Read Biblia Mixe de Quetzaltepec Ezequiel 42 Bible Online

Ezequiel 42 - Biblia Mixe de Quetzaltepec bible

Ezequiel 42

¹Ojtsës ja ye'etyëjk xwyoowpëtsëmy jap tëja'p anëkëjxytsyow, etsës jap xykyuwo'owëy tëkoty ma ja tëjkën mëti'ipë jam anëkëjxmtsow yajpatpën, ma ja tëja'awën apojtstukypë ets ma ja tëjkën tsajptëjk jëxkë'pë.

²Ya'atë tëkot jä'ä y'ayenyëty i'px majktëkëëk xajpk ja tu'kkë'ënux anëkëjxytsyow ets myëjwiinëty majkmokx tu'uk xajpk ja mäjtsk kë'ënux.

³Tu'k'it jap kyuye'eyë tëja'ptsow mëti'ipë jootjotyën, tëtujk xajpk ja mäjtsk kë'ënux myëjwiinëty ets tu'k'it tëja'ptsow nyijkxy ma ja tsaawinwaapën. Tëkëëk nikë'ë ja tëjk, jaakmëjjëp ja nyitëjkëtyakn, ka'ap jyëtu'unëty ja ëpa'tkë'ëypyën.

⁴Maajaty ja tëjk ja nyipëtsëëmtaknën tam tmëët'aty ja najxtakn, jä'ä myëjwiinëty tëkëëk xajpk ja tu'kkë'ënux ets i'px majktëkëëk xajpk ja tu'kkë'ënux, mëti'ipë tëkoty kuye'eyëpën. Ja tëjk'aaw aakjam nyas'ixë anëkëjxmtsow.

⁵Ja tëjk ja mëmäjtsk ets mëtëkëëk nikë'ëpë wäänaty myutskë, jä'ä ko kuwa'akëp wäänaty.

⁶Ya'atë tëjk ka'ap ijty jyëtu'unëty ja nyixeny itkujky tmëëtëty ijxtëm ja nyixenyën ja tëjkpa'atwa'ats mëti'ipë yajpatpën ma ja tëja'awën; paaty myutskë mëti'ipë mëmäjtsk nikë'ëjën ets mëtëkëëk nikë'ëjën.

⁷Ja tëkot kanaakpëkpyë mëti'ipë japën tëja'p, jä'ä y'ayenyëty majkmokx tu'uk xajpk ja mäjtsk kë'ënux ets ja mäjtsk kë'ënux. Wintuuytsyow jam ijty tu'uk ja potsy jä'ä y'ayenyëty majkmokx tu'uk xajpk ja mäjtsk kë'ënux, tëja'ptsowpë pyëtsimyën. Jä'ä wyinë'aty ja tëja'aw i'px majktëkëëk xajpk ja tu'kkë'ënux.

⁹Ma tyaapë tëjkën tëkëëk nikë'ëpë, tap ënäty ëpa'tkë'p tmëëtëty ja tëjkëtyakn maatsow yë xëëw pyëtsimyën, jam tsyoony ma ja tëja'awën.

¹⁰Maajaty ja potsy nyäxyën mëti'ipë tëja'ptsowën. Ëpa'tkë'ëmtsow, ma ja tëja'awën akojtukpyë ets ma ja tëjkën mëti'ipë xëëwpëtsëmytsyowën ma ja tsajptëjkën aaktam ja tëkot.

¹¹Ja nyitëja'aw mëti'ipë japën ëpa'tkë'p näjyëtu'un y'ixëty tä ja nyitëja'awën ja tëjk mëti'ipë jamën anëkëjxmtsow; ja yenyajtën ets ja kyon'ajtën tu'knax myëjwiinëty tä ja najxtaknën ma yajnitëkën ja tëjk.

¹²Ja nyitëjkëtyakn ja tëkot mëti'ipë ëpa'tkë'ëytsyowën jam tsyo'ontä'äky ma ja potsyën mëti'ipë wintuuytsyow wë'ëmpën ma ja tëja'awën xëëwpëtsëmtsyow.

¹³Ënätës xy'ënëmaay: Yë tëjk mëti'ipë yajpatëpën anëkëjxmtsow ets ëpa'tkë'ëytsyow wa'ats yë'ëjëty, yë'ë të yajtuknikojëtë yë teetytyëjkëty ets jam tjë'kxtëty tpëktëty ja jë'kxy pëky mëti'ipë ënäty ja Wintsën të yajtukwintsë'ëkën; jam tpëjktakta'atëty ja wintsë'kën wa'atsëtypë mëti'ipë ja'ay yajktëpën nino'oky nixämy ets mëti'ipë tyukunajxtëpën ja nëë poky, jä'ä ko tääpë tëjk wa'ats yë yajpaaty.

¹⁴Ko yë teetyëjk jap tyëkëtëty ka'ap tjëkyepy pyëtsëmtëty tëja'p, ko pyëtsëma'antëty jap yë wyit tjäntëty mëti'ipë myëteety'ajtëpën, jä'ä ko wa'ats yë wyit tyujkxyëty tmëët'atë; ko yë naax kajpn tmëwinkona'antëty wiink wit tyuktëkëtëp.

¹⁵Ko ja ye'etyëjk tkijpxtaay ja naax jënu'un tnitänën ja tsajptëjk tëkotytsyowpë, ënätës jap xywyoowpëtsëëmy etsës ojts xyajnëjkxy maatsow ja tu'ujën mëti'ipë xëëwpëtsëmy yajpatpën ets tkijpxtaay jënu'un y'ëwtityën jam ja naax.

¹⁶Ënät tkijpxtaay mëti'ipë jamën xëëwpëtsëmtsyow mëët ja kyepy: Jä'ä pyëtsiimy mëko'px ja tëkë'px tëtujk xajpk ja mäjtsk kë'ënux.

¹⁷Ojts tkijpxy näjyëtu'un ja anëkëjxytsyowpë: Jä'ä pyëtsiimy mëko'px ja tëkë'px tëtujk xajpk ja mäjtsk kë'ënux.

¹⁸Ojts tkijpxy näjyëtu'un ja ëpa'tkë'ëytsyowpë: Jä'ä pyëtsiimy mëko'px ja tëkë'px tëtujk xajpk ja mäjtsk kë'ënux.

¹⁹Ets ojts nyajxë'ëky matsow ënäty të kyijpxtsoonyën: Jä'ä pyëtsiimy mëko'px ja tëkë'px tëtujk xajpk ja mäjtsk kë'ënux.

²⁰Ojts tkijpxta'ay taxk pa'ajëty. Ja naax mëti'ipë ja tsajptëjk nyitënääpyën myëët'ajtyp tu'uk ja nyapots jä'ä myëjwiinëty pa'apa'a mëko'px ja tëkë'px tëtujk xajpk ja mäjtsk kë'ënux, mëti'ipë yaj'awäkxy'ijtypyën ja ëxëëkpë mëët ja wa'atspë.