Read Biblia Mixe de Quetzaltepec Ezequiel 23 Bible Online

Ezequiel 23 - Biblia Mixe de Quetzaltepec bible

Ezequiel 23

¹Ënät ja Wintsën ojts xymyëkäjpxyës ets xy'ënëmaayës:

²Jää ijty tëëyëp nimäjtsk ja to'oxytyëjkëty tu'kkä'äxpë, tu'ukyë ja taak tukmuktë.

³Tääpë nimäjtskpë to'oxytyëjkëty ëna'k'ajtëp ënäty ko ojts tpatso'onta'aktë kujenytyuunk, xim yam ja ye'etyëjk tmëët'atë; ko jap Egiptë y'ijtë ka'ap wi'ix y'ënantë ko yajtsi'tskpäntë, jëtu'un'äämpy ojts tyajtëkoytyë ja y'akiixy'ajtënëty.

⁴Ja mëjpë Oholá xyëëwajtyp, yë'ë ja Samaria kajpn kyutënääpy ets ja y'uty Oholibá txëëwajtyp, yë'ë ja Jerusalén kajpn kyutënääpy. Ojtsës mpëky mëët yë'ëjëty nimäjtsk mpatës ja n'u'unk maay ye'etyëjkpë to'oxytyëjkpë.

⁵Yë Oholá ka'apës ojts xymyëj'ixy yë'ë ojts tpanëjkxy wiink ye'etyëjk mëti'ipë yë'ë tsyojkën'ajtypyën, yë Asiria ja'ay tsiptuunpëtëjkëty,

⁶mëti'ipë wyit'ajtëpën oywyit uky tsyaptspë, mëti'ipë ënä'ämtëpën yajkutujktëpën; mëti'ipë ëna'këtyën ets oyëty yaj'ixtë, mëti'ipë tyukjajtëpën wi'ix kwaay tuk'u'unyëtëty.

⁷Ja Asiria ja'ay winpiypyë, yë'ë ojts yë Oholá jyot nyini'kx tmo'oy ets yë'ë ojts ni'ik tsoky yë tyiosëty mëti'ipë y'ëwtajtëpën ets näjyëtu'un t'ëwtajty.

⁸Jëtu'un jap tyimtso'ontäky Egiptë ja jyot nyini'kx tmo'oy oypyënëty ets ka'ap jëtu'unpë tuunk t'ëxmajtsy. Ma y'ëna'k'ajtyën may ja ye'etyëjk ojts myëëtko'knëty ets tyajtëkooy ja y'akiixyajtën ets y'awinpijty to'oxykyujeny.

⁹Paatyës ojts ntimy kyë'ëyäky ma ye'etyëjktëjkën mëti'ipë yë'ë tsyojkën'ajtypyën, yë Asiria ja'ayëty.

¹⁰Yë Asiria ja'ayëty ojts tukxi'iktë ets tpëjkëtyääytyë ja y'u'unk y'ëna'k ye'etyëjkpë to'oxytyëjkpë ets ja to'oxytyëjk tkupujxtë, tukyajku'o'këtyë ko ënäty ja nëë poky të tuuntëkoy. Ja nyëë pyoky akäjpxy ojts y'ity ma ja to'oxytyëjktëjkëtyën.

¹¹Yë y'uty Oholibá ko jëtu'un t'ijxy, tää ojts näjyëtu'un y'ëtëtstä'äky ets ni'ik o'ktëy ojts y'ëti'itsy. Ojts ja jyot nyini'kx tyäky ma ja ye'etyëjktëjkëtyën ets jä'ä ojts tpanëjkxy mëti'ipë ënäty tsyojkën'ajtypyën.

¹²Tsyojk jya'awëy oy yë Asiria ja'ay, mëti'ipë ënä'ämtëpën yajkutujktëpën, mëti'ipë tsiptuuntëpën ets oyëty xyoxy'atë, mëti'ipë tyuk'u'unyääytyëpën ja kwaay ets mëti'ipë ëna'këtyën, oyëtypë yaj'ixtë.

