Read Biblia Mixe de Quetzaltepec Ezequiel 30 Bible Online

Ezequiel 30 - Biblia Mixe de Quetzaltepec bible

Ezequiel 30

¹Ënät ja Wintsën ojts xymyëkäjpxyës ets xy'ënëmaayës:

²Mijts ye'etyëjk ja'ay, kajpx mëtya'ak ëjts nxëëwkyëjxmës ets m'ëna'anëty: Jëtu'un yë Wintsën y'ënä'äny: jë'ë ya'axtë ko myiny ja xëëw jëmëjt tsipë

³mëti'ipë wiinkoonpën, wiinkoonp ja Wintsën ja xyëëw; mëti'ipë wiinkoonpën wintuky y'ita'any; ëyo'on jää itaanp ma tääpë xëëwën.

⁴Tsip itaanp ma Egiptë kajpnën, ko ënäty may ja ja'ay tyaj'ooktë ets tmä'tsta'atë ja wyit myeeny ets tyajkutëkoytyë ja Egiptë kajpn, ko ënäty tjijtë'ktaayëtë yë pyotsy ëjx, ënätyë nëjkx yë Etiopíë tsyë'këtyä'äky.

⁵Ookantëp tsipjoty yë tsiptuunpëtëjkëty mëti'ipë Etiopíë ja'ayëtyën ets Libië ja'ayëtyën, nëjkxëp y'o'kta'atë yë Lidia ja'ayëty, Arabië ja'ayëty, Cub ja'ayëty ets wiinkëtypë ja'ayëty wiink kajpnëpë tsyoontën mëti'ipë mëët të nyäpyikyën yë Egiptë kajpn.

⁶Jëtu'un yë Wintsën y'ënä'äny: Mëti'ipë pyutëjkëtëpën yë Egiptë kajpn, tsipjotm nëjkx y'o'kta'atë, tsyo'onta'akëty jam ma Migdol kajpnën ets jampaat ma Asuán kajpnën. Ja myëj'ajt kyëjxm'ajtën ja Egiptë o'ktëy nëjkx jyäty. Ëjts Wintsën ëjts ënaanp.

⁷Yë Egiptë kajpn mon tuk ni'ik yaj'ixa'any këtiinëm yë wiinkëtypë kajpn ets xit ko'ow ni'ik nëjkx jyäty kyëpety.

⁸Koos ënäty ntuknipëjktaakë ma ja kajpn nyitoyëtyën ets kyutëkooytya'atëty mëti'ipë putëjkëpën, ënätnëm nëjkx tnijawëtë ko ëjts Wintsën.

⁹Ko ënäty tpaaty ja xëëw po'o ma ja Egiptë kajpn yajtëytyunyën, nkäjxwa'kxäämpyës yë kukäjpxy mëti'ipë mejywyinkëjxy jëtitantëpën ets tuknijawëtëty yë Etiopíë kajpn ma jotkujk yajpaatyën ko tsë'ëkë jawë jyata'any, tëë timpyääty ja xëëw po'o ma ëxëëk jyata'anyën.

¹⁰Ëjts, Wintsën, jëtu'unës n'ëna'any: Ëjts yë'ëjës yam ntukmëta'akäämpy yë Nabucodonosor yajkutujkpë, mëti'ipë jam ënä'ämpën Babilonyë ets Egiptë kyutëkoyëty yë wyit myeeny.

¹¹Yajnëjkxäämpy yë tsyiptuunpëtëjk mëti'ipë kutsë'ëkëtyën ets tyajkutëkoya'antë ja naax kajpn. Kupuxy yë Egiptë ja'ay tyaj'ooka'antë ets naax kajpn t'ëxmatsa'antë ujts mëët yë o'kpë.

¹²Nyajkutukäämpyës ets Nilë mëjnëë tsyë'ëtsëty, yë'ëjës naax kajpn ntukë'ëtëkëjäämpy yë ëxëëkja'aytyëjk; jaaypyaat jaaypyo'kxy nëjkx ja naax kajpn tyajwë'ëmy xit ko'ow ets nëjkxëp mya'ta'ay winë mëti'ipë ënäty yajpatpën ma naax kajpnën. Ëjts Wintsën ëjtsës jëtu'un të n'ëna'any.

