Read Biblia Mixe de Quetzaltepec Ezequiel 37 Bible Online

Ezequiel 37 - Biblia Mixe de Quetzaltepec bible

Ezequiel 37

¹Ojts ja Wintsën ja kyë'ë tpëjktä'äky maas ëjtsën, etsës xyajtso'ony mëët ja mëj'ajtën oyajtën, etsës jam xyajnaaxwä'ky joyjotm ma o'kpëpajk jyätyën.

²Ënät ja Wintsën xy'ënëmaayës ets ntukjëtijtëtya'ajëtyës ja joyjyot; ja maypyajk jam may ijtp ma ja joyjyotën ets tëë nyitëtstutaaynyë.

³Ënät xy'ënëmaayës: ¿Wä'än jëtää tääpë maypyajk jatëkok yë jyuukyajtën tpëktëtyë? Ënätës n'ëtsooy: Wintsën, mijts mnija'ap.

⁴Ënät ja Wintsën xy'ënëmaayës: Mëkajpx tääpë pajk ëjts nxëëwkyëjxmës. Ets xy'ënëëmëty: Miitsëty maypyajk tëëpë nyitëtstu'utën, mëtoow'itë ja Wintsën ja y'aaw y'ayuk.

⁵Jëtu'un yë Wintsën m'ënë'ëmxëtë: Tyam jatëkok yë xejy nmo'oja'antë mëti'ipë yajjuuky'ajtpën ets mjuukpyëktëty.

⁶Mpëjkta'akäämpyës yë eemy ma mpajkëtyën, yë xixy ets ni'ak, nmo'ojantëp näjyëtu'un ja mxejyëty mëti'ipë yajjuuky'ajtpën ets jatëkok mjuuky'atëty. Jëtu'un xynyijawëtëty ko ëjts Wintsën.

⁷Ënätës ojts ja maypyajk nmëmëtyä'äky jëtu'un ijxtëm ënäty të nyajtuk ëne'emyënës. Tamës ënäty nmëkäjpxy koos nmëtoowpaty y'amu'uy jëtu'un tä ujxën, ënät ja maypyajk ojts nyämyujkta'ayë nixim niyam.

⁸Etsës n'ijxy ko nyini'kx ets ja y'eemy tpëjktaaytyë ets nyitujktaaytyë mëët ja ni'ak. Je'eyëp ko ka'ap xyäjtë.

⁹Ënät ja Wintsën xy'ënëmaayës: Mëkajpx ëjts nxëëwkyëjxmës ja xejy mëti'ipë yajjuuky'ajtpën ets xy'ënëëmëty: Jëtu'un yë Wintsën y'ënä'äny: Xejy mëti'ipë yajjuuky'ajtpën, mintë anëkëjxytsyow, ëpa'tkë'ëytsyow, a'oytsyow ets anajnytsyow ets mo'o juukyajtën ya'atë jot nini'kx tëëpë y'ooktën tyëkoytyën.

¹⁰Ënät ojts ntukmëkajpxtës yë Wintsën yë xyëëw, jëtu'un tääjës ënäty të xytyuk'ëne'emyën ets jyänty myiintë ja xejy xiitsow yaatsow ets jyuukpyëjktë ja o'kpë maypyajk ets wya'kujkëtyääytyë. Nimay ënäty yajxonëty, jëtu'un nyimay'atë tä tsiptuunpëtëjkëtyën.

¹¹Ënät ja Wintsën xy'ënëmaayës: Yë Israel ja'ayëty jëtu'un tä ya'atë maypyajkën. Jëtu'un y'ëna'antë: Yë npajk'ajtëm tëë tyëtstaaynyë; ëëtsajtëm ka'ap nitii n'ëk jëjp'ijxënë, tëë ntëko'oyënë.

¹²E oy, tukmëkajpx yë nxëëwës ets xy'ënëëmëty: Naax kajpn mëti'ipës nnaax'ajtyp nkajpn'ajtypyën, nyaj'ëwatsta'ajäämpyës yë m'o'kpë jut; eetsës nyajpëtsëëmtaja'any yë o'kpëpajk ets jatëkok juuky wyimpitëty ma mnaax mkajpnën.

¹³Ets ko ënäty nyaj'ëwatsta'ayës yë o'kpë jut ets nyajpëtsëëmta'ayës jënu'un yë ja'ay të y'ooktën, jää nëjkx xynyijawëtë ko ëjts Wintsën.

¹⁴Ëjts miitsëty nmo'ojantëp yë xejy mëti'ipë yajjuuky'ajtpën ets mjuuky'ajtwinpitëty; ets nëjkx mpëjkta'aktë ma mkë'ëmnaax mkë'ëmkajpnëtyën. Ënät xynyijawëtëty ko ëjts Wintsën, tëëjës nikäjpxy ets tëëjës jëtu'un winë ntuny tääjës të nikäjpxyën. Ëjts Wintsën ëjts ënaanp.

