Read Biblia Mixe de Quetzaltepec Ezequiel 29 Bible Online

Ezequiel 29 - Biblia Mixe de Quetzaltepec bible

Ezequiel 29

¹Ma myajkmäjtsk anyën yë mëmajkpo'opë, ma majk jëmëjt tyu'uye'eyën, jää ojts yë Wintsën xymyëkäjpxyës ets xy'ënëmaayës:

²Mijts ye'etyëjk, yë'ë tyam yë yajkutujkpë mëkajpx, mëti'ipë jap Egiptë ënä'ämpën ets xytyuk'ëwaanëty ëjts nxëëwkyëjxmës wi'ix yë Egiptë kajpn jyata'any kyëpäta'anyën.

³Jëtu'un xy'ënëëmëty: Jëtu'un yë Wintsën y'ënä'äny: Ëjts mmëtsipës yam n'awinpity ma mijtsën yajkutujkpë, mëti'ipë jap Egiptë ënä'ämpën, jëtu'un mijts tä tu'uk mëjnëë jëyujkën, jap mkë'ëmnëëjoty mko'knë ets m'ëna'any: Nilë, mëjnëë, ëjts yë njä'ä, ëjts të nyajkojy.

⁴Ntukjëjp jëëpëjäämpy yë xu'uny ets jam nyäkyëx'o'tsta'ajëtëty yë nëë jëyujk ma mnimeenyën. Jap mnëëjoty njuuta'any mëët yë maynyëëjëyujk këx'ootsy ma mnimeenyën.

⁵Tääts jam nasjëpipëja'any të'ëts'itjotm, mëët tu'kë'ëyë ja nëë jëyujk mëti'ipë jap mnëëjoty yajpatpën; wintë'ës'ituuy nëjkx mkëtä'äky ets ka'ap nëjkx pën myajnaaxtëkëty. Yë'ë nëjkx mtsu'utyë mwëtsyë yë aayjëyujk ujtsjëyujk ëwa'anëtypë ets nëjkx yë lut majkwejkxy mnukyë mpotyë.

⁶Tëkokyë yë Egiptë ja'ayëty nëjkxëp tnijawëtë ko ëjts Wintsën. Ojts yë Israel kajpn jam yë näypyutëkë tja'ixta'ay ma mijtsën, mijts tsajpkäpnyën mnäpyëjktakë:

⁷ko ojts matsyë mkë'ëkëjxy, mijts je'eyë ojts mtëjy ets xyajtsëtyujty ma myoxpa'ajën; ko ojts jyakëxmëta'aka'any ma mijtsën, mijts ënätyë ojts mtëjwä'kxy ets xyajkëtaawtaay.

⁸Paaty ëjts maas nWintsën'atyën, jëtu'unës n'ëna'any: Tëës ntuknipëjktaakë ets mijts Egiptë mmëtsip mnitëkëtëty mëët yë tëypyujxn ets tyaj'o'kta'ajëty yë mja'ay ets mjëyujk.

⁹Aanë'ëk tëëtsë'ëk mkawinpita'any ets ja ja'ay t'ijxkaptëty ko ëjts Wintsën. Mijts jëtu'un m'ënany: Yë Nilë ëjts yë njä'ä, ëjtsës n'oytyuun.

¹⁰Oy, ka'ap wyi'ixëty, mëtsipës nnaxy ma mijtsën ets ma mmëj nëëjotmën. Tsë'ëkë jawë nyaj'awinpita'any tä të'ëts itën ets mon tuk, tyimtsoonëty jam Migdol ets jya'tëty Asuán, jampaat nyaxëty ma Etiopíë mëët mtu'kmëtsëpa'an'atyën.

¹¹Ka'ap nëjkx jam nyaxtë ja'ay ets jëyujk. Wëxtyikxy jëmëjt jëtu'un y'itëty ni pën jam kyatsëënëty.

¹²Mijts Egiptë, wëxtyikxy jëmëjt nyaj'ita'any tukwa'ats ets axit ako'owë; o'ktëy ni'ik ntuna'any këtiinëm jyëtu'unëty ja wiinkëtypë ja naax kajpn mëti'ipë o'ktëy të jyatën, jëtu'unyës yë mja'ay nyaj'ayo'oyëtya'aja'any ma wiinkëtypë naax kajpnën.

¹³Ëjts Wintsën, ëjts ënaanp: Ko nyaxëty wëxtyikxy jëmëjt täätsës jatëkok yë Egiptë ja'ayëty nyajtu'ukmujkta'aja'any oy ënäty axit ako'owë të y'ëkyajpaatë.

¹⁴Nyajwinpitäämpyës jatëkok yë ja'ayëty mëti'ipë tsumy matsy të y'itën wiink kë'ëy wiink kajpn ets jam tsyënaaytyaknpëktëty ëpa'tkë'ëmtsow ma Egiptë nyaaxjotmën, ma kyunaax'at kyukajpn'atën, ma nëjkx tyajkojtën tu'uk yë ënä'ämtakn ka'apë nëjkx mëj'äämpy nyäxyën.

¹⁵Ni'ik naxym nëjkx tääpë yajkutujktakn nyäxy ma wiinkëtypë kutujktaknën ets ka'ap tjëkyepy twinnaxtëty ja wiinkëtypë ja kutujktakn. Mutskës nyaj'ita'any ets ka'ap nëjkx myäyë mëjjëtypë naax kajpn,

¹⁶yë Israel kajpn ka'ap jatëkok t'ëktuk'ijxpäjnëty yë Egiptë kajpn, nëjkxëp tja'akyukëtë ok ko ojtstëm tsyuu'atë ko näypyutëkë t'ixtaaytyë jap Egiptë. Ënät nëjkx nijawëtë ko ëjts Wintsën.

¹⁷Ma tyu'uk anyën yë mëët tu'kpo'opë ja më'i'px wëxtujk jëmëjtpë, jää ojts yë Wintsën xymyëkäjpxyës ets xy'ënëmaayës:

¹⁸Tëë yë Nabucodonosor, yë Babilonyë yajkutujkpë, tkexy yë tsyiptuunpëtëjk jam Tirë; wa'ats të tkukä'pta'atë yë ja'ay ets may mëti'ipë kyejky të pyutsë'knën; yë Nabucodonosor ets jyä'äy nitii tkapaatë ko yë Tirë kajpn të tnipëtë'ëky.

¹⁹Paaty ëjts maas nWintsën'atyën, jëtu'unës n'ëna'any: Ëjts nyajkutukäämpy ets Nabucodonosor tnitëkëty yë Egiptë kajpn ets tpëjkëty yë kyumeenyajtën ets tëkokyë jënu'un winë tmëëtëtyën; mëti'ipë mye'tsypyën yë'ëts tyukmëjuyëp ja tsyiptuunpëtëjk mëti'ipë jam yajtsiptuumpyën.

²⁰Ëjts nyajkutukäämpy ets Nabucodonosor tnitëkëty yë Egiptë kajpn ets yë'ë tmëju'uny'atëty ko jam yë Tirë mëët tsyiptuny, jä'ä ko ëjts të xymyëtuny. Ëjts Wintsën, ëjts ënaanp.

²¹Jä'ä xëëw jä'ä jëmëjt nyajkëjääjëja'anyës yë jyotmëk'ajtën yë Israel kajpn ets mijts Ezequiel jotkujk xytyim mëëtkajpx xytyim mëmëtya'akëty. Ënät nëjkx tnijawëtë ko ëjts Wintsën.