Read Biblia Mixe de Quetzaltepec Ezequiel 44 Bible Online

Ezequiel 44 - Biblia Mixe de Quetzaltepec bible

Ezequiel 44

¹Ënät ja ye'etyëjk jatëkok ojts xywyoownëjkxyës jam ma ja tëjkëtyaknën mëti'ipë tëja'ptsow yajpatpën xëëwpëtsëmtsyowpë wyi'imyën, ëtuky ënäty.

²Jam ojts yë Wintsën xy'ënëëmës: Ya'atë tëjkëtyakn ëtuky yë wyë'ëma'any; ka'ap tjëkyepy y'ëwa'atsëty. Ni pën mëpaat jam kyatëkë, jä'ä ko Wintsën jam të nyäxy, mëti'ipë yë Israel ja'ayëty Tyios'ajtëpën. Paatykyëjxm ëtuky wyë'ëma'any.

³Yi'iyë mëpaat jam tyëkë yë yajkutujkpë ets tkayëty tsu'utsëty ja jë'kxy pëky kënu'kxypyë jam Wintsën wyintum. Jamtsow nëjkx tyëkë ma ja tëja'awën tëkotytsyowpë ets nän jamtsow pyëtsëmëty.

⁴Ënät ja ye'etyëjk ojts ok xyajnëjkxyës jam anëkëjxmtsow ma ja wiinkpë tëjkëtyaknën, tsajptëjkwintuuy tsyowpë. Täätsës të n'ixy ko tëëtëm yë Wintsën tyajtuktuky yë tsajptëjk mëët yë myëj'ajt y'oyajtën, etsës të nwintä'äky të naaxkoy, koonëmës yë nwinpok të ntukpaaty yë naax.

⁵Ënätës yë Wintsën të xy'ënëëmë: Mijts ye'etyëjk, yajxon ijxwa'kx ets mëtoowkukë mëti'ipë yam ntukmëmëtya'akäämpyën, ja ënä'ämën tëyajtën mëti'ipë jap tunëpën ma tsajptëjkën. Yajxon xytyim ixëty pën mëpaat tyëkë ets pyëtsimy ma tsajptëjkën.

⁶Ënëëmë tääpë kajpn käjpxy kumëtoownajxpë: Ko jëtu'un yë Wintsën y'ënä'äny: Këtii xy'ëktuunëtë ëxëëkpë, miitsëty Israel ja'ayëty.

⁷Miitsëty je'eyës yë ntsajptëjk xyaj'ëxëëkëtë ko jap xyajnaxtë jaaypyaat jaaypyo'kxy, ja ja'ay mëti'ipë ka'ap tmëët'atyën ja nkäjpxytyu'unënës ma jyot wyinma'anyën ets ma jyot nyini'kxën.

⁸Ets ka'ap tuntë ja näkyënu'kxën ma ja pokymyä'kxën yajpëjktsoyën, yë'ë të nyätyukë'ëwanëtë ja jaaypyaat jaaypyo'kxy.

⁹Paaty ëjts maas nWintsën'atyën, jëtu'unës n'ëna'any: Ko ka'ap nëjkx tyëkëtë nijëna'a yë jaaypyaat jaaypyo'kxy maas yë ntsajptëjkën mëti'ipë ka'ap tmëëtëtyën ja nkäjpxytyu'unënës ma jyot wyinma'anyën ets ma jyot nyini'kxën; oy ënäty jyayë'ë'ajtpë mëti'ipë tsënääpyën ma Israel ja'ayëtyën.

¹⁰Yë Leví ja'ayëty mëti'ipë ëpëky të nyäpyëjkta'akëtën ko ja Israel ja'ayëty ojts xy'ëxmatstës ets ja wiink tu'u ojts tmatstë, yë'ëjëty kopkpëky ko ja nyëë pyoky tnikëpäjtu'utëty.

