Read Biblia Mixe de Quetzaltepec Ezequiel 38 Bible Online

Ezequiel 38 - Biblia Mixe de Quetzaltepec bible

Ezequiel 38

¹Ënät ja Tios ojts xymyëkäjpxyës ets xy'ënëmaayës:

²Mijts ye'etyëjk, Nikajpx ëjts nxëëwkyëjxmës ko yë Magog yë nyaax kyajpn ëxëëk jyata'any kyëpäta'any ets xynyimëtya'akëty ëjts nxëëwkyëjxmës tii ëyo'on yë Gog pyatäämpyën, mëti'ipë wintsën ijtpën ma tsiptuunpëtëjkëtyën jam Mésec ets Tubal.

³Jëtu'un xy'ënëëmëty: Jëtu'un y'ënä'äny yë Wintsën: Mijts Gog, mëti'ipë tsiptuunpë wintsën ijtpën ma Mésec ets Tubalën, mmëtsip yam nänyikäjpxyës ma mijtsën.

⁴Tyam nyajwinpita'any, xu'unyës yam mpëjkta'akäämpy ma m'aawën, mijts yam nyajpëtsëmäämpy mëët yë mtsiptuunpëtëjk mëti'ipë këwaaytyuk'ënyääytyëpën, mëët yë maykyëwaay ets tsiptuunpëtëjkëty mëët yë wyit tyujkxyëty mëti'ipë myëtsiptuuntëpën, tääpë maytsyiptuunpëtëjkëty mëët yë tyiypyujxnëty ets y'akëëytyukëty ets tu'kë'ëyë mëti'ipë myëtsiptuuntëpën.

⁵Yë'ë panëjkxanëtëp yë Persië ja'ayëty, Etiopíë ja'ayëty ets Libië ja'ayëty, aakyë'ë myënëjkxtëp yë y'akëëytyuk ets pyujxnkujupëty,

⁶jam'atantëp näjyëtu'un yë tsiptuunpëtëjk mëti'ipë Gómer ets Bet-togarmá tso'ontëpën, jëkämpë tsyoontën, anëkëjxmtsowpë, ja nimaypyë ja naax kajpn mëti'ipë mëët të mnäyjä'äypyikyën.

⁷Neynyipëjktaakët ets nänyi'ixët, mijts ets tu'kë'ëyë ja'ay mëti'ipë mëët myajpaatyën; mijts ënä'ämta'a.

⁸Pyatäämpy ja xëëw jëmëjt ets nëjkx myajtuk'ëne'emy ma ja naax kajpn xynyitëkëtyën mëti'ipë jeky të tsyiptunyën, mëti'ipë tëë jyotkujkën; ja kajpn mëti'ipë wiink naax wiink kajpn yajpatpën najtswop najtskäpë ets ojts yaj'ëxwoptë xëmëkyëjxm, je'eyëp ko tëë jatëkok wyimpitë ma ja Israel ja it naaxwiinyëtë tmëët'atyën. Yë'ëjëty tëë ye'eymyujkta'atë jatëkok oy jeky muum wiink naax wiink kajpn të yajpaatë ets yë'ëjëty jotkujk jatëkok nyäyjyawëtë.

⁹Jëtu'un nëjkx mja'ty tä yëk yootsën ets xyajwintukëty yë kyajpn ets nëjkx xytyukja'ty tääpë kajpn tä tu'uk mëktuupojën mëët tu'kë'ëyë ja mtsiptuunpëtëjk ets ja naax kajpn mëti'ipë ënäty mëët të mnäyjä'äypyikyën.

¹⁰Ëjts, Wintsën, ëjts ënaanp: Jä'ä xëëw jä'ä jëmëjt nëjkx ëxëëk winma'any mjotëkëty.

¹¹Nëjkxëp m'ëna'any: Yë'ëjës yam nitëkëjäämpy yë kajpn ka'apë myäyën nyäkyuwa'anëtëty, ma tsyëënëtën yë ja'ay akujk jotkujk ets ka'apë tii tmaytyë tajtën, tu'kë'ëyë ja naax kajpn mëti'ipë ka'ap nyapotsyëtyën, ka'apë nyi'akajën ets ka'apë tmëëtëtyën mëti'ipë yajtukjëkojtë'kpën.

