Read Biblia Mixe de Quetzaltepec Daniel 11 Bible Online

Daniel 11 - Biblia Mixe de Quetzaltepec bible

Daniel 11

¹Ëjts nän ojtsës mputëkë ets ojtsës njotmëk wiinkajpxë ma ënäty ja Darío yajkutujkpë y'ëne'emyën, mëti'ipë Media ja'ayën ma ënäty mëët tu'kjëmëjt kyëjääjë yajkutukyën.

²E tyam yë'ëjës yam nikajpxäämpy tëyajtënpë: Jaaktunantëp jam Persië tëkëëk yë yajkutujkpë, ok wiinkpë tyëkëja'any yajkutujkpë ja mëmajktaxkpë mëti'ipë nëjkx ni'ik kyumeeny'ätyën këtiinëm jyëtu'un'atë ja mëtëkëëkpë. Ko ënäty ja wyit myeeny të yaj'awinpityë mëj'äämpy ets tëë kyëjääjë ja kyutujkën, ënät nëjkx tmëyu'kxëtyä'äy ja naax kajpn ets nëjkx tuknipëjktaakë wi'ix tnitëkëja'any ja Grecië itjot.

³Ok myina'any tu'uk yë yajkutujkpë mëti'ipë je'eyë tsiptunaanpën ets tyajkëjääjëja'any yë kyutujktakn ets jëtu'un winë tuna'any tä tyimjot tyimwinma'anyën.

⁴E ma ënäty të tyajkopkpëkyën ja kyutujktakn, jää nëjkx ja kyutujktakn yaj'ëxwa'any ets taxkpëky nëjkx nyäwyä'kxyë. Yë kutujkën mëti'ipë ënäty myëët'ajtypyën ja yajkutujkpë ka'ap nëjkx ja y'u'unk y'ok t'ëkjä'ä'ajnë ets nän ka'ap nëjkx ja kutujkën mëk y'ëkyajpatnë tä ënäty të pya'tkë'p'atyën, jä'ä nëjkxëp nyäwya'kxënë ets wiinkëtypë ja'ay nëjkx jam y'ënä'ämnë.

⁵Ja yajkutujkpë mëti'ipë ëpa'tkë'ëytsyowën yë'ë nëjkx mëk yajpaaty, je'eyëp ko nän jam tu'uk yë tyuunpë pyëtsëma'any, mëti'ipë tsiptuunpë wintsënën mëti'ipë nëjkx wäänë mëk yajpaatyën këtiinëm jyëtu'unëty yë'ë ets nëjkx tyajkëjääjë ja y'ënä'ämtakn.

⁶Ko ënäty ja xëëw jëmëjt të nyäxy kanaak ënät nëjkx tuntë tu'uk ja käjpxytyu'unën: Yë yajkutujkpë ëpa'tkë'ëytsyowpë nëjkxëp ja nyëëx tyajpëky mëët ja myaank ja yajkutujkpë anëkëjxytsyowpë ets jyää'atëty ja jotkujk'ajtën. Je'eyëp ko ka'ap nëjkx jëtu'un jyäty tä ënäty të tjanipëjktaakëtën, jä'ä ko ja to'oxytyëjk ets ja naaxwiinyëtë ja'ay ja yajkutujkpë ja y'ëna'këty mëti'ipë ënäty të pyëktën ets ja tyuunpëtëjkëty nëjkxëp ja ja'ay yaj'ookëtë.

⁷E tu'uk nëjkx pyëtsimy yë jyiiky myëku'uk, mëti'ipë yajkutujkpën ëpa'tkë'ëytsyow, yë'ëts nëjkx nitëkë ja yajkutujkpë mëti'ipë anëkëjxytsyowën ets nëjkx tjä'äniwa'any ja kutujkëntakn, ja tsyiptuunpëtëjkëty jä'ä nëjkx tkëwent'atë ja naax kajpn.

⁸Ets nëjkx tmënëjkxta'ay jap Egiptë ja tyiosëty, ja y'awinaxëty mëti'ipë oytyunyëtyën mëët yë pujxn win'ëëtypë ets tëkokyë ja mëët ja pu'ts pujxnëty, poop pujxnëty. Nëjkxëp jëtu'un jekytyëkë y'ity ka'ap maa tsip käjpxy.