¹¹Jyëkyejpy nëjkx je'eyë kyëwent'atë maas yë ntsajptëjk yë tyëjkëtyaknën ets ma wiinkëtypë ja tuunkën mëti'ipë ka'ap nëkooyë myëjnaxyën; yë'ë nëjkx tyaj'ooktë ja jëyujk mëti'ipë yajnino'kpën ets mëti'ipë ja naax kajpn yäjkpyën jëtu'un tä ayajk ako'onën; yë'ëjëty jëjp'ijxp nëjkx y'itë oy tii ja kajpn tyimtuk'ënä'ämëtëty.

¹²Jä'ä ko yë'ëjëty ojts ja Israel ja'ayëty tyuktunëtë ja ëxëëkpë ko ojts ja wiink tios t'ëwtatë ets jëtu'un yajpokytyuunëtë. Paatykyëjxm nëjkx tkumëtowtë ja nyëë pyokyëty. Ëjts Wintsën, ëjts ënaanp.

¹³Yë'ëjëty ka'ap nëjkx tjëkyepy tii tuntë ijxtëm yë teetytyëjkëtyën ets ka'ap tjëkyepy tmëwinkontëty mëti'ipë wa'ats'ijtpën, ni'ik mëti'ipë kënu'kxyën ka'ap mëpaat tontë. Kopkpëky ko tsëëmnaxtëty ja mëti'ipë të tuuntëkoytyën ets ja ëxëëkpë të tuntën.

¹⁴Yë'ëjës nëjkx ntuktuntë mëti'ipë ka'ap tsyowpaatyën ets tuntëty mëti'ipë mëpaat yajtunyën.

¹⁵Yë teetytyëjkëty, Leví ja'ayëty, yë Sadoc yë y'ok'u'unk y'ok'ëna'k, mëti'ipë ojts ka'ap yë tyuunk t'ëxmatstën maas yë ntsajptëjkën oy ja Israel ja'ayëty ojts jyanäyajtu'utëkatsëtë, yë'ëjëty patëtëp etsës xynyimintëty ets xymyëtuntëtyës. Mëpaat xymyëwinkontës ets xytyukwintsë'ëkëtëtyës yë jëyujk on ets jëyujk ne'pny. Ëjts Wintsën, ëjts jëtu'un ni'ënä'ämëp.

¹⁶Jyëkyejpy näjyëtu'un tyëkëtëty maas yë ntsajptëjkën ets tmëwinkontëty yë nwintsë'këntyaknës ets jam ja tyuunk tyajtu'uye'eytyëty ets yë'ë tyuntëp mëti'ipë ënäty jap tuunk'ajtpën.

¹⁷Ko tyëkëtëty ma tsajptëjk ja nyitëja'awën jootjoty tsyowpë, yë'ë linë wit pyëjkta'aktëp. Ko ënäty ja tuunk tyajtu'uye'eytyë ma ja tsajptëjk ja nyitëja'awën jootjoty tsyowpë, ka'ap mëpaat yë u'kxywyit tyajtuntë.

¹⁸Myënëjkxtëp yë kyupit mëti'ipë linë witën ets y'ëxmotspa'tkëty nän linë wit ets ka'ap tjëkyepy tii nyätyukwëënëtëty mëti'ipë yajpëxijkëpën.

¹⁹E ka'anëm ënäty jap tëja'p pyëtsëmtë ma naax kajpn y'ëwxityën ko tjäntëty ja wyit mëti'ipë jap tsajptëkoty myëtuuntëpën ets wiinkpë wyit tuktëkëtëty mëti'ipë myëpëtsëmtëpën tëja'p këtiipë ja wa'atsajtën ja naax kajpn jä'ä nyinaxëtëty.

²⁰Ka'ap tjëkyepy kutë'kx nyäkyääpëtëty ets nän ka'ap tjëkyepy yë wyääy nëkooyë tyajyontëty; je'eyë wyääy yajnikääptëty.

²¹Nitu'uk mëpaat yë teety yë tsatym nyëë tka'uuky tëëpë nyimaanaxyën ko jap yajpaatëty ma ja tsajptëjk tëja'awën.

