Read Biblia Mixe de Quetzaltepec Ezequiel 45 Bible Online

Ezequiel 45 - Biblia Mixe de Quetzaltepec bible

Ezequiel 45

¹Ko ënäty xy'ijxpëtsëmtë ja naax pënjaty nikäkëyëpën mëti'ipë yë Israel ja'ay jyä'ä'atantëpën, myajwë'ëmtëp ëpëky yë naax mëti'ipë mëjwiin'atëpën tuktujk mil ja tëkëëk mëko'px ja i'px majktëkëëk xajpk y'ayeny'atëty ets tëtujk mil xajpk myëjwiin'ajtën. Ya'atë naax kam ets jënu'un yë pya'ajën kënu'kxy nëjkx nyäxy.

²Ma ya'atë naaxën jap nëjkx yë tsajptëjk nyiwë'ëmë, jä'ä y'ayeny'atëty mëko'px ja tëkë'px tëtujk xajpk ets myëjwiin'atëty majkmokx tu'uk xajpk ja mäjtsk kë'ënux.

³Ma ya'atë naaxën jä'ä nëjkx xykyijpx pëtsëmtë tuktujk mil ja tëkëëk mëko'px ja i'px majktëkëëk xajpk y'ayenyajtën ets tëkëëk mil ja tëkëëk mëko'px ja i'px majktëkëëk xajpk myëjwiin'ajtën. Jam yë tsajptëjk yajkojëty ets ma wintsë'kën yajyakëtyën ni'ik wa'atspë.

⁴Ya'atë naax mëti'ipë të yajkënu'kxyën teety nëjkx tjä'ä'atë mëti'ipë jap tuuntëpën tsajptëkoty, ma Wintsën yë jyëën tyëjkën. Nëjkxëp yë jyëën tyëjk jam tkojtë. Yë'ë tääpë naax yajtukniwë'ëmëp yë tsajptëjk.

⁵Nëjkxëp näjyëtu'un wiinkpë naax xykyijpxy jä'ä y'ayeny'atëty tuktujk mil ja tëkëëk mëko'px ja i'px majktëkëëk xajpk ets tëkëëk mil ja tëkëëk mëko'px ja i'px majktëkëëk xajpk myëjwiin'atëty, yë'ë nëjkx tjä'ä'atë yë Leví ja'ayëty mëti'ipë jap tuuntëpën tsajptëkoty ets tmëët'atëty kyajpn ma tsyëënëtëty.

⁶Ok nëjkx xyajwë'ëmy wiinkpë naax mëti'ipë mtukniwë'ëmtëpën ja naax kajpn, tuktujk mil ja tëkëëk mëko'px ja i'px majktëkëëk xajpk myëjwiin'atëty ets mil ja tëtujk mëko'px ja tëkë'px tëtujk xajpk y'ayeny'atëty, wintuuytsyow ma ënäty ja tsajptëjk ja jyä'ä të nyiwë'ëmën kënu'kxypyë. Yë'ë ya'atë nëjkx yë Israel y'u'unk y'ok tjä'ä'atë.

⁷Jää'ataanp näjyëtu'un yë naax mëti'ipë yajkutujkpë jyä'ä'atëpën. Tu'kpëky xëëwpëtsëmtsyow ets tu'kpëky xëëwkëtä'äkytsyow, jä'ä yaj'antijy tu'kpëky ma ja naax ja kënu'kxypyën ets tu'kpëky ma ja naaxën mëti'ipë ja kajpn jyä'ä'ajtypyën. Xëëwpëtsëmytsyow ets xëëwkëtä'äkytsyow jëtu'un myëjwiin'atëty tä nitu'uk ja Israel ja'ay të nyikääkëtyën.

⁸Ya'atë naax yë'ë nëjkx tjä'ä'atë yë yajkutujkpëtëjk, jëtu'un ka'ap tpëjkëtëty yë nyaax kyam yë jyä'äy; jëtu'un nëjkx yajnaaxmooytya'atë yë Israel ja'ayëty tä ënäty tyu'kjëën'at tyu'ktëjk'atën.

⁹Ëjts Wintsën, jëtu'unës n'ëna'any: Miitsëty yajkutujkpëtëjk, jëtu'un myaj'ënëëmëtë ko Wä'än najääyë tkexy tnaxy yë tsip käjpxy. Këtii nëkoo o'ktëy xytyimtuntë ëyoopëja'aytyëjk. Tuntë ja mëti'ipë mëtëyën ets nipaye'eytyë winë tëy tëtä'äky. Këtii yë nyaax kyam xy'ëkpëjkënëtë yë nnaax nkajpnës. Ëjts Wintsën, ëjts jëtu'un ni'ënä'ämëp.

¹⁰Ko tii xytyiytyëty ets xykyijpxtëty mëtëy xytyuntëty.

¹¹Yë kijpxën mëtëypyë mëti'ipë myajtuntëpën ma aaypyajk ujtspajk xykyijxptën yë'ë myajtuntëp ko tii xykyijpxtëty mëti'ipë nëëjën. Yë bato myëët'atëp mëti'ipë jaaknatëjkëpën ma homer ets homer myëët'atëp mëti'ipë jaaknatëjkëpën ma efa; yë homer yë'ë kijpxën'atëp.