⁹Yë yajkutujkpë anëkëjxytsyowpë nëjkxëp tjanitëkëja'anëty yë yajkutujkpë ëpa'tkë'ëytsyowpë je'eyëp ko ka'ap nëjkx myëtä'äky.

¹⁰E yë y'u'unk y'ëna'këty yë yajkutujkpë mëti'ipë anëkëjxytsyowën, yë'ë nëjkx tma'kxtë yë jyä'äy mëti'ipë tsiptuntëpën. Ets tu'uk nëjkx tuknipëjktaakë tnitëkëja'anëty ja yajkutujkpë mëti'ipë ëpa'tkë'ëytsyowën ets nëjkx tyajkutëkoy ja naax kajpn tä jeexyë nëëkom të nyäxyën; ets nëjkxëp jatëkok tnitëkë ja naax kajpn jampaat nëjkx jyä'ty ma ja kutujktaknën jampë yajpaatyën ëpa'tkë'ëmtsow.

¹¹Mëët ko ënäty ja yajkutujkpë anëkëjxytsyowpë të tnipëtë'ëky ja yajkutujkpë ëpa'tkë'ëytsyowpë ënät yajxon jyoot'anpëka'any ja yajkutujkpë ëpa'tkë'ëytsyowpë ets nëjkx tmëwinpity ja yajkutujkpë anëkëjxytsyowpë ets nëjkxëp tmëmëtä'äky.

¹²Ko ënäty ja yajkutujkpë ëpa'tkë'ëytsyowpë të myëtä'äky ets ko ënäty may ja myëtsip të tyaj'ooky yë'ë nëjkx mëj këjxm nyätyukyajnaxyë, je'eyëp ko ja kyutujkën ka'ap nëjkx jeky y'ity.

¹³Ja yajkutujkpë mëti'ipë anëkëjxytsyowën nëjkxëp jatëkok twoowmuky ja tsyiptuunpëtëjk jaakwäänë nimay ets tëë ënäty nyäxy tu'kjëmëjt mäjtsk jëmëjtën ko nëjkx tuknipëjktaakë jatëkok tnitëkëja'any ja yajkutujkpë ëpa'tkë'ëytsyowpë ets jaakwäänë mëk nëjkx tukja'ajnëtë.

¹⁴Ko ënäty jëtu'un tyunyë jyätyë, may nëjkx ja ja'ay tukjoot'anpëktë ja yajkutujkpë ëpa'tkë'ëytsyowpë. Tam ja ja'ay nëjkx y'ity mëti'ipë ëxëëk ja jyot wyima'any je'eyëp ko ka'ap nëjkx myëta'aktë, jëtu'un nëjkx y'atëy ja mëti'ipës ënäty të n'a'ijxnaxyën.

¹⁵Ja yajkutujkpë anëkëjxytsyowpë nëjkxëp ja naax kajpn tyajnatuky ets nëjkx t'oytyuny ja wa'kpäjn ma ja kajpn pa'ajën ets tjëkyäpëty wi'ix tyëkëtëtyën jap kajpnjoty ets nëjkxëp tmëmëtä'äky. Oy ënäty jap kajpnjoty jyajap'atë ja oyëtypë ja tsiptuunpëtëjk ka'ap nëjkx myäyëtë tkuwa'antëty ja nyaax kyajpn.

¹⁶Ja mëtsip nëjkxëp winë tuntë ijxtëm ja tyimjot tyimwinma'anyëtyën, ni pën nëjkx kyamayë wyinkuwa'akëtëty, yë'ë nëjkx jam wyi'im ma ja naax kajpnën oypyë tsujpë ets wa'ats tyajkutëkooytya'aja'any winë ma ënäty nyäxyën.

