Read Biblia Mixe de Quetzaltepec Ezequiel 21 Bible Online

Ezequiel 21 - Biblia Mixe de Quetzaltepec bible

Ezequiel 21

¹Ënät ja Wintsën ojts xymyëkäjpxyës ets xy'ënëmaayës:

²Mijts ye'etyëjk, nëjkx jatëkok jam Jerusalén ets xynyikajpx xynyimëtya'akëty ko yë tsajptëjk mëti'ipë jamën o'ktëy jyata'any. Ëjts yë nxëëw mtukajpxpätëp ko ënäty xynyimëtyä'äky wi'ix jya'ta'any yë Israel kajpn,

³jëtu'un xy'ënëëmëty: Jëtu'un yë Wintsën y'ënä'äny: Ëjts mëtsipës yam n'awinpity ma mijtsën ets nkupujxta'aja'anyës yë ja'ay, yë'ëpaat mëti'ipë ka'ap pyokymyëëtëtyën ets mëti'ipë pokymyëëtën.

⁴Jëtu'un, mëëtës yë ntëypyujxn nyaj'o'kta'aja'any yë ja'ay, tu'knaxës nyaj'ooka'any wa'ats ja'ay ets pokyjyä'äy, anëkëjxytsyow ets ëpa'tkë'ëytsyow.

⁵Nëjkxëp yë ja'ay tnija'awëtya'atë ko ëjts Wintsën, tëëjës ja ntëypyujxn nyajpëtsëmy ets ka'apës mpëjkë'ëka'any.

⁶Mijts, ye'etyëjk, jë'ë ya'ax mëët ja monyëtukyë ets ja jotmay; winyaaxë ja naax kajpn.

⁷Ko pën myajtëwëtëty tii ko myä'äxy, jëtu'un xy'ënëëmëty jä'ä ko të xynyijawë ko tää ja ëyo'on jotmay myiny kyëtä'äky, ënät nëjkx ja ja'ay tyëkëtë moonpë tujkpë ets nëjkx jëtu'unyë ja kyë'ë y'aaw tim nyajtstë'ëyëtya'atë; ni pën nëjkx jotmëk kyanäjyawëty, tu'ukyë jyänty tsyë'këtya'atëty. Tyimpatyp ja xëëw jëmëjt ma ja ëyo'on tyuna'any jyata'anyën. Ëjts Wintsën, ëjts ënaanp.

⁸Ënät ja Wintsën ojts jatëkok xymyëkäjpxyës ets xy'ënëmaayës:

⁹Mijts ye'etyëjk, nëjkx jatëkok ja n'aaw n'ayukës nikajpx nimëtya'ak ets jëtu'un xy'ënëëmëtëty ko tëë ntuk'ëne'emy ets m'ëna'anëty: Ja tëypyujxn, ja tëypyujxn. Tëë yajjëjpme'ey ets tëë yajëjpwitsy.

¹⁰Tëë yajjëjpme'ey ets yaja'ay y'ooka'any, tëë yajëjpwitsy ets y'atë'kxëty ko ënäty yaj'ajëpipy;

¹¹paaty të yajjëjpme'ey ets yajnajtstijëty. Tëë yajjëjpme'ey yajëjpwitsy ets tyajtunëty yë yaja'ay o'kpë.

¹²Mijts ye'etyëjk, ya'ax jok, jë'ë ya'ax, jä'ä ko tëë kajpn nyitukë ets ja ja'ay y'o'kta'atëty, tëkokyë Israel yajkutujkpëtëjk. Tëë nyitujkëtya'atë ets y'o'kta'atëty mëët tu'kë'ëyë yë naax nkajpnës, paaty jotëkoy ets näkyätsykyoxët.

¹³Ëjts Wintsën, ëjts ënaanp.

¹⁴Mijts ye'etyëjk, nimëtya'ak yë n'aaw n'ayukës; yajjoot'anpëjkta'a ja'ay. Ja tëypyujxn nipëjktaakë y'ijnë ets yajja'ay'ookëty, tääpë tëypyujxn tëë ja naax kajpn t'okwinkajpxëtyä'äy.

¹⁵Të yajjëjpme'ey ets tyajnaax'ookëty mayjyä'äy, tëë yajnime'ey ets y'atë'kxëty.

¹⁶Anajny aka'any jëjp me'ey m'itëty, oy maatsow tyim yajtukpuxëty yajtsëtyut yajwintëkoyëp.

¹⁷Ëjts ni'ikyës yam näjyëtu'un nyajjoot'anpëka'any koonëmës yë n'äkë xyäämëty. Ëjts Wintsën, ëjts ënaanp.

¹⁸Ënät ja Wintsën ojts xymyëkäjpxyës etsës xy'ënëmaay:

¹⁹Kääts mäjtsk yë tu'u ma Babilonyë yajkutujkpë tmënaxëtyën yë tyiypyujxn. Ja mäjtskpë ja tu'u aakjam tsyoontëty ma tu'ukpë kajpnën, ma ja tu'u tsyo'ontä'äkyën jam xykyëxja'ajëty maatsow nyijkxyën.