¹²Näyjyëtu'un ma yajkijpxyën mëti'ipë je'emtyjyätyën, ya'atë kijpxn tunëp: I'px geras, tu'k siclë yë'ë, e tu'k ciclëpë, majktu'uk gramo yë'ë; tëkë'px ciclë, tu'k mina yë'ë.

¹³Ya'atë mëpaat xyaktë ma tsajptëjkën: Ko ënäty xyajpëtë'ëktë yë mtsajpmokëty ets cebadë ma mkam mtu'ujëtyën; nëjkxëp xypyëjkwa'kxtë tëkë'pxpëky tu'knax ets tu'kpëky nëjkx xyjyëpëktë mëti'ipë yë Wintsën mo'otëpën.

¹⁴Näyjyëtu'un yë on jä'ä xypyëjkwa'kxtëty mëko'px pëky tu'knax ets tu'uk xyjyëpëktëty mëti'ipë nëjkx yë Wintsën xytyukwintsë'ëkëtën.

¹⁵E ma kupixynyëtyën, tu'uk xypyuyaktëty ma ja mäjtsk mëko'pxjatypyën, mëti'ipë oyëtyën mëkëtyën jampë yajpaatën Israel. Yë'ë yajtukniyakëp ko ënäty yajyoxy yë aaypyajk ujtspajk, ko ënäty yajyäky ja jëyujk ooky nino'okpyë ets ko ënäty ja wintsë'kën yajyäky ma ja nay'ëëw'oy näykyajpx'oyë y'ityën.

¹⁶Tëkokyë ja'ayëty aak patëtëp tmo'otëty yë yajkutujkpë ya'atë ayajk ako'onën mëti'ipë jam Israel tsënaaytyëpën,

¹⁷e yë yajkutujkpë yë'ë yakëp ja jëyujk mëti'ipë yajnino'okëpën ets mëti'ipë tunaanpën ma yajyäkyën yë aaypyajk ujtspajk ets tsatym nyëë tëëpë nyimaanaxyën, mëti'ipë yajyajkpën ma po'o pyi'k'atyën, po'kxënxëëwpë ets ma winë tnixëëwtuntën jam Israel. Yë'ë nëjkx näjyëtu'un tyäky yë wintsë'kën mëti'ipë poky yajtukuyajkpën, yë aaypyajk ujtspajk ets jëyujk mëti'ipë yajnino'kpën ko yajtuny yë nay'ëëw'oy näykyajpx'oyë ets jëtu'un yë Israel ja'ayëty yajpokymyä'kxtëty.

¹⁸Ëjts Wintsën, jëtu'unës yam n'ëna'any: Ko tyu'uk'anëty yë mëtu'kpo'opë, yë'ë nëjkx jää xyaktë yë tsajpkaa ayääkë mëti'ipë oy mëkën ets yë'ë mëët wya'atsëty yë tsajptëjk.

¹⁹Nëjkxëp yë teety wäänë tpëjkë'ëky ja jëyujk ne'pny mëti'ipë nye'pny'äjtypyën ja wintsë'kën ko ja poky yajtukunaxy ets nëjkx tkëxkoy maajaty ja tsajptëjk xenyën mëti'ipë yajpatpën tëja'ptsow ets maajaty taxkpëky ja tyäkën ja wintsë'këntyakn ets maajaty ja xenyën ja taxkpë japë tëkotsyowën.

²⁰Näyjyëtu'un nëjkx yajtuny ma wyëxtujk xëëwpetyën ja po'o, jää nëjkx xyaktë yë wintsë'kën mëti'ipë yë nëë poky mtukunaxtëpën ma ënäty të mpoky tyuntën ajotkumonë oy jëtu'un të xykyawinmaytyë ëkë të xykyajawëtë ko të mtëkoytyë. Jëtu'un nëjkx ja tsajptëjk wa'ats wyi'imy.

²¹Ma myajkmajkts anyën ja mëët tu'kpo'opë jää nëjkx xyajtso'onta'aktë ja ëmaay xyëëwk ets wëxtujk xëëw nëjkx xykyäytyë tsajpkääky ka'apë tsyooymyëëtëtyën.

²²Tu'uk nënjkx yë yajkutujkpë tyäky yë tsajpkaa ayääkë ets nyëë pyoky tukunaxëty ets näjyëtu'un ja naax kajpn ja nyëë pyoky,

²³winjëpom ma wëxtujk xëëw xyëëwtuntën, nëjkxëp tyäky wëxtujk ja tsajpkaa ayääkë ets wëxtujk yë kupixyny, aak'oy aak mëkpë mëti'ipë tyukwintsë'ëkëpën ja Tios tsa'ay no'oky. Winjëpom nëjkx näjyëtu'un tyäky yë tsajppax mëti'ipë Tios tyukwintsë'ëkëpën ëpëky.

²⁴Tu'ukjatypë tyäkyën yë tsajpkaa ets tu'ukjatypë kupixyny, i'px tsim nëjkx tukpuyakë yë aaypyajk ujtspajk ets tëkëëk tsim ja kujkm yë on.

²⁵Näyjyëtu'un ma yajnixëëwtunyën yë tëjkxo'omy, ma myajkmokx anyën yë wëxtujk po'opë, yë yajkutujkpë wëxtujk xëëw mëpaat yë wintsë'kën tyäky, mëti'ipë nëë poky tyukunaxëpën, näjyëtu'un yë jëyujk ets aaypyajk ujtspajk tyakëty tä jëyëjp të yajnikäjpxyën.