¹⁷Nëjkxëp näjyëtu'un tuknipëjktaakë wi'ix tjä'ä'ajta'aja'anyën ja naax kam ëpa'tkë'ëytsyowpë; ets yë'ë nëjkx wyinma'anypyääty ko tyajpëka'any yë nyëëx mëët yë myaank yë yajkutujkpë ëpa'tkë'ëytsyowpë ets tpëjkëtya'aja'any yë kyutujktakn, je'eyëp ko ka'ap nëjkx oy wyimpëtsëmy jyëjpëtsëmy.

¹⁸Nëjkxëp tnitëkë yë naax kajpn mëti'ipë mejypyë'aay yajpatëpën ets may nëjkx tyajkutëkoy; e tu'uk yë tsiptuunpë wintsën nëjkx tyajjëjpkëxy ya'atë tsëtyu'un ets nëjkx tyajtsëtyu'unpaaty näjyëtu'un ja yajkutujkpë anëkëjxytsyowpë.

¹⁹Nëjkxëp ja yajkutujkpë anëkëjxytsyowpë jam tsyo'onë ets niwinpitëty ma ënäty të tsyoonyën; je'eyëp ko ëyo'onjoty nëjkx kyuye'eyë ets ja jyuukyajtën yajpëkëty, ka'ap nëjkx nijëna'a y'ëkyaja'amyäjtsnë.

²⁰Wiink yajkutujkpë nëjkx kyutëkëty ets nëjkx tu'uk ja'ay tuknipëky mëti'ipë yajmeenymyukëpën, ok nëjkx ja'ay yaj'ookyë, je'eyëp ko ka'ap jyamëty tsipjotm.

²¹Ma yë'ëjën yë'ë nëjkx jam yajkutuky ja'ay mëti'ipë ëxëëk ja'ay y'ixyën, mëti'ipë ka'ap jyapaatë'atyën jeexyë yajkutuky, yu'utsy nëjkx tmëët'aty ja jyot wyinma'any ets mëët ja win'ë'ënën antakën nëjkx tpaaty yajkutujktakn.

²²Yajkutëkooytya'ajäämpy ja kutujkën mëti'ipë ënäty ëwa'ktujkëpën ets yaj'ookäämpy ja mëti'ipë ja käjpxytyu'unën nyikopk'ajtypyën.

²³Wyin'ëënäämpy mëti'ipë ënäty mëët ja käjpxytyu'unën të tunyën, oy ënäty nyiwäänëty ja jyä'äy yë'ë mëta'akaanp ja je'eyëm.

²⁴Ma ënäty ka'ap yë'ë yajmëmay yajmëtajyën jää nëjkx tnitëkëtyä'äy ja naax kam mëti'ipë jë'kxynyaaxën ets tuna'any ja mëti'ipë ka'ap nijëna'a ja yajkutujkpëtëjk tuntënëm mëti'ipë y'ap'ajtyp y'ok'ajtypyën:

²⁵Mëët ko ënäty tmëët'aty ja kutujkën ets ja mëk'ajtën, ënät nëjkx tuknipëjktaakë tnitëkëja'any ja yajkutujkpë ëpa'tkë'ëytsyowpë mëët ja mayjyä'äy tsiptuunpëtëjkëty. Ja yajkutujkpë ëpa'tkë'ëytsyowpë näjyëtu'un nëjkx y'ëtsoowinpity amëk jotmëk ko oy tsyiptuntëty ets nëjkx näjyëtu'un tuknipëjktaakë ets may ja tsyiptuunpëtëjk tyajmukëty; je'eyëp ko nëjkxëp yajwin'ëëny ets ka'ap nëjkx y'ëkyajmëtakënë ja myëtsip.

²⁶Ja ja'ayëty mëti'ipë ënäty yajkääpy yaj'ukpyën ma kyääypyäjnën, yë'ë nëjkx ëxëëk yajjatyë, jä'ä ko ja tsyiptuunpëtëjk ka'ap nëjkx myëta'aktë may y'ooka'antë.

²⁷Ënät ja yajkutujkpëtëjk, ja winma'any tpaata'antë wi'ix myëta'aktëtyën ets nëjkx tu'ukyë kyääymyuktë ma ja kaaypyäjnën, nixim niyam nëjkx jyanäwyin'ëëna'anëtë je'eyëp ni pën nëjkx kyayajwin'ëëny jä'ä ko ka'ap tpaatynyëm jëtu'un ja nyixëëw.

