Read Biblia Mixe de Quetzaltepec Ezequiel 3 Bible Online

Ezequiel 3 - Biblia Mixe de Quetzaltepec bible

Ezequiel 3

¹Ënätës yë Tios xy'ënëmaay: Mijts, ye'etyëjk, jë'kx ya'atë aaw ayuk mëti'ipë kuja'ay miinpën ets nëjkx xymyëmëtyä'äky yë Israel ja'ayëty.

²Ënätës ojts n'awë'ëky etsës ojts xytyukjë'kxy ja aaw ayuk.

³Etsës xy'ënëmaay: Kujë'ënax ënät tyam mëti'ipë yam nmoopyën ets mjot mëët xyaj'utsëty. Ënätës ojts nkujë'ënaxy ets janty pa'akëm xy'atëjkëyës.

⁴Ënätës xy'ënëmaay: Nëjkx tukmëmëtya'ak yë Israel kajpn ya'atë aaw ayuk mëti'ipës ntsojkpyën nijawëtëty.

⁵Ka'ap yam nkexy ma tu'uk yë kajpnën mëti'ipë tsip yë y'aaw y'ayuk yajwinja'apën, yë Israel kajpn yam ntuknikejxyp.

⁶Ka'ap yam kanaak yë naax kajpn ntuknikexy mëti'ipë tsipëty kajpxtëpën, ka'apë xywyinjawëtyën ets oy jeexyë yam yë'ë ntuknikäjxpë wyinmëtoowtëp jeexyë ja m'aaw m'ayuk mëti'ipë mnimëtyäkpyën.

⁷E yë Israel kajpn ka'ap ënät mja'akyukëja'anëtëty, jä'ä ko ka'apës ëjts xymyëj'ixtë. Tu'kë'ëyë yë Israel kajpn ka'ap kyäjpxyjyä'äkyukëtë ets kujuun oyëty.

⁸E ëjts tëëjës ntuknipëjktaakë ets mijts ka'ap mkäjpxyjä'äykyukëty ets kujuun mnäpyëjkta'akëtëty tä yë'ëjëtyën.

⁹Juun yam mjot mwinma'any nyaj'awinpita'anyës jëtu'un tä nëtë'kxy tsyaajën. Këtii mtsë'ëkëty oy wi'ix yë wyiin jyëjp tjatuntë ets oy jënu'un jyakäjpxykyutëjtë.

¹⁰Ënätës xy'ënëmaay: Mëtoow'it yajxon mëti'ipë yam ntukmëmëtya'akäämpyën ets jap mjootjoty mwinma'anyjoty yajwë'ëm.

¹¹Nëjkx yë mëku'uktëjk ixtë mëti'ipë jam tsumy matsy ijtëpën wiink naax wiink kajpn, wä'än t'ixy oy tmëpëk tkamëpëktëty yë m'aaw m'ayuk, jëtu'un xy'ënëëmëty: Jëtu'un yë Tios y'ënä'äny.

¹²Ënät ja Tios ja myëk'ajtën ojts xywyijtsë'ëkyës ets jap njëxkë'pës nmëtooyës tu'uk yë mëto'owën mëkpë, jëtu'un y'amu'uy tä yë naaxwiinyëtë yu'kxyën, ko jyëwä'äky jam ma y'ijtaknën ja Wintsën ja myëj'ajt y'oyajtën.

¹³Jä'ä ja mëto'owën yajmiintëp ja tsajpjotmëtë kukäjpxy ko ja kyäkn t'awojpmuktë ets ja tëkäämpë mëti'ipë jam yajpatpën yë'ë wyintuuyëty; jëtu'un ja mëto'owën yajmëtoy tä y'amu'uyën yë naaxwiinyëtë ko yu'kxy.

¹⁴Ënätës ja Tios ja myëk'ajtën ojts xyajpëtë'ëky etsës xyajpëtsëmy jap, mon tukës ojts nëjkxnë ets jë'ë ya'ax, tamës ja Tios mëk xymyajts'ity nkë'ëkëjxyës.

¹⁵Etsës jam nja'ajty Tel Abib, ma ja Quedar mëjnëëjën, ma tsyëënëtën ja Israel ja'ayëty tsumy matsy, wëxtujk xëëwës jam n'ijty, ka'apës ojts npaaty yë winma'any tiijës ntunëp ets wi'ixës n'ënëëmëtëty.