¹³Ënätës nija'awëy ko tëëtëm nyäyaj'ëxëëkëty ets yë'ë të tpanëjkxtëkë ja juukyajtën mëti'ipë ja tsyë'ë të tjuuky'ätyën.

¹⁴E yë'ë ni'ik ojts tyëkoy: Ko t'ijxy ja awinax mëti'ipë jamën potsykyëjxm ma ja Babilonyë ja'ay ojts nyikojtu'utën ets t'ijxy ja awinax tsaptsëty kyoyëty; aakjëtu'un yaj'ixtë tä tsiptuunpë wintsënëtyën, aak wëëny aak jukyëty.

¹⁵

¹⁶Ko t'ijxy ja Babilonyë ja'ay, ënät ja tsyojkën ni'ikyë kyëjääjëy mëët yë'ëjëty ets tuknikejxy ja aaw ayuk;

¹⁷ojts ja Babilonyë ja'ayëty nyiminyë ets myëëtko'knaayë, jëtu'un yaj'ëxëëktëjkëyë, kanaak ja ye'etyëjk tmëët'ajty. Je'eyë ojts yaj'ëxë'këtyä'äyë ets ojts ok t'ëxëëk'ijxnë.

¹⁸Ënät ojts ijxnë kä'äxnë tyimnäkyë'ëyajkënë ma ja kujenytyuunkën, tyajkëxë'knë ja jyot nyini'kx niwa'ats ëxwa'ats, ojtsës xywyinxë'knë jëtu'un tä ënäty ja tsyë'ë të xywyinxëëkyënës.

¹⁹E yë'ë ni'ikyë ojts ja jyot nyini'kx tmo'oy oypyënëty, jëtu'un winë tuunë tä y'ëna'k'ajtyën, ko jap tsyënaay Egiptë ma ojts ja jyot nyini'kx oypyënëty, tmo'oyën

²⁰ojts tsojkën'aty ja Egiptë ja'ayëty, jëtu'unpë y'ëtë'ëtstë y'ëna'antën jëyujk tsajpkaajën.

²¹Mijts Oholibá, mëk ijty xyjyä'äymyetsy ja mjuukyajtën ko m'ëna'k'ajty, ko ijty jap Egiptë ja'ay mtsi'tsk mëxajëty.

²²Paaty ëjts maas nWintsën'atyën, jëtu'unës n'ëna'any: Ko tääpë ja'ayëty mëti'ipë të xymyëëtko'knën ets mëti'ipë tyam mxëëk'ajtnëpën, jä'ä y'awinpijta'atëty mmëtsip. Xiitsow yaatsowës nëjkx najtskäxë ma mijtsën ets mnipëtë'ëkëtëty,

²³nëjkxëp mniminyë yë Babilonyë ja'ayëty, caldeo ja'ayëty, Pecod ja'ayëty, Soa ja'ayëty ets Coa ja'ayëty ets tu'kë'ëyë yë Asiria ja'ayëty aakyë'ë ëna'ktëjkpë mëti'ipë oyëtyën mëkëtyën, mëti'ipë ënä'ämtëpën yajkutujktëpën, mëti'ipë tsiptuunpë wintsënëtyën ets tsip ixyëtyën; tu'kë'ëyë mëti'ipë jëyujktuk'u'unyäätyëpën.

²⁴Nëjkxëp mniminyë, mëët yë kepy wintëkäämpë ets mëët yë maytsyiptuunpëtëjk; nëjkxëp myajnatukyë wä'än tmaajëty, mëët yë pyujxn ku'umënëty mëti'ipë tyukyajja'ay o'ktëpën; tä yë akëëytyukën, kujupën ets n'ënëëmëja'antës wä'än mtëytyunyë; jëtu'un tä yë y'ënä'ämën tyiyajtën myintën, jëtu'un xykyëpätëty ja mpoky.

²⁵Nyajnaxäämpyës yë ntsip n'äkë ma mijtsën ets nëjkx ëxëëk mtunyë, nëjkxëp tnëtsuky yë mjëjp ets mtatsk; mëti'ipë ënäty juuky jaakwë'ëmtëpën kupuxy nëjkx y'o'kta'atë. Nëjkxëp mpëjkxëty yë m'u'unk m'ëna'k ye'etyëjkpë to'oxytyëjkpë ets mijts nino'oky nëjkx m'ooky.

