Read Biblia Mixe de Quetzaltepec Ezequiel 46 Bible Online

Ezequiel 46 - Biblia Mixe de Quetzaltepec bible

Ezequiel 46

¹Ëjts Wintsën, jëtu'unës n'ëna'any: Yë tëjkëtyakn xëëwpëtsëmtsyowpë mëti'ipë yajpatpën jap tëja'p jootjotytsyow ëtuky y'itëty tëtujk xëëw, ma tyuunk xëëwëtyën; jää y'ëwa'atsëty po'kxënxëëw ets ko po'o pyi'k'atëty.

²Yë yajkutujkpë jam tyëkëty ma ja tëjkëtyaknën mëjtëja'ptsowpë ets jam nyaaxwa'akëty ma tu'uk yë xenyën mëti'ipë jam ma tëjk'akajën. E yë teetytyëjkëty yë'ë nyino'oktëp ja jëyujk ooky mëti'ipë wintsë'kën'ajtpën ets yë'ë näjyëtu'un kyë'ëyaktëp ja wintsë'kën mëti'ipë ënäty ja yajkutujkpë të tmëminyën ma ja nay'ëëw'oy näykyajpx'oyë tuna'anyën, jam kyoxtänëty ets wyinta'ak nyaaxkowëty ma ja tëjk'apu'uyën ets jatëkok pyëtsëmëty, ya'atë tëjkëtyakn ka'ap nëjkx y'ëtuky tu'kxëëw koonëm kyootsëty.

³Ko po'kxënxëëw ets ko po'o pyi'k'atëty yë naax kajpn jam myinëty Tios'ëwtajtpë ma tääpë tëjkëtyaknën.

⁴Yë'ë ya'atë jëyujk myëminëp yë yajkutujkpë ets wyintsë'kën'atëty ko po'kxënxëëw tpaatëty, mëti'ipë yë Wintsën tyukwintsë'ëkëpën; tëtujk yë kupixyny ayääkë ets tu'uk yë kupixyny mëjpë, aakyë'ë oyëtypë mëkëtypë.

⁵Tu'katsypë tyäkyën ja kupixyny ayääkë jä'ä tukpuyakëty yë ujtspajk të'ëtspë i'px tsim, e ma tu'katsypë tyäkyën yë kupixyny mëjpë yë'ë kë'ëm y'a'ixëp jënu'un ënäty tukmëyakëja'any ja ujtspajk të'ëtspë. Pën i'px tsim tyäky yë ujtspajk, tëkëëk tsim ja kujkm tukmëyakëty yë on.

⁶Ma ënäty yajnixëëwtunyën yë po'o u'unk, yë'ë jää yakëp tu'uk yë tsajpkaa ayääkë, tëtujk yë kupixyny u'unk ets tu'uk yë kupixyny yä'äy mëjpë, aakyë'ë oypyë mëkpë.

⁷Tu'ukjatypë tsajpkaa ayääkë tyäkyën, i'px tsim tukmëyakëty yë ujtspajk ets näjyëtu'un tukmëyakëty tu'ukjatypë yë kupixyny ayääkë, e yë kupixyny mëjpë yë'ë nyijawëp kë'ëm jënu'un tyaka'any. E i'px tsimjatypë tyäkyën ja ujtspajk tëkëëk tsim ja kujkm tukmëyakëty yë on.

⁸Ko yë yajkutujkpë tyëkëja'anëty jam nyaxëty maatsow ja tëja'aw ja nyitëjkëtyaknën ets nän jam pyëtsëmëty.

⁹Ko yë naax kajpn myintëty ma tsajptëjkën ko ënäty ja xëëw tyunyë ets t'ëwtata'antëty yë Wintsën, ya'atë tyuntëp: mëti'ipë tëjkëtyëpën ma ja tëjk'aawën anëkëjxytsyowpë, ëpa'tkë'ëytsyow pyëtsëmtëty; e mëti'ipë tëjkëtyëpën ma ja tëjkëtyaknën ëpa'tkë'ëytsyowpë anëkëjxytsyow pyëtsëmtëty. Ka'ap nëjkx pyëtsëmtë maatsow ënäty të tyëkëtën, wiintuuytsyow nëjkx pyëtsëmtë.

¹⁰Yë yajkutujkpë mëët tyëkëty yë naax kajpn ets mëët pyëtsëmëty.

¹¹Ma xëëw tyunyën kanaakpëky jä'ä yë tsajpkaa ayääkë yajtukpuyakëty yë ujtspajk i'px tsimjaty ets näjyëtu'un tu'ukjatypë kupixyny ayääkë yajyäkyën; e yë kupixyny mëjëtypë kë'ëm xy'a'ixëtëty jënu'un yë ujtspajk xytyukpuyakëja'antë. E ma i'px tsimjatypë yë ujtspajk yajyäkyën tëkëëk tsim ja kujkm yë nyi'on xyajkëtëty.

