Read Biblia Mixe de Quetzaltepec Ezequiel 18 Bible Online

Ezequiel 18 - Biblia Mixe de Quetzaltepec bible

Ezequiel 18

¹Ënät ja Wintsën ojts xymyëkäjpxyës ets xy'ënëmaayës:

²¿Wi'ix ko jam Israel je'eyëm yë käjpxy y'ënä'äny: Ko yë teety taak yë tsatym xun tjë'kxtë y'u'unk tëtsxëmimëtëp?

³Ëjts Wintsën, njuukyajtënës yam ntukajpxpejtyp ets jëtu'unës n'ëna'any; ko ka'ap ya'atë aaw ayuk nijëna'a y'ëkyajkajpxnëty ma Israel kajpnën.

⁴Aak ëjts njä'ä'ajtyp yë naaxwiinyëtë ja'ay, näjyëtu'un yë teety taak ets u'unk ëna'k. Mëti'ipë pokytyuunpën yë'ë ookaanp.

⁵Yë ja'ay oyjyä'äy yajtijy ko mëtëy winë tuny ets mëtëy nyipaye'ey;

⁶ka'ap jam nyijkxy kopkkëjxm ma ja'ay tnixëëwtunyën awinax ets ka'ap tuk'ijxpety ka'apë tiosëtyën mëti'ipë Israel ja'ayëty myëët'ajtëpën; ka'ap yë myëku'uk yë tyo'oxytyëjk t'atsojkë ets wyinkutsë'këp yë tyo'oxytyëjk ko y'ëmaay'ity;

⁷ka'ap jyiiky myëku'uk tyaj'ëyoy, myoopy jatëkok ja myëku'uk mëti'ipë të t'amëtoyën ko të tyajnu'kxy; ka'ap pën tmeetsy; yajwä'kxyp yë kyääky y'uuky ma ja'ayën mëti'ipë yuu'o'këpën ets xyojxyp mëti'ipë niwa'ats ëxwa'atsën.

⁸Ko yë meeny pën tuk'ënu'kxy ka'ap yë'ëkyëjxmëty ko tyaj'u'unk'ata'any; ka'ap pën t'ëxëëktuny; mëtëy tnipaye'ey ja nëë poky ko pën nimäjtsk tsyippaaty;

⁹jëtu'un winë tuny tääjës yë n'ënä'ämën ntëyajtën y'ënä'änyën ets wa'ats tpaatuunta'ay. Tääpë ja'ay oy jyuuky'äty ets xëmëkyëjxm jyuuky'ata'any. Ëjts Wintsën, ëjts ënaanp.

¹⁰Pën tääpë ja'ay myëët'ajtyp tu'uk yë myaank mëti'ipë ëxëëk ja'ay'ajtpën ets yajja'ay o'kp,

¹¹mëti'ipë ka'ap yë tyeety ijty tunyën, ijxtëm ko jam tunkëjxm yajnixëëwtunyën yë wiink tios ets pyëjkëp yë myëku'uk ja tyo'oxytyëjk,

¹²yaj'ëyoopy ja ëyoopëja'ay ets mëti'ipë yajmëyäjtypyën winë ni'ikyë tmeetsy, ka'ap tmooywinpity mëti'ipë të tpëjkën; tyuk'ijxpejtyp wiink tios ets yë'ë tyuunpy ëxëëkpës n'ixyën,

¹³nëkooyë këjää tyaj'u'unk'ajnë meeny mëti'ipë myëku'uk tyuk'ënu'kxypyën; tääpë ja'ay ka'ap tjëkyepy jyuuky'atëty. Ko ënäty të tuunta'ay tëkokyë mëti'ipës n'ëxëëk'ijxypyën, tääts y'ooka'any ets ka'ap tii yajtso'oka'anyë, kë'ëm ënäty jëtu'un nyätyunyë.

¹⁴Näy tää u'unk ëna'k mëti'ipë y'ijxypyën wi'ix ja tyeety ja nëë poky tuny tkäjpxyën, je'eyëp ko yë'ë ka'ap jëtu'un tii tuny;

¹⁵ka'ap jam nyijkxy kopkkëjxm ma yajnixëëwtunyën ja wiink tios ets ka'ap wiink tios tuk'ijxpety mëti'ipë jam yajpatpën ma Israel kajpnën; ka'ap tpëjkë myëku'uk yë tyo'oxytyëjk

¹⁶ka'ap tyaj'ëyoy ja ëyoopëja'ay; ka'ap tii t'amëtoy ko myëku'uk meeny tuk'ënu'kxy; ka'ap pën tmeetsy, ni'ikyë ja kyääky y'uuky tyajwä'kxy mëët mëti'ipë yuu'o'këpën ets xyojxyp ja mëti'ipë niwa'ats ëxwa'ats yajpatpën;

¹⁷ka'ap pën t'ëxëëktuny, ka'ap yë'ëkyëjxmëty meeny pën tuk'ënu'kxy ko tyaj'u'unk'ata'any; pyatuumpy ja n'ënä'ämënës ntëyajtënës, mëtëy jyuuky'äty; tääpë ja'ay ka'ap y'ooka'any oy ënäty ja tyeety të jyapokytyuny. Yë'ë kopkpëky ko jyuuky'ata'any.

