Read Biblia Mixe de Quetzaltepec Ezequiel 8 Bible Online

Ezequiel 8 - Biblia Mixe de Quetzaltepec bible

Ezequiel 8

¹Ma myëkoxk anyën yë mëtëtujk po'opë, ma tëtujk jëmëjt y'apetyën, jamës ënäty n'u'unyë maas yë ntëjkën mëët yë mëjja'aytyëjkëty mëti'ipë Judá kukajpnajtëpën. Ajotkumonë ojts yë Wintsën tpëjktä'äky yë kyë'ë maas ëjtsën,

²ets të n'ixyës tä ja'ayën. Ëpa'tkë'ëytsyow ma wyëënën jëtu'un kyëxë'ëky jëënën ets jää ma wyëënën anëkëjxytsyow jëtu'un yaj'ixy y'atë'kxy tä tsuxkpujxnën.

³Tëë ja ja'ay ja kyë'ë xynyimëjxajyës ets të tmatsy ja nwaayës. Ënät ja Tios ja myëj'ajtën të xyajpëtë'ëkyës etsës pojjoty të xyajnëjkxy, etsës ja Tios të xytyukwin'ixy xyajnëjkxyës jam Jerusalén, jam të xypyëjktä'äkyës ma yajnitëkën ja naax kajpn, anëkëjxytsyowpë, ma yajpaatyën ja awinax mëti'ipë ëxëëk yë Tios t'ixyën.

⁴Tap ënäty ja myëj'ajt y'oyajtën ja Israel Wintsën, mëti'ipës të n'ëkwin'ixjpën jam joyjotm.

⁵Täätsës të xy'ënëëmë: Jam najts'ixë anëkëjxytsyow. Ënätës të najts'ixë jam anëkëjxmtsow, jam ma yajnitëkën, wiinkonpë ma ja wintsë'këntyakn ja nyitëjk'aawën, jamës të n'ixy ja awinax mëti'ipë ëxëëk ja Tios y'ijxypyën.

⁶Etsës të xy'ënëëmë: ¿M'ijxyp wi'ix ëxëëk y'ëtë'ëtstë y'ëna'antën yë Israel ja'ayëty, mëti'ipës yë ntsajptëjk xytyukmëjëkämkäktëpënë? Ets tyam wiinkpë xy'ixëty mëti'ipë ni'ik ëxëëkën.

⁷Ënätës të xywoownëjkxy ma yajnitëkën ja tsajptëjk tëja'aw. Ma potsyën mëti'ipë ja tsajptëjk tëja'aw nyapots'ajtypyën jamtëm tu'uk yë potsy jut.

⁸Etsës të xy'ënëëmë: Tajwoon tääpë jut. Ënätës të ntajwoony ets të mpaatsës jap tu'uk yë tëjkëtyakn.

⁹Ënätës të xy'ënëëmë: Jap tëkë ets xy'ixëty wi'ix ëxëëk y'ëtë'ëtstën y'ëna'antën.

¹⁰Täätsës jap të ntëkë, etsës të n'ixy ko tëë na'ëwtityë tkooytya'atë ja potsy ets të tkëxkoytyë yë jëyujk mëti'ipë naaxwiinye'epyën, yë jëyujk ka'apë kyutukyëtyën yajtsu'utsëty ets tu'kë'ëyë awinax mëti'ipëjaty yë Israel ja'ay y'ëwtajtëpën.

¹¹Nitëkë'px majk jap yë Israel mëjja'aytyëjk tyaktë yë wintsë'kën, tap yë Jaazanías, yë Safán yë myaank, yë'ë jap y'ëwtajtëp tääpë awinax. Aaktam tkë'ëkë'ë'atë jyëën xijtnëty, yajxon yëkjok jam tjanty pyëjkta'aktë mëët yë poom jok.

¹²Etsës të xy'ënëëmë: ¿Ix wi'ix y'ëtë'ëtstën yë Israel mëjja'aytyëjk yu'utsy me'ty?, aaktam yë y'awinaxëty nitu'ukjaty. Yë'ë jëtu'un yë myäytyë tyajtë ko ëjts ka'apës yowë tii n'ixy, ko tëëjës yë kajpn nja'atyëkooynyë.

¹³Ets ojts jyaak tim y'ënä'äny: Mjaak'ixäämpnyëm yë ni'ik ma'atpë tuntën.

¹⁴Etsës të xywyoownëjkxy ma Wintsën ja tsyajptëjk yajnitëkën, anëkëjxmtsowpë. To'oxytyëjk jam yajpatëp, yë'ë nyijëëy nyiyaxtëp yë tios Tamuz.

¹⁵Ënätës të xy'ënëëmë: ¿Tëë xy'ixyë? Mjaak timy y'ixäämpnyëm ni'ik ma'atpë.

¹⁶Ënätës të xywyoownëjkxy jap tëja'p mëti'ipë tëkotsyow yajpatpën, ma Wintsën yë tsyajptëjk yajnitëkën, itkujky ma tëjkwiinën ets mëët yë wintsë'këntyakn, i'px mëkoxk jap yë ye'etyëjk kyoxtänëtë, japtsow ma jëxkë'ptsow yë tsajptëjk yajpaatyën ma yë'ëjëtyën ets wyinta'ak nyaaxkowtë maatsow yë xëëw pyëtsimyën, xëëw y'ëwtajtëp.

¹⁷Ënätës yë Wintsën të xy'ënëëmë: ¿M'ijxypyë? Ka'ap yë Judá kajpn kyu'uxyë mëët ja ëxëëktu'un ëxëëk kajpxën, tëë ja jëën tsip tyajtëjkëtyä'äy ma ja naax kajpnën. Janaam jatsojk je'eyë ëxëëkjaty tii tuntë etsës xyajjoot'anpëktë ets jyä'ty njëjpjotyës ëxëëk yowë xyuuktë jyoktë.

¹⁸Ëjts ajoot'anës yam winë ntuna'any. Ni pënës nkapa'ëyowa'any. Oy jënu'un xyamëkajpxtëtyës, ka'apës nmëtowa'any.