Read Biblia Mixe de Quetzaltepec Daniel 5 Bible Online

Daniel 5 - Biblia Mixe de Quetzaltepec bible

Daniel 5

¹Ënät yë Belsasar tnipëjktakëy tu'uk ja ka'ayën ukën ets twoomujktaay yë wintsëntëjk mëj'äämpyëtypë y'itën mëti'ipë jamëtyën Babilonyë; yajxon ojts kom y'uknëtë ma ja ka'ayën ukën y'ijtyën.

²E ja yajkutujkpë tëë yajxon kom y'uuky, ënät ni'ënä'ämëy ets tyajmiinta'atëty ja a'ukën mëti'ipë pu'ts pujxn mëët y'oytyunyëtyën ets tyajmintëty texy mëti'ipë näjyëtu'un aak pu'ts pujxn mëët y'oytyunyëtyën, aakjä'ä mëti'ipë tyeety Nabucodonosor ënäty jam të tmëtsoonyën Jerusalén ma ja tsajptëjkën. Tääts tu'ktä'ämëtyääytyë ja tsim texy aak pu'ts pujxn mëëtpë ets yë'ë tuk'ukëtyë ets tuktojkxëtyë ja yajkutujkpë ets tëkokyë ja wintsëntëjkëty yä'äypyë to'oxypyë mëti'ipë ënäty të yajwoowmuktën.

⁴Aak uktaaytyë ja ja'ayëty ets këëkjä'ä tjanty y'ëwtatë ja y'awinaxëty, mëti'ipë oytyunyëtën mëët ja pu'ts pujxn, poop pujxn, tsuxkpujxn, juunpujxn, mëët yë tsaa ets kepy.

⁵Tam ënäty mëkujk kyäytyë y'uuktë ko jam potsywinm yajmëj'ijxpejty tu'uk yë jëën ets yaj'ixy tu'uk yë kë'ë jyä'äy jam potsywinm, jap tëkoty ma ja ja'ay pyo'kxtën, poop ja potsy yaj'ixy. Ko ja yajkutujkpë t'ijxy ja kë'ë jyä'äy,

⁶ënät tsyuxkëtyääy ets ja tsë'ëkë tyuktëjkëyë ets tyëjkëy tsëyuupë tu'kkuuytyänë.

⁷Tääts mëk tyëjkëy yaxpë jojkpë ets tmëkajpxmujktaay ja nyasja'apëtëjk, ja wyijyjyä'äytyëjk ets ja xyëëwmääpyëtëjk mëti'ipë jam Babilonyë yajpatëpën ets t'ënëmaay: Pën yajniwijpy xiipë këxja'ay yajpaatyën ets pën xytyukmëmëtyakpës wi'ix y'ënä'änyën, yë'ë yajtukxoxëp yë tsapts yëk wit ets yajtukyo'kwitsëty yë pu'ts pujxn jo'oky ets yë'ë nëjkx y'ity ënä'ämpë ma ja mëtëkëëkpë ja ënä'ämpën ëpa'tkë'ëytsyowpë yajpaatyën.

⁸Ënät jap tëkoty tyëjkëtyääytyë ja wijyjyä'äytyëjkëty, je'eyëp ko ka'ap ojts pën twinjawë wi'ix y'ënä'änyën ja mëti'ipë jam ijtpën këxja'ay ets ka'ap ojts pën myäyë wi'ix tukmëmëtya'akëtyën ja yajkutujkpë.

⁹Ni'ikyë jyänty tsyë'këtyäky ja Belsasar yajkutujkpë, tsuxkëm ja wyiin jyëjp jya'ajtaay. Ja wintsëntëjkëty mëti'ipë ënäty jam yajpatëpën ka'ap t'ëknija'awënëtë tii tyuunta'aktëpën,

¹⁰e ja to'oxytyëjk yajkutujkpë, mëti'ipë taak'ajtpën, ko tmëtoowpaty ja yajkutujkpë yä'äxy jyoky jap tëkoty mëët ja wintsëntëjkëty mëti'ipë ënäty të yajwoowmuktën kääpyë ukpë, ënät tyëjkëy jap tëkoty ets y'ënäny: Xëmë juuky'ajtp yë yajkutujkpë. Ets këtii nëkoo mmay mtajy ets këtii mnäy'ëtsë'ëkëty,

