Read Biblia Mixe de Quetzaltepec Ezequiel 32 Bible Online

Ezequiel 32 - Biblia Mixe de Quetzaltepec bible

Ezequiel 32

¹Ma tyu'uk anyën yë majkmäjtsk po'opë, mëmajkmäjtsk jëmëjtpë, jää ojts yë Wintsën xymyëkäjpxyës ets xy'ënëmaayës:

²Yë'ë ya'atë aaw ayuk mtukkuuy'ëwëp yë Egiptëpë yajkutujkpë: Jëtu'un m'ëtë'ëtsy m'ëna'any kaajën ma naax kajpnën; tä tu'uk mëj jëyujkën nëëjotypë tsyëënën: Ko mkuyuny ma mkë'ëm mëjnëëjën, mëët yë mteky xyaj'ëxëëkë yë nëë ets xyajki'ixkë yë nëëkap.

³Jëtu'un yë Wintsën y'ënä'äny: Oy muum mjayajpatpëty wiink kajpnjoty, je'eyëm nkujëpijpë'ëka'any mëët yë ntsaayës ets nmatsa'any.

⁴Jëtu'unyë nwinpajëtuta'any naaxkëjxy ets mwijts'awëty. Joon jëyujk mëti'ipë tsajpjotm kääkëtijtpën aakjam nëjkx kyëxkäkta'ay ma mijtsën, yë jëyujk je'eyë nëjkx jyotku'kxënë ko ënäty mtsu'utyë.

⁵Ujts nëjkx yë tun kopk yajpaaty mëët yë tok, e yë joyjyot mëët yë o'kpë.

⁶Nyajtsamëjäämpyës yë naax mëët yë mjot mne'pny, jampaat jya'ta'any tunkëjxm kopkkëjxm ets yë'ë mëët y'utsa'any yë wokjot.

⁷Ko ënäty nyajkutëkoy, nyajkootsëjäämpyës yë tsajp ets nyajpi'itsäämpyës yë mëtsa'a; yë xëëw ntukwinkupëkëjäämpyës yë yoots ets po'o ka'ap nëjkx tyi'kxy jyäjy.

⁸Mëët mijtskyëjxm nëjkxëpës nyajpi'tsta'ay tëkokyë mëti'ipë jam tsajpjotm të'kxp jajpën ets kyukootsëja'any yë mnaax mkajpn. Ëjts Wintsën, ëjts ënaanp.

⁹Ko jëtu'unpë ja nija'awën jya'tëty ma ja naax kajpnën mëti'ipë ka'ap xy'ixy'ätyën ko ënäty ëxëëk të mjaty të mkëpety, nëjkxëpës yë naax kajpn may n'ëtsë'ëkë.

¹⁰Mëët mijtskyëjxm may nëjkx yë naax kajpn n'ëtsë'ëk n'ajawës; yë kyutujkpëtëjkëty nëjkxëp tsyë'ëkëtë ko ënäty yë ntëypyujxnës n'ajëpipyës. Ko kyëtawtëty mëk nëjkx tsyë'ëkëtë jä'ä ko jä'ä ja jyuukyajtën pya'ëyowantëp.

¹¹Jëtu'un yë Wintsën y'ënä'äny: Yë Babilonyë yajkutujkpë nëjkxëp mtukja'tyë mëët yë tyiypyujxn.

¹²Nyajkutukäämpyës ets may ja mnaax mkajpn kyutëkoytyëty ma kupuxy y'o'kta'aja'antën ja tsiptuunpëtëjkëty. Nëjkxëp tyajkutëkooytya'atë ja Egiptë kajpn ja myëj'ajtën ets tëkokyë ja naax kajpn.

¹³Nyaj'o'kta'ajäämpyës yë jëyujk tsajpkaa mëti'ipë nëë ukpën ma mnëë jotmën ets ka'ap nëjkx yë ja'ay ets jëyujk t'ëk yaj ëxë'kënëtë tääpë nëëjot.

