Read Biblia Mixe de Quetzaltepec Ezequiel 47 Bible Online

Ezequiel 47 - Biblia Mixe de Quetzaltepec bible

Ezequiel 47

¹Ojtsës jatëkok ja ye'etyëjk xywyoownëjkxy ma ja tsajptëjk yajnitëkën. Ënätës n'ijxpaty ko japtëm ma akaj'ëjxën myuuty yë nëë, jam nyajtspëyë'ëkë xëëwpëtsëmtsyow, ma ja tsajptëjk nyajts'ixën. A'oytsyow ja nëë tnaye'ey ja tsajptëjk, ëpa'tkë'ëytsyow ma wintsë'këntyaknën.

²Ënätës xywyoowpëtsëëmy ma ja tsajptëjk ja nyaaxjotmën etsës jam xyajpëtsëëmy anëkëjxmtsow, etsës xytyukna'ëwtijty ja tsajptëjk jamës xyajjajty ma ja tëjkëtyaknën xëëwpëtsëmtsyowpë mëti'ipë tëja'ptsow pëtsëëmpën. Etsës të n'ixy xye'kxy ja nëë maatsow ja tëjkëtyaknën ëpa'tkë'ëytsyowpë.

³Ja ye'etyëjk xëëwpëtsëmtsyow ojts pyëtsimy, tejpxy kyë'ëwits'ajtyp, tëkëëk mëko'px ja i'px majktëkëëk xajpk ojts tkijpxy etsës xyajnëënajxy; maas nteky yo'knën ja nëë xypyäty.

⁴Ënät jatëkok ojts tkijpxy, nän tëkëëk mëko'px ja i'px majktëkëëk xajpk ets xyajnëënajxyës; nteky kyox këjxyës ja nëë xypyääty. Ojts wiinkpë tkijpxy nän tëkëëk mëko'px ja i'px majktëkëëk xajpk ets xyajnëënajxyës, nwëënkëjxyës ja nëë xypyääty.

⁵Ojts wiinkpë tkijpxy nän tëkëëk mëko'px ja i'px majktëkëëk xajpk ojts tkijpxy ets ja nëë, mëjnëë ënäty y'awinpijnë; këk yajxon y'awinpijty mëjnëëjën, ka'ap tjëkyepy wi'ix ye'epy ntuknaxëtyës, yä'äp tëy je'eyë.

⁶Ënätës xy'ënëmaay: Ix yajxon mëti'ipë m'ijxypyën. Ënät jatëkok xyajwinpijtyës nëëpë'aay,

⁷etsës n'ijxpaty maykyepy nëëpë'aay mäjtskpa'ajëty.

⁸Ënätës xy'ënëmaay: Ya'atë nëë jamtsow nyijkxy xëëwpëtsëmtsyow ets jam nyäxy ma Jordán mëjnëëjën, tyimja'ty jam ja Ookpyë Mejyën. Ko jam jya'tëty pa'ak yë mejy y'awinpita'any.

⁹Maajaty jyä'tyën ya'atë nëë jyëkyejpy jam jyuuky'atëty oymyëti'ipë jëyujkëty ets jyëkyejpy jap nëëjoty tsyëënëtëty yë nëë jëyujk. Jä'ä ko ya'atë nëë ko muum jya'tëty ma ta'ampë nëëjën, pa'ak y'awinpita'any ets jyëkyäpëp jyuuky'atëty oytyiijëyujkëty.

¹⁰Jëtu'un tsyo'onta'akëty jam En-gadi ets tyimja'tëty jam En-eglaim ma mëj Ookpyë Mejyën, jam'atëp yë nëë jëyujk majtspëty, jam nëjkx tsyääy tyajtë'ëtstë. Nitii jam kya'ëmaaytya'aka'any ets kanaakjëjp yë nëë jëyujk yajpaata'any tä jamën ma ja Mejyën Naax'akujkpyë.

¹¹E ma mo'onts jotmën ets nëë'akëyën ka'ap yajpaata'any yë nëë mëti'ipë yaj'ukpën; jä'ä ko ta'amts jyawëja'any, kaan jam pëtsëmaanp.