²⁶Nëjkxëp myajpëjkë yë mwit ets nëjkx myajpëjkëtyä'äy yë mkë'ëjiits mtatsktëy.

²⁷Jëtu'un nëjkx nyajjëjpkëxyës ja mjuukyajtën ma të mkujeny'ätyën jap Egiptë, ka'ap nëjkx nijëna'a ja Egiptë ja'ay xy'ëk'ijxnë ets ka'ap nëjkx xy'ëkjot'ajnë.

²⁸Jëtu'unës n'ëna'any, ëjts Wintsën: Ëjts tëëjës ntuknipëjktaakë ets nëjkx ëxëëk mjaty mkëpety wiink naax wiink kajpn mëti'ipë m'ëxëëk'ijxypyën ets mxëëk'ajtypyën.

²⁹Ëxëëk nëjkx mtunyë mëët ja tsyip y'äkë ets nëjkxëp tjä'ä'ajta'atë mëti'ipë ënäty nimëjaaw të xypyäätyën, niwa'ats ëxwa'ats myajwë'ëma'anyë; jëkäm ja mjot mnini'kx yaj'ixa'any mëti'ipë të xykyë'ëyäkyën ko të mkujeny'äty.

³⁰Ko naspëkë të mjuuky'äty ets ko të mkujeny'äty yë'ë tyam m'ëxëëktuunëp; mëët yë'ëkyëjxm ko ja mjot mnini'kx të xymyo'oy oypyënëty ets ko yë'ë mëët të xy'ëwtaty ja wiink tios.

³¹Jä'ä të xypyanëjkxy ja në'ë tu'u mëti'ipë ja mtsë'ë të tpanëjkxyën; paaty näjyëtu'un mijts ntëytyuna'any tä ja mtsë'ë të ntëytyunyënës.

³²Ëjts Wintsën, ëjts ënaanp: M'uukäämpy näjyëtu'un ja nëë mëti'ipë tëytyuunpën ijxtëm ja mtsë'ë t'ukyën, ja mëjpë ets këkpë ja a'ukën jä'ä mtuk'uukëjäämpy, ujtspë yajpaatyën mëët ja nëëxikën tukxikën ets ja kanämyëj'ixë,

³³ujts mëët ja ëyo'on jotmay ets ja o'kën tëko'oyën. Yë'ë nëjkx ja mtsë'ë Samaria ja y'a'ukën myajmukpëkyë ets mnipëkyë.

³⁴Koonëm xytyuk'uktu'utëty ets nëjkx xytyukpu'ujë ja m'a'ukën ets nëjkx mnäkyätsykyupyë. Ëjts, jëtu'un të nikäjpxy maas nWintsën'atyën ets jëtu'unës ja n'aaw n'ayuk të nkë'ëyäky.

³⁵Paaty ëjts maas nWintsën'atyën, jëtu'unës n'ëna'any: Mëët koos tëë xyjyä'äytyëkooynyë ets ja mjëxk të xytyuk'akëëynyës, kopkpëky ko xykyumëtowëty ko xim yam ja ye'etyëjk të xymyëët'aty ets ko mijts je'eyë të mpëyë'ëk'ëwtity.

³⁶Ënät ja Wintsën xy'ënëmaayës: E mijts ye'etyëjk, ¿Wi'ix mnikajpxäämpy wi'ix ja Oholá ets ja Oholibá tkumëtowa'antën ja pyokyëtyë? Pën jëtu'un, tukwinmëtow ma wyiin jyëjpën wi'ix winë ëxëëk të tuntën.

³⁷Yë'ëjëty tëë tyajtëkoytyë ja wintsë'kën maas ëjtsën ets ujts ja kyë'ë y'aawëty mëët ja jot ne'pny. Ka'apës të xywyintsë'ëkëtë, yi'iyë ja wiink tios të t'ëwtatë ets yë'ë të tukwintsë'ëkëtë ja kyë'ëm u'unk mëti'ipës mëët të n'u'unk'atyën.

