja mtëjk ets nëjkx mnitukë ma ënäty jam may ja to'oxytyëjk të nyiye'eypyätën. Nyajkutëkoyäämpyës jëtu'unpë ja mtuunk ets ka'ap nëjkx xy'ëkpatnë ja ye'etyëjk mëti'ipë mëjuyëpën ets mëëtko'knëtëty.

⁴²Jëtu'un nëjkx xyeemy ja ntsip n'äkës ets jotkujkës nëjkx nwë'ëmy; nëjkxëpës ntukjotkëtä'äky ets ka'apës nëjkx jëtu'un ja tsip äkë n'ëkmëët'ajnë.

⁴³Mijts tëë xyjyä'äytyëkoy wi'ix ojts m'ëna'k'atyën, je'eyës ojts xyajjoot'anpëky mëët ko yi'iyë ja ëxëëktu'un ëxëëk kajpxën të xyajtu'uye'ey ëxëëkpë tsaatsypë; paatykyëjxm mijts ntëytyuna'any ko ka'ap tii oy të xytyuny. Ëjts Wintsën, ëjts ënaanp.

⁴⁴Tëkokyë ja ja'ay nëjkxëp ja aaw ayuk tkajpxtë mëti'ipë ënaanpën: Jëtu'un tä ja u'unktaakën jëtu'un ja nyinëëx.

⁴⁵Mijts yë'ë ojts xytyaak'aty tu'uk yë taak mëti'ipë ijty y'ëxëëk'ijxypyën yë nyiye'etyëjk ets y'u'unk y'ëna'k; näjyëtu'un ja mtsë'ëtëjk y'ëxëëk'ijxtëp ijty ja nyiye'etyëjk ets ja y'u'unk y'ëna'k. Miits yë mtaakëty Hit ja'ay ijty ets mteetyëty Amor ja'ay.

⁴⁶Ja mtsë'ëtaak yë'ë ojts nyijkxy anëkëjxytsyow, ma Samaria kajpnën ets Samaria nyaaxjotmën; e ëpa'tkë'ëmtsow yë'ë ojts jam nyijkxy yë m'uty to'oxytyëjkpë, ma Sodomë kajpnën ets Sodomë nyaaxjotmën.

⁴⁷E mijts näjyëtu'un të m'ëtë'ëtsy tä yë'ëjëtyën nän timjëtu'un winë ëxëëkjaty të xytyuny. Ka'ap mkuxë ni'ik o'ktëy të m'ëtë'ëtsy.

⁴⁸Ëjts Wintsën, njuukyajtënës yam ntukkajpxpejtyp etsës n'ëna'any: ko yë m'uty Sodomë ets mutskëtypë nyaax kyajpn ka'ap jëtu'un tyim'ëtëtsy tä mijts të m'ëtë'ëtsyën ma mutskëtypë mnaax mkajpnën.

⁴⁹Jä'ä ko yë m'uty Sodomë, mëët yë mutskëtypë nyaax kyajpn, paaty ijty mëj këjxm nyäyajnaxëtë jä'ä ko tam may tmëët'atë jyi'kxy pyikyëty ets jotkujk yajpaatë, je'eyë ko ka'ap ojts nijëna'a tputëkëtë yë ëyoopëja'ay ets mëti'ipë winë yajmëyäjtypyën.

⁵⁰Amëj akëjxm ojts jyä'äy'ajnëtë ets tuunëtë ëxëëkpës n'ixyën; paatykyëjxmës të nyajkutëkoy tä të xy'ixyën.

⁵¹Samaria kajpn ënätpë, yë'ë nikujkwä'kxy mkamëpaatyë ma nëë pokyën. Jä'ä ko mijts ni'ik o'ktëy të m'ëtë'ëtsy ma ja nëë pokyën; ni'ik ja mpoky ko yaj'ijxkijpxy mëët yë'ëjëty, jëtu'un yaj'ixtë ka'ap yowë tii poky tmëët'atë.

