Read Biblia Mixe de Quetzaltepec Ezequiel 24 Bible Online

Ezequiel 24 - Biblia Mixe de Quetzaltepec bible

Ezequiel 24

¹Ma myajk anyën yë mëmajkpo'opë, ja taxtujk jëmëjtpë tyu'uye'eyën, jää ojts yë Wintsën xymyëkäjpxyës ets xy'ënëmaayës:

²Këxja'a ya'atë xëëw, tyampë, jä'ä ko tyam yë Babilonyë yajkutujkpë të tnitëkë yë Jerusalén kajpn.

³Ets xyaj'ëykyojëty mëti'ipë të tyuny të jyätyën ma Israel kajpnën, yë'ë ijxpäjtën wya'antëp. Ets xy'ënëëmëty ko ëjts ënaanp: Yajjëënpät tu'uk yë tu'ts ets jap yë nëë xykyutämëty.

⁴Jap xy'apëkëty yë tsu'utsy tsujktä'äkpyë, yë'ë mtsujkta'akëp yë pyuuy ets kyejky ets m'apëkëp yë pajk xixyëtypë.

⁵Yë'ë myaj'ookëp yë kupixyny oypyë mëkpë ets ja'axy xytyukpa'atwaapëty wä'än yajxon tni'ëëtsy, koonëm kyëëwta'akëty yë pyajk.

⁶Jä'ä ko yë Wintsën jëtu'un y'ënä'äny: Janty mon janty tuk yë naax kajpn yajpaaty mëti'ipë yajja'ay o'kpën. Jëtu'un yë nyäxy tä tu'uk yë tu'tsën mëti'ipë tëë nyikatskënën ets ka'ap y'ëkwatsnë. Tu'ukjaty xyjyuutëty yë tsu'utsy koonëm ja tu'ts xyajtukwa'atsëty.

⁷Yë naax kajpn ujts yajpaaty mëët yë jot ne'pny; jam të nyaaxkutämë tsaakëjxy ma yaj'ixëtyën yajxon ets ka'ap nyaaxkëjxyëty ma jeexyë naaxway yajnitukyën.

⁸Ëjts jamës nyajwë'ëma'any tääpë ne'pny, ma tääpë tsaajën të'kxpë, këtiipë nyitukëty, jëtu'unës njoot'anpëkëty etsës ja nipaye'eyën ntunëty.

⁹Jä'ä ko yë Wintsën jëtu'un y'ënä'äny: Mon tuk yë naax kajpn yajpaaty mëti'ipë je'eyë yaja'ay o'kpën. Tyamës kë'ëm n'oytyuna'any jëëntooytyakn.

¹⁰Mijts yë'ë ja'axy may mëmin, yajmëjë yë jëën ets yajxon xyajkë'ëwëty yë xixy, koonëm y'ë'tstëëtsëty yë tojkxnëë ets tyoyëty yë pajk;

¹¹ets xyjyëënkuwitsëty yë tu'ts tukwa'ats, koonëm jyatëty jëënpajkën ets y'o'kta'ajëty yë ëxëëkpë; koonëm nyëtooytya'ajëty yë nyitsuuts.

¹²Ya'atë tu'ts yajxon të tsyowënë, ka'ap wyintooywyä'ätsy.

¹³Mijts Jerusalén tëë njayajwa'atsa'any ma të m'ëxëëkën ko naspëkë të mjuuky'äty, je'eyëp ko ka'ap mwa'atsy. Jäänëm tëy mwa'atsëty koos ënäty ntsip n'äkë nyajnaxy ma mijtsën.

¹⁴Ëjts Wintsën, ëjts ënaanp ets jëtu'un tyuna'any jyata'anyë. Ëjts jëtu'un kë'ëm nyajtunan nyajjatanëp ets ka'ap mpa'ëyowa'any ets ka'apës jatëkok nwinma'anytyëkatsa'any. Yë'ë ntuktëytyunäämpy ko ëxëëk të m'ëtë'ëtsy të m'ëna'any. Ëjts Wintsën, ëjts ënaanp.