²⁸Ja yajkutujkpë anëkëjxytsyowpë nëjkxëp jatëkok wyimpity ma ja nyaax kyajpnën ets tmënëjkxta'aja'any mëti'ipë ënäty të tpaatyën ma tnitëkën ja naax kajpn ets mëtsip y'awinpita'any ma ja käjpxytyu'unënën wa'atspë; nëjkxëp ja wyinma'any tukpëtsëmy ets nëjkx jatëkok wyimpijtkojnë ma nyaax kyajpnën.

²⁹Ko ënäty tpaaty ja xëëw jëmëjt ma të tuknipëjktaakën, ënät nëjkx jatëkok tkexy ja tsyiptuunpëtëjk ëpa'tkë'ëytsyow; je'eyëp ko yë'ë ka'ap nëjkx y'ëkmëtaknë tä ënäty të myëtä'äkyën mëjëyëjp.

³⁰Yë tsyiptuunpëtëjk yë'ë nëjkx wyinkuwa'akëty yë ja'ayëty mëti'ipë tso'ontëpën maatsow yë xëëw kyëtä'äkyën, kepytyëjk nëëwinye'epyëjoty nëjkx nyiminyë ets mëët yë tsë'ëkë nëjkx tyäty kyä'äktë. Ënät nëjkx ja yajkutujkpë anëkëjxytsyowpë tukjoot'anpëky ja käjpxytyu'unën wa'atspë, yë'ë nëjkx tkajpxpäjtën'aty ko ënäty ja ja'ayëty të kyamëjwa'kpetyë mëti'ipë myëjpëjktaktëpën ja käjpxytyu'unën.

³¹Yë tsyiptuunpëtëjkëty nëjkxëp tyaj'ëxëëkëtë ja tsajptëjk mëti'ipë ta'tspëkpyë, nëjkxëp t'akajpxtuktë këtiipë pën tyakëty ja wyintsë'kën jëpom jëpompë yajyäkyën ets nëjkx jam tpëjkta'aktë ja nëkooyëpë y'ëxëëk'ajnën ets mya'at'ajnën ma ja wintsë'këntyaknën.

³²Yë yajkutujkpë yajjotukäämpy ja ja'ayëty mëët ja oy aaw oy ayuk mëti'ipë ka'ap tmëjpëjkta'aktën ja käjpxytyu'unën, je'eyëp ko ja Tios ja nyaax kyajpn ka'ap nëjkx nyäkyë'ëyäkyë ma ënäty të jyayajtsuu'ixa'antën.

³³Yë wijyjyä'äytyëjkëty mëti'ipë yajpatëpën ma naax kajpnën nëjkxëp mayjyä'äy tyaj'ijxpëktë, ok nëjkx yaj'ookëtë ets nyino'oka'anëtë ets myä'tsta'aja'anëtë ets nëjkx tyookëtë wiink naax wiink kajpn ets y'ëyowtëty myëtuntëty. Je'eyëp wäänë jëtu'un y'ita'any.

³⁴Ko ënäty tpaaty ja xëëw jëmëjt jëna'a yaj'ixjëtit yajpajëtitëtyën, nëjkxëp wäänë yajputëkëtë, oy nëjkx may ja ja'ay jyapuwa'akëtë je'eyëp ko ka'ap wyinë aaw wyinë jotëty.

³⁵Nëjkxëp näjyëtu'un yaj'ixjëtit yajpaajëtitë ja ja'ayëty mëti'ipë ënäty ja naax kajpn të tyaj'ijxpëktën ets nëjkx yajwinma'any'ixtë ets yaj'ixtëty pën oy ja wyinma'anyëty; ets ja jyuuky'ajtënëty, koonëm kyukëxëty ja xëëw juukyajtën.

³⁶Ja yajkutujkpë ja anëkëjxytsyowpë. Mëj këjxm nëjkx ni'ik nyäyajnaxyë këtiinëm ja tiostëjkëty ets nëjkx nëkooyë tni'ojënë ja Tios mëtëypyë; ets aak'oy nëjkx winë wyimpëtsë'ëmxëty, koonëm nëjkx ja Tios tyuknikexyë ja tëytyu'unën; jä'ä ko mëti'ipë yë Tios të tuknipëjktaakën tyunäämpy yë'ë.

