Read Biblia Mixe de Quetzaltepec Ezequiel 39 Bible Online

Ezequiel 39 - Biblia Mixe de Quetzaltepec bible

Ezequiel 39

¹Mijts ye'etyëjk, tukmëmëtya'ak yë Gog ëjts nxëëwkyëjxmës, jëtu'un xy'ënëëmëty: Jëtu'un yë Wintsën y'ënä'äny: Gog, mëti'ipë mëj wintsën'ajtpën jam Mésec ets Tubal, mmëtsipës yam n'awinpity ma mijtsën.

²Nyajwinpitäämpy yam; ëtyä'äkyë'äämpy nyajtsoona'any jam anëkëjxmtsow ma jëkäm myajpaatyën ets nyajmina'any ma Israel yë tyun kyopkën.

³Etsës ntëjtakta'aja'any ja ti'pxn mëti'ipë mmajts'ijtypyën ma m'anajnykyë'ëjën ets xymyajtska'ata'ajëty ja ti'pxnkepy mëti'ipë mmëët'ajtypyën ma m'a'oykyë'ëjën.

⁴E mijts, mëët yë mtsiptuunpëtëjk ets ja naax kajpn mëti'ipë mjämyëët'ajtëpën, ooky nëjkx kya'ata'atë ma Israel kopkën. Jam nkë'ëyaka'antë ets nëjkx mtsu'utsëtë lut majkwejkxy, kaa ets tsa'any.

⁵Jëpijptëy nëjkx o'kpë yajpaaty aayjoty ujtsjoty. Jëtu'unës të nikäjpxy. Tëës yë n'aaw n'ayuk nyäky.

⁶Jëënës ntuknikäxäämpy yë Magog kajpn ets kajpn nëëpë'aaypyë yajpaatën ma ja'ay akujk jotkujk jyuuky'atën. Ënät nëjkx tnijawëtë ko ëjts Wintsënajtp.

⁷Ëjts ntsojkpyës ets nxëëwës wa'atspë yajnijawëty ma Israel kajpnën ets ka'apës nkupëka'any ets nëxi'iky tukxi'iky wyë'ëmëty. Nëjkxëp wiinkëtypë naax kajpn tnijawë ko ëjts wa'atsës yë nxëëw nyaj'ity ma Israel.

⁸Kopkpëky ko tpaata'any jëtu'unpë ja xëëw jëmëjt mëti'ipës yam nyikäjpxypën. Ëjts Wintsën, ëjts ënaanp.

⁹Yë Israel ja'ayëty nëjkxëp tnino'kta'atë mëti'ipë myëtsiptuuntëpën, nëjkxëp tnino'kta'atë yë y'akëëytyuk, tyi'pxnëty, kyu'umënëty, jyëpijpnëty ets wyojpnëty, tam'ataanp ja ja'axy may mëti'ipë nyo'oktëpën wëxtujk jëmëjt.

¹⁰Ka'ap nëjkx kopkpëky kamjoty jya'axtë ets yukjoty jyä'äxypyuxtë, jä'ä ko tu'kë'ëyë tääpë mëtsiptu'unën yë'ë nëjkx tja'axy'atë. Jëtu'un nëjkx tyajpëtsëëmta'atë winë ma ja kajpnën mëti'ipë winë të yajpëtsë'ëmxëtën ets nëjkx tpëjkëtya'atë winë ja naax kajpn mëti'ipë ënäty winë të pyëjkxëtën. Ëjts Wintsën, ëjts ënaanp.

¹¹Ntuknikääkëjäämpyës yë Gog tu'uk yë itjot jam Israel, ma yajtijyën Jëtijtpë ja'ay ja Jyoy jot, mejywyintuuypyë yajpaatyën ets jam nyaaxtëkëty. Ma tääpë itjotmën ka'ap nëjkx jam pën nyäxy, jamts yë Gog nyaaxtëkëty mëët tu'kë'ëyë tsyiptuunpëtëjk ets nëjkx txëëwmo'otë, Gog ets Tsyiptuunpëtëjk Joy jot.

¹²Jää yë Israel ja'ay tyajnaaxtëjkëtya'atëty wëxtujk po'ojën ets nëjkx ja naax kajpn wa'ats jatëkok wyi'imy.

¹³Aakyë'ë ja'ay tyuunk'atantëp aak o'kpë yajnaaxtëkëjantëp ets oy nëjkx nyäyjyawëtë. Jä'ä xëëw ëjts nëjkx nmëjnaxy. Ëjts Wintsën, ëjts ënaanp.

¹⁴Nëjkxëp näjyëtu'un ja'ay ëpëky yajtuknipëktë mëti'ipë nëjkx jyëtitën kajpnjoty ets tyajnaaxtëkëtëty ja o'kpë mëti'ipë ënäty muum ka'ap të yaj'ixyën ets yajxon wa'ats wyë'ëmëty ja naax kajpn.