¹⁴Ënätnëm nëjkx tyi'kxy ja nëëjot ets nëjkx pyëyi'iky tä onën tëëynyääpy. Ëjts Wintsën, ëjts ënaanp.

¹⁵Koos yë Egiptë kajpn nyaj'awinpitëty tä yë itjotmën aanë'ëk tëëtsë'ëkpë ets ja naax kajpn tukwa'ats wyë'ëmëty, ka'ap jap pën y'ëktsënaaynyëty, ënät nëjkx tnijawëtë ko ëjts Wintsën.

¹⁶Ya'atë ëy yë'ë yajtukuuy'ëëp yë o'kpë ets to'oxytyëjktëjkëty nëjkxëp t'ëwtë ya'atë ëy oymyaakajpnëty ko ënäty tniya'axtë yë Egiptë kajpn mëët yë mayjyä'äy mëti'ipë të kyutëkoytyën. Ëjts Wintsën, ëjts ënaanp.

¹⁷Ma myajkmokx anyën yë majkmäjtsk po'opë, ja mëmajkmäjtsk jëmëjtpë, jää ojts yë Wintsën xymyëkäjpxyës ets xy'ënëmaayës:

¹⁸Mijts ye'etyëjk, ëw tu'uk yë ëy, yë'ë m'ëëw'ëtsowëtëp yë to'oxytyëjkëty mëti'ipë yajpatëpën ma kanaakpëky ja naax kajpnën ets xykyuuy'ëwtëty yë Egiptë jëtu'un tä o'kpë yajkuuy'iyën mëët ko tëë may kyutëkoytyë ets tëë y'o'kta'atë yë kyopktëjkëty. Yë kopktëjkëty naaxpa'tkë'p kya'atë, mëët ja mëti'ipë jap yajpatëpën jutjoty.

¹⁹¿Ti ni'ik jëtää mijts mtimy'oyëty këtiinëm jyëtu'unëty pën? Jëjpta'ak ets näwyijtstëwëty ma ja'ayëtyën ka'apë Tios t'ëwtatën.

²⁰Yë'ëjëty nän ënätyë y'ooka'antë ko ënäty y'ooktë ja jyä'äyëty jap tsipjoty. Jëjp ixy ja tëypyujxn y'ijnë jam ma mayjyä'äyën.

²¹Ja kopktëjk mëti'ipë mëj'äämpy të y'itën nëjkxëp jap o'këntujp t'ëxajëtë ja Egiptë ja'ayëty mëët ja jyä'äyëty mëti'ipë mëët oy të nyäjyëkyäpëtën ets y'ëna'antëty: Tëë jyënaktë. Tëë jyëpijptëwtë ja ja'ay ka'apë Tios'ëwtatën, mëti'ipë të y'ooktën tsipjotm.

²²Xim ja Asiria ja'ayëty, mëët ja tsyiptuunpëtëjk, yë'ë nyapikëtyëp yë jyutëty. Aakjam të y'o'kta'atë tsipjotm.

²³Jam të nyaaxtëkëtë ma ja këk jutën ni'ikpë kyëkëtyën. Yë tsyiptuunpëtëjk tëë t'ëtsë'këtya'atë ja'ay mëti'ipë ënäty jaakjuuky'ajtëpën, je'eyëp ko tëë näjyëtu'un y'o'kta'atë jam tsipjotm, paaty ja Asiria ja'ay yajnapikëtë ja jyut ma nyaaxtëkëja'antën.

²⁴Xim ja Elám, mëët ja tsyiptuunpëtëjkëty, yë'ë nyapikëtyëp yë jyutëty. Aakjam të y'o'kta'atë tsipjotm, mëti'ipë ka'ap yë Wintsën të t'ëwtatën jap naaxpa'tkë'p të kyëtakta'atë. Tëë t'ëtsë'ëkëtë ja'ay mëti'ipë ënäty juuky jaakyajpatëpën, je'eyëp ko tyam ka'ap pën y'ëkmëj'ijxënëtë jap o'kpë akujky ma të kyëtakta'atën.