²⁰Mtuknikäätsëp ja tu'u maajaty tmënaxëtyën ja tyiypyujxn ja Babilonyë yajkutujkpë. Yë'ë nyinëjkxëp ja Rabá kajpn, ma ja Amón ja'ay tsyëënëtën ets ja Jerusalén kajpn, ma tsyëënëtën ja Judá ja'ayëty.

²¹Tëë ja Babilonyë yajkutujkpë nyäpyëjktä'äkyë jam ma mäjtskpë ja tu'u tsyoonyën, tam t'ijxpëtsëmy wi'ix winë tunëtyën, tam t'ixta'ay tuunta'ay yë tyi'pxn, tam näjyëtu'un tyajtëy yë tyios, tam t'ixy tuny wi'ixjaty ja jëyujk määts y'ixëtyën.

²²Ma y'a'oykyë'ë ja ti'pxnkepy tukni''ixyën yë Jerusalén kajpn, jëtu'un yajja'akyukë ko yë'ë nyitëkëjäämpy, yajja'ay ookaanp, tsiptunaanp ets tyajkutëkoyä'äny ja naax kajpn ets twinwëëtëty ja potsy ma tnipätëtyën ja kajpn ets tyajnatujkta'atëty.

²³E yë Jerusalén ja'ayëty ka'ap timmyëjpëjkta'aktë ya'atë aaw ayuk mëti'ipë yam ja yajnimëtyakpën, yë'ë tyukjotkujk'ajtyp ko tëë mëët wiinkëtypë naax kajpn käjpxytyu'unën tuny. Yë'ë yajnimëtyakp tëypyë mëët ko tëë nëë poky tmëtëkë.

²⁴Paaty ëjts maas nWintsën'atyën jëtu'unës n'ëna'any: Ja ëxëëktu'un ëxëëk kajpxën ets ja o'kën tëko'oyën mëti'ipë të xyaj'itën wa'atsës të n'ixta'ay; ja nëë poky mëti'ipë yu'utsy me'ty të tuntën tëë ja nyitë'kxta'ay. Paatykyëjxm yajmajtsta'aja'antë mëti'ipë të tyuuntëkoytyën.

²⁵E mijts, Israel yajkutujkpë, ëxëëk ja'ay ka'oyjyä'äy, miimp wiinkoonp ja nyixëëw ma myajtëytyunëtyën.

²⁶Ëjts Wintsën jëtu'unës n'ëna'any: Myajpëjkëjaanp yë mkupit, ja mkujän mëti'ipë më'ëne'emypyën ets nëjkxëp winë tyëkajtsta'ay. Nëjkxëp mëj'äämpy nyäxy mëti'ipë yu'unk naxym yajpatpën ets yu'unk naxym mëti'ipë mëj'äämpy yajpatpën.

²⁷Aak potsykyutuk nëjkx nyajwë'ëmta'ayës xii yaa. Je'eyëp ko ya'atë ëyo'on yë'ë nëjkx tyaj'ity yë mëti'ipë patëpën ets mëti'ipës të xykyexyën, yë'ë nëjkx tpaye'eytyä'äy winë mëtëy.

²⁸Jëtu'un yë Tios y'ënä'äny: Mijts ye'etyëjk, nikajpx nimëtya'ak yë n'aaw n'ayukës ets xy'ënëëmëty yë Amón ja'ayëty mëti'ipë nyëxik tyukxiktëpën yë Israel kajpn, ko ja tëypyujxn jëjp'ixy yajpatnë ma yë'ëjëtyën: tëë yajxon yajme'ey, atë'kxp awëtsujkp yaj'ijxnë, je'eyë yaja'ay ookanë.

²⁹Mëti'ipë mjawin'ijxtëpën ka'ap tyiyëty ets mëti'ipë mkajpxtëpën ka'ap myëtëyëty. Jam ja tëypyujxn kyëxka'aja'any ma ja yo'knëtyën tääpë ëxëëk ja'ayëty mëti'ipë je'eyë të tyuuntëkoytyën. Tyimpatyp ja nyixëëw ma yajtëytyuna'antën tääpë ja'ayëty.

³⁰Ets ojts yë Tios jyaak'ëna'any, mijts Babilonyë ja'ay pëjkë'ëk yë mtëypyujxn ma tyëjkën. Mpaye'eyäämpyës yam yë mpoky ma të n'oytyunyën, jam naaxwiiny ma ojts mëxu'unk'atyën,

³¹etsës nyajkëta'aka'any yë n'äkë ma mijtsën tä jëënpatoyën ets nkë'ëyaka'any ma ja'ayën ka'apë pya'ëyoyën ets mëti'ipë yaja'ay o'kpën.

³²Nëjkxëp mnitoy ets m'ookëty; yë mjot mne'pny jëtu'unyë nëjkx tyäämjëtijta'ay maajaty yë naax kajpnën ets ni pën nëjkx mkaja'amyetsyë. Ëjts Wintsën, ëjts ënaanp.