¹⁵Ko pën muum t'ixëty o'kpëpajk, mëti'ipë të yajtuknipëktën t'aye'eytyëty ja kajpn, nëjkxëp tpëjktä'äky tu'uk ijxpäjtën jam o'kpë pë'am koonëm myintëty ja ja'ayëty mëti'ipë yanaaxtëkëtëpën ma ja joyjyotën ma ja Gog ja tsyiptuunpëtëjk të yajnitajtën.

¹⁶Tam wiinkpë kajpn mëti'ipë tyijtëpën Tsiptuunpë ja'ayëty. Jëtu'un nëjkx wa'ats ja naax kajpn wyi'imy.

¹⁷Ojtsës yë Wintsën näjyëtu'un xy'ënëëmë: Ënëmaaytya'a yë joonëty ets kaa jëyujkëty wä'än tu'ukmuktë na'ëwtityë ma Israel yë kyopkën ets t'ixtëty wi'ix ja o'kën tëko'oyën nyaj'ita'anyës. Jyëkyäpëp tsu'utstëty tjë'kxtëty ja tsu'utsy ets t'uuktëty ja ne'pny;

¹⁸nëjkxëp tsu'utstë ja tsiptuunpëtëjkëty ja xyixyëty ets nëjkxëp t'uuktë ja yajkutujkpëtëjk ja nye'pny, jëtu'un tä yajtsu'utyën yë kupixyny, yë tsajppax ëkë tä tsajpkaajën ni'kxëtypë mëti'ipë yajpatëpën jam Basán.

¹⁹Ma tääpë o'kën tëko'oyën nyaj'ita'anyënës, jyëkyejpy jää nëjkx may tjë'kxtë on koonëm pya'amtunëtëty ets jyëkyejpy nëjkx t'uuktë yë ne'pny koonëm myu'ukëtëty.

²⁰Nëjkxëpës nyajtsu'uts nyajjë'kxtë mëët yë këwaaytsyu'utsy ets mëët yë nyija'ay, mëët yë tsiptuunpëtëjk ets yaja'ay o'kpëtëjk yë xyixyëty, koonëm kyu'uxëtëty. Ëjts Wintsën, ëjts ënaanp.

²¹Jëtu'un nëjkx ntuk'ixyës yë nmëj'ajt n'oyajtënës wiinkpë naax kajpn. Tëkokyë wiinkëtypë naax kajpn nëjkxëp t'ixtë wi'ixës të mpaye'eyën ja tëko'oyën ets wi'ixës të ntëy tyuntën.

²²Jä'ä xëëw ets jëtu'un y'ita'any yë xëëw jëmëjt nëjkxëp yë Israel kajpn xy'ixkaptës ko ëjts Wintsën, mëti'ipë yë'ë Tyios'ajtëpën.

²³Ets nëjkx yë wiinkëtypë naax kajpn tnijawëtë ko yë Israel ja'ayëty paaty ojts yajmënëjkxtë tsumy matsy wiink naax wiink kajpn jä'äkyëjxm ko ojts pyokytyuntë ets ka'apës xywyintsë'këtyë; paatyës n'ëxmajtstë ets ëxëëk ja myëtsip tyuunëtë ets ya'o'këtë tsipjoty.

²⁴Jëtu'unës ojts ntëytyuntë tä ënäty pyaatëtën ets mëët ko ënäty të kyäjpxykyumëtoownaxtë ets të nyäyaj'ëxëëkëtë, ënätës nmëjëkämkäktë.

²⁵Paaty ëjts maas nWintsën'atyën, jëtu'unës yam n'ëna'any: Tyam mpa'ëyowa'anyës nitu'kë'ëyë yë Israel kajpn, yë Jacob yë y'u'unk y'ok. Ëjts nyajkutukäämpy ets wyimpitëty oy ja jyuuky'ajtënëty, etsës nimëkta'aka'any twinkutsë'ëkëtëty wa'atspë nxëëwës.

²⁶Nëjkxëpës nyajtso'onta'atë ma wiink naax wiink kajpn yajpaatën ets ma myëtsip yë nyaax kyajpnëtyën, ënät nëjkx jyuuky'atë jotkujk kyë'ëm naaxjoty kyë'ëmkajpnjotyëty ma ka'ap pën y'ëtsë'ëkëtëty. Jëtu'un nyaj'ixëtëtyës ja nwa'ats'ajtënës ets may ja naax kajpn t'ixtëty. Yë Israel ja'ayëty myëtänëjantëp yë ëyo'on ko ënäty të xykyäjpxy kumëtoownaxtës.

²⁸Ëjts ojts nkäxtë jam wiink naax wiink kajpn tsumy matsy, ëjts näjyëtu'un nëjkx jatëkok nyajtu'ukmuktë ma nyaax kyajpnëtyën. Nitu'uk nëjkx wiink naax wiink kajpn nkayajwë'ëmyës tsumy matsy. Ënät nëjkx tnijawëtë ko ëjts Wintsën.

²⁹Ka'apës nëjkx njëxk n'ëkja'atyëkooyëtë, jä'ä ko tëëjës yë nmëjajtën nyajnaaxkëtä'äky ma Israel kajpnën. Ëjts Wintsën, ëjts ënaanp.