Read Biblia Mixe de Quetzaltepec Ezequiel 27 Bible Online

Ezequiel 27 - Biblia Mixe de Quetzaltepec bible

Ezequiel 27

¹Ënät ojts yë Wintsën xymyëkäjpxyës ets xy'ënëmaayës:

²Mijts ye'etyëjk, ëw tu'uk yë ëy mëti'ipë o'kpë yajtukwin'ëëpën

³yë'ë Tirë mkuuy ëwëp, ja kajpn mëti'ipë yajpatpën mejy ëkë'ëy, mëti'ipë ajuuy ato'kpën mëët wiinkëtypë naax kajpn nëëpë'aaypyë yajpaatën. Jëtu'un xy'ënëëmëty ko jëtu'un yë Wintsën y'ënä'äny: Mijts Tirë jëtu'un mnätyijyë ko mijts jëtu'un tä tu'uk kepy nëëwinye'epyë, janty oypyë nimaapë kyama'atëtyën:

⁴yë mkutujkën jampaat jyä'ty mejy itkujky, mëti'ipë të mkojyën ni'ik oy ets ni'ik tsuj të m'oytyunyë.

⁵Aakyë'ë të myajtukwinwopë oytsyiin mëti'ipë Senir tso'onpën; ja kepy mëti'ipë mpë'aay të yajkëxwopyën yë'ë ajë kepy mëti'ipë Líbano tso'onpën;

⁶ja kepy mëti'ipë myajtuka'pën ets nëëwiinkëjxy mye'ey yë'ë ja nuez kepy mëti'ipë Basán tso'onpën; yë mniwop'ajtyp yë'ë ciprés kepy jampë Chipre tsyoonyën ets yë'ë mëët të yaj'awojpmuky yë elefantë y'apajk.

⁷Yë wit mëti'ipë mtuknitëëpyën yë kepy nëëwinye'epyë yë'ë linë wit mëti'ipë jap Egiptë tso'onpën, yë'ë ijty mwintëy'äjtyp ja mkepy nëëwinye'epyë; yë mtëjknikäm yë'ë mëët y'oytyunyëty yë ukywyit ets tsaptswit jampë Elisá tsyoonyën, mejypyë'aaypyë yajpaatyën.

⁸Yë'ë ijty ja kepy nëëwinye'epyë mtukkä'py yë Sidónja'ayëty ets Arvad ja'ayëty, ja mja'ay mëti'ipë kepy nëëwinye'epyë yajye'eytyëpën yajxon tukjajnëtë.

⁹Ja Guebal ja'ayëty yë'ë ijty mtukyaj'o'oyëp ja mkepy nëëwinye'epyë ko muum myä'äty. Ja ja'ayëty mëti'ipë xëmë jëtijtëpën nëëwinkëjxy yë'ë ijty yajëtijtëp ja mkepy nëëwinye'epyë ets ja mtooky yajmëjëtity.

¹⁰Ja Persië ja'ayëty, Lidia ja'ayëty ets Libië ja'ayëty yë'ë ijty mpëjktäkpy ets yajpaatëty ma ja mtsiptuunpëtëjkën ja jotmëkëtypë ets myaj'ixy mëj'äämpy ko tmëët'atë ja y'akëëytyuk ets pyujxnkujup.

¹¹Yë Arvad ja'ayëty ets mtsiptuunpëtëjkëty yë'ë ijty yajpatëp ma mpotsyën mëti'ipë mkajpnpa'a nyapots'ajtypyën ets ma ja mpotsyën yë'ë jam këwent'ajtëp yë Gamad ja'ayëty. Jam yë y'akëëytyuk tkëxtëëytya'atë potsykyëjxm ets yë'ë myaj'oykyëxë'këp.

¹²Nëkooyë ijty mkumeeny'ajnë, yë'ëpaat yë Tarsis ja'ayëty ojts myiinëtë ajuupyë ma mijtsën ets ojts mo'oyë yë poop pujxn, pu'ts pujxn, juunpujxn, poopyëk pujxn ets yu'unk pujxn.

¹³Näyjyëtu'un yë Grecië ja'ayëty, Tubal ja'ayëty ets Mésec ja'ayëty ojts myintë ma mijtsën ajuuy ato'kpë, yë'ë mmooyë ja'ay mëti'ipë mëtuuntëpën ets tsuxkpujxn.

¹⁴Yë Bet-togarmá yë'ë ijty mtukmëjuuyëp yë kwaay ets mëkjëyujk mëti'ipë myajtunëp ets mtuk'u'unyëpën.

¹⁵Yë Rodës ja'ayëty ajuuy ato'ktëp ijty mëët mijts. M'ajuuy m'ato'kp ijty mëët may yë kajpn mëti'ipë yajpatëpën mejypyë'aay ets yë'ë ijty mtukmëjuuyëp yë elefantë pajk ets oy kepy.

¹⁶Yë Edom ajuuy ato'kp ijty mëët mijts, jä'ä ko kanaakpëky winë xymyëëtëty: Yë'ë ijty mooyëp yë oyëtypë uky tsaa ets wit oyëtypë mëti'ipë jo'okyën; mëti'ipë linë witën ets myëët'ajtyp yë nëëtsaa ets tsapts tsaa.

¹⁷Näyjyëtu'un yë Judá ets Israel nän ajuuy ato'kp ijty mëët mijts ets yë'ë mtukmëjuuyëp yë Minit tsajpmok mëët tsajpkääky mëjjatyëtypë ets uuxpa'ak ets on ets tsooy mëti'ipë ja'ay nätyukja'axëpën mëti'ipë pa'akxu'kpën.