¹⁵Ënät ja Wintsën ojts xymyëkäjpxyës ets xy'ënëmaayës:

¹⁶Tu'ktonyë yam mpëjkëja'any ja ja'ay mëti'ipë mëk mtsojkpy mja'apën. Je'eyëp ko ka'ap ok mya'axëty; ka'ap yë mwiinnëë kya'ajëty.

¹⁷Ame'tsyë m'ëyowëty ets ka'ap xynyimon xynyitukëty yë m'o'kpë tä yë ja'ay yë o'kpë tnimon tnitukyën. Ka'ap jää mjëtitëty kuwa'ats tekywya'ats; ka'ap mnäwyinkuwitsëtëty ko yë m'aaw mjot pyëk y'atonëty ets ka'ap yë tsajpkääky xykyäyëty mëti'ipë yajkääpyën ko jëtu'un tyunyë jyätyë.

¹⁸Jopyëpës yë ja'ay të nmëmëtyä'äky, e jënäkyxyëëw yë nto'oxytyëjkës të y'ooky; komjëpom të ntunyës mëti'ipës yë Wintsën të xytyuk'ëne'emyën.

¹⁹Ënätës ja ja'ay të xy'ënëëmëtë mëti'ipë kajpnjoty yajpatëpën: Ëk nimëtya'ak, wi'ix ko jëtu'un winë xytyuny.

²⁰Täätsës të n'ënëëmëtë: Yë Wintsënës të xymyëkäjpxy etsës të xy'ënëëmë:

²¹Ënëëmë yë Israel kajpn: Jëtu'un yë Wintsën y'ënä'äny: Nyaj'ëxëëkëjäämpyës yam yë ntsajptëjkës, mëti'ipë m'oy'ijxtëpën, mtsojktëpën ets mëj'äämpy mnäyjyawëtë ko jyääjëty ets yë'ë mtukjotmëk'ajtëp; yë m'u'unk m'ëna'këty ye'etyëjk to'oxytyëjk mëti'ipë jam Jerusalén të xyajwë'ëmtën ja'ay nëjkx yaj'o'kta'ajëtë.

²²Ets xy'ënëëmëty: Miitsëty jëtu'un tuntë tääjës yam ntunyën: Ka'ap mnäwyit wiinkuyä'äpëtëty ko m'aaw mjot pyëktëty y'atontëty ets ka'ap xykyäytyëty yë tsajpkääky mëti'ipë jää yajkääpyën.

²³Ka'ap tjëkyepy jää kuwa'ats ets tekywya'ats mjëtitëty. Këtii jää mya'axtëty ets mmontëty mtuktëty. Këjxta'ajantëp ja mjot mmëjaawëty ko winë ëxëëk xytyuntë ets nixim niyam nëjkx mnänyiya'axëtë.

²⁴Yë Ezequiel yë'ë nëjkx xy'ijxpäjtën'atë ets tu'kë'ëyë mëti'ipë yë'ë tyuunpyën näjyëtu'un miitsëty winë xytyuntëty. Ko ënäty jëtu'un winë tyunyë jyätyë jää nëjkx xynyijawëtë ko ëjts Wintsën.

²⁵Tyam mpëjkëtya'ajäämpyës yë Israel yë nyaax kyajpn këwent'atypë y'ityën, mëti'ipë tsyajptëjk'ajtypyën, oypyë yaj'ijxyën, mëti'ipë tsyojkpyën ets y'oyjya'apën. Mpëjkëtya'ajäämpyës näjyëtu'un yë y'u'unk y'ëna'k ye'etyëjkpë to'oxytyëjkpë.

²⁶Mëti'ipë ënäty käktsokpën jä'ä xëëw, yë'ë nëjkx mtuknijawëty.

²⁷Jä'ä xëëw nëjkx mkajpxë'ëky ets jyëkyejpy nëjkx mëët mëtyä'äky mëti'ipë ënäty të kyäktso'okyën. Jëtu'un ijxpäjtën m'itëty ma naax kajpnën ets nëjkx tnijawëtë ko ëjts Wintsën.