¹¹ma kutujkëntaknën tam tu'uk yë ja'ay yajpaaty mëti'ipë tu'uwinye'eyëpën yë Wintsën yë myëj'ajtën y'oyajtën. Ko ijty yë'ë ja mteety kyutujkpë'aty tääpë ja'ay ojts tyaj'ixyë wi'ix wyijyëtyën ets wi'ix y'ijxpëkyëtyën, jëtu'un yaj'ijxy tiosën. Paaty yë Nabucodonosor yajkutujkpë ojts yë'ë tpëjktä'äky ets tniwintsën'atëty yë wijyjyä'äytyëjk, najtsja'apëtëjk, ijxpëkytyëjk ets xëëwmyääpyëtëjk mëti'ipë yajpatëpën ma Babilonyë naaxwiinyëtë tnitänën,

¹²yë Daniel mëti'ipë yë mteety tyijën Belsasar, myëët'ajtyp ijty winma'any mëjwiin këjää ets nëkooyë wyij'ajnë, y'ijxpëky'ajnë ets nyija'ap wi'ix tyajniwijëtyën yë kuma'ay, nyija'ap wi'ix tkapxtë'kxëtën mëti'ipë tsipën ets yu'utsy ijtpën, oy yë'ëjëty amay jotmay këjääjëtypë. Yë'ë mëkajpx wä'än tminy ets mtuknijawëtëty wi'ix nyiwijyën tääpë këxja'ay y'ityën potsywyiiny.

¹³Ënät ja Daniel ojts yajwoownëjkxy ma ja yajkutujkpën ets yajtëëwë: ¿Mijtsën mxëëwajtypë Daniel, mëti'ipë tsumy matsy yë nteetyës Nabucodonosor yajtso'onëm jam Judäjë?

¹⁴Tëës nyajtuk'ëwaanë ko mijts mëët'ajtyp yë Tios yë kyënu'kxy pyoj ets mwijy ets m'ijxpëky.

¹⁵E oy, yë wijyjyä'äytyëjkëty mëti'ipë yajpatëpën ma Babilonyë y'itjotmën tëë jyamintë yaa ets tjakajpxa'antë mëti'ipë xim ijtpën potsywinm këxja'ay, ka'ap të myäyëtë wi'ix tyajniwijtëtyën ets ka'ap tja'akyukëtë.

¹⁶E tëëtsës nmëtoy'äty, ko mijts mkajpxtë'kxyp winma'any mëti'ipë tsipën. Pën mijts maayëp xykyajpxëty xiipë këxja'ay y'ityën ets pën xytyuk'ëwa'anëtëpës wi'ix nyiwijyën, myajtukxoxëp yë tsapts yëk wit ets myajtukyo'ktëyëp yë pu'ts pujxn yo'kjän ets nëjkxëp myajtuknipëky ets mijts m'ënä'ämëty ma ja ënä'ämtäknën mëtëkëëkpë nyäxymyëtyën.

¹⁷Ënät ja Daniel t'ëtsooy ja yajkutujkpë: Ëk'ix mijts yajkutujkpë, mëwë'ëm tääpë xynyamo'oja'anyënës, mo'o wiinkpë ja'ay mëti'ipë tunëpën ma mkutujktaknën. Ëjts tyamës n'ëna'any ko ntukmëmëtya'aka'any wi'ix nyiwijyën mëti'ipë jam potsywinm ijtpën këxja'ay.

¹⁸Yë Tios Ni'ik yë'ë yajk yë kutujkëntakn ets mëj'ajtën, mëj'ajt oyajtën ets näyajmëjnaxë ma mteetyën Nabucodonosor.

¹⁹Mëët ja kutujkën mëti'ipë yë Tios mmooyën, ojts yë ja'ay myintë ma yë'ëjën wiink naax wiink kajpnëpë tsyoontën ets mëk twinkutsë'këtyë. Ets yë'ë yaj'o'ky ëkë yajjuuky'äjtyp ijty mëti'ipë yë'ë tsyojkën'ajtypyën; ojts tyajwinpety mëti'ipë y'a'ijxëyën ets ojts tyajnaaxkëtä'äky mëti'ipë näjyëtu'un y'a'ijxëyën.

