Read Biblia Mixe de Quetzaltepec Ezequiel 7 Bible Online

Ezequiel 7 - Biblia Mixe de Quetzaltepec bible

Ezequiel 7

¹Ënät ja Tios ojts xymyëkäjpxyës ets xy'ënëmaayës:

²Ëjts, Wintsën, jëtu'unës n'ënëëmë yë Israel Naax Israel kajpn: Winkoomp ja ëyo'on jotmay, wiinkoonp ja ëyo'on jëna'a ja naaxwiinyëtë kyutëkoyä'änyën.

³Winkoomp ja xëëw jëmëjt jëna'a mijts Israel mkutëkoyä'änyën. Jamës yë n'äkë nkëxkäjxtaja'any ma mijtsën; ntuknikajpxäämpy wi'ixjaty m'ëtë'ëtsy m'ëna'anyën ets ntëytyuna'any jä'ä ko aakyë'ë mtuumpy mëti'ipë ëxëëkën.

⁴Ka'ap mpa'ëyowa'any; yë'ë ntuktëytyunäämpy ko ëxëëk m'ëtë'ëtsy m'ëna'any ets xykyëpätëty mëti'ipë të xytyuuntëkoyën. Jëtu'un xynyijawëtëty ko ëjts Wintsën.

⁵Ëjts, Wintsën, jëtu'unës n'ëna'any: Ix, tää wyinkony ja ëyo'on ets kanaak myiny; wiinkoonp ma mijts mkëxa'any mtuka'anyën.

⁷Winkoomp ma mkutëkoya'antën miitsëty naaxtsënääpyë kajpntsënääpyë; wiinkoonp ma axit ako'owë mjajta'aja'antën. Kukëxëjaanp ja xoontakën; jam kopkkëjxm.

⁸Tyamës yë n'äkë nyajnaxa'any ma miitsëtyën koonëmës nku'uxëtëty, n'amëtoowta'ajäämpy tiijaty të xytyuuntëkoyën ets tu'ukjaty ntukumëtoowa'any.

⁹Ka'ap mpa'ëyowa'any; yë'ëkyëjxm ntëytyuna'any ko ëxëëk të m'ëtë'ëtsy të m'ëna'any ets xykyëpätëty ja m'ëxëëktu'un m'ëxëëk kajpxën. Ets nëjkx xy'ixkaptës ko ëjts miitsëty ntëytyuuntëp.

¹⁰Tyaa ja xëëw. Tëë ja jyä'ty. Tëë myiny ja ëyo'on jotmay. Ja ëxëëkajtën jä'ä mëtakp oymyaajëty, nëkooyë kyëjääjënyë ja ëxëëk tu'unën.

¹¹Winkëxë'knëp ja tsiptuunk ets aak ëxëëktuuntëp ja ja'aynyë. Ma yë'ëjëtyën nitii kya'ëktsowtëjkënë.

¹²Tyam, tëë ja xëëw tpaaty. Ma ja to'kpë yajkpë ka'ap tii t'ëktukxoontaknëty, yë'ëpaat mëti'ipë ajuupyën ka'ap ja mëk'ajtën t'ëkmëët'ajnëty wi'ix myonëty tyukëty. Ëwa'an'ajtën yam mëët ntëytyuna'anyës yë Israel ja'ayëty ko amëj akëjxm nyäyjyawëtë.

¹³Pën tëë ja'ay tii tooky ka'ap nëjkx jëtu'unpë t'ëkpatnë ma jyuuky'ajtënën ets ka'ap nëjkx t'ëkjajnë wi'ix tyajjëjpkëxëtyën ja tyuunk mëti'ipë të tyajtso'ontä'äkyën. Yë ëxëëkja'aytyëjk ka'ap tukjatë jeky jyuuky'atëty.

¹⁴Yë'ë ënaanp ja xuxn, tsip nyi'ënä'ämëp; aak jëjp'ixy y'itë, je'eyëp ko ka'ap pën tsyoony tsiptuunpë, ntëytyunäämpyës yë Israel ja'ay mëët ko amëj akëjxm nyäyjyawëtë.

¹⁵Jap tëja'p tsip jap tuunëp, tëkoty yuu pa'am jap. Mëti'ipë kajpnjoty yajpatëpën tsipjoty y'ooka'antë, e mëti'ipë kamjoty yajpatëpën yuu xëëw, yuu pa'am yaj'ookanëtëp.

¹⁶Wä'än jëtää jam pën kopkkëjxm nyajtskääkëty, tä muuxyën mëti'ipë tsë'ëkëkäkpën; tëkokyë y'o'kta'aja'antë mëët ja nyëë pyokyëty.