¹⁶Kom wëxtujk xëëw ojts yë Tios xymyëkäjpxyës, etsës xy'ënëmaay:

¹⁷Mijts, ye'etyëjk, të mpëjktä'äky ijx'ijtpë këwent'ajtpë ma Israel kajpnën. Ko ntukmëtowëty ja aaw ayuk, mkajpxnaxëp ets mnimëtya'akëp ma yë'ëjëtyën ets nijawëtëty wi'ixës ënäty n'ëna'anyën.

¹⁸N'ëkpëjktakmëty nikajpxëtyës tu'uk yë ëxëëk ja'ay mëti'ipë tëë nyitukën ets y'ookëty; pën mijts ka'ap ja ëxëëk ja'ay xytyuk'ëwaanë ko tëë nyitukë ets jeexyë ja y'ëxëëktu'unën t'ëxmatsy, yë'ë kopkpëky ja nëjkx tku'ookë ja tyëko'oyën, mijts nëjkxëp mpokytyëëmë'ëky ko ënäty të xykyatuk'ëwaanë ets jeexyë tsyo'oky.

¹⁹E pën mijts mtukmëtoopy ja ëxëëk ja'ay ja aaw ayuk ets mtuk'ënëmääpy ja y'ëxëëktu'un y'ëxëëk kajpxën ets ja jyuukyajtën ka'ap tyaj'oyë, ko y'ookëty kë'ëm ënäty nyätyunyë, nëkoo ko mijts tëë mnänyiwa'atsyë ets tëë ja mjuukyajtën xyajtso'oky.

²⁰N'ëkpëjktakmëty wiinkpë ijxpäjtën; tu'uk yë ja'ay oypyë jyuuky'ätyën tyajtëkatsëty yë jyuukyajtën ets jä'ä tuunëty ja ëxëëkpë ëkë tëkatsypë ets jyuukyajtën tyajtsiptëkëty; pën mijts ka'ap wi'ix xy'ënëëmë, ookëp yë'ë. Ëjts ka'apës nja'amyätsa'any oy ënäty tii oy të tjatuny mëj këjää, yë'ë nëjkxëp ja pyoky tku'ookë; je'eyëp ko mijts nëjkx nyajtëy pën tëë ënäty xyjya'ënëëmë ets ka'ap tii tëkatsy tunëty.

²¹E pën mijts mnëmääpy tääpë ja'ay ets këtii pyokytyunëty ets ka'ap pyokytyuny, je'eyëm oy jyuuky'äty jä'ä ko tëë kyäjpxyjä'äykyukë, mijts nän myajtso'okëp yë mjuukyajtën.

²²Ënät ja Tios ojts ja kyë'ë xytyuknixajyës jämyë ets xy'ënëmaayës: Pëtë'ëk ets nëjkx jam joyjotm ma nmëmëtya'aka'anyën.

²³Ënätës të mpëtë'ëky etsës të nëjkxy jam joyjotm, jamës të n'ixy yë Tios yë myëj'ajt y'oyajtën, jëtu'un tä ënäty të n'ixyënës jam Quebar ma ja mëjnëëpa'ajën. Ënätës nwintäky naaxkooy, ntukpatypyës yë naax yë nwinpokës.

²⁴Tä ja Tios xytyuktëjkëyës ja jyot myëjaaw etsës xyajwa'akë'ky ets xynyëmaayës: Nëjkx mnäyajku'ëtukyë mtëkoty.

²⁵Ëk'ix, myajkutsumaanp mëët yë tejpxy këtiipë mpëtsëmëty ets jap myajpaatëty tu'ukyë mëët ja naax kajpn.

²⁶Ëjts nyajkutukäämpy ets jëtu'unyë myä'än myëj'o'tspätëty mpa'kxwiiny ets uum mwë'ëmëty. Ka'ap nëjkx tjëkyepy wi'ix xy'ojëty ja naax kajpn ko kyäjpxykyumëtoownaxtëty.

²⁷E ko ënäty tii ayuk ntukmëmëtya'aka'any, tääts jatëkok nyajkajpxë'ëkëty ets nëjkx xy'ënëëmë ja naax kajpn: Jëtu'un yë Wintsën y'ënä'äny. Mëti'ipë ja'akyukëjaanpën, wä'än tja'akyukë, e mëti'ipë ka'ap jyä'äkyukëja'anyën wä'än tkaja'akyukë, jä'ä ko miitsëty jä'ä mkajpn'atë käjpxy kumëtoownajxpë.