Read Biblia Mixe de Quetzaltepec Ezequiel 26 Bible Online

Ezequiel 26 - Biblia Mixe de Quetzaltepec bible

Ezequiel 26

¹Ma tyu'uk anyën yë po'o mëmajktu'uk jëmëjtpë, jää ojts yë Wintsën xymyëkäjpxyës ets xy'ënëmaayës:

²Jëtu'un yë Tirë kajpn të y'ënä'äny, yë'ë y'antijpy yë Jerusalén kajpn: Ix tää ënät të mya'ta'ay ja nyitëjk'aaw ja kajpn ma ijty tëëyëp ja ja'ay y'ajuy y'atooktën, tyam ëjtsës xytyukka'ap; etsës nkumeenytya'akëty ets yë'ë wä'än axit ako'owë tjajta'ay.

³Paaty ëjts maas nWintsën'atyën, jëtu'unës yam n'ëna'any: Tirë, ëjts jëtu'unës yam näpyëjktä'äkyë ma mijtsën tä tu'uk mmëtsipën. Ëjts ntuknipëjktaakëjäämpy ets may yë naax kajpn mnipëtë'ëkëtëty jëtu'un tä nëë o'pykyën mejyjoty,

⁴ets tjijtë'kta'atëty yë mpotsy ets naxkujijtëtya'atëty yë potsy ma ja'ay kyëwent'atën. Wa'atsës nyajnëjkxta'aja'any winë yë'ëpaat yë naaxway etsës yi'iyë nyajwë'ëma'any yë tsaa mëti'ipë tëë yajxon tyë'kxënyën.

⁵Jap Mejy itkujky nëë jëyujk tsaay tyëtsntakn nyaj'awinpita'anyës. Ëjts Wintsën ëjts ënaanp. Yajmä'tsta'ajaanp yë Tirë kajpn,

⁶ets nyaax kyajpn mutskëtypë mëti'ipë yajpatëpën nëëwintë'ëtstuuy aak kupuxy y'ooka'antë. Ënät nëjkx tnijawëtë ko ëjts Wintsën.

⁷Ëjts, Wintsën jëtu'unës n'ëna'any: Nyajminäämpyës yë Nabucodonosor anëkëjxytsyow, mëti'ipë jam Babilonyë ënä'ämpën, mëti'ipë mëk ënä'ämpën yajkutujkpën ets tnitëkëja'any yë Tirë kajpn. Yajminäämpy yë kepy wintëkäämpë, kwaay ets mëti'ipë tyuk'u'unyääpyën, may tyajmuka'any yë jyä'äy.

⁸Tëypyujxn yajtunäämpy ko ënäty tyajkutëkoy ja mnaax mkajpn mutskëtypë mëti'ipë yajpatëpën nëëwintë'ëtstuuy ets mnapotsa'anyë ets twinwëëtëja'any yë mkajpnpa'a ma jam tyajnaxa'anyën yë tsyiptuunpëtëjk mëët yë pyujxn mëti'ipë myëtsiptuuntëpën.

⁹Yë'ë nëjkx mëët yë mëj kepy mëti'ipë yajpatijpën yajtukjijtë'ëky yë mëjpotsy ets mëët yë ja'axykya'tsn yajijtë'ka'any yë potsy ma ja këwent'ajtpë y'itën.

¹⁰Ko ënäty yë Babilonyë yajkutujkpë tnitëkë yë mnaax mkajpn ma tëjkëtyaknën, jëtu'un tä yajnitëkën yë kajpn ajotkumonë, nëkooyë nëjkx tmëtëjkënë yë maykyëwaay ets yajxon nëjkx yajnaaxjoktë, mëpaatëp yë naaxjok mji'kxënëty, jëtu'un yaj'ijxnëty tsyëtyuuypyëjktaaynyë yë potsy mëti'ipë ja naax kajpn nyapots'ajtypyën mëët ja nä'ämpë ko ënäty myäytyëkëtë ja kwaay ets ja kepy wintëkäämpë;

¹¹nëjkxëp yë mnë'ë mtu'u tyuktujkta'ay mëët yë maykyëwaay. Kupuxy y'ooka'antë yë ja'ay mëti'ipë tsënaaytyëpën ma mnaax mkajpnën ets nyaaxkujitëja'any yë mpotsy mëti'ipë tëjk pya'atënääpyën.