¹⁸Yë tyeety mëti'ipë yaj'ëyoowën ja ëyoopëja'ay ets ojts myeetsy, ëxëëk y'ëtity y'ënäny ma nyaax kyajpnën, kyu'ookëjäämpy ja nyëë pyoky.

¹⁹Nëjkxëp xyajtëwtë: ¿Wi'ix ko yë u'unk ëna'k ka'ap tkukëpätë ja teety ja pyoky? Paatykyëjxm jyëtu'unëty jä'ä ko ja u'unk ëna'k ojts tuntë mëti'ipë mëtëyën ets mëti'ipë wa'atsën, ojts tpatuny ja ënä'ämën tëyajtën; paaty mëtëy ko jyuuky'ata'any.

²⁰Yi'iyë mëti'ipë pokytyuunpën ookaanp. Ka'ap tjëkyepy yë u'unk ëna'k tkëpätëty tyeety yë pyoky; näy ka'ap tjëkyepy teety tkëpätëty yë u'unk ëna'k yë pyoky. Yë ja'ay mëti'ipë mëtëy winë tyuunpyën y'ëxajëjäämpy ja näykyumayë mëët ko ënäty mëtëy winë të tuny; e mëti'ipë ëxëëk winë të tunyën kwanë ko nëjkx tkumëtoy.

²¹E pën yë ëxëëk ja'ay y'ëxmajtsyp yë y'ëxëëktu'un y'ëxëëk kajpxën ets tpatuny tëkokyë yë ntëyajtënës ets tuny mëti'ipë mëtëyën ets wa'atsën, tëyajtën yë'ë ko tääpë ja'ay juuky'ataanp ets ka'ap y'ooka'any.

²²Ja mëti'ipë ënäty ëxëëk të tunyën ko të pya'tkë'p'aty ka'apës ja nja'amyätsa'any ets yë'ë nëjkxëp ja jyuuky'äty mëët ko ënäty ja mëtëypyë të tuny.

²³Ëjts ka'apës ntsoky ets ëxëëk ja'ay y'ookëty, yë'ëjës ntsojkpy ets tyajtëkatsëty yë jyuukyajtën ets jyuuky'atëty. Ëjts Wintsën, ëjts ënaanp.

²⁴E ko yë wa'ats ja'ay t'ëxmatsëty ja oynyë'ë oytyu'u ets jä'ä tunëty ja ëxëëkpë mëti'ipës n'ëxëëk'ijxypyën mëti'ipë ëxëëk ja'ay tyuunpyën, ¿ko m'ëk may m'ëk tajtë, wä'än jëtää tääpë ja'ay jyuuky'atëtyë? Oy ënäty tii winë të tjatuny oy, ëjts ka'apës nja'amyätsa'any; yë'ë kopkpëky ko y'ookëty mëët ko ënäty të xykyawintsë'ëkës ets yë'ë nëjkx tku'ookë nyëë pyoky.

²⁵Miitsëty wä'än jëtää m'ëna'antë ko ka'apës tii mëtëy nipaye'ey; mëtoow'itë yajxon miitsëty Israel ja'ayëty, ¿wi'ix, mmaaytyëp mtajtëp ko ka'apës tii oy mëtëy nipaye'eyë? ¿Këtii jyëëmpitëty mijts mkajpxtë, këtii jëtää yë'ëjëty xynyikajpxtë ko miitsëty ka'ap tii mëtëy xynyipaye'eytyë?

²⁶Pën tu'uk wa'ats ja'ay y'ëxmajtsyp ja oynyë'ë oytyu'u ets tuunë ja ëxëëkpë, kopkpëky ko y'ooky ets tkukëpety ja y'ëxëëktu'un y'ëxëëk kajpxën.

²⁷Ko tu'uk yë ëxëëk ja'ay t'ëxmatsy yë ëxëëktu'un ëxëëk kajpxën ets jä'ä tuny ja mëtëypyë ets jaantypë, yë'ë yajtso'okäämpy yë jyuukyajtën.

²⁸Ko wyinma'anypyaatëty ets t'ëxmatsëty yë ëxëëk në'ë ëxëëk tu'u, tääpë ja'ay juuky'ataanp yë'ë ets ka'ap y'ooka'any tyëkoyä'äny.

²⁹E yë Israel kajpn ëna'anaanp yë'ë ko ka'apës tii oy nipaye'ey. ¿Ko ëjts ka'apës tii oy nipaye'ey? ¿Këtii jëtää yë'ëjëty yë Israel kajpn ka'ap tii oy tnipaye'eyë?

³⁰Tyam yë mpoky ntukwinmëtowa'antë, wi'ixjaty winë të xytyuuntëkoytyën, miitsëty Israel ja'ayëty. Ëjts Wintsën, ëjts ënaanp. Nikë tim ëxmatstë yë m'ëxëëk juukyajtënëty, këtiipë kë'ëm mpoky tsyëëmë'ëktëty ko ënäty axit ako'owë mjatë mkëpätë.

³¹Tim mëjëkämkä'äktë yë ëxëëkajtën maas të xymyëtëkoytyën, yaj'oyëtë ets yaj'ajämëtë yë mjuukyajtënëty. ¿Mijts Israel, tii ko m'ëk o'kpëty?

³²Ixmatstë yë ëxëëk juukyajtën ets mjuuky'atëty. Ëjts Wintsën, ëjts ënaanp.