Read Biblia Mixe de Quetzaltepec Ezequiel 28 Bible Online

Ezequiel 28 - Biblia Mixe de Quetzaltepec bible

Ezequiel 28

¹Ënät ja Wintsën ojts xymyëkäjpxyës ets xy'ënëmaayës:

²Mijts ye'etyëjk, ënëëmë yë Tirë yajkutujkpë: Jëtu'un yë Wintsën y'ënä'äny: Tëë mjot mwinma'any y'uty mëët yë amëj'ajt akëjxmajtën, tä tiosën të mnäjyawëty, jam m'u'unyë ma y'u'unyëtën ja tiostëjkëty ets mejy'akujk të myajpaaty. Je'eyëp ko mijts ka'ap mtiosëty, mijts mnaaxwinyëtë ja'ay mëti'ipë jëtu'un määpy tajpën tä tiosën.

³¿Wä'än jëtää ni'ik m'ixpëkyëtyë këtiinëm yë Danielë? ¿Wä'än jëtää xynyija'awëtyä'äy winë mëti'ipë yu'utsy ijtpënë?

⁴Mëët ja mwijyajtën ets ko winë xyjäty xynyijawë paaty të mkumeenytyä'äky, tëë xyaj'ujtsta'ay yë m'apëjkën mëët yë pu'ts pujxn ets poop pujxn.

⁵Mëët ko xynyijawë wi'ix m'ajuy m'atookëtyën tëë xyajmëj xyajkëjääjë yë mwit mmeeny ets mëët ko të mkumeenytyä'äky amëj akëjxm tyam mnäjya'awënë.

⁶Paaty yë Wintsën jëtu'un y'ënä'äny: Mijts ko m'ëna'any ko jëtu'un mwijyëty tä tiosën,

⁷nyajminäämpyës yë jaaypyaat jaaypyo'kxy ma mijtsën ets ëxëëk mtunëtëty, ja'ay mëti'ipë mëkëtyën, mëti'ipë jyuutäämpyën yë tyiypyujxn ets myaj'ooka'anyë, mijts oypyë tsujpë ets wijypyë ets yajnaaxkujitëja'any yë m'oyajtën mëj'ajtën.

⁸Jap jutjoty myajkëta'aka'anyë, jap nëëpa'tkë'p myajkuka'anaxa'anyë.

⁹¿Jëtu'un je'eyëm m'ëna'ana'any ko mijts mjëtu'unëty tä tu'uk tiosën ko ënäty jam ma mëtsipën myajpatnë?. Ko ënäty myajpatnë ma ja'ayëtyën mëti'ipë myaj'ookanëpën mijts nitii mëk'ajtën xykyamëët'ata'any ma mnaaxwinyëtë ja'ay'ätyën.

¹⁰Jaaypyo'kxy nëjkx myaj'ookyë, jëtu'un tä y'ooktën ja'ay mëti'ipë ka'ap Wintsën t'ëwtatën. Ëjts Wintsën, ëjts ënaanp; jëtu'unës yë n'aaw n'ayuk të n'ëxmatsy.

¹¹Ënät yë Wintsën ojts xymyëkäjpxyës etsës xy'ënëmaay:

¹²Mijts ye'etyëjk, yaj'oyë tu'uk yë ëy, ma yajkuuy'iyën yë Tirë yajkutujkpë, jëtu'un xyaj'ëna'anëty: Jëtu'un yë Wintsën y'ënä'äny: Mijts ënäty ijxpäjtën m'ijtp ma ja wa'atsajtënën, ujts mëët ja ixpëkyajtën ets ja oy'ijxën.

¹³Jam ënäty Edén myajpaaty ma ja Tios tmëëtëtyën yë y'ujts tsa'am kam, mëti'ipë myëët'ajtypyën oyëtypë tsaa, tsapts tsaa, të'kxy tsyaa; yëktsuxk tsaa, pu'ts tsaa, uky tsyapts tsaa; tsu'unk tsaa, tsuxk uky tsyaa, uky tsyaa ets tsuxktsaa; yë mnantsëm ets mtatsktëy aakyë'ë pu'ts pujxn, mëti'ipë myajtuknikojëyën ma ënäty ka'anëm mkojynyëmën.

¹⁴Ojts ntukmëwë'ëmy tu'uk yë tsajpjotmëtë kukäjpxy ets mkëwent'atëtëty, jam ënäty myajpaaty ma Wintsën yë kyopkën wa'atspë ets mëtsa'a itkujky mnaxy mtëkë.