¹⁵Ënät yë Wintsën ojts xymyëkäjpxyës ets xy'ënëmaayës:

¹⁶Kajpë'ëk tu'uk yë kepy ets jam mkëxja'ajëty, jëtu'un xyaj'ëna'anëty: Yë Judá kajpn ets tëkokyë yë Israel kajpn mëti'ipë mëët tu'ukyë nyäyaj'ityën. Kajpë'ëk wiinkpë kepy ets jam mkëxja'ajëty, jëtu'un xyaj'ëna'anëty: José, mëti'ipë yë Efraín kutënaayëpën ets tu'kë'ëyë yë Israel kajpn mëti'ipë mëët tu'ukyë nyäyaj'ityën.

¹⁷Ets ënät xy'akajpmukëty, jap mkë'ëjoty, tu'uk je'eyë yaj'ixëty.

¹⁸Ko yë mmëkunaax mëkukajpn m'ënë'ëmxëtëty: Tukmëmëtyaktëkës wi'ixën tääpë nyiwijy,

¹⁹tääts xy'ënëëmëty: Jëtu'un yë Wintsën y'ënä'äny: Tyamës nkajpë'ëka'any yë José kyepy, mëti'ipë yë Efraín myëët'ajtypyën ets mëti'ipë myëët'ajtëpën yë Israel ja'ayëty mëti'ipë mëët yë Efraín tu'ukyë nyämyäyën, etsës n'akajpmuka'any mëët yë Judá kyepy ets tu'ukyë nkë'ëkap'atëtyës.

²⁰Jam ma ja'ayëtyën mëti'ipë y'ixtëpën, kajp'it mäjtsk ja kepy mëti'ipë të xynyijayën.

²¹Ets xy'ënëëmëtëty: Jëtu'un yë Wintsën y'ënä'äny: Nyajpëtsëmantëpës yam yë Israel ja'ayëty ma naax kajpnën maajaty yajpaatën; nyajmujkta'ajantëpës etsës tu'ukyë kajpn nyaj'awinpita'any ma nyaax kyajpnëtyën.

²²Mëët yë'ëjëty nyajkojäämpyës tu'uk yë naax kajpn ma ya'atë it naaxwiinyëtën, ma Israel kopkën ets nëjkxëp tmëët'atë tu'uk yë kyutujktakn. Ka'ap nëjkx y'ëknäwya'kxënëtë mäjtskpëky ets ka'ap nëjkx mäjtsk yë yajkutujkpë t'ëkmëët'ajnëtë.

²³Näy ka'ap nëjkx y'ëknätyukyaj'ëxë'kënëtë ja awinax ëkë wiinkëtypë ja tios, ka'ap nëjkx nëkoo ja nëë poky t'ëk tuuntëkooynyëtë. Nëjkxëpës npokymyä'kxtë oy ënäty tiijaty të tuntë ets nëjkxëpës nyajpokywya'atstë. Yë'ë nëjkx nkajpniwa'antës ets ëjts nëjkx xyTyios'atës.

²⁴Yë ntuunpës David, yë'ë nëjkx yajkutuky ma yë'ëjëtyën ets yë'ëjëty nëjkxëpës xymyëmëtowtë ets nëjkx tkuuytyuntë ja n'ënä'ämënës ntëyajtënës.

²⁵Jam nëjkx tsyëënëtë ma ja naax kajpnën mëti'ipës nmooyën yë ntuunpës Jacob, ma ojts näjyëtu'un tsyëënëtën yë y'ap y'okëty. Jam nëjkx tsyëënëtë xëmë ets näjyëtu'un yë y'u'unk y'ëna'këty ets y'u'unk y'okëty; yë ntuunpës David yë'ë nëjkx xëmë yajkutuky.

²⁶Ntunäämpyës tu'uk yë käjpxytyu'unën mëët yë'ëjëty jekpyë y'itëtyën, jëtu'un akujk jotkujk jyuuky'atëty. Nëjkxëpës nyajnimayëtë ets xëmëkyëjxm nëjkx yajja'amyetsy yë ntsajptëjkës ma yë'ëjëtyën.

²⁷Ëjts yajpaataanpës ma yë'ëjëtyën, ëjts nëjkx xyTyios'atë ets yë'ëjëty nëjkxëpës nkajpniwa'any.

²⁸Ko ënäty yë ntsajptëjkës yajpaaty xëmë ma yë'ëjëtyën, nëjkxëp yë wiinkëtypë naax kajpn tnijawëtë ko yë Israel kajpn yë'ëjës të nwin'ixy etsës yë'ë nkajpn'ata'any.