⁵²Mijts kopkpëky ko xytyëëmnaxëty ja ëyo'on jotmay, ko mijts ja mpoky mëjwiin këjää ets ëxëëkjaty ni'ik, jëtu'un yaj'ixy ka'ap yowë nëkoo të pyokytyuntë ja mmëkä'äxtëjkëty. Mijts kopkpëky ko xymyënaxy xyajnaxy yë tsëtyu'un ets xymyënax xyajnaxëty ma o'ktëy mjatëty mkëpätëtyën, jä'ä ko nikë jëtu'un yaj'ixy yë mmëkä'äxtëjk ka'ap yowë tii poky tmëët'atë.

⁵³Nyajjotkujkëjäämpyës jatëkok yë Sodomë kajpn ets Samaria kajpn, mëët nitëkokyë mutskjatypë kyajpn; näjyëtu'un mijts nyajjotkujkëjäämpy jatëkok,

⁵⁴je'eyëp ko mmënax myajnaxëp oy ënäty o'ktëy mjaty mkëpety ets ko ënäty xytyuktsëtyuny mëti'ipë të xytyunyën, ënät nëjkx yë'ëjëty jyotkujkëtë ma mijtsën.

⁵⁵Ko ënäty yë Sodomë kajpn, Samaria kajpn ets myutsk kajpn jatëkok jyotkujkëtë jëtu'un tä ijty tëëyëpën, näjyëtu'un miitsëty mjotkujkëja'antë mëët yë mutskjatypë mnaax mkajpnëty.

⁵⁶Mijts je'eyë ijty xynyëxi'iky xytyukxi'iky ko o'ktëy jyäty kyëpety yë m'uty Sodomë, jä'ä ko mëj këjxm ënäty mnäjyawëty

⁵⁷ma ënäty ka'ap wyinkëxë'ëknyëm ja mpoky; e tyam tëkokyë tääpë naax kajpnëty, ma tsyëënëtën yë Edom ja'ayëty, filistejë ja'ayëty ets mëti'ipë mëët mnätyu'kmëtsëpa'an'atyën je'eyë tyam mtukxikënë; ka'ap ni pën m'ëk tsojkënë.

⁵⁸Tyam kopkpëky ko xymyënaxy xyajnaxy ja ëyo'on jotmay jä'ä ko ëxëëk winë të xytyuny. Ëjts Wintsën, ëjts ënaanp.

⁵⁹Ëjts Wintsën, jëtu'unës n'ëna'any: Ko nmo'ojäämpy yam ja tëytyu'unën ijxtëm mnitëkëtyën, jä'ä ko ka'ap të xypyatuny ja m'aaw m'ayuk mëti'ipë käjpxytyu'unën'ajtpën.

⁶⁰Ëjts tëy wa'atsës nja'amyätsa'any ja käjpxytyu'unën mëti'ipës ntuunën mëët mijts ma m'ëna'k'ajtyën ets ntunäämpyës yë käjpxytyu'unën mëti'ipë xëmë ijtëwaanpën.

⁶¹Ko ënäty nmo'oy ja mmëkä'äxtëjk to'oxytyëjkpë tä jeexyë xynyëëxëtyën, oy kyakopkpëkyëty tääpë käjpxytyu'unën mpatunëtyës, mijts je'eyëm nëjkx xyjyä'äymyetsy ja m'ëxëëktu'un m'ëxëëk kajpxën ets je'eyëm nëjkx mtsëtyuny.

⁶²Nëjkxëpës nyaj'ajämë ja nkäjpxytyu'unënës mëët mijts, ënät nëjkx xynyijawë ko ëjts Wintsën.

⁶³Ko xyjyä'äymyätsëty mëk nëjkx mtsëtyuny ets ëxëëkëm nëjkx mnäjyawëty, ka'ap xy'ëknimëtya'akanëty ja mtuuntëko'oy mkajpxtëko'oyën ko ënäty të nmä'äkxta'ayës ja mpoky. Ëjts Wintsën, ëjts ënaanp.