¹⁵Mijts nitii poky ënäty xykyamëëtëty ko ojts mkojy, oknëm yë pokytyu'unën xyäjty ma mjot mwinma'anyën.

¹⁶Ënät yë nëë poky ojts mpaatyë ko ojts mkumeenytyä'äky ets may ja juy tooky xymyëët'ajnë. Ënät ojts n'ixkexy ets mjëwa'akëty nwintuuyës; ojts jam njëkexy ma ja Tios ja kyopkën, ja tsajpjotmëtë kukäjpxy mëti'ipë ënäty mkëwent'ajtëpën yë'ë ojts myajpëtsëëmënë mëtsa'a itkujky.

¹⁷Mëët ko ënäty m'oyëty mtsujëty yë'ë ojts amëj akëjxm myaj'awinpityë ets ko ënäty mëj jaanty mnäjyawëty ënät ojts tyëkooytyä'äy ja m'ixpëkyajtën. Ojts njaamteeny nnaaxteeny ets nëxi'iky tukxi'iky ojts nyajwë'ëmy ma wiinkëtypë yajkutujkpëtëjkën.

¹⁸May ojts ja nëë poky xytyuuntëkooynyë ets ja mjot mwinma'any mëj xyajtëkooynyë mëët ja mjuy mtooky, yë'ëpaat ojts xyaj'ëxëëktëjkënyë yë mtsajptëjk. Ënät ojts nyajmëjës yë jëën ma mjuuky'ätyën ets myajtooytyëkooyë. Tyam aak m'ijxëp yë ja'ay ko o'ktëy mjajnë mkëpäjnë ets kuyjyaamën të m'awinpijnë.

¹⁹Tëkokyë yë naax kajpn mëti'ipë m'ijxy'ajtëpën tsë'këp ko m'ixyë. Ëxëëkëm të mja'ajnë; xëmëkyëjxm të m'atëkoy.

²⁰Ënät ojts yë Wintsën xymyëkäjpxyës ets xy'ënëmaayës:

²¹Mijts ye'etyëjk, winpit jam Sidón ets xy'ënëëmëtëty yë ja'ay ëjts nxëëwkyëjxmës.

²²Jëtu'un xy'ënëëmëty: Ya'atë yë Wintsën të tkäjpxy: Ëjts mmëtsipës yam n'awinpity ma mijtsën Sidón kajpn; ëjts mëj'äämpyës naxa'any ma mijtsën. Ko ënäty mijts myajnitëkë maas nyaj'ixa'anyën ja nmëj'ajtënës ets nwa'ats'ajtënës, ënät nëjkx yajnijawë ko ëjts Wintsën.

²³Ntuknikäxäämpy yë pa'am ëyo'on ets jot ne'pny pyëyë'ëka'any ma mnaax mkajpnën; mayjyä'äy ookantëp kupuxy ma mnaax mkajpnën xiitsow yaatsow. Ënät nëjkx yajnijawë ko ëjts Wintsën.

²⁴Yë Israel kajpn ka'ap nëjkx y'ëkyaj'ëyoowënë wiinkëtypë naax kajpn na'ëwtitypë yajpaatën ma yë'ëjën. Ënät nëjkx yajnijawë ko ëjts Wintsën.

²⁵Ëjts Wintsën, jëtu'unës n'ëna'any: Nyajmujjkta'ajäämpyës yë Israel ja'ayëty jënu'un yajpaatën axit ako'owë wiink naax wiink kajpn ets jëtu'un nyaj'ixa'anyës ja nwa'ats'ajtënës ma ja naax kajpnën. Yë Israel kajpn nëjkxëp jatëkok yë nyaax kyajpn tniwä'äky ma ja naax kajpnën mëti'ipë ojts yë ntuunpës Jacob ntukumayën.

²⁶Jam nëjkx jotkujk y'itë tsyëënëtë ets nëjkx tkojtë jyëën tyëjkëty; nëjkxëp jam tpëjkta'aktë kyam tyu'ujëty. Ja naax kajpn mëti'ipë ënäty ëxëëk të tunyën yë Israel kajpn nëjkxëpës ntukumëtoy. Jëtu'un nijawëtëty ko ëjts wintsën, mëti'ipë jam Israel Tios'ajtpën.