¹²Meenytyuk nyajwë'ëma'any, yajmä'tsta'ajaanp yë mjuy mtooky, yajijtë'kaanp yë mpotsy ets nyaaxmëjijtëtya'aja'any yë mkutujkëntëjk oypyë kyojyëtyën; nyëëkuko'owta'ajantëp ja tsaa ets ja kepy yë'ëpaat yë naaxmaj ets tsaapu'u.

¹³Jëtu'unës nyajjëjptuka'any ja m'ëy myä'äxy ets ka'ap y'ëkyajmëtowanë yë mkow.

¹⁴Tä të'kx tsaajën nyaj'awinpita'anyës ma tsaay tsyë'ëtsëtyën ets nijëna'a kyayaj'akojëty. Ëjts Wintsën, jëtu'unës të n'ëna'any; ëjts tyamës nikajpxë.

¹⁵Ëjts Wintsën, jëtu'unës yë Tirë n'ënëëmë: Yë naax kajpn mejypyë'aaypyë yajpaatën tsë'këtya'ajantëp ko ënäty tnijawëtë ëxëëk mjaty mkëpety ets ko tëë ja jë'ëyën yaxën jyam'aty ets tëë ja mja'ay y'ooktë mëti'ipë tsënaaytyëpën ma mnaax mkajpnën.

¹⁶Tëkokyë ja yajkutujkpëtëjk nëjkxëp jam wyä'ätsë'kta'atë ma y'ënyääypyäjnëtyën ets nëjkxëp ja wyit tjäänta'atë mëti'ipë ënäty myë''ënä'ämtëpën; tsë'ëkë mëët nëjkx nyaaxwäätstë jatëkok ets janaam jatsojk tsyëtyuytyëty ko ënäty m'ixyë.

¹⁷Ënät nëjkx tyaj'ëypëtsëmtë ko ënäty jëtu'un mjaty mkëpety: Wi'ix ko të mkutëkoy, wi'ix ko të myaj'ijxtëkoy jap mejy'akujky, ma ënäty mëj'äämpy ets akäjpxy m'ityën. Mijts mëët yë mja'ay mëj'äämpy të m'ity ma ja mejyën ets tëë ja naax kajpn mëk mtsë'ëkëty naaxwiinyëtë apëtsëmy.

¹⁸Tyam ma të m'atëkoyën, tsë'këtyëp ja naax kajpn nëë'akujkpyë yajpaatën. Tyam ma të myaj'ijxtëkoyën ja të'ëtsnaax mejyjotypë tsë'ëkëjantëp jä'äjëty.

¹⁹Jä'ä ko ëjts Wintsën, ëjts ënaanp: Axit ako'owë ntuna'any, jëtu'un nyaj'awinpita'any tä itjotmën ma ka'ap pën tsyëënën. Ëjts nyajkutukäämpy ets mnijä'tstëkoyëtëty yë këk nëëmejy,

²⁰ets mkinëty në'ppaat ma o'kpë yajpaatën, ma nyipätën yë o'kpë tëëyëpë jyuuky'atën. Jap pa'tkë'p nyajjëjpta'aka'any ma ja naax kajpnën mëti'ipë tëëyëp nikoompäjtën ets jap mjuuky'atëty ma ja o'kpë tsyëënëtën. Ka'ap nëjkx pën y'ëktsënaaynyë ma mijtsën ets ka'ap nëjkx nijëna'a m'ëk yaj'akojënë ma ja'ayëtyën mëti'ipë juuky'ajtëpën.

²¹O'ktëy nyaj'awinpita'any këtiipë m'ëk juuky'ajnëty. Oy pën mja'ixta'ajëtëty ka'ap nëjkx myajpaaty. Ëjts Wintsën, ëjts ënaanp.