²²Ka'ap tjëkyepy pyëkëty mëët tu'uk yë to'oxytyëjk tëëpë kyu'ookyën ëkë mëti'ipë pëjktëkatsyën, yi'iyë mëpaat mëët pyiky tu'uk yë to'oxytyëjk mëti'ipë ka'ap ye'etyëjk tmëëtsëënënëm ëkë mëti'ipë ënäty tu'uk yë teety të tku'ookyën.

²³Yë teetytyëjkëty kopkpëky ko yë nnaax nkajpnës tukni''ixëtëty mëti'ipë kënu'kxyën ets mëti'ipë ka'ap kyënu'kxyëtyën, mëti'ipë wa'atsën ets mëti'ipë ka'ap wya'atsëtyën.

²⁴Ko ja'ay tsyippaatëty yë'ë nëjkx tnipaye'eytyë ja tëko'oyën tä jeexyë tu'uk nipaye'epyën mëët ja n'ënä'ämënës ntëyajtënës. Nëjkxëp tpatuntë ja ënä'ämën mëti'ipë nyikäjpxypën jëna'a ja xëëw yajtunëtyën ets kopkpëky ko näjyëtu'un tpo'kxtëty ja npo'kxënxëëwës.

²⁵Nijëna'a mëpaat tkatontë o'kpë, këtiipë nyäyaj'ëxëëkëtëty, ënät tëy pën yë'ë të y'ooky tyeety tyaak, y'u'unk y'ëna'k, ëkë myëkä'äx ye'etyëjk to'oxytyëjkpë mëti'ipë ka'ap pyiky'atën.

²⁶Ko jëtu'un tuntëty kopkpëky ko tsyi'iwtëty xyëtstëty ets näpyujën tpaatëty ets t'apo'kxtuktëty wëxtujk xëëw.

²⁷Ko jatëkok tyëkëtëty jap tsajptëkoty ets ja tuunk jatëkok tyajtu'uye'eya'antëty mëti'ipë tyuunk'ajtëpën, nëjkxëp tu'uk tyaktë yë wintsë'kën mëti'ipë nyëë pyoky tyukunaxtëpën. Ëjts Wintsën, ëjts jëtu'un ni'ënä'ämëp.

²⁸Ëjts jëtu'un naxëp tä jeexyë yë teetytyëjkëty yë kyuma'ayën yajmo'otën. Ka'ap nëjkx yë nyaax kyamëty ëpëky yajmo'otë jam ma Israel ja'ayëtyën. Jä'ä ko ëjts yë xyjyä'ä'ajtëp.

²⁹Jyëkyejpy tjë'kxtëty tpëktëty yë aaypyajk ujtspajk mëti'ipë yë Israel ja'ayëty ëjts xytyukwintsë'këtyëpën ets jyëkyejpy tsu'utstëty yë tsu'utsy mëti'ipë yë Israel ja'ayëty näjyëtu'un yajktëpën ko ja jëyujk tukunaxtë ja nyëë pyokyëty. Näyjyëtu'un tëkokyë mëti'ipë yë Israel ja'ayëty ëjts të xytyukmëyoxtën yë'ë jyä'ä'atëp.

³⁰Yë teetytyëjkëty nän yë'ë nëjkx tjä'ä'atë mëti'ipë më''ëka'any pëtë'kpën kamjoty tu'ujoty ets ja ayajk ako'onën mëti'ipë më''ëka'any yajyajkpën. Ets ko ënäty ja jëtsy yajwooky mëti'ipë tsajpkääky yajtuk'oytyuunpën, yë'ë nëjkx yë teetytyëjkëty tjä'ä'atë. Jëtu'un nëjkx yë nkënu'kxënës jam kyëtä'äky ma mjëën mtëjkëtyën.

³¹Yë teetytyëjkëty ka'ap nëjkx nijëna'a tsu'utstë yë jëyujk najts'ookë, ëkë mëti'ipë jëyujk të yaj'ookyën.