Read Biblia Mixe de Quetzaltepec Ezequiel 48 Bible Online

Ezequiel 48 - Biblia Mixe de Quetzaltepec bible

Ezequiel 48

¹Yaa myiny këxja'ay yë Israel ja'ayëty yë y'u'unk y'okëty: Tsyo'ontä'äky ma Israel tsëpa'an anëkëjxmtsowpë, nyäxy jam ma ja Mejyën Naax'akujkpyë, nyajxë'ëky jam Hetlón, ma ja Hamat ets Hasar-enán yajnitëkën, y'ëwtijtë'ëky ëpa'tkë'ëmtsow ma Damaskë naaxjotmën ets Hamat y'itjotmën. Nitu'ukjaty yë ja'ayëty jënu'un tyu'kja'ay'atën nëjkxëp yajmo'otë yë nyaax kyamëty, mëti'ipë yajpatpën xëëwpëtsëmtsyow ets xëëwkëtä'äkytsyow. Yë'ë nëjkx yajmo'otë yë nyaaxëty yë Dan, Aser, Neftalí, Manasés, Efraín, Rubén ets Judá.

⁸Ëpëky nëjkx xyajwë'ëmtë ja naax mëti'ipë yajpatpën xëëwpëtsëmtsyow ets xëëwkëtä'äkytsyow. Jä'ä myëjwiin'atëty tuktujk mil ja tëkëëk mëko'px ja i'px majktëkëëk xajpk ets näjyëtu'un y'ayeny'atëty tä ja naaxën mëti'ipë më''ëka'any të yajkijpxtën, jampë tsyo'ontä'äkyën maatsow yë xëëw pyëtsimyën ets tyimja'ty jam xëëwkëtä'äkytsyow. Itkujky ijty wyi'imy ja tsajptëjk.

⁹Ja naax mëti'ipë ja Wintsën yajtukniwë'ëmpën jä'ä y'ayeny'atëty tuktujk mil ja tëkëëk mëkoxk ja i'px majktëkëëk xajpk ets jä'ä myëjwiin'atëty tëtujk mil ja tëtujk mëko'px ja tëkë'px tëtujk xajpk.

¹⁰Ma ya'atë naaxën nëjkxëp yajtukniwë'ëmy yë teetytyëjkëty; jä'ä y'ayeny'atëty tuktujk mil ja tëkëëk mëko'px ja i'px majktëkëëk xajpk mëti'ipë anëkëjxmtsow ets ëpa'tkë'ëytsyow jëjptakpën, e mëti'ipë xëëwpëtsëmytsyowën ets xëëwkëtä'äkytsyow nëjkxpën jä'ä myëjwiin'atëty tëkëëk mil ja tëkëëk mëko'px ja i'px majktëkëëk xajpk. Itkujky ja tsajptëjk nëjkx wyi'imy.

¹¹Ya'atë naax, teetyëjk nëjkx yajtukniwë'ëmtë ets Wintsën nëjkx yajtuknikënu'kxë, yë'ë n'antijpyës yë Sadoc yë y'u'unk y'ok mëti'ipë ojts ka'ap xy'ëxmatstënës ko ojts yë Israel ja'ayëty t'ëxmatstë yë në'ë ntu'ujës, tä y'ëtëtstën yë Leví ja'ayëty.

¹²E paaty n'ëna'anyës, ma ja naaxën mëti'ipë ja Wintsën yajtukniwë'ëmpën, ma ja Leví ja'ayëty ja nyaaxjotëtyën, yë teetytyëjkëty nëjkxëp yajmo'otë yë nyaaxëty mëti'ipë ni'ikwa'atsën.

¹³Ma teetyëjk yë nyaaxëtyën, jam nëjkx yë Leví ja'ayëty näjyëtu'un yë nyaax yajmo'otë, jä'ä nëjkx y'ayeny'äty tuktujk mil ja tëkëëk mëko'px ja i'px majktëkëëk xajpk ets myëjwiinëty tëkëëk mil ja tëkëëk mëko'px ja i'px majktëkëëk xajpk. Yë naax mëti'ipë nëjkx yë Wintsën yajtukniwë'ëmyën jä'ä nëjkx y'ayeny'äty tuktujk mil ja tëtujk mëko'px ja i'px majktëkëëk xajpk ets myëjwiin'atëty tëtujk mil ja tëtujk mëko'px ja tëkë'px tëtujk xajpk.

¹⁴Yë'ë nëjkx ya'atë naax ni'ik mëj nyaax'aty ma naax kajpnën. Tyaapë naax ka'ap tjëkyepy yajtookëty nitu'kjënu'un ets nän ka'ap tjëkyepy pën yajmo'ojëty, jä'ä ko yë'ë të yajtuknipëjktaakë yë Wintsën.

¹⁵Ja naax mëti'ipë ënäty natëjkëpën, mëti'ipë ayenyën tuktujk mil ja tëkëëk mëko'px ja i'px majktëkëëk xajpk ets myëjwiinëty tu'uk mil ja tëtujk mëko'px ja tëkë'px tëtujk xajpk ka'ap pën tjä'äjëty. Jam jyëkyejpy ja'ay tsyëënëtëty ets jam nëjkx yë jëyujk jë'kxy y'ity. Itkujky ja kajpn nëjkx yajpaaty,

¹⁶jä'ä nëjkx na'ëwtityë myëjwiin'aty tu'uk mil ja tu'kmëko'px xajpk.