¹²Njuutäämpyës yam winë ets nmä'tsta'ajäämpyës yam; nitëkëjäämpyës yam yë naax kajpn mëti'ipë tëë yaj'akojën ets mëti'ipë kanaak kajpn të tsyoontën ets të ye'eymyuktën, mëti'ipë kujëyujk kutsajpkaajën ets mëti'ipë myëët'ajtëpën winë, mëj'äämpyë nyäyajnaxëtën.

¹³Nëjkxëp myajtëyë yë Sabá ja'ayëty ets Dedán ja'ayëty ets ajuuy ato'kpë mëti'ipë jam Tarsis kukajpnajtëpën: ¿Mä'tspën të mminyë? ¿Paatykyëjxmën të xyajmuky yë mtsiptuunpëtëjk ets xyajpëtsëma'any winë ets xymyäätsa'any yë pu'ts pujxn ets poop pujxn; jëyujk tsajpkaa ets tëkokyë mëti'ipë myëët'ajtëpën?

¹⁴E oy, ka'ap wyi'ixëty, mëmëtya'ak yë Gog ëjts nxëëwkyëjxmës ets xy'ënëëmëty: Jëtu'un yë Wintsën y'ënä'äny: Ko yë Israel kajpn ënäty jotkujk yajpaaty, ënät xynyitsoonëty.

¹⁵Jam jëkäm anëkëjxmtsow ma mkajpnën, mëët may yë mtsiptuunpëtëjk jotmëkëtypë mëti'ipë këwaaytyuk'ënyääytyëpën.

¹⁶Jëtu'un nëjkx xynyitëkë yë Israel kajpn, mëti'ipës nkajpn'ajtypyën. Mijts Gog, jëtu'un nëjkx xyajwintuky yë naax kajpn tä yë yëk yootsën. Nëjkxëp ntuknitëkë yë nnaax nkajpnës, jëtu'unts nëjkx mijts xymyëtunyës ets jëtu'un wiinkëtypë naax kajpn nëjkx tnijawëtë ko ëjts Wintsën, koos nyajnikëxë'ëky ko ëjts wa'atsës.

¹⁷Ëjts Wintsën, jëtu'unës n'ëna'any: Mijtsën ojts n'antijy koos ojts tëëyëp njanimëtyä'äky mëët yë nkäjpxynyajxpëtëjkës jam Israel; yë'ëjëty ojts nikajpxtë ko ënäty mijts mmina'any ets xynyitëkëja'any yë Israel kajpn.

¹⁸Ëjts Wintsën, jëtu'unës n'ëna'any: Ko ënäty yë Gog tnitëkë yë Israel kajpn, mëkës nëjkx njoot'anpëky.

¹⁹Maas yam njoot'anpëkyën, jëtu'unës yam n'ëna'any nxëëwkyëjxmës ko jääjës nëjkx tu'uk yë ujx mëkpë nyajnaxy ma Israel kajpnën.

²⁰Ets nëjkxëp tsyë'këtya'atë yë nëë jëyujkëty, yë joonëty, yë aayjëyujk ujtsjëyujk ets mëti'ipë myox tyukye'eytyëpën ets näjyëtu'un yë naaxwiinyëtë ja'ayëty. Jijta'ajantëp yë tun kopk, yë tsaa ets potsy mëti'ipë naax kajpn nyapots'ajtypyën.

²¹Ma Gog kajpnën nyajminäämpyës yë ëyo'on jotmay atsë'ëk ajawëpë, ntëytyunäämpyës mëët yë pa'am ëyo'on ets o'kën tëko'oyën mëkpë tsaatsypë. Ma yë'ëjën mëët yë tsyiptuunpëtëjk ets naax kajpn mëti'ipë putëjkëyëpën nyajkomtu'ujäämpyës, nyajtëtsntu'ujäämpyës ets nyajtu'ujäämpyës yë jëën mëti'ipë tsääpy no'kpën ets nëjkx yë tsyiptuunpëtëjk nyänyipëtë'ëkyë aakyë'ë mëët yë tëypyujxn. Ëjts Wintsën, ëjts ënaanp.

²³Jëtu'un may yë naax kajpn ntuk'ixa'anyës ko ëjts mëjës ets wa'atsës. Ëjts näynyikëxë'ëkanëpës ma yë'ëjëtyën ets nëjkxëp tnijawëtë ko ëjts Wintsën.