¹⁸Damaskë may ijty winë mju'uyxyëty; yë'ë mtukmëjuuyëp yë tsatym nyëë tëëpë nyimaanaxyën mëti'ipë tso'onpën Helbón ets ja pixyny mëti'ipë tso'onpën Sahar.

¹⁹Jam Uzal, jam ijty tsyoony yë mtsatsym nyëë, yë pujxn, yë canelë, yë waxk mëti'ipë pa'akxu'kpën, mëti'ipë tyukwinkupëjktëpën yë mtooky.

²⁰Yë Dedán ajuuy ato'kp ijty mëët mijts, yë'ë ijty mëët xywyinkupëky yë ënyääypyäjn mëti'ipë tuunpën ma kwaayën.

²¹Yë Arabië ja'ayëty ets wintsëntëjkëty mëti'ipë Quedar ja'ayëtyën jam ijty tyim ajuytyë ma mijtsën ets mo'oyë yë kupixyny ets tsajppax ko tii tjuy ja mëti'ipë mijts mtukmëto'kpyën.

²²Yë Sabá ja'ayëty ets Raamá ja'ayëty jam ijty tyim ajuytyë ma mijtsën, yë'ë winë tyukujuuytyëp yë tsooy mëti'ipë pa'akxu'kpën ets tsaa mëti'ipë tsowën ets pu'ts pujxn.

²³Nixim niyam ijty mnätyukmëtookëtë winë mëët yë Harán ja'ayëty, Cané ja'ayëty, Edén ja'ayëty, Sabá ja'ayëty, Asiria ja'ayëty ets Media ja'ayëty;

²⁴yë'ë ijty mtukmëto'këtëp yë oyëtypë wit, jo'okyëtypë mëti'ipë kanaak ujkën ets kanaak jo'okyën.

²⁵Kanaak ijty yë kepy nëëwinye'epyë nyäxy tyëkë, tyajminy kanaakjëjp yë juy tooky ma mijtsën. Jëtu'un ijty mijts tä tu'uk yë kepy nëëwinye'epyë nëëwinkëjxypyë yajpaatyën, ujts mëët yë juy tooky

²⁶Ja ja'ay mëti'ipë yajye'eytyëpën ja kepy nëëwinye'epyë jampaat myajja'ajtë nëë'itkujky, je'eyëp ko yë tuupoj mëti'ipë të tsyoonyën jam pëtë'ëktsow, ëxëëk të myajjatyë.

²⁷Yë mwit mmeeny, yë mjuy mtooky ets mëti'ipëjaty myaj'ijtyp myajwintëëpyën, yë mja'ay mëti'ipë yajye'eytyëpën ja kepy nëëwinye'epyë ets mëti'ipë kya'ptëpën, mëti'ipë jëëntuuntëpën, m'ajuuy m'ato'kpëty, mtsiptuunpëtëjkëty ets tëkokyë ja mja'ay mëti'ipë jap mkepy nëëwinye'epyëjoty myajëtijtypyën, mëët nëjkx mkiinta'ay ko ënäty tpaaty ja xëëw po'o.

²⁸Jëtu'un tä ënäty ya'axtën jyoktën ja mja'ay mëti'ipë kepy nëëwinye'epyë yajye'eytyëpën näjyëtu'un nëjkx ja nëëmejy ya'axtë jyoktë.

²⁹Nëjkxëp jyënaktë kepy nëëwinye'epyë këjxy ja mëti'ipë nëëka'ptëpën; ja kepy nëëwinye'epyë yajye'epyëty nëjkxëp pyujtpëtsëmtë ets wintë'ëtstuuy kyëtakta'aja'antë.

³⁰Nëjkxëp y'ëwë'ëktë ets mijts myajnijë'ë myajniya'axëty. Nëjkxëp naaxway nyätyukupëkëtë ets nëjkx jyaamyäts nyaaxyätstë.

³¹Mëët ko ënäty o'ktëy mjaty mkëpety nëjkxëp nyäkyutë'kxn kä'pta'ajëtë, nëjkxëp tuktëkëtë wit tujkxy monpë tukpë ets nëjkx jyë'ëtë ya'axtë mëët ja pëjkën ato'onën.

³²Nëjkxëp myajwin'ëy tä o'kpë yajwin'ëyën, ma nëjkx y'ëna'antën mëët ja monyëtukyë: ¿Pën ëkmëpaatëtëp ja Tirë kajpn, mëti'ipë ënäty yajpatpën nëë'itkujky?

³³Ko ijty jyä'ty ja mjuy mtooky mëti'ipë tso'onpën ma mejyën, kanaak ja naax kajpn xyaj'akëtä'äky xyajjotkëtä'äky. Mëët ko winë may'äämpy xymyëëtëty may ja yajkutujkpëtëjk xyajkumeenytyä'äky yaa naaxwiiny.

³⁴Tyam o'ktëy të mjajnë jap nëëjoty, tëë mkiinë jap nëëkomjoty. Ja m'ajuy m'atooky ets ja ja'ay mëti'ipë mëët myajpaatyën tëë kyiinta'atë mëët mijts jap këknëëjoty.

³⁵Tëkokyë ja naax kajpn mëti'ipë yajpatëpën nëëpë'aay aak tsë'kënëtëp mëët ijxtëm të mjaty të mkëpetyën; yë kyutujkpëtëjkëty aak je'eyë myoonëtë tyujknëtë ets aak yaj'ijxnëtëp ma wyiinëty jyëjpëtyën ko tsë'këtyëp.

³⁶Yë ajuupyëtëjkëty mëti'ipë tso'ontëpën wiink naax wiink kajpn je'eyë tsyë'kënëtë ko m'ixyë. Ëxëëkëm të mjajnë; jääpaat jëtu'un të mjuuky'äty ka'ap nijëna'a m'ëk yaj'ixanë.