Read Biblia Mixe de Quetzaltepec Daniel 8 Bible Online

Daniel 8 - Biblia Mixe de Quetzaltepec bible

Daniel 8

¹Ma ënäty mëtëkëëk jëmëjt y'ëne'emyën yë Belsasar, ëjts Daniel, ojts nwinkuma'ay, ëpëky mëti'ipës ënäty të n'ëk wiinkumaapën.

²Maas ënäty jam nwinkuma'ayën, jamës näywyin'ixë ma ja Susa kajpnën, ma ja kutujktakn yajpaatyën, yë'ë y'itjot yë Elám, Ulai nëëpë'aay.

³Jëkämës n'ixy, tu'uk yë kupixyny ayääkë jam nëëpë'am. Mäjtsk yë wyaj tmëëtëty, ok ënäty tu'uk të myuxy je'eyëp jaakyeny ets ja kon ja myëku'uk.

⁴Të n'ixyës ko ja kupixyny ayääkë jamtsow ja wyaj tnajtstijë maatsow yë xëëw pyëtsimyën, ënëkëjxytsyow ets ëpa'tkë'ëytsyow ets nitu'uk ja jëyujk kyawinkuwa'akëty ets nitu'uk kyanäy'a'ixëty mëët tsyiptunëty. Jëtu'un tä

⁵Yë'ëjës ënäty jam nmëmääpy nmëtäjpynyëm mëti'ipës ënäty të n'ixyën, ko tu'uk të myiny yë tsajppax maatsow yë xëëw pyëtsimyën, pëyi'ikyë myiny jëtu'un yaj'ixy pojjoty yowë pyëyi'iky. Tyaapë tsajppax tam tu'ukyë wyaj tmëëtëty ma wyimpokën,

⁶ko jyä'ty ma ja kupixyny ayääkën, mëti'ipës ënäty të n'ixyën jam nëëpë'am, jëtu'unyë të tkä'äpë'ëky mëët ja wyaj amëjaaw

⁷ets të tëjë mäjtskëty ja wyaj, ka kupixyny ka'ap të t'ëkjëkyäjpnë wi'ix nyäkyuwa'anëtëty. Ok ja tsajppax të tyajkëtay ja kupixyny ets të tnäjpminy të tnäjpxëpy, ni pën të kyaminy ets jeexyë të tyajtso'oky ja kupixyny.

⁸Ja tsajppax ni'ikyë ja yaj'ixy myëktä'äky, e ma ënäty yajxon të myëjaawtëkën, ënät të tyijy ja mëjpë ja wyaj ets të pyëtsimy taxk wiinkpë ja wyaj tu'uk nyas'ixë xëëwpëtsëmtsyow, tu'uk xëëwkëtä'äkytsyow, tu'uk anëkëjxytsyow ets tu'uk ëpa'tkë'ëytsyow.

⁹Ma tu'ukën tëë wiinkpë jam pyëtsimy mutskpë, ojts yeeky ets jamtsow të nyasyääkë ëpa'tkë'ëmtsow, maatsow xëëw pyëtsimyën ets maatsow ja it naaxwiinyëtë wyi'imyën ja oypyë tsujpë.

¹⁰Nëkooyë ojts yä'knë, jampaat jyä'äjty ma ja tsiptuunpëtëjkëtyën mëti'ipë jam tsajpjotm yajpatëpën ets ojts may tyajka'ay tä jeexyë mëtsa'a kyuka'anaxyën ets t'ate'eny tukte'eny,

¹¹ojts tsipwinkajpxë ja mëti'ipë nyiwintsën'ajtypyën ja tsiptuunpëtëjk; ojts may tyaj'atëkoy ja wintsë'kën jëpom jëpompë yajyäkyën ets ojts tyaj'ëxëëkë ja tsajptëjk.

¹²Mëët ja ëxëëk winma'any ojts jam tyajnaaxkëtä'äky ja tsyiptuunpëtëjk ma ja wintsë'kën yajyäkyën ets tyajma'ty ja tëyajtën. Ojts tuunta'ay winë ijxtëm ënäty tyimjot tyimwinma'any ets ojts winë oy wyimpëtsë'ëmta'ayxyëty.

¹³Ënätës të nmëtoy ko tu'uk tsajpjotmëtë kukäjpxy tyajtëy ja myëku'uk: ¿Jëna'a jyëjpkëxa'any ya'atë mëti'ipë yaj'ijxpën ma wintsë'këntyaknën ma yajyäkyën winjëpom yë wintsë'kën? ¿Jëna'apaat pyo'oxa'any yë nëë poky ma Wintsën yë tsyajptëjkën ets mëpëjkpëtëjkëty, ets je'eyë yaj'atään yajtuktäänëty?

¹⁴Ets yajmëtooy ja ëtsoowinpijtën: Jääpaat ma ënäty kyä'pxyën mäjtsk mil ja tëkëëk mëko'px ux ets jopy. Ko ënäty kyä'pxy tääts nëjkx wyä'ätsy yë tsajptëjk.