¹⁷Aak nyajtstëyëjantëp yë kyë'ëjëty ets aak tsëyuyantëp yë tyekyëty.

¹⁸Nëjkxëp tuktëkëtë ja wit mëti'ipë u'kxpën kuumpën ko ënäty pyëkëtë y'atonëtë; aak tsëtyuytyëp ja jyot nyini'kxëty; tsaptsëm ja wyiin jyëjp jyajta'aja'antë mëët ja tsëtyu'un ets aak kutë'kx nyätyuunta'aja'anëtë.

¹⁹Jëtu'unyë tko'owëtijta'aja'antë tu'ujoty ja poop pujxn mëti'ipë myëët'ajtëpën; tä pu'uxmën t'ixko'owa'antë ja pu'ts pujxn. Oy tjamëët'atëty ja pu'ts pujxn ets ja poop pujxn ka'ap yë'ë yajtso'oka'anëtë ko ënäty ja Wintsën tyukjoot'anpëkëtë. Ka'ap nëjkx myäyëtë wi'ix ja yuu xëëw tyajnaxtëtyën ets ka'ap nëjkx myäyëtë wi'ix ja myox tyaj'utstëtyën, jä'ä ko ja pu'ts pujxn jä'ä ënäty të yajkuka'anaxëtë jap pokyjoty.

²⁰Ko të t'oy'ixtë kë'ëjiits kë'ëjän tääts mëj këjxm të nyäpyëjkta'akëtë ets yë'ë të tuk'oytyuntë ëxëëkpë y'awinaxëty. Paatykyëjxm nyaj'awinpitanëtës yë kyë'ëjän kyë'ëjiitsëty tä pu'uxmën.

²¹Nyajminäämpyës yë ja'ay mëti'ipë wiink naaxwiinyëtë tso'onpën ets myä'tsta'ajëtëty, nyajminäämpyës yë ja'ay mëti'ipë ka'ap pën tsyokyën ets winë pyëjkëtya'ajëtëty ets yaj'awinpitëtëty ëxëëkëm tsaatsyëm.

²²Ëjts näjyëpëkanëpës ma tyaapë kajpnën wä'än t'ixtë pën yaj'ëxë'këtyëp yë ntsajptëjkës, mëti'ipës ijty yu'utsy nyaj'ijtypyën. Minantëp yë ja'ay mëti'ipë ëxëëk ëtë'ëtsan ëna'anantëpën ets tyaj'ëxëëkëtëty yë ntsajptëjkës.

²³Jam xy'ixëty tu'uk yë pujxntejpxy, jä'ä ko ma kajpnën may yë ja'ay mëti'ipë nitujkëpën ko yaja'ay'ooky, ni'ikyë naax kajpn tyuktujknë mëët yë tsiptu'un tsipkajpxën.

²⁴Ëjts nyajminäämpyës yë ja'ay mëti'ipë ëxëëkja'ayëtyën ets yë'ë tjä'ä'atëty yë tëjk mëti'ipë jam ma naax kajpnën. Nyajkëxäämpyës yë myëj'ajt kyëjxm'ajtën yë ja'ayëty mëti'ipë tyam ënä'ämtëpën; nyajkutukäämpyës ets kyutëkooytya'ajëty maajaty t'ëwtatën yë y'awinaxëty.

²⁵Tuktëkëjänëtëp yë tsë'ëkë; y'ixta'ajantëp ja jotkujk'ajtën ets ka'ap tpaata'antë.

²⁶Kanaakjëjp yë ëyo'on myina'any; aak oyo'on aak jotmay yajnikajpxaanp oymyaajëty. Nëkoopë nëjkx t'ixta'atë yë käjpxynyajxpë mëti'ipë nyimëtya'akëpën ja Tios ja y'aaw y'ayuk; ka'ap jyää'ata'any yë teety ets mëjja'aytyëjk mëti'ipë kajpx wijëpën.

²⁷Mon tuk nëjkx nyäxyoxyë yë yajkutujkpë, yë ënä'ämpë näjyëtu'un nëjkx je'eyë tsyë'kënë ets ni'ikyë ja naax kajpn t'ëtsë'ëkëja'any. Jëtu'unës ntuna'any tä winë tuntë tkajpxtën ets jëtu'unës ja nyëë pyoky mpaye'eyä'äny tä tpaye'eytyën ja nyëë pyokyëty. Jëtu'unës xy'ixkaptëty ko ëjts Wintsën.