Read Biblia Mixe de Quetzaltepec Ezequiel 35 Bible Online

Ezequiel 35 - Biblia Mixe de Quetzaltepec bible

Ezequiel 35

¹Ënät ja Wintsën ojts xymyëkäjpxyës ets xy'ënëmaayës:

²Nëjkx jam ma Seir kopkën ets xynyimëtya'akëty ëjts nxëëwkyëjxmës wi'ix ëxëëk jyata'antën.

³Jëtu'un xy'ënëëmëty: Ya'atë aaw ayuk të tnikäjpxy yë Wintsën: Ëjts mmëtsipës yam n'awinpity ma mijtsën Seir kopk ets ko ënäty ntëytyuny jä'ä nyaj'awinpita'any aanë'ëk tëëtsë'ëk ets xit ko'ow.

⁴Nyajkutëkoyäämpyës yam yë mnaax mkajpn ets mijts anë'ëk tëëtsë'ëk nyaj'awinpita'any. Ënätnëm xynyijawëty ko ëjts Wintsën.

⁵Mijts xëmë mëtsip të mnäyajnaxyë ma Israel ja'ayëtyën ets jää të xynyipëtë'ëky ma ënäty jam yajtëytyuntën, ma ja pyoky tkumëtowtën.

⁶E ëjts Wintsën, njuukyajtënës yam ntukajpxpejtyp ko mijts nkë'ëyaka'any jap o'këntujp ets o'kën yë'ë m'ixjëtitan mpajëtitanëp. Mijts mëët yë poky ko të myajja'ay ooky, ja o'kën yë'ë mpajëtitanëp.

⁷Mijts Seir kopk aanë'ëk tëëtsë'ëk ets xit ko'ow nyajwë'ëma'any, ëjts ka'apës n'ëkyajkutukanë ets jam pën tsyëënëty ma mijtsën.

⁸Ëjts nyajkutukäämpy ets y'ujtsta'ajëty yë mtun mkopk, yë mjoyjyot ets mnëëjot mëët yë o'kpëty mëti'ipë tsipjoty o'ktëpën.

⁹Aanë'ëk tëëtsë'ëk nëjkx nyajwë'ëmy xëmëkyëjxm ets ni pën jam kya'ëktsënaaynyëty ma mnaax mkajpnën. Ënätnëm nëjkx xy'ijxkaptë ko ëjts Wintsën.

¹⁰Mijts jëtu'un ojts m'ëna'any: Yë Israel yë y'it nyaaxwiinyëtë, ma yajpaatyën mäjtskpëky yë yajkutujkpë ëjts njä'ä'atäämpy; ëjts nëjkx xywyintsën'atë oy ënäty jam jyayajpaaty yë Wintsën.

¹¹E ëjts Wintsën, njuukyajtënës yam ntukajpxpejtyp ko mijts näjyëtu'un nëjkx n'ëxëëk'ixy, ntukjotma'aty ets ntukjoot'anpëky tä ojts xytyunyën yë Israel kajpn. Ko mijts ntëytyunëty, yë'ëjëty nëjkxëpës xy'ixkaptë.

¹²Ënät xy'ixëty ko ëjts Wintsën, ojtsës nmëtoowta'ay tëkokyë wi'ixjaty ojts xytyijyën yë Israel kopk. Mijts, ojts m'ëna'any: Të'ëts it yë'ë, tyam jyëkyejpy njä'äpëjkmëty.

¹³Mijts nëkooyë ojts m'aaw xyajwä'kxy koos ojts xytsyipwinkajpxë ets wi'ix kawi'ixëty ojts xynyikäjpxy xynyimëtyä'äkyës. Ojtsës nmëtoowta'ay.

¹⁴Paatyës n'ëna'any, ëjts Wintsën: Tëkokyë naaxwiinyëtë xyoonta'aka'any ko mijts nyajkutëkoyëty.

¹⁵Mijts ojts mxoontä'äky ko kyutëkooy ja it naaxwiinyëtë mëti'ipë yë Israel ja'ayëty yajmooytyën ets tjä'ä'atëty, je'eyëp ko mijts nän timjëtu'un mjata'any: Mijts Seir kopk aanë'ëk tëëtsë'ëk mkawinpita'any, mëti'ipë Edom jyä'ä'ajtypyën. Ënätnëm xynyijawëtëty ko ëjts Wintsën.