²⁵Jam yë Elám jyëpijpnë tsyiptuunpëtëjk akujky mëti'ipë näjyëtu'un të y'ooktën, tu'kë'ëyë yë'ëjëty aak ka'ap yë Tios të t'ëwtatë ets tsipjoty të y'ooktë mëti'ipë nyapikëtyëpën ja jyutëty. Tëë t'ëtsë'k t'ajawëtë ja mëti'ipë juuky'ajtëpën, je'eyëp ko tyam ka'ap pën y'ëkmëj'ijxënëtë jap o'kpë akujky ma të kyëtakta'atën. Jam të wyë'ëmta'atë ma ja o'kpëtyën mëti'ipë ja'ay të yaj'ookëtën.

²⁶Xim ja Mésec ets ja Tubal, mëët nitëkokyë yë tsyiptuunpëtëjkëty, yë'ë nyapikëtyëp ja jyutëty. Aakjam të y'o'kta'atë tsipjotm, mëti'ipë ka'ap yë Wintsën të t'ëwtatën jap naaxpa'tkë'p të kyëtakta'atë. Tëë t'ëtsë'ëkëtë ja'ay mëti'ipë ënäty juuky yajpatëpën.

²⁷Ka'ap jyamëty të nyaaxtëkëtë ma nyaaxtëjkëtyën ja wintsëntëjkëty tëëyëpë jyuuky'atën, mëti'ipë ojts jap naaxjoty yajpëjkta'aktën mëët ja pyujxnëty mëti'ipë myëtsiptuuntëpën, yë'ë ojts ja tyiypyujxn tkoy'atë ets ja mëti'ipë ijty nätyuk'akëëytyujkëtëpën kyätykyijxy ojts yajpëjktä'äky, tëë ënäty t'ëtsë'ëkëtë ja ja'ay mëti'ipë juuky jaakyajpatëpën.

²⁸Jap mijts myajpaata'any, mijts Egiptë kajpn, ma yajpaatën ja'ayëty ka'apë Wintsën t'ëwtatën, anuk tuknukë jyata'any mëët yë o'kpëtëjk mëti'ipë tsipjoty të y'ooktën.

²⁹Xim ja Edom, mëët yë yajkutujkpëtëjk ets wyintsëntëjk. Oy jënu'un jotmëk të jyä'äy'äty, nän jam yajpaaty o'kpë itkujky ma yajpaatën yë o'kpëty mëti'ipë tsipjoty të y'ooktën, mëti'ipë ka'ap Wintsën t'ëwtajtën.

³⁰Aak xim yajpata'atë ja wintsëntëjkëty mëti'ipë të y'ënä'ämtën anëkëjxytsyow, ma yajpaatë yë Sidónja'ayëty. Jotmëk ojts y'itë ets tëë ja'ay t'atsë'ëk t'ajawëtë, e tyam tëë jap jyëjpta'aktë wintsëtyu'un jëjptsëtyu'un ma ja o'kpë yajpaatën, mëti'ipë të y'ooktën tsipjoty. Ka'ap yë Wintsën të t'ëwtatë, jap tyam yajpaatë o'kpëtujp ma ka'ap pën myëjpëjkta'akëtën tsipjotypë të y'ooktën, mëti'ipë të jyëjpta'aktën o'kpëtujp.

³¹Ko ënäty yë Egiptë yajkutujkpë y'ixëtë nëjkxëp jyotkujkë jä'ä ko ojts ja jyä'äy yaj'ookëtë, jä'ä ko yë'ë ojts y'o'kta'atë mëët ja tsyiptuunpëtëjk jam tsipjotm. Ëjts Wintsën, ëjts ënaanp.

³²Yë Egiptë yajkutujkpë tëë ja'ay t'ëtsë'ëkë mëti'ipë të jyuuky'atën; paaty jam të nyaaxtëkë ma ja'ayëtyën mëti'ipë ka'ap yë Tios të t'ëwtatën, mëti'ipë të y'ooktën tsipjoty, näjyëtu'un nitëkokyë yë tsyiptuunpëtëjk. Ëjts Wintsën, jëtu'un ënaanp.