¹⁵E ëjts jä'äs ënäty jam nmëmääpy nmëtäjpy wi'ixës jam nwinkuma'ayën ets njaja'aykyukëja'anyës tiitën jyatijäämpy, ko tu'uk të n'ixyës pyëtsimy ja'ayën yaj'ixy ets të wyinkuwa'akës,

¹⁶etsës të nmëtoy kyäjpxy ja'ayën jap ma Ulai mëjnëëjën, jëtu'un y'ënä'äny: Gabriel tukmëmëtya'ak ya'atë ja'ay wi'ix nyiwijyën yë wyinkuma'ay.

¹⁷Ënätës të xymyëwinkony, e ëjts tëëjës ntsë'ëkë ets nwintä'äky të naaxkoyës, koonëmës yë nwinpok ntukpaaty yë naax, e yë'ë jëtu'unës të xy'ënëëmë: Mijts nääxwiinyëtë ja'ay, yë'ë mnijawëp ko ya'atë xy'ixyën yë'ë nyikäjpxyp wi'ix kyukëxëja'anyën yë xëëw juukyajtën.

¹⁸Tamës ënäty xymyëmëtyä'äky koos të nkëtay etsës jëtu'unyë të njëpijptëy naaxkëjxy; e yë'ë ënätyë të xykyë'ënixajyës, etsës të xywyijtsë'ëky,

¹⁹ets të xy'ënëëmës: Yë'ë yam ntukmëmëtya'akäämpy tii tunan jatanëpën ko ënäty ja Wintsën tëë tuknipëjktaakë ko ja tsyip y'äkë tyajnaxa'any, tääpë xywin'ixyën yë'ë nyikäjpxy wi'ix yë juukyajtën kyukëxëja'anyën.

²⁰Yë tsajppax mëti'ipë të yaj'ijxpën ko mäjtsk yë wyaj yë'ë y'antijpy yë yajkutujkpëtëjk mëti'ipë Media ja'ayën ets Persë ja'ayën.

²¹Yë tsajppax yë'ë y'antijpy yë Grecië yajkutujkpë, e yë wyaj mëjpë kyëxë'ëkyën wyimpoktuuy yë'ë yë yajkutujkpë mëti'ipë ënä'ämaanpën.

²²Ja taxkpë ja waj mëti'ipë të pyëtsimyën ko ja mëët tu'ukpë të tyijy, yë'ë y'antijpy ko taxk yë yajkutujkpë jyaak ita'any ma ja kajpnën, je'eyëp ko ka'ap jëtu'un mëj'äämpy y'ita'antë tä ja mëjëyëjpën.

²³Ko ya'atë yajkutujkpëtëjk nëjkx mëj'äämpy y'ijnëtë ma ja naaxwiinyëtën ets ënäty ja nëë poky myëjënyë kyëjääjënë, tu'uk nëjkx yë yajkutujkpë pyëtsimy mëti'ipë nëjkx amëj akëjxm jyä'äy'ätyën ets wijy këpety nëjkx nyäyajnaxyë.

²⁴Mëk nëjkx yajpaaty, je'eyëp ka'ap nëjkx kë'ëm myëk'aty; nëjkxëp tyajkutëkoy yë naax kajpn ets nëjkxëp myëtä'äky oymyaajëty. Nëjkxëp tyajtëkoy yë mëti'ipë ënäty amëk jotmukën ets may yë Tios yë nyaax kyajpn nëjkx tyajkutëkooyë.

²⁵Mëët yë kyëpety winma'any, yë'ë nëjkx tukmëtä'äky antakën. Amëj akëjxm nëjkx nyäjyawëty ets may nëjkx ja'ay tyaj'ooky mëti'ipë ënäty jotkujk yajpatëpën, jä'ä ko awin'ë'ënën nëjkx ja'ay tyaj'ooky. Nëjkxëp mëët tsyiptuny mëti'ipë nyikopk'ajtypyën yë yajkutujkpëtëjk, je'eyëp jää ka'ap nëjkx y'ëkmëtaknë.

²⁶Ko të xywyin'ixy ja jopy'ajtën ets ja jënäkyxyëëwajtën tëë ja myajtuknijawë tii y'antijpyën ets tëy jaanty yë'ë; je'eyë ko mijts yu'utsy xymyëët'atëty, jä'ä ko yë'ë jää nëjkx y'atëy ko ënäty tëë nyäxy ja xëëw jëmëjt kanaak.

²⁷Ëjts Daniel, jëtu'unës të näjyawëty xejy tyujkpës yowë ets kanaak xëëwës të nmëko'knë pa'am mëët. Okës të niwijy ets jatëkok të ntuuntëkës ma ja yajkutujkpë ja kyutujktaknën. Je'eyëp mëk nmëmay nmëtajyës ja nkuma'ayës mëti'ipës ënäty të nwin'ixyën, jä'ä ko ka'apës ënäty oy nwinjawë wi'ixës jyaniwija'anyën.