Read Biblia Mixe de Quetzaltepec Ezequiel 31 Bible Online

Ezequiel 31 - Biblia Mixe de Quetzaltepec bible

Ezequiel 31

¹Ma tyu'uk anyën ja mëtëkëëk po'opë, ja majktu'uk jëmëjtpë, ënätës ja Wintsën xynyimiiny etsës xy'ënëmaay:

²Ënëëmë yë faraón, yë Egiptëpë yajkutujkpë ets nitu'kë'ëyë jyä'äy: ¿Tii mëët yaj'ijxkijpxy yë mmëjajtën?

³Jëtu'un tä yë ciprés kepyën ëkë ajë kepyën mëti'ipë jam Líbano, janty'oy xye'enty kyëxë'ëky, mëj nyinikë jam yukjotm, këjxm, jampaat jyëjp jyä'ty ma yootsën.

⁴Yë nëë tuu putëkëjanëp ets yääkëty; tëë jam mëjnëë pyëtsimy ma tyänën; yë nëë mëti'ipë jam tso'onpën tëë tyajxo'kta'ay yë kepy mëti'ipë jamëtyën.

⁵Jä'ä ko kom yë nëë tmëëtëty, paaty nëkooyë këjxm ya'knë këtiinëm jyëtu'unëty yë myëku'uktëjk mëti'ipë jam yukjotm; yë xye'enty këjääpaat të yoonë ets të yoonwä'kxy jëkämpaat.

⁶Yë joon mëti'ipë muum tso'ontëpën tëë pyä'än jam t'oytyuntë; yë aayjëyujk ujtsjëyujk tëë jam y'u'unk tyajmëxu'unk'atë kepypya'tkë'ëm. Ma nyinikën jyëkyejpy jam yë naax kajpn nyäpyëjkta'akëtëty.

⁷Mëj ijty tääpë kepy ets këjxm, yeny ijty yë xye'enty, jä'ä ko yë tyikts nëpë'aay yajpaaty.

⁸Nimëti'ipë ajë kepy tkamëpaatëty mëti'ipë tënääpyën ma Tios yë kyepy kyamën tä tääpë kepyën; nimëti'ipë tsiin jëtu'un kya'ixëty tä yë'ëjën, nimëti'ipë castanyë kepy jëtu'un kyamayëty yë y'ääy, nimëti'ipë kepy jëtu'un oy tsuj kyakëxë'ëky mëti'ipë jam tënaaytyëpën ma Tios yë kyepy kyamën tä tääpë kepyën.

⁹Janty oy ojts nyajyony nyajjiitsyës, mäjpxy yë nyi'aay; yë wiinkëtypë kepy mëti'ipë jamën Edén, ma ja Tios ja kyepy kyamën, wiink ijxëtëp ijty.

¹⁰E oy ko jyëtu'unëty, yë Wintsën jëtu'un y'ënä'äny: tääpë kepy nëkooyë të yoonë, tëë jyëjp tpatnë yoots; ko nëkooyë të yony amëj akëjxm të y'awinpijnë.

¹¹Paaty të ntimy nyajts'ixës, oy ënät nyiminëtëty yë myëtsip, mëti'ipë wiink kë'ëy wiink kajpn tso'onpën ets ëxëëk tyunëtëty jëtu'un tä nyitëkëtyën ko të tyuuntëkoy.

¹²Yë myëtsip yë mëkpë ets kutsë'ëkëpë nëjkx pyujxë'ëkyë ets jëtu'unyë y'ëxmatsa'anyë; yë y'ääy xye'enty jëtu'unyë muum jyaak kuj jyaak jëpipëty tunkëjxm kopkkëjxm, wokjoty käätsoty ets joyjoty; ja naax kajpn mëti'ipë ënäty të pya'at'it të pya'tsëënëtyën jëtu'unyë nëjkx kyäkta'atë ets nipëyë'ktuta'atëty.

¹³Nëjkxëp wiinkëtypë joon jëyujk myintë ets nëjkx tsyënaaytyaknpëktë ma ja mëj kepy ënäty të nyajtskëtawën ets minantëp näjyëtu'un ja wiinkëtypë ja aayjëyujk ujtsjëyujk ets nëjkx jam ja pyä'än tpëjkta'aktë.

¹⁴Ets nimëti'ipë kepy nëjkx kya'ëkyoonë, oy ënäty nëëpë'aay jyayajpaaty, oy jënu'un jyanëëpa'atye'eyëty ka'ap nëjkx nëkooyë y'ëkyujkyoonë ets ja tsajp tpaatëty. Tëë nyitujkëtya'atë ets y'o'kta'atëty ets naaxpa'tkë'p jyëjptakta'atëty ets tpuwa'akëtëty ja myëku'uk mëti'ipë tëëyëp o'ktëpën.

¹⁵Ëjts Wintsën jëtu'unës n'ëna'any: Ko ënäty ja aay kepy jap jyëjptä'äky ma ja o'kën yajkutukyën, ëjts nëjkx nyajkutuky ets tsyë'ëtsëty yë mëjmejy këkpëpë mëët yë monyëtukyë; nyajwa'ak'oyëjäämpyës yë nëë mëti'ipë pëyë'kpën; nëjkxëp mon tuk nyaj'awinpityës yë Líbano kopk ets tsyëtsta'ajëty tëkokyë yë aay kepy mëti'ipë tunkëjxy kopkëjxy yajpatpën.

¹⁶Ko ënäty jap nyajjëjptä'äkyës naaxpa'tkë'p ets nëjkx tpaaty ja myëku'uktëjk mëti'ipë tëëyëp o'ktëpën, nëkooyë nëjkx y'ënanë ko ënäty jap tyuknokë ets nëjkx tsyë'ëkëtë wiinkëtypë naax kajpn. Ma tääpë itjot naaxjotmën naaxpa'tkë'pë yajpaatyën nëjkxëp xyoonta'aktë yë aay kepy oyëtypë ets mëti'ipë nëëpë'aay të yajpaatën ma Líbano kopkën.

¹⁷Näyjyëtu'un yë'ëjëty nëjkxëp jap jyëjpta'aktë tä yë'ëjën, ma yajkutukyën ja o'kën ets tpuwa'akëtëty mëti'ipë tsipjoty të y'ooktën. Mëti'ipë ënäty të tkuwa'anyën jëtu'unyë nëjkx y'akääkwa'kxtë wiink naax wiink kajpn.

¹⁸Nimëti'ipë kepy ënäty kyajëtu'unëty jampë Edén yajpaatën tä yë'ë myëj'äämpyëtyën ets kyëjxmëtyën; e ko të y'o'knë näjyëtu'un jap naaxpa'tkë'p jyëjpta'aka'any tä ja myëku'uktëjkën mëti'ipë jam Edén yajpatëpën ets yajpaata'any mëët ja wiinkëtypë ja aay kepy, mëti'ipë jëënjoty tsipjoty o'ktën tëkooytyën. Tyaapë kepy yajnimëtyä'äkyën yë'ë yaj'antijp yë faraón ets tëkokyë yë jyä'äy.