¹²Ko yë yajkutujkpë tyakëty tsojkënkyëjxm yë y'ayajk y'ako'onën ma Wintsënën, ijxtëm tu'uk yë tsajpkaajën ëkë kupixyny mëti'ipë yakëpën ko ënäty yë nay'ëëw'oy näykyajpx'oyë tuny, jamtsow xëëwpëtsëmtsyow tyëkëty ets tyakëty yë wyintsë'kën näjyëtu'un tä yë po'kxënxëëw txëëwtuntën. Ko pyëtsëmëty ënätyë yë tëjkëtyakn y'ëtujkojnëty.

¹³Winjopy yajyakëty tu'uk yë kupixyny ayääkë tu'ukpë jyëmëjtën, oypyë mëkpë, yë'ë yajtukwino'ok yajtukwinxamëp yë Wintsën.

¹⁴Näyjyëtu'un winjopy yajmo'ojëty yë Wintsën yë aaypyajk ujtspajk wëxtujk tsim ets tu'ktsim yë on, mëti'ipë yajtuknipëkëpën yë tsajpmokway. Ya'atë jëtu'unpë tsajptëkoty tyuunk kopkpëky yë'ë.

¹⁵Yë wintsë'kën ma yajnino'okyën ja kupixyny ets ma yajyäkyën ja ujtspajk ets ja on, jopyëp mëpaat yajyäky.

¹⁶Ëjts Wintsën, jëtu'unës n'ëna'any: Ko tu'uk yë yajkutujkpë tukumayëty yë nyaax yë y'u'unk y'ëna'k, ja naax kam yë'ë jyä'ä'atëp yë y'u'unk y'ok.

¹⁷E ko yë yajkutujkpë tukumayëty yë nyaax yë tyuunpë, jääyë tjä'ä'atëty ja tuunpë ma ënäty jajëmëjt tpaatyën ma y'ëwaatsëpëtsëmyën winë ets nëjkx jatëkok ja yajkutujkpë tjä'äpëky ets y'u'unk y'ok tmëwë'ëmëty.

¹⁸Tu'uk yë yajkutujkpë ka'ap tjëkyepy pën yë nyaax kyam tpëjkëty. Ko yë y'u'unk y'ëna'k yë nyaax kyam tmo'oja'anëty yë'ë mëpaat tmo'oy mëti'ipë jyä'ä'ajtypyën; jëtu'un ka'ap pën wyë'ëmëty naaxtuk këtiipë yë nnaax nkajpnës ye'eywya'kxëty.

¹⁹Ënät ja ye'etyëjk ojts xywyoownëjkxyës ma tëjkëtyaknën anëkëjxmtsowpë, ma ja tëjkën kanaak akojtukpyë, mëti'ipë yë teetyëjk të yajtuknikojëtën. Ënät të xytyukni''ixës yë tëjk kanaak akojtukpyë mëti'ipë yajpatpën xëëwkëtä'äkytsyow, ja ix'ampë yajpaatyën,

²⁰etsës të xy'ënëëmë: Yaa yë teetytyëjkëty tyajkë'ëwtëty yë tsu'utsy mëti'ipë wintsë'kën'ajtpën ko të yajpaaty yë pokymyä'kxën ets yaa näjyëtu'un tyajkë'ëwtëty yë aaypyajk ujtspajk. Jëtu'un ka'ap jap tii tmëpëtsëmtëty tëja'p ets jëtu'un ka'ap yë naax kajpn tii tonëty mëti'ipë kënu'kxyën.

²¹Ënätës jap tëja'p xywyoowpëtsëëmy ets ojts xytyukniye'eyëtyä'äyës ja tëja'aw ja tyatsk taxkpëky. Etsës n'ijxy ko maajaty ja tëja'aw ja tyatskën taxkpëky aaktam tmëëtëty yë tëjkpa'atwa'ats mutskjatyëty. Aak tu'knax kyijpxyëty, majktëkëëk xajpk ja tu'kkë'ënux y'ayenyëty ets majk xajpk myëjwiinëty.

²³Ets na'ëwtity tsaapotsy jam, ma ja potsy y'ëjxën jëëntooytyakn jam.

²⁴Ënätës xy'ënëmaay: Yaa jëtu'un yë ja'ayëty, mëti'ipë jap tsajptëkoty tuuntëpën tyajkë'ëwtëty yë tsu'utsy mëti'ipë naax kajpn yajktëpën ets Wintsën tukwintsë'ëkëtëty.