¹³Ëjts Wintsën, jëtu'unës n'ëna'any: Nyajkutëkoyäämpyës yë awinax ets nyajkëxäämpyës ka'apë tiosëty jampë Menfis yajpaatën. Ka'ap nëjkx yë Egiptë t'ëkmëët'ajnë pën ënä'ämëtëpën ets tsë'ëkë mëët nëjkx xëmë yajpaaty ja naax kajpn.

¹⁴Xit ko'ow nyajjajta'aja'anyës yë ëpa'tkë'ëytsyowpë Egiptë kajpn, nino'okäämpyës yë Soan kajpn ets nyajnitukëjäämpyës yë Tebas kajpn.

¹⁵Ntukjoot'anpëkäämpyës yë Sin, mëti'ipë Egiptë kajpn wyäämpyën tsoktakn ets nyajkutëkoyäämpyës yë Tebas wyit myeeny ets jyotkujk'ajtën.

¹⁶Njëën'ixkonëjäämpyës yë Egiptë, e yë Sin jëtu'unyë nyäwyiita'any nyäxyaatsa'anyë; nëjkxëp jyuty yë Tebas kajpn yë nyapotsy ets Menfis xëëny nëjkx yajtukja'ty.

¹⁷Yë ëna'ktëjkëty mëti'ipë jam tso'ontëpën On ets Bubastis tsipjoty nëjkx y'ooktë ets mëti'ipë wë'ëmtëpën tsumy matsy jam yajmënëjkxa'antë wiink naax wiink kajpn.

¹⁸Koos ënäty nyajkutëkoy yë Egiptë kyutujkën etsës nyajkëjxta'ay ja myëk'ajtën mëti'ipë të nyätyukyajnaxyën mëj këjxm, nëjkxëp yë xëëw kyootsë jam Tafnes ets Egiptë kajpn yoots nëjkx nyitukyë, e ja Egiptë ja'ayëty tsumy matsy nëjkx yajmënëjkxta'atë wiink naax wiink kajpn.

¹⁹Ëjts ntëytyunäämpy yë Egiptë kajpn ijxtëm të nyitukën, ënätnëm nëjkx tnijawëtë ko ëjts Wintsën.

²⁰Ma wyëxtujk anyën yë mëtu'kpo'opë, ma majktu'uk yë jëmëjt tyu'uye'eyën, jääjës ojts yë Wintsën xymyëkäjpxy ets xy'ënëmaayës:

²¹Ëjts yë yajkutujkpë kyë'ë të ntëjë, mëti'ipë jap Egiptë yajkutujkpën ets ka'ap ni pën të yajtsooypyetyë ets ja tsyëtyut të pyijt të myojtsxëty ets jeexyë nyiwijy ets jatëkok ja tyiypyujxn t'ajëpipëty.

²²Paaty ëjts maas nWintsën'atyën, jëtu'unës n'ëna'any: Ëjts mëtsipës yam n'awinpity ma yajkutujkpën, mëti'ipë jap Egiptë ënä'ämpën. Ntëjjäämpyës yam mäjtskëty yë kyë'ë, tu'uk yë oypyë ets tu'uk mëti'ipës të ntëjyën ets jëtu'un tmajtstu'utëty yë tyiypyujxn.

²³Nyajye'eywya'kxäämpyës yë Egiptë ja'ayëty ma wiinkëtypë naax kajpnën ets tukye'eyëtya'atëty yë wiinkëtypë naax kajpn.

²⁴Etsës yë Babilonyë yajkutujkpë ni'ikyë njotmëkmo'oja'any, etsës yë'ë ntukë'ëtëkëja'any yë ntëypyujxnës. Ntëjjänëpës yë faraón yë kyë'ë mäjtskëty ets ko ënäty ja myëtsip të yajtsëtyutyë ëxëëk tjawëja'any ja tsyëtyut.

²⁵Nmo'ojäämpyës yë Babilonyë yajkutujkpë yë jot mëjaaw etsës yë faraón ni'ikyë nmëjaawpëka'any. Koos ënäty yë Babilonyë yajkutujkpë nmo'oy yë ntëypyujxnës ets Egiptë kajpn tuknipëtë'ëkëty, jäänëm nëjkx t'ijxpaatë ko ëjts Wintsën.

²⁶Nwojpwa'kxäämpyës yë Egiptë ja'ayëty ma wiinkëtypë naax kajpnën ets nëjkx t'ijxpaatë ko ëjts Wintsën.