³⁸Ko jëtu'un winë të tuntë ëjts jëtu'un të xytyuntë, jä'ä ko yë'ëjëty tu'kxëëyë ojts yë njëën ntëjkës tyaj'ëxëëkëtë ets tu'kxëëyë ojts yë npo'kxën nxëëwës tukxi'iktë.

³⁹Ets jä'ä xëëw ma ojts ja y'u'unkëty tukwintsë'ëkëtën ja wiink tios, jä'ä xëëw ojts nyëjkxtë maas yë ntëjkën ets tyaj'ëxë'këtyë. Jëtu'un të y'ëtë'ëtstë maas ja nkë'ëmtëjkën.

⁴⁰Ojts tnikäxëtë ja ye'etyëjktëjk wiink naax wiink kajpnëpë tsyoontën ets myiintë. Tääpë nimäjtskpë to'oxytyëjkëty yajxon ojts nitsiw nixëtsëtë, yajxon nyäy'oytyuunëtë, ojts ja wyiin jyëjp tkoytyë ets t'ëwxijtë ja ye'etyëjktëjk mëti'ipë ënäty minantëpën;

⁴¹jam nyäkyëxko'këtë ma ja maapäjnën oypyë tsujpë ets jëjp'ixy ja kääky uuky y'ijnë, jam ma ja kaaytyaknën ojts ja pa'akxu'kpë tpëjkta'aktë ets tyajtooytyë ja on mëti'ipës ënäty ëjts të nyajtuknipëjktaakën.

⁴²Jëtu'un yajmëtoownë tä ja'ay xyëëwtunyën ko ya'axtë jyoktë; jä'ä xiktëp ëwë'ktëp ja ja'ayëty mëti'ipë ënäty jam të tsyoontën të'ëts'itjotm, mëti'ipë ja to'oxytyëjk y'oytyuuntëpën ko tpëjktakëtë ja oyëtypë ja kyë'ëjän ets ja kyujän.

⁴³Ënätës ojts nmay ntajy: Yë'ë ënät myëët'atantëp tääpë to'oxytyëjkëty mëti'ipë xim yam ja ye'etyëjk të tmëët'atën, tëëpë tyuun'ënu'kxëtën. Myëëtko'knëjantëp ënät.

⁴⁴Ix, yë'ë nyimiintëp ja Oholá ets ja Oholibá, mëti'ipë naspëkë'ajtëpën ets kujeny'ajtëpën.

⁴⁵E yë ye'etyëjkëty mëti'ipë wa'atsëtyën yajnitukëjantëp tääpë nimäjtskpë to'oxytyëjkëty ets tkumëtowtëty yë nyëë pyokyëty ko të yajja'ay'ooktë, jä'ä ko yë'ëjëty tëë tyajtëkoytyë ja wyintsë'kën ma nyiye'etyëjkëtyën ets yaja'ay o'kpë yë'ëjëty.

⁴⁶Jëtu'un ja Wintsën y'ënä'äny: Wä'än ja naax kajpn tu'ukmuky ets tääpë to'oxytyëjkëty yajnitu'ukmukëty, wä'än tyaj'ëtsë'ëkëtë ets wä'än tyajmä'tsta'atë;

⁴⁷wä'än yë naax kajpn tkuka'atsy ets wä'än tukuumnaxy; wä'än tyaj'o'ktaayëtë y'u'unk y'ëna'k ets wä'än tnino'ktaayëtë jyëën tyëjkëty.

⁴⁸Ëjts nyajkutëkoyäämpyës jëtu'unpë nëë poky ma naax kajpnën. Jëtu'un nëjkx ja to'oxytyëjktëjk t'ixtë wi'ix yajtëytyuntën këtiipë näjyëtu'un pyokytyuntëty.

⁴⁹Tääpë nimäjtskpë to'oxytyëjkëty kopkpëky ko tkumëtowtëty yë nyëë pyokyëty ets ko të t'ëwtatë wiinkpë tios ka'apë Tiosëtyën. Jëtu'un nëjkx miitsëty xynyijawëtë ko ëjts Wintsën.