³⁷Ya'atë yajkutujkpë ka'ap nëjkx tmëjpëjktä'äky ja Tios mëti'ipë y'aptëjk y'ëwtajtën ets ni yë'ë nëjkx tkamëjpëjktä'äky ja tios mëti'ipë ja to'oxytyëjktëjk y'ëwtajtëpën ets mëti'ipë tios nëjkx tkamëj'ixy, jä'ä ko yë'ë mëj nëjkx ni'ik nyäyajnaxyë këtiinëm jyëtu'un'atë ja tiostëjkëty.

³⁸Je'eyëp tëy ko yë'ë nëjkxëp ja tios t'ëwtaty mëti'ipë nyitios'ajtypyën ja naax kajpn ta'tspëkpyë ets napotsypë; yë'ë nëjkx ya'atë tios t'ëwtaty mëti'ipë ja y'aptëjk ka'ap t'ëwtajtën ets nëjkx tukwintsë'ëkë yë pu'ts pujxn, poop pujxn, oyëtypë tsaa ets mëti'ipë tsowëtyën.

³⁹Yë'ë nëjkx tukuwa'any ja naax kajpn këwent'atyëtypë ets ta'tspëkpyë ja ja'ayëty mëti'ipë y'ëwtajtëpën wiink tios; ets pënjaty y'ëwtajtëpën ya'atë yajkutujkpë nëjkxëp kanaak winë tmo'oy, nëjkxëp tyuunk oyëtypë tmo'oy ets nyaax kyamëty näjyëtu'un tmo'oja'any ets yë'ë tkuma'ayën'atëty.

⁴⁰Ko ënäty tpaaty ja xëëw jëmëjt ma ja jëtu'unpë kyukëxëja'anyën, ja yajkutujkpë ëpa'tkë'ëytsyowpë jää nëjkx tnipëtë'ëky ja yajkutujkpë anëkëjxytsyowpë; je'eyëp ko yë'ë ënätyë näjyëtu'un jyëjpkuwa'akëja'anyë ets tyukja'ta'anyë jëtu'un tä myëkpojyën ets ëxëëk tuna'any ja ëpa'tkë'ëytsyowpë, jëtu'un tukja'ta'any mëët ja pyujxnwintëkäämpë ets ja tsyiptuunpëtëjk tä nëëkomën.

⁴¹Nyitëkëjäämpy näjyëtu'un ja naax kajpn oypyë tsujpë ets may ja ja'ay jam tyaj'ooka'any; yë Edom ja'ayëty, yë Moab ja'ayëty ets Amón ja'ayëty nëjkxëp may tsyo'oktë.

⁴²Yë'ë nëjkx tjä'ä'atë may yë naax kajpn, yë'ëpaat yë Egiptë kajpn nëjkx y'apatnaxyë.

⁴³Yajnëjkxta'ajäämpy yë pu'ts pujxn ets poop pujxn ets tëkokyë winë mëti'ipë tsowëtyën japë Egiptë ënäty yajpaatyën; ok näjyëtu'un yë Libië ets Etiopíë yajtukja'ta'any.

⁴⁴E ok nëjkx yajtuk'ëwaanë ko ënäty nyipëtë'ëka'anyë ja yajkutujkpë anëkëjxytsyowpë ets ja xëëwkëtä'äky tsyowpë ets nëjkx tsipwinkajpxëtë; ets tsyona'any mëët ja joot'an ets mëët ja winma'any ko tyaj'ooka'any ja mayjyä'äy.

⁴⁵Jam nëjkx nyäpyëjktä'äkyë itkujky ma ja mejyën mëët nyäpyäätyë ja kopk wa'atspë ets oypyë tsujpë. Je'eyëp ko tëë ënäty tyukja'tyë ja xëëw jëmëjt ma y'ookanën ets jämyë nëjkx y'ooky ets ka'ap ni pën maa y'ëknimëtyakënë.