¹⁷Ma ja kajpn pa'ajën jam nëjkx y'ity ja jëyujk jë'kxy tsajpkaa jë'kxy, jä'ä myëjwiin'atëty ja nyinaax majkta'px tëkëëk xajpk pa'apa'a.

¹⁸Nëjkxëp wiinkpë naax nyatëkë jam kajpnpë'am ma ja naaxën mëti'ipë ënäty ja Wintsën të yajtuknipëjktaakën, jä'ä y'ayenyëty tëkëëk mil ja tëkëëk mëko'px ja i'px majktëkëëk xajpk maatsow yë xëëw pyëtsimyën ets näjyëtu'un myëjwiinëty maatsow yë xëëw kyëtä'äkyën. Ma tyaapë naaxën jam nëjkx winë yajkojy yajni'ipy, ja pëjktä'äky mëti'ipë ënäty jam ijtp wintëëpën yë'ë nëjkx tjä'ä'atë yë ja'ayëty mëti'ipë naax kajpn myëtuuntëpën.

¹⁹Yë ja'ay mëti'ipë naax kajpn myëtuumpyën wä'än pën t'u'unk t'okëty yë'ë nëjkx tyajtuny ya'atë naax.

²⁰Tu'kë'ëyë ja naax mëti'ipë ënäty ëpëky të yajtuknipëjktaakën ja Wintsën ets mëti'ipë të yajtukniwë'ëmyën ja kajpn, jä'ä nëjkx winëty myëjwiin'aty tuktujk mil ja tëkëëk mëko'px ja i'px majktëkëëk xajpk pa'apa'a.

²¹Yë'ë nëjkx tjä'ä'aty yë yajkutujkpë ja naax mëti'ipë natëjkëpën ma Judá ja'ayëty ets Benjamín ja'ayëty jyä'ä të yajtuknikääkëtën; mëti'ipë wë'ëmpën ja naax mëti'ipë ja Wintsën të yajtuknipëjktaakën ets mëti'ipë ja kajpn të yajtukniwë'ëmyën. Jä'ä myëjwiin'atëty tuktujk mil ja tëkëëk mëko'px ja i'px majktëkëëk xajpk ets jam nëjkx tsyo'ontä'äky ja kijpxën maatsow ja xëëw pyëtsimyën ets tyimja'tëty ma ja tsëpa'anën mëti'ipë xëëwpëtsëmytsyowën, nyajxë'ëkëty jam xëëwkëtä'äkytsyow ets jya'tëty maatsow ja mejyën. Itkujky nëjkx wyi'imy ja mëti'ipë ja Wintsën të yajtuknikääkën mëët ja tsajptëjk, ëpëky ja Leví ja'ay ja jyä'äjëty ets ja kajpn ja jyä'ä.

²³Ja wiinkpë ja nyaaxëty ja Israel ja'ayëty, ëpa'tkë'ëytsyow jyëjptä'äky. Nitu'ukjaty nëjkx yë Israel ja'ay yajmo'otë, kë'ëk jä'ä: tsyo'onta'akëty ma ja tsëpa'anën mëti'ipë xëëwpëtsëmytsyowën ets tyimja'tëty xëëwkëtä'äkytsyow, jëtu'un nëjkx wyi'imy: Benjamín, Simeón, Isacar, Zabulón ets Gad.

²⁸Ja ëpa'tkë'ëytsyowpë ja naax yajpaatyën ma ja Gad ja jyä'äjën, jam nëjkx kyijpxtsoony Tamar ets nyaxëty ma ja nëë'akëyën Meriba-cades ets ma Egiptë wokën ets jya'tëty jampaat ma ja Mejyën Naax'akujkpyë.

²⁹Ya'atë jëtu'un ja naax kajpn mëti'ipë nëjkx tkuma'ayën'atë ja Israel ja'ayëty ets jëtu'un'äämpy nëjkx xyajwa'kxtë. Ëjts Wintsën, ëjts yam jëtu'un yë ënä'ämën nyäjkpy.

³⁰Nëjkxëp ja naax kajpn yajnapotsy, jä'ä tu'kpa'ajaty y'ayeny'atëty tu'uk mil ja mëkoxk mëko'px xajpk. Ma ja tu'kpa'apën tëkëëk jam yë nyitëjkëtyakn xyaj'oyëtëty, tu'ukjaty nëjkx yajtuknipëjktaakë tu'ukpë ja Israel jyä'äy, jëtu'un nëjkx yajmä'kxy: Ja tëjkëtyakn anëkëjxytsyowpë yë'ë nëjkx tjä'ä'aty yë: Rubén, Judá ets Leví; e xëëwpëtsëmtsyow yë'ë nëjkx tjä'ä'aty yë: José, Benjamín ets Dan; ëpa'tkë'ëytsyow yë'ë nëjkx tjä'ä'aty yë Simeón, Isacar ets Zabulón; e xëëwkëtä'äkytsyow yë'ë nëjkx tjä'ä'aty yë: Gad, Aser ets Neftalí.

³⁵Ja kajpn ja nyapots na'ëwtity jä'ä y'ayeny'atëty tëtujk mil xajpk ets ja naax kajpn jä'ä txëëwajnëty: Yaa yë Wintsën yajpaaty.