Read Biblia Mixe de Quetzaltepec Oseas 11 Bible Online

Oseas 11 - Biblia Mixe de Quetzaltepec bible

Oseas 11

¹Ko yë Israel kajpn ënäty pyi'k'atynyëm, ntsojkpy nja'apës ijty; yë'ëkyëjxm ko ënäty n'u'unk'atyës, ojtsës nyaxtsoy ets tsyoonëty jap Egiptë.

²Koos nyaxtsoy, ni'ikyës xymyëjëkämke'eky. Yë'ë ja wyintsë'kën myoopy ja wiink tios ets ijty twinno'oky twinxamy yë awinax.

³E oyës njanijawë ko jëtu'un y'ëtë'ëtstë ojtsës yë Efraín kajpn ntu'uwinwoy etsës ntukni''ijxëy wi'ix ye'eyëtyën; e yë'ëjëty ka'ap twinja'awëtyë ko ëjts ënäty nkëwent'ajtëpës.

⁴Mëët ja tsojkën ja'awën nyajmiintës maas ëjtsën; jëtu'unës ojts ntseeny nkony tä tu'uk mëxu'unkën mëti'ipë tsi'tspnëmën; ojtsës n'amëtunëtë ets nyajkay nyaj'uuktë,

⁵e yë'ëjëty ka'apës të xynyimina'antë. Paatykyëjxm jatëkok jap Egiptë wyimpita'antë ets Asiria ja'ay ënä'ämanëtëp.

⁶Tunanëp yë tsip ma nyaax kyajpnëtyën ets kyutëkoyä'äny mëti'ipë ta'tspëky ets këwent'atyën, mëët ko ënäty ëxëëkëty të myäy të tyajtë.

⁷Jëkämës yë nkajpn tyimnäyyaj'ityë; nëyax yujkyaxtëp je'eyë ets ni pën tkamëtoy.

⁸¿Wi'ix n'ëk'ëxmatsëty mijts Efraín? ¿Wi'ix n'ëkmajtstu'utëty mijts Israel? ¿Jyëkyäpëp jëtää nyajkutëkoyëty tääjës ojts nyajkutëkoyën yë Admá kajpnën, ëkë tääjës nyajkutëkooyën yë Seboím kajpnë? Je'eyës nmëkxejy n'o'kxejy, ko njapa'ëyoy.

⁹Ka'apës jëtu'un tii ntimtyuna'any ijxtëmës yë n'äkë xyayajmay xyayajtajyën: Ka'apës yë Efraín n'ëkyajkutëkoyanë, jä'ä ko Tiosës, ka'ap nyaaxwiinyëtë ja'ayëty. Ëjts wa'atsës nyajpaaty itkujky ma mijtsën ets ka'apës yë'ëjëty të niminyës ets nyajkutëkoyä'äny.

¹⁰Yë'ëjëty pyajnëjkxantëp yë Wintsën ets Wintsën tä kaajën myu'uja'any. Mu'ujaanp ets nimina'any matsow yë xëëw pyëtsimyën mëti'ipë jyä'ä'ajtypyën.

¹¹Tä joonën tsyoona'antë jap Egiptë ets myina'antë maas ëjtsën mëët ja; tä pakën tsyona'antë jam Asiria; ets nyajtsëënëja'antës jatëkok ma jyëën tyëjkëtyën. Ëjts, mëti'ipë Wintsën'ajtpën, ëjts yam jëtu'un ënaanpës.

¹²Yë Efraín je'eyës xywin'ëëny; je'eyë y'antä'äky yë Israel kajpn maas ëjtsën. Yë Judá ja'ayëty tëë jyëwa'knëtë maas ëjtsën, tyam yë'ë oy myëtuunëp yë awinax.