Read Biblia Mixe de Quetzaltepec Oseas 10 Bible Online

Oseas 10 - Biblia Mixe de Quetzaltepec bible

Oseas 10

¹Jëtu'un yë Israel kajpn nyäxy tä tu'uk yë tsatym kyepyën; ko may ja tyëëm tpëjktä'äky, may näjyëtu'un t'oytyuny ja wyintsë'këntyakn; ko ja nyaax kyajpn ijty y'oyë, nän oy ja y'awinax t'oytyuny mëti'ipë kënu'kxy yajnajxypyën.

²Mäjtsk yë Israel yë jyuukyjot të nyäwyä'kxyë, tyam kyëpätäämpy ja nyëë pyoky. Yë Wintsën yajkutëkoyäämpy yë wintsë'këntyakn ets jyijtë'ëkäämpy yë tsaatsetsy mëti'ipë kënu'kxy yajnajxtëpën.

³Ets ya'atë kajpn y'ëna'ana'any: Ka'ap nmëët'ajtëm yajkutujkpë jä'ä ko ka'ap të nwinkutsë'këmë yë Wintsën. E ¿tii jëtää tu'uk yajkutujkpë tyimtuumpy?

⁴Je'eyë tyäty myëtyä'äky, je'eyë winë t'ëwaanë ets twinkäätsë noky; ko ënät yë nipaye'eyën tuny jëtu'un yajjawë xwätën mëti'ipë ujtsjoty yoonpën.

⁵Tsë'ëkëtyëp yë Samaria ja'ayëty; mëët ko të jyijtë'ëky ja y'awinaxëty mëti'ipë këxë'kpën tsajpkaa u'unkën, Bet-avén yajtijyën. Yë'ë nyijëëy nyiyaxtëp yë naax kajpn ets teetytyëjkëty, jä'ä ko tëë ja myëj'ajt y'oyajtën tyëkoy.

⁶Tääpë awinax jam Asiria yajmënëjkxa'any ets yajtukë'ëtëkëja'any yë yajkutujkpë. Jëtu'un nëjkx yë Efraín wyi'imy tsëtyu'unmëët: Yë Israel wintsëtyu'un jëjptsëtyu'un nëjkx nyäjyawëty mëët ko ënäty ja y'awinax të tyukjijtëtyä'äy.

⁷Jëtu'un yë Samaria yajkutujkpë jyata'any tä tu'uk yë kepyxya'k wyinjë'ëtyën nëëwiinkëjxy.

⁸Kutëkooytya'ajaanp yë awinax yë tsyajptëjk ma Israel ja'ay ijty pyokytyuntën. Jam ma y'awinaxëtyën äpny ets aay ujts nëjkx jam yony ets nëjkx yë ja'ay yë'ëpaat tjatsoktë ets jeexyë y'ujts nyiyoontëkoytyë ets nëjkxëp jya'ëna'antë ets jeexyë kopk nyija'awpätëtë.

⁹Jëtu'un yë Wintsën y'ënä'äny: Yë Israel ninu'un pyoky tka'ëxmatsy, tyajtso'ontäky jam Guibeá. Ni'ikyë pyokytyuun'ëtë'ëtsy. Paatykyëjxm yë tsip pyaata'anëtë yë ëxëëkja'aytyëjk jampë yajpaatën Guibeá.

¹⁰Ntëytyunäämpyës ya'atë kajpn jëna'a ënäty ja njot nwinma'anyës tyim'ëna'anyën. Nëjkxëp yë naax kajpn tyukmukyë koos ënäty ntukumëtoy ja y'ëxëëktu'un y'ëxëëk kajpxën.

¹¹Yë Efraín jëtu'un ijty tä tu'uk yë tsajpkaajën yujypyë mëti'ipë wyinte'empyën yë tsajpmok. Tëës tu'uk yë kepy ntukyo'kapë ma ja yo'knën oypyë tsujpë, mëti'ipë tsajpkaa myëyuupyën ets tpajëtutëty yë kepy wintëkäämpë; e yë Judá yë'ë pyajëtutäämpy mëti'ipë naaxtajpën ets Jacob mëti'ipë naaxwo'kpën.

¹²Tëë n'ënëëmëtës: Yë'ë oypyë nipaye'eyën ni'iptë ets xyajmuktëty yë nätsyok näjyawë. Nipëjktaakëtë yë naax ets xynyi'iptëty jemypyë tëëmt, jä'ä ko yë'ë nyixëëw'ajtyp ets Wintsën yaj'ijxta'ajëty, koonëm tyajminëty ja nitsokën ma miitsëtyën tä nëë tuujën.

¹³Miitsëty yë'ë ëxëëkpë të xynyiyu'ujëtë, yë'ë të xyajmuktë tëkatsypë nipaye'eyën ka'apë myëtëyëtyën ets ëxëëk të xymyëjatë ko mwin'ëëntë. Ko të xytyuk'ijxpätë ja mpujxn wintëkäämpë mëti'ipë yajmëtsiptuunpën ets ko të xytyuk'ijxpety ja mtsiptuunpëtëjk,

¹⁴nëjkxëp ja'ay nyänyipëtë'ëkyë ma mnaax mkajpnën ets tëkokyë ja mnaax mkajpn mëti'ipë ënäty ta'tspëky ets këwent'aty mëët'ajtypyën nëjkxëp kyutëkooytya'atë, jëtu'un tä ojts kyutëkoyën ja kyutujkën ja Bet-arbel mëti'ipë jam Salmán ënä'ämpën ko ojts ja tsip y'ity ets ko ojts ja taak y'ooky tyëkoy mëët ja y'u'unk.

¹⁵Näyjyëtu'un miitsëty mjata'antë, jënu'un jam Betel mtsëënëtën, ko ëxëëk winë të xytyuntë. Ookaanp yë Israel yajkutujkpë ko xëëw pyëtsëmëty.