²⁰E ko ojts tyuktëkëty ja nämyëjjaw näjyääntyjyawë, tääts winë wiinkjaty tuuny, yë'ëts ojts yajtëkoyë, tääts yajpëjkëy ja kyutujktakn ets ja myëj'ajt y'oyajtën mëti'ipë ënäty myëët'ajtypyën ma yajkutukyën.

²¹Yajjëëwijt jam ma ja ja'ayëtyën ets jëtu'un y'awinpijty aayjëyujk ujtsjëyujkën; ojts mëët tsyënaaymyuky yë krukts ets tsajpkaa ets aayjëyujk ujtsjëyujk ëwa'anëtypë, ojts ja jyot nyini'kx nyimaaniky, koonëm t'ijxpaty yë Tios Ni'ik këjxmëpë, mëti'ipë myëët'ajtypyën yë kutujkën ets mëk'ajtën ma naaxwiinyëtë ja'ayëtyën ets ko yë'ë myoopy ja kutujkën ja ja'ay mëti'ipë yë'ë y'a'ijxëpën.

²²E tyam, mijts Belsasar yajkutujkpë, ja myaank ja mëti'ipë yam ntukmëmëtyäkpyën; mijts nän najëtu'un yaj'ixy kyëjääjë xyajtso'ontä'äky yë mjuukyajtën, amëj akëjxm yaj'ixy mja'ay'äty.

²³Mijts, je'eyë xynyëxi'iky xytyukxi'iky yë Wintsën tsajpjotmëpë yajpaatyën, tëë xynyikäxë ja tsim texy mëti'ipë aak pu'ts pujxn mëët y'oytyunyëtyën jampë ijty yajpaatyën ma tsajptëjkën ets jap yë m'uuky të xy'atämëtë ets të xy'ëwtatë ja wiinkëtypë ja tios mëti'ipë oytyunyën mëët yë pu'ts pujxn, poop pujxn, tsuxkpujxn, juunpujxn ets kepy tsaa; tios ka'apë myëtowtën ets ka'apë tii tnijawëtën. E ka'ap ja Tios të xywyinkutsë'ëkë mijts yajkutujkpë mëti'ipë myajjuuky'ajtëpën ets mëti'ipë mtuktuunëpën winë.

²⁴Paaty të tkexy ja kë'ë mëti'ipë të tja'ayën ya'atë ayuk,

²⁵MENÉ, MENÉ, TEKEL ETS PARSÍN,

²⁶mëti'ipë niwijpën: MENÉ: Tios mëtyoy tyaj'ijnë yë xëëw jënu'un myajkutuka'anyën ets tëë t'awitsy mapaat jyëjpkëxëtyën;

²⁷TEKEL: Yë yajkutujkpë tëë yaj'akijpxnaxy ma kijpxnën mëti'ipë tëëykyijpxpën ets to'tsyky të pyëtsimy;

²⁸PARSÍN: Yë yajkutujkpë kyutujkën tëë mäjtskpëky nyäwyä'kxyë, tu'kpëky yë'ë jyä'ä'atantëp yë Medos ja'ayëty ets Persas ja'ayës.

²⁹Ënätyë ja Belsasar yajkutujkpë ni'ënä'ämëy ets ja Daniel yajtukxoxëty ja wit tsaptsëtypë ets yajtukyo'ktëyëty ja pu'ts pujxn yo'kjän ets tuk'ëwa'anëtyääy ja mayjyä'äy ko ja Daniel jä'ä najxp yajkutujkpë ma mëtëkëëkpë ja kutujktaknën.

³⁰Jä'ä tsu'um ja Belsasar yajkutujkpë tyaj'o'ktë, mëti'ipë ënäty jam yajkutujkpën ma Caldeo ja'ayëtyën,

³¹ets Darío, Media ja'ayën yë'ë ojts tyëkë yajkutujkpë. Jä'ä ënäty yë Darío jyëmëjt tëkë'px mäjtsk.