¹²Ma nëëpa'ajën, mäjtskpa'ajëty, aay kepy jam yonaanp mëti'ipë tëëmpätëpën ets yajë'kxëty. Ka'ap yë y'ääy kya'aja'any nijëna'a ets xëmë tyëëmpäta'any. Wimpo'o tyëëmpäta'any jä'ä ko ja nëë mëti'ipë tso'onpën ma tsajptëjkën yë'ë xëmë xook yaj'itäämpy ja naax. Yë tyëëm yë'ë yajjë'kxëp e yë y'ääy tsooy wya'anëty.

¹³Ëjts Wintsën, jëtu'unës n'ëna'any: Ya'atë tsëpa'an itaanp ma ja naax kajpnën mëti'ipë kuma'ayën'ataanpën ma Israel ja'ayëty nimajkmäjtsk kä'äxpë yajpaatën. Yë José mäjtsk it nëjkx tyukka'ayë.

¹⁴Ëjts ojtsës n'ënëëmë yë m'aptëjkëty ets nxëëwës ojts ntukajpxpety. Ko wä'än tyajwa'kxtë yë naax tu'knax. Ya'atë naax kajpn yë'ë nëjkx tkuma'ayën'atë.

¹⁵Mëti'ipë jam najxpën anëkëjxmtsow, jam tsyoonëty ma Mejyën Naax'akujkpyë, nyaxëty jam Hetlón ets jam Sedad y'itjotm,

¹⁶nyaxëty jam Berotá ets Sibraim mëti'ipë yajpatpën ma Damaskë y'itjotmën ets Hamat y'itjot nyaxëty jam Hasar-haticon ma mëët nyämëtsëpa'an'atyën yë Haurán.

¹⁷Jëtu'un yë anëkëjxmtsowpë nëjkx jam nyäxy, jam tsyoonëty ma Mejyën Naax'akujkpyë ets jya'tëty jam Hasar-enán ets nëjkx anëkëjxmtsow wyi'imy yë Damaskë ets Hamat yë y'itjot.

¹⁸Ja tsëpa'an xëëwpëtsëmtsyowpë nyäxyën jam nëjkx tsyoony Haurán ets Damaskë ets nëjkx jyä'ty jam Tamar, ma Ookpyë Mejyën, yë'ë pyaye'eyëp yë Jordán nëë, yë'ë nëjkx tsyëpa'an'aty ma mëët nyäpyaatëtëtyën yë Galaad ets Israel y'itjot.

¹⁹E yë ëpa'tkë'ëytsyowpë jam tsyo'onta'akëty ma Tamar y'itjotmën, nyajxë'ëkëty jam Meriba-cades ets nyaxëty ma Egiptë wokën ets tyimja'tëty ma Mejyën Naax'akujkpyë.

²⁰E xëëwkëtä'äky tsyowpë ja tsëpa'an, jam nëjkx nyäxy ma Mejyën Naax'akujkpyë y'itjotmën, tsyo'onta'akëty jam ma mëët yë Egiptë tyu'kmëtsëpa'anëtyën ets jya'tëty jampaat ma mejypya'ajën ma tsyo'ontaknën yë Hamat y'itjot.

²¹Ya'atë jëtu'un naaxwiinyëtë'ajtp mëti'ipë nëjkx tu'knax xyajwa'kxtën ma Israel ja'ayëtyën.

²²Yë'ë nëjkx xykyuma'ayën'atë ets yë'ë nëjkx näjyëtu'un tkuma'ayën'atë jaaypyaat jaaypyo'kxy mëti'ipë y'u'unk myääy myëët'ajtëpën ma miitsëtyën. Yë jaaypyaat jaaypyo'kxy jëtu'un xyjyawëtëty tä jeexyë y'Israel ja'ay'atën. Ko ënäty xypyëjkwa'kxtë yë naax kam nëjkxëp näjyëtu'un yë jaaypyaat jaaypyo'kxy xymyo'otë yë jyä'äjëty mëti'ipë tsënaaytyëpën ma miitsëtyën.

²³Yë jaaypyo'kxyjyä'äyëty jam nëjkx yë nyäkyumayë yajmo'otë ma ënäty ja Israel yajpaatyën ja jyä'ä mëti'ipë kyutsëna'ayëpën. Ëjts Wintsën, ëjtsës yam jëtu'un ni'ënä'ämëp.